૧. વિભઙ્ગવારો

હેતુપચ્ચયો

૧૦૬. ચેતસિકં ધમ્મં પચ્ચયા ચેતસિકો ધમ્મો ઉપ્પજ્જતિ હેતુપચ્ચયા… તીણિ (પટિચ્ચસદિસા).

અચેતસિકં ધમ્મં પચ્ચયા અચેતસિકો ધમ્મો ઉપ્પજ્જતિ હેતુપચ્ચયા – ચિત્તં પચ્ચયા ચિત્તસમુટ્ઠાનં રૂપં, વત્થું પચ્ચયા ચિત્તં; પટિસન્ધિક્ખણે ચિત્તં પચ્ચયા કટત્તારૂપં, ચિત્તં પચ્ચયા વત્થુ, વત્થું પચ્ચયા ચિત્તં, એકં મહાભૂતં…પે…. (૧)

અચેતસિકં ધમ્મં પચ્ચયા ચેતસિકો ધમ્મો ઉપ્પજ્જતિ હેતુપચ્ચયા – ચિત્તં પચ્ચયા સમ્પયુત્તકા ખન્ધા, વત્થું પચ્ચયા ચેતસિકા ખન્ધા (પટિસન્ધિક્ખણે દ્વેપિ કાતબ્બા). (૨)

અચેતસિકં ધમ્મં પચ્ચયા ચેતસિકો ચ અચેતસિકો ચ ધમ્મા ઉપ્પજ્જન્તિ હેતુપચ્ચયા – ચિત્તં પચ્ચયા સમ્પયુત્તકા ખન્ધા ચિત્તસમુટ્ઠાનઞ્ચ રૂપં, વત્થું પચ્ચયા ચિત્તઞ્ચ સમ્પયુત્તકા ચ ખન્ધા (પટિસન્ધિક્ખણે દ્વેપિ કાતબ્બા). (૩)

૧૦૭. ચેતસિકઞ્ચ અચેતસિકઞ્ચ ધમ્મં પચ્ચયા ચેતસિકો ધમ્મો ઉપ્પજ્જતિ હેતુપચ્ચયા – ચેતસિકં એકં ખન્ધઞ્ચ ચિત્તઞ્ચ પચ્ચયા દ્વે ખન્ધા, દ્વે ખન્ધે ચ…પે… ચેતસિકં એકં ખન્ધઞ્ચ વત્થુઞ્ચ પચ્ચયા દ્વે ખન્ધા, દ્વે ખન્ધે ચ…પે… (પટિસન્ધિક્ખણે દ્વેપિ કાતબ્બા). (૧)

ચેતસિકઞ્ચ અચેતસિકઞ્ચ ધમ્મં પચ્ચયા અચેતસિકો ધમ્મો ઉપ્પજ્જતિ હેતુપચ્ચયા – ચેતસિકે ખન્ધે ચ ચિત્તઞ્ચ પચ્ચયા ચિત્તસમુટ્ઠાનં રૂપં, ચેતસિકે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, ચેતસિકે ખન્ધે ચ વત્થુઞ્ચ પચ્ચયા ચિત્તં (પટિસન્ધિક્ખણે તીણિપિ કાતબ્બા). (૨)

ચેતસિકઞ્ચ અચેતસિકઞ્ચ ધમ્મં પચ્ચયા ચેતસિકો ચ અચેતસિકો ચ ધમ્મા ઉપ્પજ્જન્તિ હેતુપચ્ચયા – ચેતસિકં એકં ખન્ધઞ્ચ ચિત્તઞ્ચ પચ્ચયા દ્વે ખન્ધા ચિત્તસમુટ્ઠાનઞ્ચ રૂપં, દ્વે ખન્ધે ચ…પે… ચેતસિકં એકં ખન્ધઞ્ચ વત્થુઞ્ચ પચ્ચયા દ્વે ખન્ધા ચિત્તઞ્ચ, દ્વે ખન્ધે ચ…પે… (પટિસન્ધિક્ખણે દ્વેપિ કાતબ્બા). (૩)

આરમ્મણપચ્ચયો

૧૦૮. ચેતસિકં ધમ્મં પચ્ચયા ચેતસિકો ધમ્મો ઉપ્પજ્જતિ આરમ્મણપચ્ચયા… તીણિ (પટિચ્ચસદિસા).

અચેતસિકં ધમ્મં પચ્ચયા અચેતસિકો ધમ્મો ઉપ્પજ્જતિ આરમ્મણપચ્ચયા – ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા ચિત્તં; પટિસન્ધિક્ખણે…પે…. (૧)

અચેતસિકં ધમ્મં પચ્ચયા ચેતસિકો ધમ્મો ઉપ્પજ્જતિ આરમ્મણપચ્ચયા – ચક્ખાયતનં પચ્ચયા ચક્ખુવિઞ્ઞાણસહગતા ખન્ધા…પે… કાયાયતનં પચ્ચયા…પે… ચિત્તં પચ્ચયા સમ્પયુત્તકા ખન્ધા, વત્થું પચ્ચયા ચેતસિકા ખન્ધા (પટિસન્ધિક્ખણે દ્વેપિ કાતબ્બા). (૨)

અચેતસિકં ધમ્મં પચ્ચયા ચેતસિકો ચ અચેતસિકો ચ ધમ્મા ઉપ્પજ્જન્તિ આરમ્મણપચ્ચયા – ચક્ખાયતનં પચ્ચયા ચક્ખુવિઞ્ઞાણં સમ્પયુત્તકા ચ ખન્ધા…પે… કાયાયતનં પચ્ચયા…પે… વત્થું પચ્ચયા ચિત્તં સમ્પયુત્તકા ચ ખન્ધા (પટિસન્ધિક્ખણે એકં). (૩)

૧૦૯. ચેતસિકઞ્ચ અચેતસિકઞ્ચ ધમ્મં પચ્ચયા ચેતસિકો ધમ્મો ઉપ્પજ્જતિ આરમ્મણપચ્ચયા – ચક્ખુવિઞ્ઞાણસહગતં એકં ખન્ધઞ્ચ ચક્ખુવિઞ્ઞાણઞ્ચ પચ્ચયા દ્વે ખન્ધા, દ્વે ખન્ધે ચ…પે… ચક્ખુવિઞ્ઞાણસહગતં એકં ખન્ધઞ્ચ ચક્ખાયતનઞ્ચ પચ્ચયા દ્વે ખન્ધા, દ્વે ખન્ધે ચ…પે… કાયવિઞ્ઞાણસહગતં…પે… ચેતસિકં એકં ખન્ધઞ્ચ ચિત્તઞ્ચ પચ્ચયા દ્વે ખન્ધા, દ્વે ખન્ધે ચ…પે… ચેતસિકં એકં ખન્ધઞ્ચ વત્થુઞ્ચ પચ્ચયા દ્વે ખન્ધા, દ્વે ખન્ધે ચ…પે… (પટિસન્ધિક્ખણે દ્વે). (૧)

ચેતસિકઞ્ચ અચેતસિકઞ્ચ ધમ્મં પચ્ચયા અચેતસિકો ધમ્મો ઉપ્પજ્જતિ આરમ્મણપચ્ચયા – ચક્ખુવિઞ્ઞાણસહગતે ખન્ધે ચ ચક્ખાયતનઞ્ચ પચ્ચયા ચક્ખુવિઞ્ઞાણં…પે… કાયવિઞ્ઞાણસહગતે…પે… ચેતસિકે ખન્ધે ચ વત્થુઞ્ચ પચ્ચયા ચિત્તં (પટિસન્ધિક્ખણે એકં). (૨)

ચેતસિકઞ્ચ અચેતસિકઞ્ચ ધમ્મં પચ્ચયા ચેતસિકો ચ અચેતસિકો ચ ધમ્મા ઉપ્પજ્જન્તિ આરમ્મણપચ્ચયા – ચક્ખુવિઞ્ઞાણસહગતં એકં ખન્ધઞ્ચ ચક્ખાયતનઞ્ચ પચ્ચયા દ્વે ખન્ધા ચક્ખુવિઞ્ઞાણઞ્ચ, દ્વે ખન્ધે ચ…પે… ચેતસિકં એકં ખન્ધઞ્ચ વત્થુઞ્ચ પચ્ચયા દ્વે ખન્ધા ચિત્તઞ્ચ, દ્વે ખન્ધે ચ…પે… (પટિસન્ધિક્ખણે એકં, સંખિત્તં). (૩)