૧. વિભઙ્ગવારો

હેતુપચ્ચયો

૬૬. આસવસમ્પયુત્તં ધમ્મં પચ્ચયા આસવસમ્પયુત્તો ધમ્મો ઉપ્પજ્જતિ હેતુપચ્ચયા… તીણિ (પટિચ્ચવારસદિસો).

આસવવિપ્પયુત્તં ધમ્મં પચ્ચયા આસવવિપ્પયુત્તો ધમ્મો ઉપ્પજ્જતિ હેતુપચ્ચયા – આસવવિપ્પયુત્તં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… દોમનસ્સસહગતં વિચિકિચ્છાસહગતં ઉદ્ધચ્ચસહગતં મોહં પચ્ચયા ચિત્તસમુટ્ઠાનં રૂપં; પટિસન્ધિક્ખણે…પે… ખન્ધે પચ્ચયા વત્થુ, વત્થું પચ્ચયા ખન્ધા, એકં મહાભૂતં…પે… મહાભૂતે પચ્ચયા ચિત્તસમુટ્ઠાનં રૂપં, કટત્તારૂપં, ઉપાદારૂપં. વત્થું પચ્ચયા આસવવિપ્પયુત્તા ખન્ધા, વત્થું પચ્ચયા દોમનસ્સસહગતો મોહો. (૧)

આસવવિપ્પયુત્તં ધમ્મં પચ્ચયા આસવસમ્પયુત્તો ધમ્મો ઉપ્પજ્જતિ હેતુપચ્ચયા – વત્થું પચ્ચયા આસવસમ્પયુત્તકા ખન્ધા, દોમનસ્સસહગતં વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા. (૨)

આસવવિપ્પયુત્તં ધમ્મં પચ્ચયા આસવસમ્પયુત્તો ચ આસવવિપ્પયુત્તો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા આસવસમ્પયુત્તકા ખન્ધા, મહાભૂતે પચ્ચયા ચિત્તસમુટ્ઠાનં રૂપં, દોમનસ્સસહગતં વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા ચિત્તસમુટ્ઠાનઞ્ચ રૂપં, વત્થું પચ્ચયા દોમનસ્સસહગતા ખન્ધા ચ મોહો ચ. (૩)

૬૭. આસવસમ્પયુત્તઞ્ચ આસવવિપ્પયુત્તઞ્ચ ધમ્મં પચ્ચયા આસવસમ્પયુત્તો ધમ્મો ઉપ્પજ્જતિ હેતુપચ્ચયા – આસવસમ્પયુત્તં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે ચ…પે… દોમનસ્સસહગતં વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પચ્ચયા તયો ખન્ધા…પે… દ્વે ખન્ધે ચ…પે…. (૧)

આસવસમ્પયુત્તઞ્ચ આસવવિપ્પયુત્તઞ્ચ ધમ્મં પચ્ચયા આસવવિપ્પયુત્તો ધમ્મો ઉપ્પજ્જતિ હેતુપચ્ચયા – આસવસમ્પયુત્તે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પચ્ચયા ચિત્તસમુટ્ઠાનં રૂપં, દોમનસ્સસહગતે ખન્ધે ચ વત્થુઞ્ચ પચ્ચયા દોમનસ્સસહગતો મોહો. (૨)

આસવસમ્પયુત્તઞ્ચ આસવવિપ્પયુત્તઞ્ચ ધમ્મં પચ્ચયા આસવસમ્પયુત્તો ચ આસવવિપ્પયુત્તો ચ ધમ્મા ઉપ્પજ્જન્તિ હેતુપચ્ચયા – આસવસમ્પયુત્તં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… આસવસમ્પયુત્તે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, દોમનસ્સસહગતં વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… દોમનસ્સસહગતં એકં ખન્ધઞ્ચ વત્થુઞ્ચ પચ્ચયા તયો ખન્ધા મોહો ચ…પે… દ્વે ખન્ધે…પે…. (૩)

આરમ્મણપચ્ચયાદિ

૬૮. આસવસમ્પયુત્તં ધમ્મં પચ્ચયા આસવસમ્પયુત્તો ધમ્મો ઉપ્પજ્જતિ આરમ્મણપચ્ચયા… તીણિ (પટિચ્ચવારસદિસા).

આસવવિપ્પયુત્તં ધમ્મં પચ્ચયા આસવવિપ્પયુત્તો ધમ્મો ઉપ્પજ્જતિ આરમ્મણપચ્ચયા – આસવવિપ્પયુત્તં એકં ખન્ધં પચ્ચયા તયો ખન્ધા…પે… દ્વે ખન્ધે…પે… પટિસન્ધિક્ખણે…પે… વત્થું પચ્ચયા ખન્ધા, ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા આસવવિપ્પયુત્તા ખન્ધા, વત્થું પચ્ચયા દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો. (૧)

આસવવિપ્પયુત્તં ધમ્મં પચ્ચયા આસવસમ્પયુત્તો ધમ્મો ઉપ્પજ્જતિ આરમ્મણપચ્ચયા – વત્થું પચ્ચયા આસવસમ્પયુત્તકા ખન્ધા, દોમનસ્સસહગતં વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા. (૨)

આસવવિપ્પયુત્તં ધમ્મં પચ્ચયા આસવસમ્પયુત્તો ચ આસવવિપ્પયુત્તો ચ ધમ્મા ઉપ્પજ્જન્તિ આરમ્મણપચ્ચયા – વત્થું પચ્ચયા દોમનસ્સસહગતા વિચિકિચ્છાસહગતા ઉદ્ધચ્ચસહગતા ખન્ધા મોહો ચ. (૩)

૬૯. આસવસમ્પયુત્તઞ્ચ આસવવિપ્પયુત્તઞ્ચ ધમ્મં પચ્ચયા આસવસમ્પયુત્તો ધમ્મો ઉપ્પજ્જતિ આરમ્મણપચ્ચયા – આસવસમ્પયુત્તં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે…. (૧)

આસવસમ્પયુત્તઞ્ચ આસવવિપ્પયુત્તઞ્ચ ધમ્મં પચ્ચયા આસવવિપ્પયુત્તો ધમ્મો ઉપ્પજ્જતિ આરમ્મણપચ્ચયા – દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ વત્થુઞ્ચ પચ્ચયા દોમનસ્સસહગતો વિચિકિચ્છાસહગતો ઉદ્ધચ્ચસહગતો મોહો. (૨)

આસવસમ્પયુત્તઞ્ચ આસવવિપ્પયુત્તઞ્ચ ધમ્મં પચ્ચયા આસવસમ્પયુત્તો ચ આસવવિપ્પયુત્તો ચ ધમ્મા ઉપ્પજ્જન્તિ આરમ્મણપચ્ચયા – દોમનસ્સસહગતં વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ વત્થુઞ્ચ પચ્ચયા તયો ખન્ધા મોહો ચ…પે… દ્વે ખન્ધે…પે… અધિપતિપચ્ચયા… અનન્તરપચ્ચયા…પે… અવિગતપચ્ચયા. (૩)