૧. વિભઙ્ગવારો

નહેતુપચ્ચયો

૩૭૫. ઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નહેતુપચ્ચયા – અહેતુકપટિસન્ધિક્ખણે વત્થું પટિચ્ચ નોઉપાદા ખન્ધા. (૧)

નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નહેતુપચ્ચયા – અહેતુકં નોઉપાદા એકં ખન્ધં પટિચ્ચ તયો ખન્ધા નોઉપાદા ચ ચિત્તસમુટ્ઠાનં રૂપં…પે… દ્વે ખન્ધે…પે… અહેતુકપટિસન્ધિક્ખણે…પે… એકં મહાભૂતં…પે… અસઞ્ઞસત્તાનં એકં મહાભૂતં પટિચ્ચ તયો મહાભૂતા…પે… દ્વે મહાભૂતે પટિચ્ચ દ્વે મહાભૂતા, વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૧)

નોઉપાદા ધમ્મં પટિચ્ચ ઉપાદા ધમ્મો ઉપ્પજ્જતિ નહેતુપચ્ચયા – અહેતુકે નોઉપાદા ખન્ધે પટિચ્ચ ઉપાદા ચિત્તસમુટ્ઠાનં રૂપં; અહેતુકપટિસન્ધિક્ખણે…પે… મહાભૂતે પટિચ્ચ ઉપાદા ચિત્તસમુટ્ઠાનં રૂપં કટત્તારૂપં ઉપાદારૂપં…પે… (યાવ અસઞ્ઞસત્તા). (૨)

નોઉપાદા ધમ્મં પટિચ્ચ ઉપાદા ચ નોઉપાદા ચ ધમ્મા ઉપ્પજ્જન્તિ નહેતુપચ્ચયા – અહેતુકં નોઉપાદા એકં ખન્ધં પટિચ્ચ તયો ખન્ધા ઉપાદા ચ નોઉપાદા ચ ચિત્તસમુટ્ઠાનં રૂપં…પે… દ્વે ખન્ધે…પે… અહેતુકપટિસન્ધિક્ખણે…પે…. (૩)

ઉપાદા ચ નોઉપાદા ચ ધમ્મં પટિચ્ચ નોઉપાદા ધમ્મો ઉપ્પજ્જતિ નહેતુપચ્ચયા – અહેતુકપટિસન્ધિક્ખણે નોઉપાદા એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ…પે…. (૧)

નઆરમ્મણપચ્ચયાદિ

૩૭૬. નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નઆરમ્મણપચ્ચયા – નોઉપાદા ખન્ધે પટિચ્ચ નોઉપાદા ચિત્તસમુટ્ઠાનં રૂપં; પટિસન્ધિક્ખણે…પે… એકં મહાભૂતં…પે… (યાવ અસઞ્ઞસત્તા) દ્વે મહાભૂતે પટિચ્ચ દ્વે મહાભૂતા. (૧)

નોઉપાદા ધમ્મં પટિચ્ચ ઉપાદા ધમ્મો ઉપ્પજ્જતિ નઆરમ્મણપચ્ચયા – નોઉપાદા ખન્ધે પટિચ્ચ ઉપાદા ચિત્તસમુટ્ઠાનં રૂપં; પટિસન્ધિક્ખણે…પે… મહાભૂતે પટિચ્ચ ઉપાદા ચિત્તસમુટ્ઠાનં રૂપં કટત્તારૂપં ઉપાદારૂપં (યાવ અસઞ્ઞસત્તા). (૨)

નોઉપાદા ધમ્મં પટિચ્ચ ઉપાદા ચ નોઉપાદા ચ ધમ્મા ઉપ્પજ્જન્તિ નઆરમ્મણપચ્ચયા – નોઉપાદા ખન્ધે પટિચ્ચ ઉપાદા ચ નોઉપાદા ચ ચિત્તસમુટ્ઠાનં રૂપં; પટિસન્ધિક્ખણે…પે…. (૩)

નઅધિપતિપચ્ચયા પઞ્ચ, નઅનન્તરપચ્ચયા તીણિ…પે… નઉપનિસ્સયપચ્ચયા પઞ્ચ, નપુરેજાતપચ્ચયા પઞ્ચ, નપચ્છાજાતપચ્ચયા પઞ્ચ, નઆસેવનપચ્ચયા પઞ્ચ.

નકમ્મપચ્ચયો

૩૭૭. નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નકમ્મપચ્ચયા – નોઉપાદા ખન્ધે પટિચ્ચ સમ્પયુત્તકા ચેતના; બાહિરં આહારસમુટ્ઠાનં ઉતુસમુટ્ઠાનં…પે… દ્વે મહાભૂતે પટિચ્ચ દ્વે મહાભૂતા. (૧)

નોઉપાદા ધમ્મં પટિચ્ચ ઉપાદા ધમ્મો ઉપ્પજ્જતિ નકમ્મપચ્ચયા – બાહિરે આહારસમુટ્ઠાને ઉતુસમુટ્ઠાને મહાભૂતે પટિચ્ચ ઉપાદારૂપં. (૨)

નોઉપાદા ધમ્મં પટિચ્ચ ઉપાદા ચ નોઉપાદા ચ ધમ્મા ઉપ્પજ્જન્તિ નકમ્મપચ્ચયા – બાહિરં આહારસમુટ્ઠાનં ઉતુસમુટ્ઠાનં એકં મહાભૂતં પટિચ્ચ તયો મહાભૂતા ઉપાદા ચ રૂપં…પે… દ્વે મહાભૂતે…પે…. (૩)

નવિપાકપચ્ચયો

૩૭૮. નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નવિપાકપચ્ચયા – નોઉપાદા એકં ખન્ધં પટિચ્ચ તયો ખન્ધા નોઉપાદા ચ ચિત્તસમુટ્ઠાનં રૂપં…પે… દ્વે ખન્ધે…પે… એકં મહાભૂતં…પે… (યાવ અસઞ્ઞસત્તા, એવં તીણિ નોઉપાદામૂલકે).

નઆહારપચ્ચયો

૩૭૯. નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નઆહારપચ્ચયા – બાહિરં ઉતુસમુટ્ઠાનં અસઞ્ઞસત્તાનં એકં મહાભૂતં…પે… દ્વે મહાભૂતે પટિચ્ચ દ્વે મહાભૂતા. (૧)

નોઉપાદા ધમ્મં પટિચ્ચ ઉપાદા ધમ્મો ઉપ્પજ્જતિ નઆહારપચ્ચયા – બાહિરં ઉતુસમુટ્ઠાનં અસઞ્ઞસત્તાનં મહાભૂતે પટિચ્ચ ઉપાદારૂપં. (૨)

નોઉપાદા ધમ્મં પટિચ્ચ ઉપાદા ચ નોઉપાદા ચ ધમ્મા ઉપ્પજ્જન્તિ નઆહારપચ્ચયા – બાહિરં ઉતુસમુટ્ઠાનં અસઞ્ઞસત્તાનં એકં મહાભૂતં પટિચ્ચ તયો મહાભૂતા ઉપાદા ચ રૂપં…પે… દ્વે મહાભૂતે…પે…. (૩)

નઇન્દ્રિયપચ્ચયો

૩૮૦. નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નઇન્દ્રિયપચ્ચયા – બાહિરં આહારસમુટ્ઠાનં ઉતુસમુટ્ઠાનં એકં મહાભૂતં…પે…. (૧)

નોઉપાદા ધમ્મં પટિચ્ચ ઉપાદા ધમ્મો ઉપ્પજ્જતિ નઇન્દ્રિયપચ્ચયા – બાહિરે આહારસમુટ્ઠાને ઉતુસમુટ્ઠાને અસઞ્ઞસત્તાનં મહાભૂતે પટિચ્ચ રૂપજીવિતિન્દ્રિયં.

નોઉપાદા ધમ્મં પટિચ્ચ ઉપાદા ચ નોઉપાદા ચ ધમ્મા ઉપ્પજ્જન્તિ નઇન્દ્રિયપચ્ચયા – બાહિરં આહારસમુટ્ઠાનં ઉતુસમુટ્ઠાનં એકં મહાભૂતં…પે…. (૩)

નઝાનપચ્ચયાદિ

૩૮૧. નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નઝાનપચ્ચયા – પઞ્ચવિઞ્ઞાણસહગતં એકં ખન્ધં પટિચ્ચ તયો ખન્ધા…પે… દ્વે ખન્ધે…પે… બાહિરં આહારસમુટ્ઠાનં ઉતુસમુટ્ઠાનં અસઞ્ઞસત્તાનં…પે… દ્વે મહાભૂતે પટિચ્ચ દ્વે મહાભૂતા. (૧)

નોઉપાદા ધમ્મં પટિચ્ચ ઉપાદા ધમ્મો ઉપ્પજ્જતિ નઝાનપચ્ચયા – બાહિરે આહારસમુટ્ઠાને ઉતુસમુટ્ઠાને અસઞ્ઞસત્તાનં મહાભૂતે પટિચ્ચ ઉપાદા કટત્તારૂપં. (૨)

નોઉપાદા ધમ્મં પટિચ્ચ ઉપાદા ચ નોઉપાદા ચ ધમ્મા ઉપ્પજ્જન્તિ નઝાનપચ્ચયા – બાહિરં આહારસમુટ્ઠાનં ઉતુસમુટ્ઠાનં અસઞ્ઞસત્તાનં એકં મહાભૂતં પટિચ્ચ તયો મહાભૂતા…પે… દ્વે મહાભૂતે…પે… મહાભૂતે પટિચ્ચ ઉપાદા કટત્તારૂપં ઉપાદારૂપં. (૩)

ઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નમગ્ગપચ્ચયા પઞ્ચ… નસમ્પયુત્તપચ્ચયા… તીણિ.

નવિપ્પયુત્તપચ્ચયાદિ

૩૮૨. નોઉપાદા ધમ્મં પટિચ્ચ નોઉપાદા ધમ્મો ઉપ્પજ્જતિ નવિપ્પયુત્તપચ્ચયા – અરૂપે નોઉપાદા એકં ખન્ધં પટિચ્ચ તયો ખન્ધા…પે… દ્વે ખન્ધે…પે… બાહિરં આહારસમુટ્ઠાનં ઉતુસમુટ્ઠાનં અસઞ્ઞસત્તાનં એકં મહાભૂતં…પે…. (૧)

નોઉપાદા ધમ્મં પટિચ્ચ ઉપાદા ધમ્મો ઉપ્પજ્જતિ નવિપ્પયુત્તપચ્ચયા – બાહિરે આહારસમુટ્ઠાને ઉતુસમુટ્ઠાને અસઞ્ઞસત્તાનં મહાભૂતે પટિચ્ચ ઉપાદા કટત્તારૂપં, ઉપાદારૂપં. (૨)

નોઉપાદા ધમ્મં પટિચ્ચ ઉપાદા ચ નોઉપાદા ચ ધમ્મા ઉપ્પજ્જન્તિ નવિપ્પયુત્તપચ્ચયા – બાહિરં આહારસમુટ્ઠાનં ઉતુસમુટ્ઠાનં એકં મહાભૂતં પટિચ્ચ તયો મહાભૂતા ઉપાદા ચ રૂપં…પે… દ્વે મહાભૂતે પટિચ્ચ દ્વે મહાભૂતા ઉપાદા ચ રૂપં, અસઞ્ઞસત્તાનં એકં મહાભૂતં પટિચ્ચ તયો મહાભૂતા કટત્તા ચ રૂપં ઉપાદારૂપં…પે… દ્વે મહાભૂતે પટિચ્ચ દ્વે મહાભૂતા કટત્તા ચ રૂપં ઉપાદારૂપં… નોનત્થિપચ્ચયા… નોવિગતપચ્ચયા. (૩)