૧. વિભઙ્ગવારો

નહેતુપચ્ચયો

૫૬. આસવસમ્પયુત્તં ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૧)

આસવવિપ્પયુત્તં ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નહેતુપચ્ચયા – અહેતુકં આસવવિપ્પયુત્તં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… અહેતુકપટિસન્ધિક્ખણે…પે… (યાવ આસઞ્ઞસત્તા). (૧)

નઆરમ્મણપચ્ચયો

૫૭. આસવસમ્પયુત્તં ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નઆરમ્મણપચ્ચયા – આસવસમ્પયુત્તે ખન્ધે પટિચ્ચ ચિત્તસમુટ્ઠાનં રૂપં. (૧)

આસવવિપ્પયુત્તં ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નઆરમ્મણપચ્ચયા – આસવવિપ્પયુત્તે ખન્ધે પટિચ્ચ ચિત્તસમુટ્ઠાનં રૂપં, દોમનસ્સસહગતં વિચિકિચ્છાસહગતં ઉદ્ધચ્ચસહગતં મોહં પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે… ખન્ધે પટિચ્ચ વત્થુ, એકં મહાભૂતં…પે… (યાવ અસઞ્ઞસત્તા). (૧)

આસવસમ્પયુત્તઞ્ચ આસવવિપ્પયુત્તઞ્ચ ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નઆરમ્મણપચ્ચયા – આસવસમ્પયુત્તે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં, દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પટિચ્ચ ચિત્તસમુટ્ઠાનં રૂપં. (૧)

નઅધિપતિપચ્ચયો

૫૮. આસવસમ્પયુત્તં ધમ્મં પટિચ્ચ આસવસમ્પયુત્તો ધમ્મો ઉપ્પજ્જતિ નઅધિપતિપચ્ચયા (સંખિત્તં).

નપુરેજાતપચ્ચયાદિ

૫૯. આસવસમ્પયુત્તં ધમ્મં પટિચ્ચ આસવસમ્પયુત્તો ધમ્મો ઉપ્પજ્જતિ નપુરેજાતપચ્ચયા – અરૂપે આસવસમ્પયુત્તં એકં ખન્ધં પટિચ્ચ તયો ખન્ધા…પે… દ્વે ખન્ધે…પે…. (૧)

આસવસમ્પયુત્તં ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નપુરેજાતપચ્ચયા – અરૂપે વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો, આસવસમ્પયુત્તે ખન્ધે પટિચ્ચ ચિત્તસમુટ્ઠાનં રૂપં. (૨)

આસવસમ્પયુત્તં ધમ્મં પટિચ્ચ આસવસમ્પયુત્તો ચ આસવવિપ્પયુત્તો ચ ધમ્મા ઉપ્પજ્જન્તિ નપુરેજાતપચ્ચયા – અરૂપે વિચિકિચ્છાસહગતં ઉદ્ધચ્ચસહગતં એકં ખન્ધં પટિચ્ચ તયો ખન્ધા મોહો ચ…પે… દ્વે ખન્ધે…પે…. (૩)

૬૦. આસવવિપ્પયુત્તં ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નપુરેજાતપચ્ચયા – અરૂપે આસવવિપ્પયુત્તં એકં ખન્ધં પટિચ્ચ તયો ખન્ધા…પે… દ્વે ખન્ધે…પે… આસવવિપ્પયુત્તે ખન્ધે પટિચ્ચ ચિત્તસમુટ્ઠાનં રૂપં, દોમનસ્સસહગતં વિચિકિચ્છાસહગતં ઉદ્ધચ્ચસહગતં મોહં પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે… (યાવ અસઞ્ઞસત્તા). (૧)

આસવવિપ્પયુત્તં ધમ્મં પટિચ્ચ આસવસમ્પયુત્તો ધમ્મો ઉપ્પજ્જતિ નપુરેજાતપચ્ચયા – અરૂપે વિચિકિચ્છાસહગતં ઉદ્ધચ્ચસહગતં મોહં પટિચ્ચ સમ્પયુત્તકા ખન્ધા. (૨)

૬૧. આસવસમ્પયુત્તઞ્ચ આસવવિપ્પયુત્તઞ્ચ ધમ્મં પટિચ્ચ આસવસમ્પયુત્તો ધમ્મો ઉપ્પજ્જતિ નપુરેજાતપચ્ચયા – અરૂપે વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા…પે… દ્વે ખન્ધે ચ…પે…. (૧)

આસવસમ્પયુત્તઞ્ચ આસવવિપ્પયુત્તઞ્ચ ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નપુરેજાતપચ્ચયા – આસવસમ્પયુત્તે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં, દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પટિચ્ચ ચિત્તસમુટ્ઠાનં રૂપં. (૨)

(નપચ્છાજાતપચ્ચયા નવ, નઆસેવનપચ્ચયા નવ.)

નકમ્મપચ્ચયાદિ

૬૨. આસવસમ્પયુત્તં ધમ્મં પટિચ્ચ આસવસમ્પયુત્તો ધમ્મો ઉપ્પજ્જતિ નકમ્મપચ્ચયા – આસવસમ્પયુત્તે ખન્ધે પટિચ્ચ સમ્પયુત્તકા ચેતના. (૧)

આસવવિપ્પયુત્તં ધમ્મં પટિચ્ચ આસવવિપ્પયુત્તો ધમ્મો ઉપ્પજ્જતિ નકમ્મપચ્ચયા – આસવવિપ્પયુત્તે ખન્ધે પટિચ્ચ વિપ્પયુત્તકા ચેતના. (૧)

આસવવિપ્પયુત્તં ધમ્મં પટિચ્ચ આસવસમ્પયુત્તો ધમ્મો ઉપ્પજ્જતિ નકમ્મપચ્ચયા – દોમનસ્સસહગતં વિચિકિચ્છાસહગતં ઉદ્ધચ્ચસહગતં મોહં પટિચ્ચ સમ્પયુત્તકા ચેતના. (૨)

આસવસમ્પયુત્તઞ્ચ આસવવિપ્પયુત્તઞ્ચ ધમ્મં પટિચ્ચ આસવસમ્પયુત્તો ધમ્મો ઉપ્પજ્જતિ નકમ્મપચ્ચયા – દોમનસ્સસહગતે વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પટિચ્ચ સમ્પયુત્તકા ચેતના… નવિપાકપચ્ચયા… નઆહારપચ્ચયા… નઇન્દ્રિયપચ્ચયા… નઝાનપચ્ચયા… નમગ્ગપચ્ચયા… નસમ્પયુત્તપચ્ચયા… નવિપ્પયુત્તપચ્ચયા… નોનત્થિપચ્ચયા… નોવિગતપચ્ચયા.