૧. વિભઙ્ગવારો

હેતુપચ્ચયો

૨૪૭. ચિત્તસહભું ધમ્મં પચ્ચયા ચિત્તસહભૂ ધમ્મો ઉપ્પજ્જતિ હેતુપચ્ચયા… તીણિ (પટિચ્ચસદિસા).

નોચિત્તસહભું ધમ્મં પચ્ચયા નોચિત્તસહભૂ ધમ્મો ઉપ્પજ્જતિ હેતુપચ્ચયા – વત્થું પચ્ચયા ચિત્તં, ચિત્તં પચ્ચયા નોચિત્તસહભુ ચિત્તસમુટ્ઠાનં રૂપં; પટિસન્ધિક્ખણે…પે… (પટિચ્ચવારસદિસં, સબ્બે મહાભૂતા). (૧)

નોચિત્તસહભું ધમ્મં પચ્ચયા ચિત્તસહભૂ ધમ્મો ઉપ્પજ્જતિ હેતુપચ્ચયા – ચિત્તં પચ્ચયા સમ્પયુત્તકા ખન્ધા ચિત્તસહભુ ચિત્તસમુટ્ઠાનઞ્ચ રૂપં, વત્થું પચ્ચયા ચિત્તસહભૂ ખન્ધા; પટિસન્ધિક્ખણે…પે… (સબ્બે મહાભૂતા પટિચ્ચસદિસં). (૨)

નોચિત્તસહભું ધમ્મં પચ્ચયા ચિત્તસહભૂ ચ નોચિત્તસહભૂ ચ ધમ્મા ઉપ્પજ્જન્તિ હેતુપચ્ચયા – ચિત્તં પચ્ચયા સમ્પયુત્તકા ખન્ધા ચિત્તસહભુ ચ નોચિત્તસહભુ ચ ચિત્તસમુટ્ઠાનં રૂપં, વત્થું પચ્ચયા ચિત્તઞ્ચ સમ્પયુત્તકા ચ ખન્ધા; પટિસન્ધિક્ખણે…પે… (પટિચ્ચસદિસં, સબ્બે મહાભૂતા). (૩)

૨૪૮. ચિત્તસહભુઞ્ચ નોચિત્તસહભુઞ્ચ ધમ્મં પચ્ચયા ચિત્તસહભૂ ધમ્મો ઉપ્પજ્જતિ હેતુપચ્ચયા – ચિત્તસહભું એકં ખન્ધઞ્ચ ચિત્તઞ્ચ પચ્ચયા દ્વે ખન્ધા ચિત્તસહભુ ચિત્તસમુટ્ઠાનઞ્ચ રૂપં, દ્વે ખન્ધે ચ…પે… ચિત્તસહભું એકં ખન્ધઞ્ચ વત્થુઞ્ચ પચ્ચયા દ્વે ખન્ધા, દ્વે ખન્ધે ચ…પે… પટિસન્ધિક્ખણે…પે… (પટિચ્ચસદિસં, સબ્બે મહાભૂતા). (૧)

ચિત્તસહભુઞ્ચ નોચિત્તસહભુઞ્ચ ધમ્મં પચ્ચયા નોચિત્તસહભૂ ધમ્મો ઉપ્પજ્જતિ હેતુપચ્ચયા – ચિત્તસહભૂ ખન્ધે ચ ચિત્તઞ્ચ પચ્ચયા નોચિત્તસહભુ ચિત્તસમુટ્ઠાનં રૂપં, ચિત્તસહભૂ ખન્ધે ચ વત્થુઞ્ચ પચ્ચયા ચિત્તં. ચિત્તસહભૂ ખન્ધે ચ મહાભૂતે ચ પચ્ચયા નોચિત્તસહભુ ચિત્તસમુટ્ઠાનં રૂપં; પટિસન્ધિક્ખણે…પે… (પટિચ્ચસદિસં, સબ્બે મહાભૂતા). (૨)

ચિત્તસહભુઞ્ચ નોચિત્તસહભુઞ્ચ ધમ્મં પચ્ચયા ચિત્તસહભૂ ચ નોચિત્તસહભૂ ચ ધમ્મા ઉપ્પજ્જન્તિ હેતુપચ્ચયા – ચિત્તસહભું એકં ખન્ધઞ્ચ ચિત્તઞ્ચ પચ્ચયા દ્વે ખન્ધા ચિત્તસહભુ ચ નોચિત્તસહભુ ચ ચિત્તસમુટ્ઠાનં રૂપં, ચિત્તસહભું એકં ખન્ધઞ્ચ વત્થુઞ્ચ પચ્ચયા દ્વે ખન્ધા ચિત્તઞ્ચ, દ્વે ખન્ધે ચ…પે… પટિસન્ધિક્ખણે…પે… (પટિચ્ચસદિસં, સબ્બે મહાભૂતા). (૩)

આરમ્મણપચ્ચયો

૨૪૯. ચિત્તસહભું ધમ્મં પચ્ચયા ચિત્તસહભૂ ધમ્મો ઉપ્પજ્જતિ આરમ્મણપચ્ચયા… તીણિ (પટિચ્ચસદિસં).

નોચિત્તસહભું ધમ્મં પચ્ચયા નોચિત્તસહભૂ ધમ્મો ઉપ્પજ્જતિ આરમ્મણપચ્ચયા…પે… ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં…પે…. (ઇમં ચિત્તસમુટ્ઠાનદુકં પચ્ચયવારે આરમ્મણસદિસં. છન્નમ્પિ ઇમેસં પઞ્ચવિઞ્ઞાણમૂલા કાતબ્બા. સંખિત્તં.)