૧. વિભઙ્ગવારો

હેતુપચ્ચયો

૧. સઞ્ઞોજનં ધમ્મં પટિચ્ચ સઞ્ઞોજનો ધમ્મો ઉપ્પજ્જતિ હેતુપચ્ચયા – કામરાગસઞ્ઞોજનં પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં, કામરાગસઞ્ઞોજનં પટિચ્ચ સીલબ્બતપરામાસસઞ્ઞોજનં અવિજ્જાસઞ્ઞોજનં, કામરાગસઞ્ઞોજનં પટિચ્ચ માનસઞ્ઞોજનં અવિજ્જાસઞ્ઞોજનં, કામરાગસઞ્ઞોજનં પટિચ્ચ અવિજ્જાસઞ્ઞોજનં, પટિઘસઞ્ઞોજનં પટિચ્ચ ઇસ્સાસઞ્ઞોજનં અવિજ્જાસઞ્ઞોજનં, પટિઘસઞ્ઞોજનં પટિચ્ચ મચ્છરિયસઞ્ઞોજનં અવિજ્જાસઞ્ઞોજનં, પટિઘસઞ્ઞોજનં પટિચ્ચ અવિજ્જાસઞ્ઞોજનં, માનસઞ્ઞોજનં પટિચ્ચ ભવરાગસઞ્ઞોજનં અવિજ્જાસઞ્ઞોજનં, ભવરાગસઞ્ઞોજનં પટિચ્ચ અવિજ્જાસઞ્ઞોજનં, વિચિકિચ્છાસઞ્ઞોજનં પટિચ્ચ અવિજ્જાસઞ્ઞોજનં. (૧)

સઞ્ઞોજનં ધમ્મં પટિચ્ચ નોસઞ્ઞોજનો ધમ્મો ઉપ્પજ્જતિ હેતુપચ્ચયા – સઞ્ઞોજને પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં. (૨)

સઞ્ઞોજનં ધમ્મં પટિચ્ચ સઞ્ઞોજનો ચ નોસઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – કામરાગસઞ્ઞોજનં પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં સમ્પયુત્તકા ચ ખન્ધા ચિત્તસમુટ્ઠાનઞ્ચ રૂપં (ચક્કં બન્ધિતબ્બં). (૩)

૨. નોસઞ્ઞોજનં ધમ્મં પટિચ્ચ નોસઞ્ઞોજનો ધમ્મો ઉપ્પજ્જતિ હેતુપચ્ચયા – નોસઞ્ઞોજનં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા, એકં મહાભૂતં…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં. (૧)

નોસઞ્ઞોજનં ધમ્મં પટિચ્ચ સઞ્ઞોજનો ધમ્મો ઉપ્પજ્જતિ હેતુપચ્ચયા – નોસઞ્ઞોજને ખન્ધે પટિચ્ચ સઞ્ઞોજના. (૨)

નોસઞ્ઞોજનં ધમ્મં પટિચ્ચ સઞ્ઞોજનો ચ નોસઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – નોસઞ્ઞોજનં એકં ખન્ધં પટિચ્ચ તયો ખન્ધા સઞ્ઞોજના ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે…. (૩)

૩. સઞ્ઞોજનઞ્ચ નોસઞ્ઞોજનઞ્ચ ધમ્મં પટિચ્ચ સઞ્ઞોજનો ધમ્મો ઉપ્પજ્જતિ હેતુપચ્ચયા – કામરાગસઞ્ઞોજનઞ્ચ સમ્પયુત્તકે ચ ખન્ધે પટિચ્ચ દિટ્ઠિસઞ્ઞોજનં અવિજ્જાસઞ્ઞોજનં (ચક્કં બન્ધિતબ્બં). (૧)

સઞ્ઞોજનઞ્ચ નોસઞ્ઞોજનઞ્ચ ધમ્મં પટિચ્ચ નોસઞ્ઞોજનો ધમ્મો ઉપ્પજ્જતિ હેતુપચ્ચયા – નોસઞ્ઞોજનં એકં ખન્ધઞ્ચ સઞ્ઞોજને ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે ચ…પે…. (૨)

સઞ્ઞોજનઞ્ચ નોસઞ્ઞોજનઞ્ચ ધમ્મં પટિચ્ચ સઞ્ઞોજનો ચ નોસઞ્ઞોજનો ચ ધમ્મા ઉપ્પજ્જન્તિ હેતુપચ્ચયા – નોસઞ્ઞોજનં એકં ખન્ધઞ્ચ કામરાગસઞ્ઞોજનઞ્ચ પટિચ્ચ તયો ખન્ધા દિટ્ઠિસઞ્ઞોજનં અવિજ્જાસઞ્ઞોજનં ચિત્તસમુટ્ઠાનઞ્ચ રૂપં…પે… (ચક્કં બન્ધિતબ્બં). (૩)

(આરમ્મણપચ્ચયે રૂપં નત્થિ. અધિપતિપચ્ચયો હેતુસદિસો, વિચિકિચ્છાસઞ્ઞોજનં નત્થિ.) અનન્તરપચ્ચયા…પે… અવિગતપચ્ચયા.