૧-૭. પટિચ્ચવારાદિ

પચ્ચયચતુક્કં

હેતુપચ્ચયો

૯. ચિત્તં કુસલં ધમ્મં પટિચ્ચ નોચિત્તો કુસલો ધમ્મો ઉપ્પજ્જતિ હેતુપચ્ચયા. (૧)

નોચિત્તં કુસલં ધમ્મં પટિચ્ચ નોચિત્તો કુસલો ધમ્મો ઉપ્પજ્જતિ હેતુપચ્ચયા. નોચિત્તં કુસલં ધમ્મં પટિચ્ચ ચિત્તો કુસલો ધમ્મો ઉપ્પજ્જતિ હેતુપચ્ચયા. નોચિત્તં કુસલં ધમ્મં પટિચ્ચ ચિત્તો કુસલો ચ નોચિત્તો કુસલો ચ ધમ્મા ઉપ્પજ્જન્તિ હેતુપચ્ચયા. (૩)

ચિત્તં કુસલઞ્ચ નોચિત્તં કુસલઞ્ચ ધમ્મં પટિચ્ચ નોચિત્તો કુસલો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૧૦. હેતુયા પઞ્ચ, આરમ્મણે પઞ્ચ (સબ્બત્થ પઞ્ચ), અવિગતે પઞ્ચ (સંખિત્તં).

નઅધિપતિયા પઞ્ચ, નપુરેજાતે પઞ્ચ, નપચ્છાજાતે પઞ્ચ, નઆસેવને પઞ્ચ, નકમ્મે તીણિ, નવિપાકે પઞ્ચ, નવિપ્પયુત્તે પઞ્ચ (સંખિત્તં).

(સહજાતવારમ્પિ…પે… સમ્પયુત્તવારમ્પિ વિત્થારેતબ્બં.)

૧૧. નોચિત્તો કુસલો ધમ્મો નોચિત્તસ્સ કુસલસ્સ ધમ્મસ્સ હેતુપચ્ચયેન પચ્ચયો. નોચિત્તો કુસલો ધમ્મો ચિત્તસ્સ કુસલસ્સ ધમ્મસ્સ હેતુપચ્ચયેન પચ્ચયો. નોચિત્તો કુસલો ધમ્મો ચિત્તસ્સ કુસલસ્સ ચ નોચિત્તસ્સ કુસલસ્સ ચ ધમ્મસ્સ હેતુપચ્ચયેન પચ્ચયો. (૩) (સંખિત્તં.)

૧૨. હેતુયા તીણિ, આરમ્મણે નવ, અધિપતિયા નવ, અનન્તરે નવ…પે… સહજાતે અઞ્ઞમઞ્ઞે નિસ્સયે પઞ્ચ, ઉપનિસ્સયે આસેવને નવ, કમ્મે તીણિ, આહારે ઇન્દ્રિયે પઞ્ચ, ઝાને મગ્ગે તીણિ, સમ્પયુત્તે પઞ્ચ…પે… અવિગતે પઞ્ચ (સંખિત્તં).

નહેતુયા નવ, નઆરમ્મણે નવ (સંખિત્તં).

હેતુપચ્ચયા નઆરમ્મણે તીણિ (સંખિત્તં).

નહેતુપચ્ચયા આરમ્મણે નવ (સંખિત્તં).

(યથા કુસલત્તિકે પઞ્હાવારસ્સ અનુલોમમ્પિ પચ્ચનીયમ્પિ અનુલોમપચ્ચનીયમ્પિ પચ્ચનીયાનુલોમમ્પિ ગણિતં, એવં ગણેતબ્બં.)

૧૩. ચિત્તં અકુસલં ધમ્મં પટિચ્ચ નોચિત્તો અકુસલો ધમ્મો ઉપ્પજ્જતિ હેતુપચ્ચયા. (૧)

નોચિત્તં અકુસલં ધમ્મં પટિચ્ચ નોચિત્તો અકુસલો ધમ્મો ઉપ્પજ્જતિ હેતુપચ્ચયા. નોચિત્તં અકુસલં ધમ્મં પટિચ્ચ ચિત્તો અકુસલો ધમ્મો ઉપ્પજ્જતિ હેતુપચ્ચયા. નોચિત્તં અકુસલં ધમ્મં પટિચ્ચ ચિત્તો અકુસલો ચ નોચિત્તો અકુસલો ચ ધમ્મા ઉપ્પજ્જન્તિ હેતુપચ્ચયા. (૩)

ચિત્તં અકુસલઞ્ચ નોચિત્તં અકુસલઞ્ચ ધમ્મં પટિચ્ચ નોચિત્તો અકુસલો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૧૪. હેતુયા પઞ્ચ, આરમ્મણે પઞ્ચ…પે… અવિગતે પઞ્ચ. (સંખિત્તં. ચિત્તદુકકુસલસદિસં, નહેતુયાપિ કત્તબ્બં. સહજાતવારમ્પિ…પે… પઞ્હાવારમ્પિ કાતબ્બં).

૧૫. ચિત્તં અબ્યાકતં ધમ્મં પટિચ્ચ નોચિત્તો અબ્યાકતો ધમ્મો ઉપ્પજ્જતિ હેતુપચ્ચયા. (૧)

નોચિત્તં અબ્યાકતં ધમ્મં પટિચ્ચ નોચિત્તો અબ્યાકતો ધમ્મો ઉપ્પજ્જતિ હેતુપચ્ચયા. નોચિત્તં અબ્યાકતં ધમ્મં પટિચ્ચ ચિત્તો અબ્યાકતો ધમ્મો ઉપ્પજ્જતિ હેતુપચ્ચયા. નોચિત્તં અબ્યાકતં ધમ્મં પટિચ્ચ ચિત્તો અબ્યાકતો ચ નોચિત્તો અબ્યાકતો ચ ધમ્મા ઉપ્પજ્જન્તિ હેતુપચ્ચયા. (૩)

ચિત્તં અબ્યાકતઞ્ચ નોચિત્તં અબ્યાકતઞ્ચ ધમ્મં પટિચ્ચ નોચિત્તો અબ્યાકતો ધમ્મો ઉપ્પજ્જતિ હેતુપચ્ચયા. (૧) (સંખિત્તં.)

૧૬. હેતુયા પઞ્ચ, આરમ્મણે પઞ્ચ…પે… વિપાકે પઞ્ચ…પે… અવિગતે પઞ્ચ (સંખિત્તં).

નહેતુયા પઞ્ચ, નઆરમ્મણે તીણિ, નઅધિપતિયા પઞ્ચ…પે… નપુરેજાતે નપચ્છાજાતે નઆસેવને પઞ્ચ, નકમ્મે તીણિ, નવિપાકે પઞ્ચ, નઆહારે એકં, નઇન્દ્રિયે એકં, નઝાને પઞ્ચ, નમગ્ગે પઞ્ચ, નસમ્પયુત્તે તીણિ, નવિપ્પયુત્તે પઞ્ચ…પે… નોવિગતે તીણિ (સંખિત્તં).

(સહજાતવારમ્પિ…પે… સમ્પયુત્તવારમ્પિ વિત્થારેતબ્બં.)

૧૭. નોચિત્તો અબ્યાકતો ધમ્મો નોચિત્તસ્સ અબ્યાકતસ્સ ધમ્મસ્સ હેતુપચ્ચયેન પચ્ચયો… તીણિ (ચિત્તદુકકુસલસદિસં વિત્થારેતબ્બં).

૧૮. હેતુયા તીણિ, આરમ્મણે નવ, અધિપતિયા નવ, અનન્તરે નવ…પે… સહજાતે પઞ્ચ, પુરેજાતે તીણિ, આસેવને નવ, કમ્મે તીણિ, વિપાકે પઞ્ચ, વિપ્પયુત્તે પઞ્ચ, અત્થિયા પઞ્ચ, નત્થિયા નવ…પે… અવિગતે પઞ્ચ (સંખિત્તં).