૧. વિભઙ્ગવારો

હેતુપચ્ચયો

૧૧૯. ચેતસિકો ધમ્મો ચેતસિકસ્સ ધમ્મસ્સ હેતુપચ્ચયેન પચ્ચયો – ચેતસિકા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

ચેતસિકો ધમ્મો અચેતસિકસ્સ ધમ્મસ્સ હેતુપચ્ચયેન પચ્ચયો – ચેતસિકા હેતૂ ચિત્તસ્સ ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૨)

ચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ હેતુપચ્ચયેન પચ્ચયો – ચેતસિકા હેતૂ સમ્પયુત્તકાનં ખન્ધાનં ચિત્તસ્સ ચ ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૩)

આરમ્મણપચ્ચયો

૧૨૦. ચેતસિકો ધમ્મો ચેતસિકસ્સ ધમ્મસ્સ આરમ્મણપચ્ચયેન પચ્ચયો – ચેતસિકે ખન્ધે આરબ્ભ ચેતસિકા ખન્ધા ઉપ્પજન્તિ. (મૂલં પુચ્છિતબ્બં) ચેતસિકે ખન્ધે આરબ્ભ ચિત્તં ઉપ્પજ્જતિ. (મૂલં પુચ્છિતબ્બં) ચેતસિકે ખન્ધે આરબ્ભ ચેતસિકા ખન્ધા ચ ચિત્તઞ્ચ ઉપ્પજ્જન્તિ. (૩)

૧૨૧. અચેતસિકો ધમ્મો અચેતસિકસ્સ ધમ્મસ્સ આરમ્મણપચ્ચયેન પચ્ચયો – અરિયા મગ્ગા વુટ્ઠહિત્વા…પે… ફલં પચ્ચવેક્ખન્તિ, નિબ્બાનં પચ્ચવેક્ખન્તિ. નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો; ચક્ખું…પે… વત્થું અચેતસિકે ખન્ધે અનિચ્ચતો…પે… વિપસ્સતિ અસ્સાદેતિ અભિનન્દતિ, તં આરબ્ભ ચિત્તં ઉપ્પજ્જતિ. દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. ચેતોપરિયઞાણેન અચેતસિકચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં…પે… આકિઞ્ચઞ્ઞાયતનં…પે… રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… અચેતસિકા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અચેતસિકો ધમ્મો ચેતસિકસ્સ ધમ્મસ્સ આરમ્મણપચ્ચયેન પચ્ચયો – અરિયા મગ્ગા વુટ્ઠહિત્વા…પે… નિબ્બાનં પચ્ચવેક્ખન્તિ (પઠમગમનસદિસં); ચક્ખું…પે… વત્થું અચેતસિકે ખન્ધે અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. ચેતોપરિયઞાણેન અચેતસિકચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… રૂપાયતનં ચક્ખુવિઞ્ઞાણસહગતાનં ખન્ધાનં…પે… ફોટ્ઠબ્બાયતનં કાયવિઞ્ઞાણસહગતાનં ખન્ધાનં…પે… અચેતસિકા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

અચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ આરમ્મણપચ્ચયેન પચ્ચયો – અરિયા મગ્ગા વુટ્ઠહિત્વા…પે… નિબ્બાનં પચ્ચવેક્ખન્તિ (પઠમગમનસદિસં); ચક્ખું…પે… વત્થું અચેતસિકે ખન્ધે અનિચ્ચતો…પે… વિપસ્સતિ અસ્સાદેતિ અભિનન્દતિ, તં આરબ્ભ ચિત્તઞ્ચ સમ્પયુત્તકા ચ ખન્ધા ઉપ્પજ્જન્તિ. દિબ્બેન ચક્ખુના રૂપં પસ્સતિ…પે… રૂપાયતનં ચક્ખુવિઞ્ઞાણસ્સ સમ્પયુત્તકાનઞ્ચ ખન્ધાનં આરમ્મણપચ્ચયેન પચ્ચયો…પે… ફોટ્ઠબ્બાયતનં કાયવિઞ્ઞાણસ્સ સમ્પયુત્તકાનઞ્ચ ખન્ધાનં…પે… અચેતસિકા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૩)

૧૨૨. ચેતસિકો ચ અચેતસિકો ચ ધમ્મા ચેતસિકસ્સ ધમ્મસ્સ આરમ્મણપચ્ચયેન પચ્ચયો – ચેતસિકે ખન્ધે ચ ચિત્તઞ્ચ આરબ્ભ ચેતસિકા ખન્ધા ઉપ્પજ્જન્તિ. (મૂલં પુચ્છિતબ્બં) ચેતસિકે ખન્ધે ચ ચિત્તઞ્ચ આરબ્ભ ચિત્તં ઉપ્પજ્જતિ. (મૂલં પુચ્છિતબ્બં) ચેતસિકે ખન્ધે ચ ચિત્તઞ્ચ આરબ્ભ ચેતસિકા ખન્ધા ચ ચિત્તઞ્ચ ઉપ્પજ્જન્તિ. (૩)

અધિપતિપચ્ચયો

૧૨૩. ચેતસિકો ધમ્મો ચેતસિકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – ચેતસિકે ખન્ધે ગરું કત્વા ચેતસિકા ખન્ધા ઉપ્પજ્જન્તિ. સહજાતાધિપતિ – ચેતસિકાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (મૂલં પુચ્છિતબ્બં) આરમ્મણાધિપતિ – ચેતસિકે ખન્ધે ગરું કત્વા ચિત્તં ઉપ્પજ્જતિ. સહજાતાધિપતિ – ચેતસિકાધિપતિ ચિત્તસ્સ ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (મૂલં પુચ્છિતબ્બં ) આરમ્મણાધિપતિ – ચેતસિકે ખન્ધે ગરું કત્વા ચેતસિકા ખન્ધા ચ ચિત્તઞ્ચ ઉપ્પજ્જન્તિ. સહજાતાધિપતિ – ચેતસિકાધિપતિ સમ્પયુત્તકાનં ખન્ધાનં ચિત્તસ્સ ચ ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૧૨૪. અચેતસિકો ધમ્મો અચેતસિકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરિયા મગ્ગા વુટ્ઠહિત્વા…પે… નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ. મગ્ગસ્સ, ફલસ્સ અધિપતિપચ્ચયેન પચ્ચયો; ચક્ખું …પે… વત્થું અચેતસિકે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા ચિત્તં ઉપ્પજ્જતિ. સહજાતાધિપતિ – અચેતસિકાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૧)

અચેતસિકો ધમ્મો ચેતસિકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરિયા મગ્ગા વુટ્ઠહિત્વા…પે… નિબ્બાનં ગરું કત્વા…પે… (પઠમગમનસદિસં); ચક્ખું…પે… વત્થું અચેતસિકે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – અચેતસિકાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૨)

અચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરિયા મગ્ગા વુટ્ઠહિત્વા…પે… નિબ્બાનં…પે… (પઠમગમનં) અચેતસિકે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા ચેતસિકા ખન્ધા ચ ચિત્તઞ્ચ ઉપ્પજ્જન્તિ. સહજાતાધિપતિ – અચેતસિકાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

ચેતસિકો ચ અચેતસિકો ચ ધમ્મા ચેતસિકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ… તીણિ (આરમ્મણાધિપતિયેવ).

અનન્તરપચ્ચયાદિ

૧૨૫. ચેતસિકો ધમ્મો ચેતસિકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ચેતસિકા ખન્ધા પચ્છિમાનં પચ્છિમાનં ચેતસિકાનં ખન્ધાનં અનન્તરપચ્ચયેન પચ્ચયો. (મૂલં પુચ્છિતબ્બં) પુરિમા પુરિમા ચેતસિકા ખન્ધા પચ્છિમસ્સ પચ્છિમસ્સ ચિત્તસ્સ અનન્તરપચ્ચયેન પચ્ચયો. (મૂલં પુચ્છિતબ્બં) પુરિમા પુરિમા ચેતસિકા ખન્ધા પચ્છિમાનં પચ્છિમાનં ચેતસિકાનં ખન્ધાનં ચિત્તસ્સ ચ અનન્તરપચ્ચયેન પચ્ચયો. (૩)

૧૨૬. અચેતસિકો ધમ્મો અચેતસિકસ્સ ધમ્મસ્સ અનન્તરપચ્ચયેન પચ્ચયો – પુરિમં પુરિમં ચિત્તં પચ્છિમસ્સ પચ્છિમસ્સ ચિત્તસ્સ અનન્તરપચ્ચયેન પચ્ચયો; અનુલોમં ગોત્રભુસ્સ…પે… ફલસમાપત્તિયા અનન્તરપચ્ચયેન પચ્ચયો. (૧)

અચેતસિકો ધમ્મો ચેતસિકસ્સ ધમ્મસ્સ અનન્તરપચ્ચયેન પચ્ચયો (એવં તીણિ કાતબ્બાનિ, પઠમગમનસદિસં. પૂરિત્વા કાતબ્બં, નિન્નાનાકરણં).

ચેતસિકો ચ અચેતસિકો ચ ધમ્મા ચેતસિકસ્સ ધમ્મસ્સ અનન્તરપચ્ચયેન પચ્ચયો… તીણિ (આવજ્જનાપિ વુટ્ઠાનમ્પિ નત્થિ).

સમનન્તરપચ્ચયેન પચ્ચયો… નવ, સહજાતપચ્ચયેન પચ્ચયો… નવ (પટિચ્ચવારસદિસં), અઞ્ઞમઞ્ઞપચ્ચયેન પચ્ચયો… નવ (પટિચ્ચવારસદિસં), નિસ્સયપચ્ચયેન પચ્ચયો… નવ (પચ્ચયવારસદિસં).

ઉપનિસ્સયપચ્ચયો

૧૨૭. ચેતસિકો ધમ્મો ચેતસિકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – ચેતસિકા ખન્ધા ચેતસિકાનં ખન્ધાનં ઉપનિસ્સયપચ્ચયેન પચ્ચયો. (મૂલં પુચ્છિતબ્બં, તીણિ ઉપનિસ્સયા) ચેતસિકા ખન્ધા ચિત્તસ્સ ઉપનિસ્સયપચ્ચયેન પચ્ચયો. (મૂલં પુચ્છિતબ્બં, તીણિ ઉપનિસ્સયા) ચેતસિકા ખન્ધા ચેતસિકાનં ખન્ધાનં ચિત્તસ્સ ચ ઉપનિસ્સયપચ્ચયેન પચ્ચયો. (૩)

૧૨૮. અચેતસિકો ધમ્મો અચેતસિકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – ઉતું… ભોજનં… સેનાસનં ચિત્તં ઉપનિસ્સાય દાનં દેતિ…પે… સઙ્ઘં ભિન્દતિ; ઉતું… ભોજનં… સેનાસનં ચિત્તં સદ્ધાય…પે… પઞ્ઞાય… રાગસ્સ…પે… પત્થનાય કાયિકસ્સ સુખસ્સ, કાયિકસ્સ દુક્ખસ્સ, મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો. (૧)

અચેતસિકો ધમ્મો ચેતસિકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો પકતૂપનિસ્સયો…પે…. પકતૂપનિસ્સયો – ઉતું… ભોજનં… સેનાસનં ચિત્તં ઉપનિસ્સાય દાનં દેતિ…પે… (તીણિ, પઠમગમનસદિસં નિન્નાનાકરણં).

ચેતસિકો ચ અચેતસિકો ચ ધમ્મા ચેતસિકસ્સ ધમ્મસ્સ ઉપનિસ્સયપચ્ચયેન પચ્ચયો… તીણિ.

પુરેજાતપચ્ચયો

૧૨૯. અચેતસિકો ધમ્મો અચેતસિકસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… વિપસ્સતિ અસ્સાદેતિ અભિનન્દતિ, તં આરબ્ભ ચિત્તં ઉપ્પજ્જતિ. દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે…. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ ચિત્તસ્સ પુરેજાતપચ્ચયેન પચ્ચયો. (૧)

અચેતસિકો ધમ્મો ચેતસિકસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસહગતાનં ખન્ધાનં…પે… ફોટ્ઠબ્બાયતનં કાયવિઞ્ઞાણસહગતાનં ખન્ધાનં…પે…. વત્થુપુરેજાતં – ચક્ખાયતનં ચક્ખુવિઞ્ઞાણસહગતાનં ખન્ધાનં…પે… કાયાયતનં…પે… વત્થુ ચેતસિકાનં ખન્ધાનં પુરેજાતપચ્ચયેન પચ્ચયો. (૨)

અચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… વિપસ્સતિ અસ્સાદેતિ અભિનન્દતિ, તં આરબ્ભ ચિત્તઞ્ચ સમ્પયુત્તકા ચ ખન્ધા ઉપ્પજ્જન્તિ. દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ સમ્પયુત્તકાનઞ્ચ ખન્ધાનં…પે… ફોટ્ઠબ્બાયતનં…પે…. વત્થુપુરેજાતં – ચક્ખાયતનં ચક્ખુવિઞ્ઞાણસ્સ સમ્પયુત્તકાનઞ્ચ ખન્ધાનં…પે… કાયાયતનં…પે… વત્થુ ચિત્તસ્સ સમ્પયુત્તકાનઞ્ચ ખન્ધાનં પુરેજાતપચ્ચયેન પચ્ચયો. (૩)

પચ્છાજાતાસેવનપચ્ચયા

૧૩૦. ચેતસિકો ધમ્મો અચેતસિકસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં).

અચેતસિકો ધમ્મો અચેતસિકસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં).

ચેતસિકો ચ અચેતસિકો ચ ધમ્મા અચેતસિકસ્સ ધમ્મસ્સ પચ્છાજાતપચ્ચયેન પચ્ચયો (સંખિત્તં).

ચેતસિકો ધમ્મો ચેતસિકસ્સ ધમ્મસ્સ આસેવનપચ્ચયેન પચ્ચયો (સંખિત્તં).

કમ્મપચ્ચયો

૧૩૧. ચેતસિકો ધમ્મો ચેતસિકસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – ચેતસિકા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – ચેતસિકા ચેતના વિપાકાનં ખન્ધાનં કમ્મપચ્ચયેન પચ્ચયો. (૧)

ચેતસિકો ધમ્મો અચેતસિકસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – ચેતસિકા ચેતના ચિત્તસ્સ ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – ચેતસિકા ચેતના વિપાકસ્સ ચિત્તસ્સ કટત્તા ચ રૂપાનં કમ્મપચ્ચયેન પચ્ચયો. (૨)

ચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – ચેતસિકા ચેતના સમ્પયુત્તકાનં ખન્ધાનં ચિત્તસ્સ ચ ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – ચેતસિકા ચેતના વિપાકાનં ખન્ધાનં ચિત્તસ્સ કટત્તા ચ રૂપાનં કમ્મપચ્ચયેન પચ્ચયો. (૩)

વિપાકપચ્ચયાદિ

૧૩૨. ચેતસિકો ધમ્મો ચેતસિકસ્સ ધમ્મસ્સ વિપાકપચ્ચયેન પચ્ચયો… નવ… આહારપચ્ચયેન પચ્ચયો… નવ… ઇન્દ્રિયપચ્ચયેન પચ્ચયો… નવ… ઝાનપચ્ચયેન પચ્ચયો… તીણિ… મગ્ગપચ્ચયેન પચ્ચયો… તીણિ… સમ્પયુત્તપચ્ચયેન પચ્ચયો… પઞ્ચ.

વિપ્પયુત્તપચ્ચયો

૧૩૩. ચેતસિકો ધમ્મો અચેતસિકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (સંખિત્તં). (૧)

અચેતસિકો ધમ્મો અચેતસિકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતં – ચિત્તં ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો; પટિસન્ધિક્ખણે ચિત્તં કટત્તારૂપાનં વિપ્પયુત્તપચ્ચયેન પચ્ચયો; ચિત્તં વત્થુસ્સ વિપ્પયુત્તપચ્ચયેન પચ્ચયો; વત્થુ ચિત્તસ્સ વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ વિપ્પયુત્તપચ્ચયેન પચ્ચયો…પે… કાયાયતનં કાયવિઞ્ઞાણસ્સ…પે… વત્થુ ચિત્તસ્સ વિપ્પયુત્તપચ્ચયેન પચ્ચયો. પચ્છાજાતં – ચિત્તં પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અચેતસિકો ધમ્મો ચેતસિકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં. સહજાતં – પટિસન્ધિક્ખણે વત્થુ ચેતસિકાનં ખન્ધાનં વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસહગતાનં ખન્ધાનં…પે… કાયાયતનં કાયવિઞ્ઞાણસહગતાનં ખન્ધાનં…પે… વત્થુ ચેતસિકાનં ખન્ધાનં વિપ્પયુત્તપચ્ચયેન પચ્ચયો. (૨)

અચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં. સહજાતં – પટિસન્ધિક્ખણે વત્થુ ચેતસિકાનં ખન્ધાનં ચિત્તસ્સ ચ વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ સમ્પયુત્તકાનઞ્ચ ખન્ધાનં…પે… કાયાયતનં કાયવિઞ્ઞાણસ્સ સમ્પયુત્તકાનઞ્ચ ખન્ધાનં…પે… વત્થુ ચિત્તસ્સ સમ્પયુત્તકાનઞ્ચ ખન્ધાનં વિપ્પયુત્તપચ્ચયેન પચ્ચયો. (૩)

ચેતસિકો ચ અચેતસિકો ચ ધમ્મા અચેતસિકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (સંખિત્તં).

અત્થિપચ્ચયો

૧૩૪. ચેતસિકો ધમ્મો ચેતસિકસ્સ ધમ્મસ્સ અત્થિપચ્ચયેન પચ્ચયો… એકં (પટિચ્ચવારસદિસં).

ચેતસિકો ધમ્મો અચેતસિકસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં (સંખિત્તં). (૨)

ચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ અત્થિપચ્ચયેન પચ્ચયો… એકં (પટિચ્ચવારસદિસં). (૩)

૧૩૫. અચેતસિકો ધમ્મો અચેતસિકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં (સંખિત્તં). (૧)

અચેતસિકો ધમ્મો ચેતસિકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતં – ચિત્તં ચેતસિકાનં ખન્ધાનં અત્થિપચ્ચયેન પચ્ચયો; પટિસન્ધિક્ખણે ચિત્તં…પે… પટિસન્ધિક્ખણે વત્થુ ચેતસિકાનં ખન્ધાનં અત્થિપચ્ચયેન પચ્ચયો. પુરેજાતં – ચક્ખું…પે… વત્થું અનિચ્ચતો…પે… (પુરેજાતસદિસં નિન્નાનાકરણં). (૨)

અચેતસિકો ધમ્મો ચેતસિકસ્સ ચ અચેતસિકસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતં – ચિત્તં સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો; પટિસન્ધિક્ખણે ચિત્તં…પે… પટિસન્ધિક્ખણે વત્થુ ચેતસિકાનં ખન્ધાનં ચિત્તસ્સ ચ અત્થિપચ્ચયેન પચ્ચયો. પુરેજાતં – ચક્ખું…પે… વત્થું અનિચ્ચતો…પે… (પુરેજાતસદિસં નિન્નાનં). (૩)

૧૩૬. ચેતસિકો ચ અચેતસિકો ચ ધમ્મા ચેતસિકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – ચક્ખુવિઞ્ઞાણસહગતો એકો ખન્ધો ચ ચક્ખાયતનઞ્ચ દ્વિન્નં ખન્ધાનં…પે… કાયવિઞ્ઞાણસહગતો…પે… ચેતસિકો એકો ખન્ધો ચ વત્થુ ચ દ્વિન્નં ખન્ધાનં અત્થિપચ્ચયેન પચ્ચયો; દ્વે ખન્ધા ચ…પે…. સહજાતો – ચેતસિકો એકો ખન્ધો ચ ચિત્તઞ્ચ દ્વિન્નં ખન્ધાનં અત્થિપચ્ચયેન પચ્ચયો; દ્વે ખન્ધા ચ…પે… (પટિસન્ધિક્ખણે) દ્વેપિ કાતબ્બા. (૧)

ચેતસિકો ચ અચેતસિકો ચ ધમ્મા અચેતસિકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતા – ચક્ખુવિઞ્ઞાણસહગતા ખન્ધા ચ ચક્ખાયતનઞ્ચ ચક્ખુવિઞ્ઞાણસ્સ…પે… કાયવિઞ્ઞાણસ્સ…પે… ચેતસિકા ખન્ધા ચ ચિત્તઞ્ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; ચેતસિકા ખન્ધા ચ ચિત્તઞ્ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. સહજાતા – ચેતસિકા ખન્ધા ચ વત્થુ ચ ચિત્તસ્સ અત્થિપચ્ચયેન પચ્ચયો (પટિસન્ધિક્ખણે તીણિપિ કાતબ્બા). પચ્છાજાતા – ચેતસિકા ખન્ધા ચ ચિત્તઞ્ચ પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – ચેતસિકા ખન્ધા ચ ચિત્તઞ્ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – ચેતસિકા ખન્ધા ચ ચિત્તઞ્ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

ચેતસિકો ચ અચેતસિકો ચ ધમ્મા ચેતસિકસ્સ ચ અચેતસિકસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – ચક્ખુવિઞ્ઞાણસહગતો એકો ખન્ધો ચ ચક્ખાયતનઞ્ચ દ્વિન્નં ખન્ધાનં ચક્ખુવિઞ્ઞાણસ્સ ચ અત્થિપચ્ચયેન પચ્ચયો…પે… કાયવિઞ્ઞાણસહગતો એકો ખન્ધો ચ કાયાયતનઞ્ચ દ્વિન્નં ખન્ધાનં કાયવિઞ્ઞાણસ્સ ચ અત્થિપચ્ચયેન પચ્ચયો; દ્વે ખન્ધા ચ…પે…. સહજાતો – ચેતસિકો એકો ખન્ધો ચ વત્થુ ચ દ્વિન્નં ખન્ધાનં ચિત્તસ્સ ચ અત્થિપચ્ચયેન પચ્ચયો; દ્વે ખન્ધા ચ…પે… (પટિસન્ધિયા દ્વે કાતબ્બા). (૩)