૧. વિભઙ્ગવારો

હેતુપચ્ચયો

૬૧. ચિત્તં ધમ્મં પચ્ચયા નોચિત્તો ધમ્મો ઉપ્પજ્જતિ હેતુપચ્ચયા – ચિત્તં પચ્ચયા સમ્પયુત્તકા ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે…પે…. (૧)

નોચિત્તં ધમ્મં પચ્ચયા નોચિત્તો ધમ્મો ઉપ્પજ્જતિ હેતુપચ્ચયા – નોચિત્તં એકં ખન્ધં પચ્ચયા દ્વે ખન્ધા ચિત્તસમુટ્ઠાનઞ્ચ રૂપં, દ્વે ખન્ધે…પે… પટિસન્ધિક્ખણે…પે… (યાવ મહાભૂતા), વત્થું પચ્ચયા નોચિત્તા ખન્ધા. (૧)

નોચિત્તં ધમ્મં પચ્ચયા ચિત્તો ધમ્મો ઉપ્પજ્જતિ હેતુપચ્ચયા – નોચિત્તે ખન્ધે પચ્ચયા ચિત્તં, વત્થું પચ્ચયા ચિત્તં; પટિસન્ધિક્ખણે નોચિત્તે ખન્ધે પચ્ચયા ચિત્તં, પટિસન્ધિક્ખણે વત્થું પચ્ચયા ચિત્તં. (૨)

નોચિત્તં ધમ્મં પચ્ચયા ચિત્તો ચ નોચિત્તો ચ ધમ્મા ઉપ્પજ્જન્તિ હેતુપચ્ચયા – નોચિત્તં એકં ખન્ધં પચ્ચયા દ્વે ખન્ધા ચિત્તઞ્ચ ચિત્તસમુટ્ઠાનઞ્ચ રૂપં, દ્વે ખન્ધે…પે… વત્થું પચ્ચયા ચિત્તઞ્ચ સમ્પયુત્તકા ચ ખન્ધા; પટિસન્ધિક્ખણે નોચિત્તં એકં ખન્ધં પચ્ચયા દ્વે ખન્ધા ચિત્તઞ્ચ કટત્તા ચ રૂપં, દ્વે ખન્ધે…પે… પટિસન્ધિક્ખણે વત્થું પચ્ચયા ચિત્તઞ્ચ સમ્પયુત્તકા ચ ખન્ધા. (૩)

ચિત્તઞ્ચ નોચિત્તઞ્ચ ધમ્મં પચ્ચયા નોચિત્તો ધમ્મો ઉપ્પજ્જતિ હેતુપચ્ચયા – નોચિત્તં એકં ખન્ધઞ્ચ ચિત્તઞ્ચ પચ્ચયા દ્વે ખન્ધા ચિત્તસમુટ્ઠાનઞ્ચ રૂપં, દ્વે ખન્ધે ચ…પે… ચિત્તઞ્ચ મહાભૂતે ચ પચ્ચયા ચિત્તસમુટ્ઠાનં રૂપં, ચિત્તઞ્ચ વત્થુઞ્ચ પચ્ચયા નોચિત્તા ખન્ધા, પટિસન્ધિક્ખણે નોચિત્તં એકં ખન્ધઞ્ચ ચિત્તઞ્ચ પચ્ચયા દ્વે ખન્ધા કટત્તા ચ રૂપં, દ્વે ખન્ધે ચ…પે… પટિસન્ધિક્ખણે ચિત્તઞ્ચ મહાભૂતે ચ પચ્ચયા કટત્તારૂપં; પટિસન્ધિક્ખણે ચિત્તઞ્ચ વત્થુઞ્ચ પચ્ચયા નોચિત્તા ખન્ધા. (૧)

આરમ્મણપચ્ચયો

૬૨. ચિત્તં ધમ્મં પચ્ચયા નોચિત્તો ધમ્મો ઉપ્પજ્જતિ આરમ્મણપચ્ચયા… એકં (પટિચ્ચવારસદિસં).

નોચિત્તં ધમ્મં પચ્ચયા નોચિત્તો ધમ્મો ઉપ્પજ્જતિ આરમ્મણપચ્ચયા – નોચિત્તં એકં ખન્ધં પચ્ચયા દ્વે ખન્ધા, દ્વે ખન્ધે…પે… પટિસન્ધિક્ખણે…પે… પટિસન્ધિક્ખણે વત્થું પચ્ચયા ખન્ધા, ચક્ખાયતનં પચ્ચયા ચક્ખુવિઞ્ઞાણસહગતા ખન્ધા…પે… કાયાયતનં પચ્ચયા કાયવિઞ્ઞાણસહગતા ખન્ધા, વત્થું પચ્ચયા નોચિત્તા ખન્ધા. (૧)

નોચિત્તં ધમ્મં પચ્ચયા ચિત્તો ધમ્મો ઉપ્પજ્જતિ આરમ્મણપચ્ચયા – નોચિત્તે ખન્ધે પચ્ચયા ચિત્તં, વત્થું પચ્ચયા ચિત્તં; પટિસન્ધિક્ખણે નોચિત્તે ખન્ધે પચ્ચયા ચિત્તં, પટિસન્ધિક્ખણે વત્થું પચ્ચયા ચિત્તં, ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં. (૨)

નોચિત્તં ધમ્મં પચ્ચયા ચિત્તો ચ નોચિત્તો ચ ધમ્મા ઉપ્પજ્જન્તિ આરમ્મણપચ્ચયા – નોચિત્તં એકં ખન્ધં પચ્ચયા દ્વે ખન્ધા ચિત્તઞ્ચ, દ્વે ખન્ધે…પે… વત્થું પચ્ચયા ચિત્તઞ્ચ સમ્પયુત્તકા ચ ખન્ધા; પટિસન્ધિક્ખણે…પે… પટિસન્ધિક્ખણે વત્થું પચ્ચયા ચિત્તઞ્ચ સમ્પયુત્તકા ચ ખન્ધા, ચક્ખાયતનં પચ્ચયા ચક્ખુવિઞ્ઞાણં સમ્પયુત્તકા ચ ખન્ધા…પે… કાયાયતનં પચ્ચયા કાયવિઞ્ઞાણં સમ્પયુત્તકા ચ ખન્ધા. (૩)

ચિત્તઞ્ચ નોચિત્તઞ્ચ ધમ્મં પચ્ચયા નોચિત્તો ધમ્મો ઉપ્પજ્જતિ આરમ્મણપચ્ચયા – નોચિત્તં એકં ખન્ધઞ્ચ ચિત્તઞ્ચ પચ્ચયા દ્વે ખન્ધા, દ્વે ખન્ધે ચ…પે… ચિત્તઞ્ચ વત્થુઞ્ચ પચ્ચયા નોચિત્તા ખન્ધા, પટિસન્ધિક્ખણે…પે… પટિસન્ધિક્ખણે ચિત્તઞ્ચ વત્થુઞ્ચ પચ્ચયા નોચિત્તા ખન્ધા, ચક્ખાયતનઞ્ચ ચક્ખુવિઞ્ઞાણઞ્ચ પચ્ચયા ચક્ખુવિઞ્ઞાણસહગતા ખન્ધા…પે… કાયાયતનં ચ…પે… (સંખિત્તં). (૧)