૧. વિભઙ્ગવારો

હેતુપચ્ચયો

૧૨૧. આસવો ચેવ આસવસમ્પયુત્તો ચ ધમ્મો આસવસ્સ ચેવ આસવસમ્પયુત્તસ્સ ચ ધમ્મસ્સ હેતુપચ્ચયેન પચ્ચયો… તીણિ.

આસવસમ્પયુત્તો ચેવ નો ચ આસવો ધમ્મો આસવસમ્પયુત્તસ્સ ચેવ નો ચ આસવસ્સ ધમ્મસ્સ હેતુપચ્ચયેન પચ્ચયો – આસવસમ્પયુત્તા ચેવ નો ચ આસવા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

આરમ્મણપચ્ચયાદિ

૧૨૨. આસવો ચેવ આસવસમ્પયુત્તો ચ ધમ્મો આસવસ્સ ચેવ આસવસમ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો… તીણિ.

આસવસમ્પયુત્તો ચેવ નો ચ આસવો ધમ્મો આસવસમ્પયુત્તસ્સ ચેવ નો ચ આસવસ્સ ધમ્મસ્સ આરમ્મણપચ્ચયેન પચ્ચયો – આસવસમ્પયુત્તે ચેવ નો ચ આસવે ખન્ધે આરબ્ભ આસવસમ્પયુત્તા ચેવ નો ચ આસવા ખન્ધા ઉપ્પજ્જન્તિ. (૧)

આસવસમ્પયુત્તો ચેવ નો ચ આસવો ધમ્મો આસવસ્સ ચેવ આસવસમ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો – આસવસમ્પયુત્તે ચેવ નો ચ આસવે ખન્ધે આરબ્ભ આસવા ઉપ્પજ્જન્તિ. (૨)

આસવસમ્પયુત્તો ચેવ નો ચ આસવો ધમ્મો આસવસ્સ ચેવ આસવસમ્પયુત્તસ્સ ચ આસવસમ્પયુત્તસ્સ ચેવ નો ચ આસવસ્સ ચ ધમ્મસ્સ આરમ્મણપચ્ચયેન પચ્ચયો – આસવસમ્પયુત્તે ચેવ નો ચ આસવે ખન્ધે આરબ્ભ આસવા ચ આસવસમ્પયુત્તકા ચ ખન્ધા ઉપ્પજ્જન્તિ. (૩)

આસવો ચેવ આસવસમ્પયુત્તો ચ આસવસમ્પયુત્તો ચેવ નો ચ આસવો ચ ધમ્મા આસવસ્સ ચેવ આસવસમ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો … તીણિ.

અધિપતિપચ્ચયા… (આરમ્મણસદિસા, ગરુકારમ્મણા) અનન્તરપચ્ચયા… (આરમ્મણસદિસાયેવ, પુરિમા પુરિમાતિ કાતબ્બા.) સમનન્તરપચ્ચયા… સહજાતપચ્ચયા… અઞ્ઞમઞ્ઞપચ્ચયા… નિસ્સયપચ્ચયા… ઉપનિસ્સયપચ્ચયા (આરમ્મણસદિસંયેવ, વિભજના નત્થિ… તીણિ. ઉપનિસ્સયં સબ્બં કાતબ્બં).

કમ્મપચ્ચયાદિ

૧૨૩. આસવસમ્પયુત્તો ચેવ નો ચ આસવો ધમ્મો આસવસમ્પયુત્તસ્સ ચેવ નો ચ આસવસ્સ ધમ્મસ્સ કમ્મપચ્ચયેન પચ્ચયો… તીણિ… આહારપચ્ચયેન પચ્ચયો… તીણિ… ઇન્દ્રિયપચ્ચયેન પચ્ચયો… તીણિ… ઝાનપચ્ચયેન પચ્ચયો… તીણિ… મગ્ગપચ્ચયેન પચ્ચયો… નવ… સમ્પયુત્તપચ્ચયેન પચ્ચયો… નવ… અત્થિપચ્ચયેન પચ્ચયો… નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો… નવ.