૧-૭. પટિચ્ચવારાદિ

પચ્ચયચતુક્કં

હેતુપચ્ચયો

૧૦. ઉપાદાનિયં કુસલં ધમ્મં પટિચ્ચ ઉપાદાનિયો કુસલો ધમ્મો ઉપ્પજ્જતિ હેતુપચ્ચયા. (૧)

અનુપાદાનિયં કુસલં ધમ્મં પટિચ્ચ અનુપાદાનિયો કુસલો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૧૧. હેતુયા દ્વે, આરમ્મણે દ્વે…પે… અવિગતે દ્વે (સંખિત્તં. લોકિયલોકુત્તરદુકકુસલસદિસં. સહજાતવારમ્પિ…પે… પઞ્હાવારમ્પિ વિત્થારેતબ્બં.)

૧૨. ઉપાદાનિયં અકુસલં ધમ્મં પટિચ્ચ ઉપાદાનિયો અકુસલો ધમ્મો ઉપ્પજ્જતિ હેતુપચ્ચયા (સંખિત્તં).

હેતુયા એકં, આરમ્મણે એકં…પે… અવિગતે એકં (સંખિત્તં).

(સહજાતવારેપિ…પે… પઞ્હાવારેપિ સબ્બત્થ એકં.)

૧૩. ઉપાદાનિયં અબ્યાકતં ધમ્મં પટિચ્ચ ઉપાદાનિયો અબ્યાકતો ધમ્મો ઉપ્પજ્જતિ હેતુપચ્ચયા. (૧)

અનુપાદાનિયં અબ્યાકતં ધમ્મં પટિચ્ચ અનુપાદાનિયો અબ્યાકતો ધમ્મો ઉપ્પજ્જતિ હેતુપચ્ચયા. અનુપાદાનિયં અબ્યાકતં ધમ્મં પટિચ્ચ ઉપાદાનિયો અબ્યાકતો ધમ્મો ઉપ્પજ્જતિ હેતુપચ્ચયા. અનુપાદાનિયં અબ્યાકતં ધમ્મં પટિચ્ચ ઉપાદાનિયો અબ્યાકતો ચ અનુપાદાનિયો અબ્યાકતો ચ ધમ્મા ઉપ્પજ્જન્તિ હેતુપચ્ચયા. (૩)

ઉપાદાનિયં અબ્યાકતઞ્ચ અનુપાદાનિયં અબ્યાકતઞ્ચ ધમ્મં પટિચ્ચ ઉપાદાનિયો અબ્યાકતો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૧૪. હેતુયા પઞ્ચ, આરમ્મણે દ્વે…પે… આસેવને એકં…પે… અવિગતે પઞ્ચ (સંખિત્તં. લોકિયદુકઅબ્યાકતસદિસં. સહજાતવારમ્પિ…પે… પઞ્હાવારમ્પિ વિત્થારેતબ્બં).