૧. વિભઙ્ગવારો

નહેતુપચ્ચયો

૨૪૩. ચિત્તસહભું ધમ્મં પટિચ્ચ ચિત્તસહભૂ ધમ્મો ઉપ્પજ્જતિ નહેતુપચ્ચયા – અહેતુકં ચિત્તસહભું એકં ખન્ધં પટિચ્ચ દ્વે ખન્ધા ચિત્તસહભુ ચિત્તસમુટ્ઠાનઞ્ચ રૂપં, દ્વે ખન્ધે…પે… અહેતુકપટિસન્ધિક્ખણે…પે… વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (એવં નવપિ પઞ્હા કાતબ્બા. ‘‘અહેતુક’’ન્તિ નિયામેતબ્બં. યથા અનુલોમે લબ્ભતિ એવં કાતબ્બં. તીણિ મોહો યથા ચિત્તસમુટ્ઠાનદુકે એવમેવ કાતબ્બા.)

નકમ્મપચ્ચયો

૨૪૪. ચિત્તસહભું ધમ્મં પટિચ્ચ ચિત્તસહભૂ ધમ્મો ઉપ્પજ્જતિ નકમ્મપચ્ચયા – ચિત્તસહભૂ ખન્ધે પટિચ્ચ ચિત્તસહભૂ ચેતના.

નોચિત્તસહભું ધમ્મં પટિચ્ચ નોચિત્તસહભૂ ધમ્મો ઉપ્પજ્જતિ નકમ્મપચ્ચયા – બાહિરં… આહારસમુટ્ઠાનં… ઉતુસમુટ્ઠાનં…પે….

નોચિત્તસહભું ધમ્મં પટિચ્ચ ચિત્તસહભૂ ધમ્મો ઉપ્પજ્જતિ નકમ્મપચ્ચયા – ચિત્તં પટિચ્ચ સમ્પયુત્તકા ચેતના.

ચિત્તસહભુઞ્ચ નોચિત્તસહભુઞ્ચ ધમ્મં પટિચ્ચ ચિત્તસહભૂ ધમ્મો ઉપ્પજ્જતિ નકમ્મપચ્ચયા – ચિત્તસહભૂ ખન્ધે ચ ચિત્તઞ્ચ પટિચ્ચ સમ્પયુત્તકા ચેતના.

નઝાનપચ્ચયો

૨૪૫. ચિત્તસહભું ધમ્મં પટિચ્ચ ચિત્તસહભૂ ધમ્મો ઉપ્પજ્જતિ નઝાનપચ્ચયા – પઞ્ચવિઞ્ઞાણસહગતં…પે….