૧. વિભઙ્ગવારો

હેતુપચ્ચયો

૯૭. સઞ્ઞોજનઞ્ચેવ સઞ્ઞોજનિયઞ્ચ ધમ્મં પટિચ્ચ સઞ્ઞોજનો ચેવ સઞ્ઞોજનિયો ચ ધમ્મા ઉપ્પજ્જન્તિ હેતુપચ્ચયા – કામરાગસઞ્ઞોજનં પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં (ચક્કં). (૧)

સઞ્ઞોજનઞ્ચેવ સઞ્ઞોજનિયઞ્ચ ધમ્મં પટિચ્ચ સઞ્ઞોજનિયો ચેવ નો ચ સઞ્ઞોજનો ધમ્મો ઉપ્પજ્જતિ હેતુપચ્ચયા – સઞ્ઞોજને પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં. (૨)

સઞ્ઞોજનઞ્ચેવ સઞ્ઞોજનિયઞ્ચ ધમ્મં પટિચ્ચ સઞ્ઞોજનો ચેવ સઞ્ઞોજનિયો ચ સઞ્ઞોજનિયો ચેવ નો ચ સઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – કામરાગસઞ્ઞોજનં પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં સમ્પયુત્તકા ખન્ધા ચિત્તસમુટ્ઠાનઞ્ચ રૂપં (ચક્કં). (૩)

૯૮. સઞ્ઞોજનિયઞ્ચેવ નો ચ સઞ્ઞોજનં ધમ્મં પટિચ્ચ સઞ્ઞોજનિયો ચેવ નો ચ સઞ્ઞોજનો ધમ્મો ઉપ્પજ્જતિ હેતુપચ્ચયા – સઞ્ઞોજનિયઞ્ચેવ નો ચ સઞ્ઞોજનં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… (યાવ મહાભૂતા). (૧)

સઞ્ઞોજનિયઞ્ચેવ નો ચ સઞ્ઞોજનં ધમ્મં પટિચ્ચ સઞ્ઞોજનો ચેવ સઞ્ઞોજનિયો ચ ધમ્મો ઉપ્પજ્જતિ હેતુપચ્ચયા – સઞ્ઞોજનિયે ચેવ નો ચ સઞ્ઞોજને ખન્ધે પટિચ્ચ સઞ્ઞોજના. (૨)

સઞ્ઞોજનિયઞ્ચેવ નો ચ સઞ્ઞોજનં ધમ્મં પટિચ્ચ સઞ્ઞોજનો ચેવ સઞ્ઞોજનિયો ચ સઞ્ઞોજનિયો ચેવ નો ચ સઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – સઞ્ઞોજનિયઞ્ચેવ નો ચ સઞ્ઞોજનં એકં ખન્ધં પટિચ્ચ તયો ખન્ધા સઞ્ઞોજના ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે…. (૩)

૯૯. સઞ્ઞોજનઞ્ચેવ સઞ્ઞોજનિયઞ્ચ સઞ્ઞોજનિયઞ્ચેવ નો ચ સઞ્ઞોજનં ધમ્મં પટિચ્ચ સઞ્ઞોજનો ચેવ સઞ્ઞોજનિયો ચ ધમ્મો ઉપ્પજ્જતિ હેતુપચ્ચયા – કામરાગસઞ્ઞોજનઞ્ચ સમ્પયુત્તકે ચ ખન્ધે પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં (ચક્કં). (૧)

સઞ્ઞોજનઞ્ચેવ સઞ્ઞોજનિયઞ્ચ સઞ્ઞોજનિયઞ્ચેવ નો ચ સઞ્ઞોજનઞ્ચ ધમ્મં પટિચ્ચ સઞ્ઞોજનિયો ચેવ નો ચ સઞ્ઞોજનો ધમ્મો ઉપ્પજ્જતિ હેતુપચ્ચયા – સઞ્ઞોજનિયઞ્ચેવ નો ચ સઞ્ઞોજનં એકં ખન્ધઞ્ચ સઞ્ઞોજને ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે…. (૨)

સઞ્ઞોજનઞ્ચેવ સઞ્ઞોજનિયઞ્ચ સઞ્ઞોજનિયઞ્ચેવ નો ચ સઞ્ઞોજનઞ્ચ ધમ્મં પટિચ્ચ સઞ્ઞોજનો ચેવ સઞ્ઞોજનિયો ચ સઞ્ઞોજનિયો ચેવ નો ચ સઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – સઞ્ઞોજનિયઞ્ચેવ નો ચ સઞ્ઞોજનં એકં ખન્ધઞ્ચ કામરાગસઞ્ઞોજનઞ્ચ પટિચ્ચ તયો ખન્ધા દિટ્ઠિસઞ્ઞોજનં અવિજ્જાસઞ્ઞોજનં ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે… (ચક્કં બન્ધિતબ્બં). (૩)

(સઞ્ઞોજનગોચ્છકે પઠમદુકસદિસં.)

(એવં ઇમમ્પિ દુકં વિત્થારેતબ્બં, નિન્નાનાકરણં ઠપેત્વા લોકુત્તરં).

સઞ્ઞોજનસઞ્ઞોજનિયદુકં નિટ્ઠિતં.