૧. વિભઙ્ગવારો

હેતુપચ્ચયો

૧૦. આસવં ધમ્મં પચ્ચયા આસવો ધમ્મો ઉપ્પજ્જતિ હેતુપચ્ચયા (આસવમૂલકં તીણિ, પટિચ્ચસદિસા).

નોઆસવં ધમ્મં પચ્ચયા નોઆસવો ધમ્મો ઉપ્પજ્જતિ હેતુપચ્ચયા – નોઆસવં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… ખન્ધે પચ્ચયા વત્થુ, વત્થું પચ્ચયા ખન્ધા, મહાભૂતે પચ્ચયા ચિત્તસમુટ્ઠાનં રૂપં કટત્તારૂપં ઉપાદારૂપં, વત્થું પચ્ચયા નોઆસવા ખન્ધા. (૧)

નોઆસવં ધમ્મં પચ્ચયા આસવો ધમ્મો ઉપ્પજ્જતિ હેતુપચ્ચયા – નોઆસવે ખન્ધે પચ્ચયા આસવા, વત્થું પચ્ચયા આસવા. (૨)

નોઆસવં ધમ્મં પચ્ચયા આસવો ચ નોઆસવો ચ ધમ્મા ઉપ્પજ્જન્તિ હેતુપચ્ચયા – નોઆસવં એકં ખન્ધં પચ્ચયા તયો ખન્ધા આસવા ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે… વત્થું પચ્ચયા આસવા સમ્પયુત્તકા ચ ખન્ધા. (૩)

૧૧. આસવઞ્ચ નોઆસવઞ્ચ ધમ્મં પચ્ચયા આસવો ધમ્મો ઉપ્પજ્જતિ હેતુપચ્ચયા – કામાસવઞ્ચ સમ્પયુત્તકે ચ ખન્ધે પચ્ચયા દિટ્ઠાસવો અવિજ્જાસવો (ચક્કં). કામાસવઞ્ચ વત્થુઞ્ચ પચ્ચયા દિટ્ઠાસવો અવિજ્જાસવો (ચક્કં). (૧)

આસવઞ્ચ નોઆસવઞ્ચ ધમ્મં પચ્ચયા નોઆસવો ધમ્મો ઉપ્પજ્જતિ હેતુપચ્ચયા – નોઆસવં એકં ખન્ધઞ્ચ આસવે ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… આસવઞ્ચ વત્થુઞ્ચ પચ્ચયા નોઆસવા ખન્ધા. (૨)

આસવઞ્ચ નોઆસવઞ્ચ ધમ્મં પચ્ચયા આસવો ચ નોઆસવો ચ ધમ્મા ઉપ્પજ્જન્તિ હેતુપચ્ચયા – નોઆસવં એકં ખન્ધઞ્ચ કામાસવઞ્ચ પચ્ચયા તયો ખન્ધા દિટ્ઠાસવો અવિજ્જાસવો ચિત્તસમુટ્ઠાનઞ્ચ રૂપં…પે… દ્વે ખન્ધે…પે… (ચક્કં). કામાસવઞ્ચ વત્થુઞ્ચ પચ્ચયા દિટ્ઠાસવો અવિજ્જાસવો સમ્પયુત્તકા ચ ખન્ધા (ચક્કં. સંખિત્તં). (૩)