૧. વિભઙ્ગવારો

હેતુપચ્ચયો

૧૨૭. હેતુઞ્ચેવ સહેતુકઞ્ચ ધમ્મં પટિચ્ચ હેતુ ચેવ સહેતુકો ચ ધમ્મો ઉપ્પજ્જતિ હેતુપચ્ચયા – અલોભં પટિચ્ચ અદોસો અમોહો (ચક્કં). લોભં પટિચ્ચ મોહો (ચક્કં); પટિસન્ધિક્ખણે અલોભં પટિચ્ચ અદોસો અમોહો (ચક્કં). (૧)

હેતુઞ્ચેવ સહેતુકઞ્ચ ધમ્મં પટિચ્ચ સહેતુકો ચેવ ન ચ હેતુ ધમ્મો ઉપ્પજ્જતિ હેતુપચ્ચયા – હેતું પટિચ્ચ સમ્પયુત્તકા ખન્ધા; પટિસન્ધિક્ખણે…પે…. (૨)

હેતુઞ્ચેવ સહેતુકઞ્ચ ધમ્મં પટિચ્ચ હેતુ ચેવ સહેતુકો ચ સહેતુકો ચેવ ન ચ હેતુ ચ ધમ્મા ઉપ્પજ્જન્તિ હેતુપચ્ચયા – અલોભં પટિચ્ચ અદોસો અમોહો સમ્પયુત્તકા ચ ખન્ધા (ચક્કં). લોભં પટિચ્ચ મોહો સમ્પયુત્તકા ચ ખન્ધા (ચક્કં); પટિસન્ધિક્ખણે…પે…. (૩)

૧૨૮. સહેતુકઞ્ચેવ ન ચ હેતું ધમ્મં પટિચ્ચ સહેતુકો ચેવ ન ચ હેતુ ધમ્મો ઉપ્પજ્જતિ હેતુપચ્ચયા – સહેતુકઞ્ચેવ ન ચ હેતું એકં ખન્ધં પટિચ્ચ તયો ખન્ધા…પે… દ્વે ખન્ધે…પે… પટિસન્ધિક્ખણે…પે….(૧)

સહેતુકઞ્ચેવ ન ચ હેતું ધમ્મં પટિચ્ચ હેતુ ચેવ સહેતુકો ચ ધમ્મો ઉપ્પજ્જતિ હેતુપચ્ચયા – સહેતુકે ચેવ ન ચ હેતૂ ખન્ધે પટિચ્ચ હેતૂ; પટિસન્ધિક્ખણે…પે…. (૨)

સહેતુકઞ્ચેવ ન ચ હેતું ધમ્મં પટિચ્ચ હેતુ ચેવ સહેતુકો ચ સહેતુકો ચેવ ન ચ હેતુ ચ ધમ્મા ઉપ્પજ્જન્તિ હેતુપચ્ચયા – સહેતુકઞ્ચેવ ન ચ હેતું એકં ખન્ધં પટિચ્ચ તયો ખન્ધા હેતુ ચ…પે… દ્વે ખન્ધે…પે… પટિસન્ધિક્ખણે…પે…. (૩)

૧૨૯. હેતુઞ્ચેવ સહેતુકઞ્ચ સહેતુકઞ્ચેવ ન ચ હેતુઞ્ચ ધમ્મં પટિચ્ચ હેતુ ચેવ સહેતુકો ચ ધમ્મો ઉપ્પજ્જતિ હેતુપચ્ચયા – અલોભઞ્ચ સમ્પયુત્તકે ચ ખન્ધે પટિચ્ચ અદોસો અમોહો (ચક્કં). લોભઞ્ચ સમ્પયુત્તકે ચ ખન્ધે પટિચ્ચ મોહો (ચક્કં); પટિસન્ધિક્ખણે…પે…. (૧)

હેતુઞ્ચેવ સહેતુકઞ્ચ સહેતુકઞ્ચેવ ન ચ હેતુઞ્ચ ધમ્મં પટિચ્ચ સહેતુકો ચેવ ન ચ હેતુ ધમ્મો ઉપ્પજ્જતિ હેતુપચ્ચયા – સહેતુકઞ્ચેવ ન ચ હેતું એકં ખન્ધઞ્ચ હેતુઞ્ચ પટિચ્ચ તયો ખન્ધા…પે… દ્વે ખન્ધે…પે… પટિસન્ધિક્ખણે…પે…. (૨)

હેતુઞ્ચેવ સહેતુકઞ્ચ સહેતુકઞ્ચેવ ન ચ હેતુઞ્ચ ધમ્મં પટિચ્ચ હેતુ ચેવ સહેતુકો ચ સહેતુકો ચેવ ન ચ હેતુ ચ ધમ્મા ઉપ્પજ્જન્તિ હેતુપચ્ચયા – સહેતુકઞ્ચેવ ન ચ હેતું એકં ખન્ધઞ્ચ અલોભઞ્ચ પટિચ્ચ તયો ખન્ધા અદોસો અમોહો ચ…પે… દ્વે ખન્ધે…પે… પટિસન્ધિક્ખણે…પે…. (૩)

(સંખિત્તં. એવં વિત્થારેતબ્બં.)