૧. વિભઙ્ગવારો

હેતુપચ્ચયો

૯૬. સહેતુકો ધમ્મો સહેતુકસ્સ ધમ્મસ્સ હેતુપચ્ચયેન પચ્ચયો – સહેતુકા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો; પટિસન્ધિક્ખણે…પે…. (૧)

સહેતુકો ધમ્મો અહેતુકસ્સ ધમ્મસ્સ હેતુપચ્ચયેન પચ્ચયો – સહેતુકા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ હેતુપચ્ચયેન પચ્ચયો – સહેતુકા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે…પે…. (૩)

૯૭. અહેતુકો ધમ્મો અહેતુકસ્સ ધમ્મસ્સ હેતુપચ્ચયેન પચ્ચયો – વિચિકિચ્છાસહગતો ઉદ્ધચ્ચસહગતો મોહો ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૧)

અહેતુકો ધમ્મો સહેતુકસ્સ ધમ્મસ્સ હેતુપચ્ચયેન પચ્ચયો – વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં હેતુપચ્ચયેન પચ્ચયો. (૨)

અહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ હેતુપચ્ચયેન પચ્ચયો – વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

આરમ્મણપચ્ચયો

૯૮. સહેતુકો ધમ્મો સહેતુકસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં…પે… ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, ઝાના વુટ્ઠહિત્વા ઝાનં પચ્ચવેક્ખતિ. અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ. પહીને કિલેસે…પે… વિક્ખમ્ભિતે કિલેસે…પે… પુબ્બે…પે… સહેતુકે ખન્ધે અનિચ્ચતો…પે… દોમનસ્સં ઉપ્પજ્જતિ; કુસલાકુસલે નિરુદ્ધે સહેતુકો વિપાકો તદારમ્મણતા ઉપ્પજ્જતિ; ચેતોપરિયઞાણેન સહેતુકચિત્તસમઙ્ગિસ્સ ચિત્તં જાનન્તિ. આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… સહેતુકા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ આરમ્મણપચ્ચયેન પચ્ચયો; સહેતુકે ખન્ધે આરબ્ભ સહેતુકા ખન્ધા ઉપ્પજ્જન્તિ. (૧)

સહેતુકો ધમ્મો અહેતુકસ્સ ધમ્મસ્સ આરમ્મણપચ્ચયેન પચ્ચયો – સહેતુકે ખન્ધે અનિચ્ચતો …પે… દોમનસ્સં ઉપ્પજ્જતિ, કુસલાકુસલે નિરુદ્ધે અહેતુકો વિપાકો તદારમ્મણતા ઉપ્પજ્જતિ, સહેતુકે ખન્ધે આરબ્ભ અહેતુકા ખન્ધા ચ મોહો ચ ઉપ્પજ્જન્તિ. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ આરમ્મણપચ્ચયેન પચ્ચયો – સહેતુકે ખન્ધે આરબ્ભ વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. (૩)

૯૯. અહેતુકો ધમ્મો અહેતુકસ્સ ધમ્મસ્સ આરમ્મણપચ્ચયેન પચ્ચયો – નિબ્બાનં આવજ્જનાય આરમ્મણપચ્ચયેન પચ્ચયો; ચક્ખું…પે… વત્થું… અહેતુકે ખન્ધે ચ મોહઞ્ચ અનિચ્ચતો…પે… દોમનસ્સં ઉપ્પજ્જતિ; કુસલાકુસલે નિરુદ્ધે અહેતુકો વિપાકો તદારમ્મણતા ઉપ્પજ્જતિ; રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… અહેતુકે ખન્ધે ચ મોહઞ્ચ આરબ્ભ અહેતુકા ખન્ધા ચ મોહો ચ ઉપ્પજ્જન્તિ. (૧)

અહેતુકો ધમ્મો સહેતુકસ્સ ધમ્મસ્સ આરમ્મણપચ્ચયેન પચ્ચયો – અરિયા નિબ્બાનં પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ આરમ્મણપચ્ચયેન પચ્ચયો. અરિયા અહેતુકે પહીને કિલેસે પચ્ચવેક્ખન્તિ, વિક્ખમ્ભિતે કિલેસે…પે… પુબ્બે…પે… ચક્ખું…પે… વત્થું…પે… અહેતુકે ખન્ધે ચ મોહઞ્ચ અનિચ્ચતો…પે… દોમનસ્સં ઉપ્પજ્જતિ; કુસલાકુસલે નિરુદ્ધે સહેતુકો વિપાકો તદારમ્મણતા ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન અહેતુકચિત્તસમઙ્ગિસ્સ ચિત્તં જાનન્તિ; અહેતુકા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ આરમ્મણપચ્ચયેન પચ્ચયો; અહેતુકે ખન્ધે ચ મોહઞ્ચ આરબ્ભ સહેતુકા ખન્ધા ઉપ્પજ્જન્તિ. (૨)

અહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ આરમ્મણપચ્ચયેન પચ્ચયો – ચક્ખું આરબ્ભ વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ; સોતં …પે… વત્થું… અહેતુકે ખન્ધે ચ મોહઞ્ચ આરબ્ભ વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. (૩)

૧૦૦. સહેતુકો ચ અહેતુકો ચ ધમ્મા સહેતુકસ્સ ધમ્મસ્સ આરમ્મણપચ્ચયેન પચ્ચયો – વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ આરબ્ભ સહેતુકા ખન્ધા ઉપ્પજ્જન્તિ. (૧)

સહેતુકો ચ અહેતુકો ચ ધમ્મા અહેતુકસ્સ ધમ્મસ્સ આરમ્મણપચ્ચયેન પચ્ચયો – વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ આરબ્ભ અહેતુકા ખન્ધા ચ મોહો ચ ઉપ્પજ્જન્તિ. (૨)

સહેતુકો ચ અહેતુકો ચ ધમ્મા સહેતુકસ્સ ચ અહેતુકસ્સ ચ ધમ્મસ્સ આરમ્મણપચ્ચયેન પચ્ચયો – વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ આરબ્ભ વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. (૩)

અધિપતિપચ્ચયો

૧૦૧. સહેતુકો ધમ્મો સહેતુકસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં…પે… ઉપોસથકમ્મં કત્વા તં ગરું કત્વા પચ્ચવેક્ખતિ, ઝાના…પે… અરિયા મગ્ગા વુટ્ઠહિત્વા મગ્ગં ગરું કત્વા…પે… ફલં…પે… સહેતુકે ખન્ધે ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – સહેતુકાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

સહેતુકો ધમ્મો અહેતુકસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સહેતુકાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – સહેતુકાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

અહેતુકો ધમ્મો સહેતુકસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – અરિયા નિબ્બાનં ગરું કત્વા પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ અધિપતિપચ્ચયેન પચ્ચયો; ચક્ખું…પે… વત્થું… અહેતુકે ખન્ધે ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૧)

અનન્તરપચ્ચયો

૧૦૨. સહેતુકો ધમ્મો સહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા સહેતુકા ખન્ધા પચ્છિમાનં પચ્છિમાનં સહેતુકાનં ખન્ધાનં અનન્તરપચ્ચયેન પચ્ચયો; અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ… મગ્ગો ફલસ્સ… ફલં ફલસ્સ… અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. (૧)

સહેતુકો ધમ્મો અહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા વિચિકિચ્છાસહગતા ઉદ્ધચ્ચસહગતા ખન્ધા પચ્છિમસ્સ પચ્છિમસ્સ વિચિકિચ્છાસહગતસ્સ ઉદ્ધચ્ચસહગતસ્સ મોહસ્સ અનન્તરપચ્ચયેન પચ્ચયો; સહેતુકં ચુતિચિત્તં અહેતુકસ્સ ઉપપત્તિચિત્તસ્સ અનન્તરપચ્ચયેન પચ્ચયો; સહેતુકં ભવઙ્ગં આવજ્જનાય અનન્તરપચ્ચયેન પચ્ચયો; સહેતુકં ભવઙ્ગં અહેતુકસ્સ ભવઙ્ગસ્સ અનન્તરપચ્ચયેન પચ્ચયો; સહેતુકા ખન્ધા અહેતુકસ્સ વુટ્ઠાનસ્સ અનન્તરપચ્ચયેન પચ્ચયો. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ અનન્તરપચ્ચયેન પચ્ચયો – પુરિમા પુરિમા વિચિકિચ્છાસહગતા ઉદ્ધચ્ચસહગતા ખન્ધા પચ્છિમાનં પચ્છિમાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

૧૦૩. અહેતુકો ધમ્મો અહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમો પુરિમો વિચિકિચ્છાસહગતો ઉદ્ધચ્ચસહગતો મોહો પચ્છિમસ્સ પચ્છિમસ્સ વિચિકિચ્છાસહગતસ્સ ઉદ્ધચ્ચસહગતસ્સ મોહસ્સ અનન્તરપચ્ચયેન પચ્ચયો; પુરિમા પુરિમા અહેતુકા ખન્ધા પચ્છિમાનં પચ્છિમાનં અહેતુકાનં ખન્ધાનં અનન્તરપચ્ચયેન પચ્ચયો; આવજ્જના પઞ્ચન્નં વિઞ્ઞાણાનં અનન્તરપચ્ચયેન પચ્ચયો. (૧)

અહેતુકો ધમ્મો સહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમો પુરિમો વિચિકિચ્છાસહગતો ઉદ્ધચ્ચસહગતો મોહો પચ્છિમાનં પચ્છિમાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં અનન્તરપચ્ચયેન પચ્ચયો; અહેતુકં ચુતિચિત્તં સહેતુકસ્સ ઉપપત્તિચિત્તસ્સ અનન્તરપચ્ચયેન પચ્ચયો; અહેતુકં ભવઙ્ગં સહેતુકસ્સ ભવઙ્ગસ્સ અનન્તરપચ્ચયેન પચ્ચયો; આવજ્જના સહેતુકાનં ખન્ધાનં અનન્તરપચ્ચયેન પચ્ચયો; અહેતુકા ખન્ધા સહેતુકસ્સ વુટ્ઠાનસ્સ અનન્તરપચ્ચયેન પચ્ચયો. (૨)

અહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ અનન્તરપચ્ચયેન પચ્ચયો – પુરિમો પુરિમો વિચિકિચ્છાસહગતો ઉદ્ધચ્ચસહગતો મોહો પચ્છિમાનં પચ્છિમાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો; આવજ્જના વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

૧૦૪. સહેતુકો ચ અહેતુકો ચ ધમ્મા સહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પચ્છિમાનં પચ્છિમાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં અનન્તરપચ્ચયેન પચ્ચયો. (૧)

સહેતુકો ચ અહેતુકો ચ ધમ્મા અહેતુકસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પચ્છિમસ્સ પચ્છિમસ્સ વિચિકિચ્છાસહગતસ્સ ઉદ્ધચ્ચસહગતસ્સ મોહસ્સ અનન્તરપચ્ચયેન પચ્ચયો; વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ અહેતુકસ્સ વુટ્ઠાનસ્સ અનન્તરપચ્ચયેન પચ્ચયો. (૨)

સહેતુકો ચ અહેતુકો ચ ધમ્મા સહેતુકસ્સ ચ અહેતુકસ્સ ચ ધમ્મસ્સ અનન્તરપચ્ચયેન પચ્ચયો – પુરિમા પુરિમા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પચ્છિમાનં પચ્છિમાનં વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અનન્તરપચ્ચયેન પચ્ચયો. (૩)

સહજાતપચ્ચયાદિ

૧૦૫. સહેતુકો ધમ્મો સહેતુકસ્સ ધમ્મસ્સ સહજાતપચ્ચયેન પચ્ચયો (પટિચ્ચવારે સહજાતસદિસં, ઇહ ઘટના નત્થિ)… અઞ્ઞમઞ્ઞપચ્ચયેન પચ્ચયો (પટિચ્ચવારસદિસં)… નિસ્સયપચ્ચયેન પચ્ચયો (પટિચ્ચવારે નિસ્સયપચ્ચયસદિસં, ઇહ ઘટના નત્થિ).

ઉપનિસ્સયપચ્ચયો

૧૦૬. સહેતુકો ધમ્મો સહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સહેતુકા ખન્ધા સહેતુકાનં ખન્ધાનં ઉપનિસ્સયપચ્ચયેન પચ્ચયો. (૧)

સહેતુકો ધમ્મો અહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સહેતુકા ખન્ધા અહેતુકાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સહેતુકા ખન્ધા વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

૧૦૭. અહેતુકો ધમ્મો અહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કાયિકં સુખં કાયિકસ્સ સુખસ્સ, કાયિકસ્સ દુક્ખસ્સ, મોહસ્સ ચ ઉપનિસ્સયપચ્ચયેન પચ્ચયો; કાયિકં દુક્ખં… ઉતુ… ભોજનં… સેનાસનં કાયિકસ્સ સુખસ્સ, કાયિકસ્સ દુક્ખસ્સ, મોહસ્સ ચ ઉપનિસ્સયપચ્ચયેન પચ્ચયો; મોહો કાયિકસ્સ સુખસ્સ, કાયિકસ્સ દુક્ખસ્સ, મોહસ્સ ચ ઉપનિસ્સયપચ્ચયેન પચ્ચયો; કાયિકં સુખં… કાયિકં દુક્ખં… ઉતુ… ભોજનં, સેનાસનં, મોહો ચ કાયિકસ્સ સુખસ્સ, કાયિકસ્સ દુક્ખસ્સ, મોહસ્સ ચ ઉપનિસ્સયપચ્ચયેન પચ્ચયો. (૧)

અહેતુકો ધમ્મો સહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કાયિકં સુખં ઉપનિસ્સાય દાનં દેતિ…પે… સઙ્ઘં ભિન્દતિ; કાયિકં દુક્ખં… ઉતું… ભોજનં… સેનાસનં… મોહં ઉપનિસ્સાય દાનં દેતિ…પે… સઙ્ઘં ભિન્દતિ; કાયિકં સુખં…પે… મોહો ચ સદ્ધાય…પે… પઞ્ઞાય રાગસ્સ…પે… પત્થનાય મગ્ગસ્સ ફલસમાપત્તિયા ઉપનિસ્સયપચ્ચયેન પચ્ચયો. (૨)

અહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – કાયિકં સુખં મોહો ચ વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

૧૦૮. સહેતુકો ચ અહેતુકો ચ ધમ્મા સહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ સહેતુકાનં ખન્ધાનં ઉપનિસ્સયપચ્ચયેન પચ્ચયો. (૧)

સહેતુકો ચ અહેતુકો ચ ધમ્મા અહેતુકસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ અહેતુકાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૨)

સહેતુકો ચ અહેતુકો ચ ધમ્મા સહેતુકસ્સ ચ અહેતુકસ્સ ચ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ ઉપનિસ્સયપચ્ચયેન પચ્ચયો. (૩)

પુરેજાતપચ્ચયો

૧૦૯. અહેતુકો ધમ્મો અહેતુકસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ, કુસલાકુસલે નિરુદ્ધે અહેતુકો વિપાકો તદારમ્મણતા ઉપ્પજ્જતિ; રૂપાયતનં ચક્ખુવિઞ્ઞાણસ્સ …પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ… પુરેજાતં વત્થુ અહેતુકાનં ખન્ધાનં મોહસ્સ ચ પુરેજાતપચ્ચયેન પચ્ચયો. (૧)

અહેતુકો ધમ્મો સહેતુકસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ; કુસલાકુસલે નિરુદ્ધે સહેતુકો વિપાકો તદારમ્મણતા ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. વત્થુપુરેજાતં – વત્થુ સહેતુકાનં ખન્ધાનં પુરેજાતપચ્ચયેન પચ્ચયો. (૨)

અહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… વત્થું આરબ્ભ વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ. વત્થુપુરેજાતં – વત્થુ વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ પુરેજાતપચ્ચયેન પચ્ચયો. (૩)

પચ્છાજાતપચ્ચયાદિ

૧૧૦. સહેતુકો ધમ્મો અહેતુકસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા સહેતુકા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

અહેતુકો ધમ્મો અહેતુકસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અહેતુકા ખન્ધા ચ મોહો ચ પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

સહેતુકો ચ અહેતુકો ચ ધમ્મા અહેતુકસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

સહેતુકો ધમ્મો સહેતુકસ્સ ધમ્મસ્સ આસેવનપચ્ચયેન પચ્ચયો (અનન્તરસદિસં. આવજ્જનમ્પિ ભવઙ્ગમ્પિ નત્થિ, આસેવનપચ્ચયે વજ્જેતબ્બા નવપિ ).

કમ્મપચ્ચયો

૧૧૧. સહેતુકો ધમ્મો સહેતુકસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – સહેતુકા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – સહેતુકા ચેતના વિપાકાનં સહેતુકાનં ખન્ધાનં કમ્મપચ્ચયેન પચ્ચયો. (૧)

સહેતુકો ધમ્મો અહેતુકસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – સહેતુકા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. નાનાક્ખણિકા – સહેતુકા ચેતના વિપાકાનં અહેતુકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – સહેતુકા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. નાનાક્ખણિકા – સહેતુકા ચેતના વિપાકાનં સહેતુકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૩)

અહેતુકો ધમ્મો અહેતુકસ્સ ધમ્મસ્સ કમ્મપચ્ચયેન પચ્ચયો – અહેતુકા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો; પટિસન્ધિક્ખણે…પે…. (૧)

વિપાકપચ્ચયો

૧૧૨. સહેતુકો ધમ્મો સહેતુકસ્સ ધમ્મસ્સ વિપાકપચ્ચયેન પચ્ચયો – વિપાકો સહેતુકો એકો ખન્ધો તિણ્ણન્નં ખન્ધાનં…પે… દ્વે ખન્ધા…પે… પટિસન્ધિક્ખણે…પે…. (૧)

સહેતુકો ધમ્મો અહેતુકસ્સ ધમ્મસ્સ વિપાકપચ્ચયેન પચ્ચયો – વિપાકા સહેતુકા ખન્ધા ચિત્તસમુટ્ઠાનાનં રૂપાનં વિપાકપચ્ચયેન પચ્ચયો; પટિસન્ધિક્ખણે…પે…. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ વિપાકપચ્ચયેન પચ્ચયો – વિપાકો સહેતુકો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં…પે… દ્વે ખન્ધા…પે… પટિસન્ધિક્ખણે…પે…. (૩)

અહેતુકો ધમ્મો અહેતુકસ્સ ધમ્મસ્સ વિપાકપચ્ચયેન પચ્ચયો – વિપાકો અહેતુકો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ વિપાકપચ્ચયેન પચ્ચયો. (૧)

આહારપચ્ચયો

૧૧૩. સહેતુકો ધમ્મો સહેતુકસ્સ ધમ્મસ્સ આહારપચ્ચયેન પચ્ચયો… તીણિ.

અહેતુકો ધમ્મો અહેતુકસ્સ ધમ્મસ્સ આહારપચ્ચયેન પચ્ચયો – અહેતુકા આહારા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં…પે… પટિસન્ધિક્ખણે…પે… કબળીકારો આહારો ઇમસ્સ કાયસ્સ આહારપચ્ચયેન પચ્ચયો. (૧)

ઇન્દ્રિયપચ્ચયાદિ

૧૧૪. સહેતુકો ધમ્મો સહેતુકસ્સ ધમ્મસ્સ ઇન્દ્રિયપચ્ચયેન પચ્ચયો… તીણિ.

અહેતુકો ધમ્મો અહેતુકસ્સ ધમ્મસ્સ ઇન્દ્રિયપચ્ચયેન પચ્ચયો – અહેતુકા ઇન્દ્રિયા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં…પે… પટિસન્ધિક્ખણે…પે… ચક્ખુન્દ્રિયં ચક્ખુવિઞ્ઞાણસ્સ…પે… કાયિન્દ્રિયં કાયવિઞ્ઞાણસ્સ ઇન્દ્રિયપચ્ચયેન પચ્ચયો; રૂપજીવિતિન્દ્રિયં કટત્તારૂપાનં ઇન્દ્રિયપચ્ચયેન પચ્ચયો. (૧)

સહેતુકો ધમ્મો સહેતુકસ્સ ધમ્મસ્સ ઝાનપચ્ચયેન પચ્ચયો… તીણિ.

અહેતુકો ધમ્મો અહેતુકસ્સ ધમ્મસ્સ ઝાનપચ્ચયેન પચ્ચયો – અહેતુકાનિ ઝાનઙ્ગાનિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં…પે… પટિસન્ધિક્ખણે…પે…. (૧)

સહેતુકો ધમ્મો સહેતુકસ્સ ધમ્મસ્સ મગ્ગપચ્ચયેન પચ્ચયો… તીણિ.

સહેતુકો ધમ્મો સહેતુકસ્સ ધમ્મસ્સ સમ્પયુત્તપચ્ચયેન પચ્ચયો (પટિચ્ચવારે સમ્પયુત્તસદિસા છ પઞ્હા).

વિપ્પયુત્તપચ્ચયો

૧૧૫. સહેતુકો ધમ્મો અહેતુકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – સહેતુકા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો; પટિસન્ધિક્ખણે સહેતુકા ખન્ધા કટત્તારૂપાનં વિપ્પયુત્તપચ્ચયેન પચ્ચયો. પચ્છાજાતા – સહેતુકા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અહેતુકો ધમ્મો અહેતુકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતા – અહેતુકા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો; પટિસન્ધિક્ખણે અહેતુકા ખન્ધા કટત્તારૂપાનં વિપ્પયુત્તપચ્ચયેન પચ્ચયો; ખન્ધા વત્થુસ્સ વિપ્પયુત્તપચ્ચયેન પચ્ચયો; વત્થુ ખન્ધાનં વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ… વત્થુ અહેતુકાનં ખન્ધાનં મોહસ્સ ચ વિપ્પયુત્તપચ્ચયેન પચ્ચયો. પચ્છાજાતા – અહેતુકા ખન્ધા ચ મોહો ચ પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અહેતુકો ધમ્મો સહેતુકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં. સહજાતં – પટિસન્ધિક્ખણે વત્થુ સહેતુકાનં ખન્ધાનં વિપ્પયુત્તપચ્ચયેન પચ્ચયો. પુરેજાતં – વત્થુ સહેતુકાનં ખન્ધાનં વિપ્પયુત્તપચ્ચયેન પચ્ચયો. (૨)

અહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ વિપ્પયુત્તપચ્ચયેન પચ્ચયો. (૩)

સહેતુકો ચ અહેતુકો ચ ધમ્મા અહેતુકસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અત્થિપચ્ચયો

૧૧૬. સહેતુકો ધમ્મો સહેતુકસ્સ ધમ્મસ્સ અત્થિપચ્ચયેન પચ્ચયો – સહેતુકો એકો ખન્ધો તિણ્ણન્નં ખન્ધાનં…પે… દ્વે ખન્ધા…પે… પટિસન્ધિક્ખણે…પે…. (૧)

સહેતુકો ધમ્મો અહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – સહેતુકા ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; વિચિકિચ્છાસહગતા ઉદ્ધચ્ચસહગતા ખન્ધા મોહસ્સ ચ ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો; પટિસન્ધિક્ખણે…પે…. પચ્છાજાતા – સહેતુકા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

સહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ અત્થિપચ્ચયેન પચ્ચયો – સહેતુકો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો; વિચિકિચ્છાસહગતો ઉદ્ધચ્ચસહગતો એકો ખન્ધો તિણ્ણન્નં ખન્ધાનં મોહસ્સ ચ ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે સહેતુકો…પે…. (૩)

૧૧૭. અહેતુકો ધમ્મો અહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – અહેતુકો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે… વિચિકિચ્છાસહગતો ઉદ્ધચ્ચસહગતો મોહો ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; પટિસન્ધિક્ખણે…પે… (યાવ અસઞ્ઞસત્તા કાતબ્બં). પુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ, કુસલાકુસલે નિરુદ્ધે અહેતુકો વિપાકો તદારમ્મણતા ઉપ્પજ્જતિ; રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ અત્થિપચ્ચયેન પચ્ચયો; વત્થુ અહેતુકાનં ખન્ધાનં મોહસ્સ ચ અત્થિપચ્ચયેન પચ્ચયો. પચ્છાજાતા – અહેતુકા ખન્ધા ચ મોહો ચ પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો; કબળીકારો આહારો ઇમસ્સ કાયસ્સ અત્થિપચ્ચયેન પચ્ચયો; રૂપજીવિતિન્દ્રિયં કટત્તારૂપાનં અત્થિપચ્ચયેન પચ્ચયો. (૧)

અહેતુકો ધમ્મો સહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં અત્થિપચ્ચયેન પચ્ચયો; પટિસન્ધિક્ખણે વત્થુ સહેતુકાનં ખન્ધાનં અત્થિપચ્ચયેન પચ્ચયો. પુરેજાતં – ચક્ખું…પે… વત્થું અનિચ્ચતો…પે… દોમનસ્સં ઉપ્પજ્જતિ; કુસલાકુસલે નિરુદ્ધે સહેતુકો વિપાકો તદારમ્મણતા ઉપ્પજ્જતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, વત્થુ સહેતુકાનં ખન્ધાનં અત્થિપચ્ચયેન પચ્ચયો. (૨)

અહેતુકો ધમ્મો સહેતુકસ્સ ચ અહેતુકસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – વિચિકિચ્છાસહગતો ઉદ્ધચ્ચસહગતો મોહો સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો. પુરેજાતં – ચક્ખું…પે… વત્થું આરબ્ભ વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ઉપ્પજ્જન્તિ, વત્થુ વિચિકિચ્છાસહગતાનં ઉદ્ધચ્ચસહગતાનં ખન્ધાનં મોહસ્સ ચ અત્થિપચ્ચયેન પચ્ચયો. (૩)

૧૧૮. સહેતુકો ચ અહેતુકો ચ ધમ્મા સહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – વિચિકિચ્છાસહગતો ઉદ્ધચ્ચસહગતો એકો ખન્ધો ચ મોહો ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે… પટિસન્ધિક્ખણે સહેતુકો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. સહજાતો – સહેતુકો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ…પે…. (૧)

સહેતુકો ચ અહેતુકો ચ ધમ્મા અહેતુકસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતા – સહેતુકા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો; પટિસન્ધિક્ખણે સહેતુકા ખન્ધા ચ મહાભૂતા ચ કટત્તારૂપાનં અત્થિપચ્ચયેન પચ્ચયો. સહજાતા – વિચિકિચ્છાસહગતા ઉદ્ધચ્ચસહગતા ખન્ધા ચ વત્થુ ચ મોહસ્સ અત્થિપચ્ચયેન પચ્ચયો. પચ્છાજાતા – વિચિકિચ્છાસહગતા ઉદ્ધચ્ચસહગતા ખન્ધા ચ મોહો ચ પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – સહેતુકા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – સહેતુકા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

સહેતુકો ચ અહેતુકો ચ ધમ્મા સહેતુકસ્સ ચ અહેતુકસ્સ ચ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – વિચિકિચ્છાસહગતો ઉદ્ધચ્ચસહગતો એકો ખન્ધો ચ મોહો ચ તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે…. સહજાતો – વિચિકિચ્છાસહગતો ઉદ્ધચ્ચસહગતો એકો ખન્ધો ચ વત્થુ ચ તિણ્ણન્નં ખન્ધાનં મોહસ્સ ચ અત્થિપચ્ચયેન પચ્ચયો…પે… દ્વે ખન્ધા ચ…પે…. (૩)