૧. વિભઙ્ગવારો

હેતુપચ્ચયો

૭૪. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ હેતુપચ્ચયેન પચ્ચયો – આસવસમ્પયુત્તા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ હેતુપચ્ચયેન પચ્ચયો – આસવસમ્પયુત્તા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો; દોસો મોહસ્સ ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ હેતુપચ્ચયેન પચ્ચયો – આસવસમ્પયુત્તા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; દોસો સમ્પયુત્તકાનં ખન્ધાનં મોહસ્સ ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૭૫. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ હેતુપચ્ચયેન પચ્ચયો – આસવવિપ્પયુત્તા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ હેતુપચ્ચયેન પચ્ચયો – દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં હેતુપચ્ચયેન પચ્ચયો. (૨)

આસવવિપ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ હેતુપચ્ચયેન પચ્ચયો – દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૭૬. આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ધમ્મસ્સ હેતુપચ્ચયેન પચ્ચયો – દોસો ચ મોહો ચ આસવસમ્પયુત્તકાનં ખન્ધાનં હેતુપચ્ચયેન પચ્ચયો. (૧)

આસવસમ્પયુત્તો ચ આસવવિપ્પયુત્તો ચ ધમ્મા આસવવિપ્પયુત્તસ્સ ધમ્મસ્સ હેતુપચ્ચયેન પચ્ચયો – દોસો ચ મોહો ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૨)

આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ હેતુપચ્ચયેન પચ્ચયો – દોસો ચ મોહો ચ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

આરમ્મણપચ્ચયો

૭૭. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – આસવસમ્પયુત્તે ખન્ધે આરબ્ભ આસવસમ્પયુત્તકા ખન્ધા ઉપ્પજ્જન્તિ. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો – આસવસમ્પયુત્તે ખન્ધે આરબ્ભ આસવવિપ્પયુત્તા ખન્ધા ચ મોહો ચ ઉપ્પજ્જન્તિ. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો – આસવસમ્પયુત્તે ખન્ધે આરબ્ભ દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. (૩)

૭૮. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં…પે… ઉપોસથકમ્મં કત્વા તં પચ્ચવેક્ખતિ; પુબ્બે સુચિણ્ણાનિ…પે… ઝાના…પે… અરિયા મગ્ગં…પે… ફલં…પે… નિબ્બાનં…પે… નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો; અરિયા આસવવિપ્પયુત્તે પહીને કિલેસે પચ્ચવેક્ખન્તિ; વિક્ખમ્ભિતે…પે… પુબ્બે…પે… ચક્ખું…પે… વત્થું આસવવિપ્પયુત્તે ખન્ધે અનિચ્ચતો દુક્ખતો અનત્તતો વિપસ્સતિ. (ઇધ અસ્સાદના નત્થિ) દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. ચેતોપરિયઞાણેન આસવવિપ્પયુત્તચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… આસવવિપ્પયુત્તા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય મોહસ્સ આરમ્મણપચ્ચયેન પચ્ચયો. (૧)

આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં…પે… ઉપોસથકમ્મં કત્વા તં અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ; પુબ્બે સુચિણ્ણાનિ…પે… ઝાના વુટ્ઠહિત્વા ઝાનં…પે… ચક્ખું…પે… વત્થું આસવવિપ્પયુત્તે ખન્ધે અસ્સાદેતિ અભિનન્દતિ, તં આરબ્ભ રાગો…પે… દિટ્ઠિ… દોમનસ્સં… વિચિકિચ્છા… ઉદ્ધચ્ચં ઉપ્પજ્જતિ. (૨)

આસવવિપ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો – ચક્ખું…પે… વત્થું આસવવિપ્પયુત્તે ખન્ધે આરબ્ભ દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. (૩)

૭૯. આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ આરબ્ભ આસવસમ્પયુત્તા ખન્ધા ઉપ્પજ્જન્તિ. (૧)

આસવસમ્પયુત્તો ચ આસવવિપ્પયુત્તો ચ ધમ્મા આસવવિપ્પયુત્તસ્સ ધમ્મસ્સ આરમ્મણપચ્ચયેન પચ્ચયો – દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ આરબ્ભ આસવવિપ્પયુત્તા ખન્ધા ચ મોહો ચ ઉપ્પજ્જન્તિ. (૨)

આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ આરમ્મણપચ્ચયેન પચ્ચયો – દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ આરબ્ભ દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. (૩)

અધિપતિપચ્ચયો

૮૦. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – આસવસમ્પયુત્તે ખન્ધે ગરું કત્વા આસવસમ્પયુત્તકા ખન્ધા ઉપ્પજ્જન્તિ. સહજાતાધિપતિ – આસવસમ્પયુત્તાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – આસવસમ્પયુત્તાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો; દોમનસ્સસહગતાધિપતિ મોહસ્સ ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – આસવસમ્પયુત્તાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો; દોમનસ્સસહગતાધિપતિ સમ્પયુત્તકાનં ખન્ધાનં મોહસ્સ ચ ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૮૧. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા, સીલં…પે… ઉપોસથકમ્મં કત્વા તં ગરું કત્વા પચ્ચવેક્ખતિ; પુબ્બે સુચિણ્ણાનિ…પે… ઝાના…પે… અરિયા મગ્ગા વુટ્ઠહિત્વા મગ્ગં…પે… ફલં…પે… નિબ્બાનં ગરું કત્વા પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ અધિપતિપચ્ચયેન પચ્ચયો. સહજાતાધિપતિ – આસવવિપ્પયુત્તાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં દત્વા સીલં…પે… ઉપોસથકમ્મં કત્વા તં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ, પુબ્બે સુચિણ્ણાનિ…પે… ઝાના…પે… ચક્ખું…પે… વત્થું આસવવિપ્પયુત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૨)

અનન્તરપચ્ચયો

૮૨. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા આસવસમ્પયુત્તકા ખન્ધા પચ્છિમાનં પચ્છિમાનં આસવસમ્પયુત્તકાનં ખન્ધાનં અનન્તરપચ્ચયેન પચ્ચયો. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા પચ્છિમસ્સ પચ્છિમસ્સ દોમનસ્સસહગતસ્સ વિચિકિચ્છાસહગતસ્સ ઉદ્ધચ્ચસહગતસ્સ મોહસ્સ અનન્તરપચ્ચયેન પચ્ચયો; આસવસમ્પયુત્તા ખન્ધા વુટ્ઠાનસ્સ અનન્તરપચ્ચયેન પચ્ચયો. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ અનન્તરપચ્ચયેન પચ્ચયો – પુરિમા પુરિમા દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા પચ્છિમાનં પચ્છિમાનં દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

૮૩. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમો પુરિમો દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો પચ્છિમસ્સ પચ્છિમસ્સ દોમનસ્સસહગતસ્સ વિચિકિચ્છાસહગતસ્સ ઉદ્ધચ્ચસહગતસ્સ મોહસ્સ અનન્તરપચ્ચયેન પચ્ચયો; પુરિમા પુરિમા આસવવિપ્પયુત્તા ખન્ધા પચ્છિમાનં પચ્છિમાનં આસવવિપ્પયુત્તાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ…પે… ફલસમાપત્તિયા અનન્તરપચ્ચયેન પચ્ચયો. (૧)

આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમો પુરિમો દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો પચ્છિમાનં પચ્છિમાનં દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં અનન્તરપચ્ચયેન પચ્ચયો; આવજ્જના આસવસમ્પયુત્તકાનં ખન્ધાનં અનન્તરપચ્ચયેન પચ્ચયો. (૨)

આસવવિપ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ અનન્તરપચ્ચયેન પચ્ચયો – પુરિમો પુરિમો દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો પચ્છિમાનં પચ્છિમાનં દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો; આવજ્જના દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

૮૪. આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પચ્છિમાનં પચ્છિમાનં દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં અનન્તરપચ્ચયેન પચ્ચયો. (૧)

આસવસમ્પયુત્તો ચ આસવવિપ્પયુત્તો ચ ધમ્મા આસવવિપ્પયુત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પચ્છિમસ્સ પચ્છિમસ્સ દોમનસ્સસહગતસ્સ વિચિકિચ્છાસહગતસ્સ ઉદ્ધચ્ચસહગતસ્સ મોહસ્સ અનન્તરપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ વુટ્ઠાનસ્સ અનન્તરપચ્ચયેન પચ્ચયો. (૨)

આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ અનન્તરપચ્ચયેન પચ્ચયો – પુરિમા પુરિમા દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પચ્છિમાનં પચ્છિમાનં દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

સમનન્તરપચ્ચયાદિ

૮૫. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ સમનન્તરપચ્ચયેન પચ્ચયો… સહજાતપચ્ચયેન પચ્ચયો… નવ… અઞ્ઞમઞ્ઞપચ્ચયેન પચ્ચયો… છ… નિસ્સયપચ્ચયેન પચ્ચયો… નવ.

ઉપનિસ્સયપચ્ચયો

૮૬. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – આસવસમ્પયુત્તા ખન્ધા આસવસમ્પયુત્તાનં ખન્ધાનં ઉપનિસ્સયપચ્ચયેન પચ્ચયો. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – આસવસમ્પયુત્તા ખન્ધા આસવવિપ્પયુત્તાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – આસવસમ્પયુત્તકા ખન્ધા દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

૮૭. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… સીલં…પે… પઞ્ઞં… કાયિકં સુખં…પે… સેનાસનં… મોહં ઉપનિસ્સાય દાનં દેતિ…પે… સમાપત્તિં ઉપ્પાદેતિ; સદ્ધા…પે… પઞ્ઞા… કાયિકં સુખં… કાયિકં દુક્ખં… મોહો ચ સદ્ધાય…પે… મોહસ્સ ચ ઉપનિસ્સયપચ્ચયેન પચ્ચયો. (૧)

આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય માનં જપ્પેતિ, દિટ્ઠિં ગણ્હાતિ; સીલં…પે… પઞ્ઞં… કાયિકં સુખં… કાયિકં દુક્ખં… ઉતું… ભોજનં… સેનાસનં… મોહં ઉપનિસ્સાય પાણં હનતિ…પે… સઙ્ઘં ભિન્દતિ; સદ્ધા…પે… મોહો ચ રાગસ્સ…પે… પત્થનાય ઉપનિસ્સયપચ્ચયેન પચ્ચયો. (૨)

આસવવિપ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધા… સીલં…પે… મોહો દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

૮૮. આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો …પે…. પકતૂપનિસ્સયો – દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ આસવસમ્પયુત્તકાનં ખન્ધાનં ઉપનિસ્સયપચ્ચયેન પચ્ચયો. (પુચ્છિતબ્બં મૂલં) દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ આસવસમ્પયુત્તકાનં ખન્ધાનં ઉપનિસ્સયપચ્ચયેન પચ્ચયો. (૧)

આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૨)

પુરેજાતપચ્ચયો

૮૯. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો દુક્ખતો અનત્તતો વિપસ્સતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ આસવવિપ્પયુત્તાનં ખન્ધાનં મોહસ્સ ચ પુરેજાતપચ્ચયેન પચ્ચયો. (૧)

આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. વત્થુપુરેજાતં – વત્થુ આસવસમ્પયુત્તકાનં ખન્ધાનં પુરેજાતપચ્ચયેન પચ્ચયો. (૨)

આસવવિપ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું આરબ્ભ દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. વત્થુપુરેજાતં – વત્થુ દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ પુરેજાતપચ્ચયેન પચ્ચયો. (૩)

પચ્છાજાતપચ્ચયો

૯૦. આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા આસવસમ્પયુત્તકા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા આસવવિપ્પયુત્તા ખન્ધા ચ મોહો ચ પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

આસવસમ્પયુત્તો ચ આસવવિપ્પયુત્તો ચ ધમ્મા આસવવિપ્પયુત્તસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

આસેવનપચ્ચયો

૯૧. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ આસેવનપચ્ચયેન પચ્ચયો… નવ (આવજ્જનાપિ વુટ્ઠાનમ્પિ નત્થિ ).

કમ્મપચ્ચયો

૯૨. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ કમ્મપચ્ચયેન પચ્ચયો – આસવસમ્પયુત્તકા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – આસવસમ્પયુત્તા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા ચેતના મોહસ્સ ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. નાનાક્ખણિકા – આસવસમ્પયુત્તકા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ કમ્મપચ્ચયેન પચ્ચયો – આસવસમ્પયુત્તા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા ચેતના સમ્પયુત્તકાનં ખન્ધાનં મોહસ્સ ચ ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – આસવવિપ્પયુત્તા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા આસવવિપ્પયુત્તા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

વિપાકપચ્ચયો

૯૩. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ વિપાકપચ્ચયેન પચ્ચયો… એકં.

આહારપચ્ચયો

૯૪. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ આહારપચ્ચયેન પચ્ચયો – આસવસમ્પયુત્તા આહારા સમ્પયુત્તકાનં ખન્ધાનં આહારપચ્ચયેન પચ્ચયો. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ આહારપચ્ચયેન પચ્ચયો – આસવસમ્પયુત્તા આહારા ચિત્તસમુટ્ઠાનાનં રૂપાનં આહારપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા આહારા મોહસ્સ ચિત્તસમુટ્ઠાનાનઞ્ચ રૂપાનં આહારપચ્ચયેન પચ્ચયો. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ આહારપચ્ચયેન પચ્ચયો – આસવસમ્પયુત્તા આહારા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં આહારપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા આહારા સમ્પયુત્તકાનં ખન્ધાનં મોહસ્સ ચ ચિત્તસમુટ્ઠાનાનઞ્ચ રૂપાનં આહારપચ્ચયેન પચ્ચયો. (૩)

૯૫. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ આહારપચ્ચયેન પચ્ચયો – આસવવિપ્પયુત્તા આહારા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં આહારપચ્ચયેન પચ્ચયો; પટિસન્ધિક્ખણે…પે… કબળીકારો આહારો ઇમસ્સ કાયસ્સ આહારપચ્ચયેન પચ્ચયો. (૧)

ઇન્દ્રિયપચ્ચયાદિ

૯૬. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ ઇન્દ્રિયપચ્ચયેન પચ્ચયો… ચત્તારિ… ઝાનપચ્ચયેન પચ્ચયો… ચત્તારિ… મગ્ગપચ્ચયેન પચ્ચયો… ચત્તારિ… સમ્પયુત્તપચ્ચયેન પચ્ચયો… છ.

વિપ્પયુત્તપચ્ચયો

૯૭. આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – આસવસમ્પયુત્તા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – આસવસમ્પયુત્તા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં (સંખિત્તં. વિત્થારેતબ્બં). (૧)

૯૮. આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ આસવસમ્પયુત્તકાનં ખન્ધાનં વિપ્પયુત્તપચ્ચયેન પચ્ચયો. (૧)

આસવવિપ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ દોમનસ્સસહગતાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ વિપ્પયુત્તપચ્ચયેન પચ્ચયો. (૨)

આસવસમ્પયુત્તો ચ આસવવિપ્પયુત્તો ચ ધમ્મા આસવવિપ્પયુત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અત્થિપચ્ચયો

૯૯. આસવસમ્પયુત્તો ધમ્મો આસવસમ્પયુત્તસ્સ ધમ્મસ્સ અત્થિપચ્ચયેન પચ્ચયો… એકં. (૧)

આસવસમ્પયુત્તો ધમ્મો આસવવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – આસવસમ્પયુત્તા ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા મોહસ્સ ચ ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો. પચ્છાજાતા – આસવસમ્પયુત્તા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

આસવસમ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ અત્થિપચ્ચયેન પચ્ચયો (સહજાતસદિસં). (૩)

૧૦૦. આસવવિપ્પયુત્તો ધમ્મો આસવવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં, વિત્થારેતબ્બં). (૧)

આસવવિપ્પયુત્તો ધમ્મો આસવસમ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં અત્થિપચ્ચયેન પચ્ચયો. પુરેજાતં – ચક્ખું…પે… વત્થું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ, વત્થુ આસવસમ્પયુત્તકાનં ખન્ધાનં અત્થિપચ્ચયેન પચ્ચયો. (૨)

આસવવિપ્પયુત્તો ધમ્મો આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો. પુરેજાતં – ચક્ખું…પે… વત્થું આરબ્ભ દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. (૩)

૧૦૧. આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – આસવસમ્પયુત્તો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે… દોમનસ્સસહગતો વિચિકિચ્છાસહગતો ઉદ્ધચ્ચસહગતો એકો ખન્ધો ચ મોહો ચ તિણ્ણન્નં ખન્ધાનં અત્થિપચ્ચયેન પચ્ચયો; દ્વે ખન્ધા ચ…પે…. (૧)

આસવસમ્પયુત્તો ચ આસવવિપ્પયુત્તો ચ ધમ્મા આસવવિપ્પયુત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતા – આસવસમ્પયુત્તા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા ચ વત્થુ ચ મોહસ્સ અત્થિપચ્ચયેન પચ્ચયો. પચ્છાજાતા – આસવસમ્પયુત્તા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – આસવસમ્પયુત્તા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

આસવસમ્પયુત્તો ચ આસવવિપ્પયુત્તો ચ ધમ્મા આસવસમ્પયુત્તસ્સ ચ આસવવિપ્પયુત્તસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – દોમનસ્સસહગતો વિચિકિચ્છાસહગતો ઉદ્ધચ્ચસહગતો એકો ખન્ધો ચ મોહો ચ તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા ચ…પે…. સહજાતો – દોમનસ્સસહગતો વિચિકિચ્છાસહગતો ઉદ્ધચ્ચસહગતો એકો ખન્ધો ચ વત્થુ ચ તિણ્ણન્નં ખન્ધાનં મોહસ્સ ચ…પે… દ્વે ખન્ધા ચ…પે…. (૩)