૧-૭. પટિચ્ચવારાદિ

હેતુપચ્ચયો

૩૦. કુસલં કિલેસવિપ્પયુત્તં સંકિલેસિકં ધમ્મં પટિચ્ચ કુસલો કિલેસવિપ્પયુત્તો સંકિલેસિકો ધમ્મો ઉપ્પજ્જતિ હેતુપચ્ચયા. કુસલં કિલેસવિપ્પયુત્તં સંકિલેસિકં ધમ્મં પટિચ્ચ અબ્યાકતો કિલેસવિપ્પયુત્તો સંકિલેસિકો ધમ્મો ઉપ્પજ્જતિ હેતુપચ્ચયા. કુસલં કિલેસવિપ્પયુત્તં સંકિલેસિકં ધમ્મં પટિચ્ચ કુસલો કિલેસવિપ્પયુત્તો સંકિલેસિકો ચ અબ્યાકતો કિલેસવિપ્પયુત્તો સંકિલેસિકો ચ ધમ્મા ઉપ્પજ્જન્તિ હેતુપચ્ચયા. (૩)

અબ્યાકતં કિલેસવિપ્પયુત્તં સંકિલેસિકં ધમ્મં પટિચ્ચ અબ્યાકતો કિલેસવિપ્પયુત્તો સંકિલેસિકો ધમ્મો ઉપ્પજ્જતિ હેતુપચ્ચયા. (૧)

કુસલં કિલેસવિપ્પયુત્તં સંકિલેસિકઞ્ચ અબ્યાકતં કિલેસવિપ્પયુત્તં સંકિલેસિકઞ્ચ ધમ્મં પટિચ્ચ અબ્યાકતો કિલેસવિપ્પયુત્તો સંકિલેસિકો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૩૧. હેતુયા પઞ્ચ, આરમ્મણે દ્વે…પે… અવિગતે પઞ્ચ (સંખિત્તં. સહજાતવારમ્પિ…પે… સમ્પયુત્તવારમ્પિ પટિચ્ચવારસદિસં).

૩૨. કુસલો કિલેસવિપ્પયુત્તો સંકિલેસિકો ધમ્મો કુસલસ્સ કિલેસવિપ્પયુત્તસ્સ સંકિલેસિકસ્સ ધમ્મસ્સ હેતુપચ્ચયેન પચ્ચયો… તીણિ.

અબ્યાકતો કિલેસવિપ્પયુત્તો સંકિલેસિકો ધમ્મો અબ્યાકતસ્સ કિલેસવિપ્પયુત્તસ્સ સંકિલેસિકસ્સ ધમ્મસ્સ હેતુપચ્ચયેન પચ્ચયો. (૧) (સંખિત્તં.)

૩૩. હેતુયા ચત્તારિ, આરમ્મણે ચત્તારિ…પે… અવિગતે સત્ત (સંખિત્તં. યથા કુસલત્તિકે પઞ્હાવારં, એવં વિત્થારેતબ્બં).

૩૪. કુસલં કિલેસવિપ્પયુત્તં અસંકિલેસિકં ધમ્મં પટિચ્ચ કુસલો કિલેસવિપ્પયુત્તો અસંકિલેસિકો ધમ્મો ઉપ્પજ્જતિ હેતુપચ્ચયા.

અબ્યાકતં કિલેસવિપ્પયુત્તં અસંકિલેસિકં ધમ્મં પટિચ્ચ અબ્યાકતો કિલેસવિપ્પયુત્તો અસંકિલેસિકો ધમ્મો ઉપ્પજ્જતિ હેતુપચ્ચયા.

હેતુયા દ્વે…પે… અવિગતે દ્વે (સંખિત્તં. સહજાતવારમ્પિ …પે… સમ્પયુત્તવારમ્પિ પટિચ્ચવારસદિસં).

૩૫. કુસલો કિલેસવિપ્પયુત્તો અસંકિલેસિકો ધમ્મો કુસલસ્સ કિલેસવિપ્પયુત્તસ્સ અસંકિલેસિકસ્સ ધમ્મસ્સ હેતુપચ્ચયેન પચ્ચયો. (૧)

અબ્યાકતો કિલેસવિપ્પયુત્તો અસંકિલેસિકો ધમ્મો અબ્યાકતસ્સ કિલેસવિપ્પયુત્તસ્સ અસંકિલેસિકસ્સ ધમ્મસ્સ હેતુપચ્ચયેન પચ્ચયો. (૧) (સંખિત્તં.)

૩૬. હેતુયા દ્વે, આરમ્મણે દ્વે, અધિપતિયા તીણિ, અનન્તરે દ્વે…પે… ઉપનિસ્સયે ચત્તારિ…પે… અવિગતે દ્વે (સંખિત્તં. યથા કુસલત્તિકે પઞ્હાવારં, એવં વિત્થારેતબ્બં).

કુસલત્તિકકિલેસગોચ્છકં નિટ્ઠિતં.