૧. વિભઙ્ગવારો

હેતુપચ્ચયો

૧૦૦. સઞ્ઞોજનઞ્ચેવ સઞ્ઞોજનસમ્પયુત્તઞ્ચ ધમ્મં પટિચ્ચ સઞ્ઞોજનો ચેવ સઞ્ઞોજનસમ્પયુત્તો ચ ધમ્મો ઉપ્પજ્જતિ હેતુપચ્ચયા – કામરાગસઞ્ઞોજનં પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં (ચક્કં). (૧)

સઞ્ઞોજનઞ્ચેવ સઞ્ઞોજનસમ્પયુત્તઞ્ચ ધમ્મં પટિચ્ચ સઞ્ઞોજનસમ્પયુત્તો ચેવ નો ચ સઞ્ઞોજનો ધમ્મો ઉપ્પજ્જતિ હેતુપચ્ચયા – સઞ્ઞોજને પટિચ્ચ સમ્પયુત્તકા ખન્ધા. (૨)

સઞ્ઞોજનઞ્ચેવ સઞ્ઞોજનસમ્પયુત્તઞ્ચ ધમ્મં પટિચ્ચ સઞ્ઞોજનો ચેવ સઞ્ઞોજનસમ્પયુત્તો ચ સઞ્ઞોજનસમ્પયુત્તો ચેવ નો ચ સઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – કામરાગસઞ્ઞોજનં પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં સમ્પયુત્તકા ચ ખન્ધા (ચક્કં). (૩)

૧૦૧. સઞ્ઞોજનસમ્પયુત્તઞ્ચેવ નો ચ સઞ્ઞોજનં ધમ્મં પટિચ્ચ સઞ્ઞોજનસમ્પયુત્તો ચેવ નો ચ સઞ્ઞોજનો ધમ્મો ઉપ્પજ્જતિ હેતુપચ્ચયા – સઞ્ઞોજનસમ્પયુત્તઞ્ચેવ નો ચ સઞ્ઞોજનં એકં ખન્ધં પટિચ્ચ તયો ખન્ધા…પે… દ્વે ખન્ધે…પે…. (૧)

સઞ્ઞોજનસમ્પયુત્તઞ્ચેવ નો ચ સઞ્ઞોજનં ધમ્મં પટિચ્ચ સઞ્ઞોજનો ચેવ સઞ્ઞોજનસમ્પયુત્તો ચ ધમ્મો ઉપ્પજ્જતિ હેતુપચ્ચયા – સઞ્ઞોજનસમ્પયુત્તે ચેવ નો ચ સઞ્ઞોજને ખન્ધે પટિચ્ચ સઞ્ઞોજના (૨)

સઞ્ઞોજનસમ્પયુત્તઞ્ચેવ નો ચ સઞ્ઞોજનં ધમ્મં પટિચ્ચ સઞ્ઞોજનો ચેવ સઞ્ઞોજનસમ્પયુત્તો ચ સઞ્ઞોજનસમ્પયુત્તો ચેવ નો ચ સઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – સઞ્ઞોજનસમ્પયુત્તઞ્ચેવ નો ચ સઞ્ઞોજનં એકં ખન્ધં પટિચ્ચ તયો ખન્ધા સઞ્ઞોજના ચ…પે… દ્વે ખન્ધે…પે…. (૩)

૧૦૨. સઞ્ઞોજનઞ્ચેવ સઞ્ઞોજનસમ્પયુત્તઞ્ચ સઞ્ઞોજનસમ્પયુત્તઞ્ચેવ નો ચ સઞ્ઞોજનઞ્ચ ધમ્મં પટિચ્ચ સઞ્ઞોજનો ચેવ સઞ્ઞોજનસમ્પયુત્તો ચ ધમ્મો ઉપ્પજ્જતિ હેતુપચ્ચયા – કામરાગસઞ્ઞોજનઞ્ચ સમ્પયુત્તકે ચ ખન્ધે પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં (ચક્કં). (૧)

સઞ્ઞોજનઞ્ચેવ સઞ્ઞોજનસમ્પયુત્તઞ્ચ સઞ્ઞોજનસમ્પયુત્તઞ્ચેવ નો ચ સઞ્ઞોજનઞ્ચ ધમ્મં પટિચ્ચ સઞ્ઞોજનસમ્પયુત્તો ચેવ નો ચ સઞ્ઞોજનો ધમ્મો ઉપ્પજ્જતિ હેતુપચ્ચયા – સઞ્ઞોજનસમ્પયુત્તઞ્ચેવ નો ચ સઞ્ઞોજનં એકં ખન્ધઞ્ચ સઞ્ઞોજને ચ પટિચ્ચ તયો ખન્ધા…પે… દ્વે ખન્ધે ચ…પે…. (૨)

સઞ્ઞોજનઞ્ચેવ સઞ્ઞોજનસમ્પયુત્તઞ્ચ સઞ્ઞોજનસમ્પયુત્તઞ્ચેવ નો ચ સઞ્ઞોજનઞ્ચ ધમ્મં પટિચ્ચ સઞ્ઞોજનો ચેવ સઞ્ઞોજનસમ્પયુત્તો ચ સઞ્ઞોજનસમ્પયુત્તો ચેવ નો ચ સઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – સઞ્ઞોજનસમ્પયુત્તઞ્ચેવ નો ચ સઞ્ઞોજનં એકં ખન્ધઞ્ચ કામરાગસઞ્ઞોજનઞ્ચ પટિચ્ચ તયો ખન્ધા દિટ્ઠિસઞ્ઞોજનં અવિજ્જાસઞ્ઞોજનં…પે… દ્વે ખન્ધે ચ…પે… (ચક્કં). (૩)