૧. વિભઙ્ગવારો

હેતુપચ્ચયો

૧. હેતું ધમ્મં પટિચ્ચ હેતુ ધમ્મો ઉપ્પજ્જતિ હેતુપચ્ચયા – અલોભં પટિચ્ચ અદોસો અમોહો, અદોસં પટિચ્ચ અલોભો અમોહો, અમોહં પટિચ્ચ અલોભો અદોસો, લોભં પટિચ્ચ મોહો, મોહં પટિચ્ચ લોભો, દોસં પટિચ્ચ મોહો, મોહં પટિચ્ચ દોસો; પટિસન્ધિક્ખણે…પે…. (૧)

હેતું ધમ્મં પટિચ્ચ નહેતુ ધમ્મો ઉપ્પજ્જતિ હેતુપચ્ચયા – હેતું ધમ્મં પટિચ્ચ સમ્પયુત્તકા ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે…પે…. (૨)

હેતું ધમ્મં પટિચ્ચ હેતુ ચ નહેતુ ચ ધમ્મા ઉપ્પજ્જન્તિ હેતુપચ્ચયા – અલોભં પટિચ્ચ અદોસો અમોહો સમ્પયુત્તકા ચ ખન્ધા ચિત્તસમુટ્ઠાનઞ્ચ રૂપં (ચક્કં). લોભં પટિચ્ચ મોહો સમ્પયુત્તકા ચ ખન્ધા ચિત્તસમુટ્ઠાનઞ્ચ રૂપં…પે… પટિસન્ધિક્ખણે…પે…. (૩)

૨. નહેતું ધમ્મં પટિચ્ચ નહેતુ ધમ્મો ઉપ્પજ્જતિ હેતુપચ્ચયા – નહેતું એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે…પે… ખન્ધે પટિચ્ચ વત્થુ, વત્થું પટિચ્ચ ખન્ધા; એકં મહાભૂતં…પે…. (૧)

નહેતું ધમ્મં પટિચ્ચ હેતુ ધમ્મો ઉપ્પજ્જતિ હેતુપચ્ચયા – નહેતૂ ખન્ધે પટિચ્ચ હેતૂ; પટિસન્ધિક્ખણે…પે… વત્થું પટિચ્ચ હેતૂ. (૨)

નહેતું ધમ્મં પટિચ્ચ હેતુ ચ નહેતુ ચ ધમ્મા ઉપ્પજ્જન્તિ હેતુપચ્ચયા – નહેતું એકં ખન્ધં પટિચ્ચ તયો ખન્ધા હેતુ ચ ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા હેતુ ચ ચિત્તસમુટ્ઠાનઞ્ચ રૂપં; પટિસન્ધિક્ખણે…પે… પટિસન્ધિક્ખણે વત્થું પટિચ્ચ હેતૂ સમ્પયુત્તકા ચ ખન્ધા. (૩)

૩. હેતુઞ્ચ નહેતુઞ્ચ ધમ્મં પટિચ્ચ હેતુ ધમ્મો ઉપ્પજ્જતિ હેતુપચ્ચયા – અલોભઞ્ચ સમ્પયુત્તકે ચ ખન્ધે પટિચ્ચ અદોસો અમોહો (ચક્કં). લોભઞ્ચ સમ્પયુત્તકે ચ ખન્ધે પટિચ્ચ મોહો, દોસઞ્ચ સમ્પયુત્તકે ચ ખન્ધે પટિચ્ચ મોહો…પે… પટિસન્ધિક્ખણે…પે… અલોભઞ્ચ વત્થુઞ્ચ પટિચ્ચ અદોસો અમોહો…પે…. (૧)

હેતુઞ્ચ નહેતુઞ્ચ ધમ્મં પટિચ્ચ નહેતુ ધમ્મો ઉપ્પજ્જતિ હેતુપચ્ચયા – નહેતું એકં ખન્ધઞ્ચ હેતુઞ્ચ પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે ચ હેતુઞ્ચ પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે…પે… પટિસન્ધિક્ખણે વત્થુઞ્ચ હેતુઞ્ચ પટિચ્ચ સમ્પયુત્તકા ખન્ધા. (૨)

હેતુઞ્ચ નહેતુઞ્ચ ધમ્મં પટિચ્ચ હેતુ ચ નહેતુ ચ ધમ્મા ઉપ્પજ્જન્તિ હેતુપચ્ચયા – નહેતું એકં ખન્ધઞ્ચ અલોભઞ્ચ પટિચ્ચ તયો ખન્ધા અદોસો અમોહો ચ ચિત્તસમુટ્ઠાનઞ્ચ રૂપં…પે… દ્વે ખન્ધે ચ અલોભઞ્ચ પટિચ્ચ દ્વે ખન્ધા અદોસો અમોહો ચ ચિત્તસમુટ્ઠાનઞ્ચ રૂપં (ચક્કં). નહેતું એકં ખન્ધઞ્ચ લોભઞ્ચ પટિચ્ચ તયો ખન્ધા મોહો ચ ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… વત્થુઞ્ચ અલોભઞ્ચ પટિચ્ચ અદોસો અમોહો સમ્પયુત્તકા ચ ખન્ધા. (૩)

આરમ્મણપચ્ચયાદિ

૪. હેતું ધમ્મં પટિચ્ચ હેતુ ધમ્મો ઉપ્પજ્જતિ આરમ્મણપચ્ચયા (રૂપં છડ્ડેત્વા અરૂપેયેવ નવ પઞ્હા)… અધિપતિપચ્ચયા (પટિસન્ધિ નત્થિ, પરિપુણ્ણં) એકં મહાભૂતં પટિચ્ચ…પે… મહાભૂતે પટિચ્ચ ચિત્તસમુટ્ઠાનં રૂપં ઉપાદારૂપં… (ઇમં નાનં) અનન્તરપચ્ચયા… સમનન્તરપચ્ચયા… સહજાતપચ્ચયા (સબ્બે મહાભૂતા યાવ અસઞ્ઞસત્તા)… અઞ્ઞમઞ્ઞપચ્ચયા… નિસ્સયપચ્ચયા… ઉપનિસ્સયપચ્ચયા… પુરેજાતપચ્ચયા… આસેવનપચ્ચયા (દ્વીસુપિ પટિસન્ધિ નત્થિ)… કમ્મપચ્ચયા… વિપાકપચ્ચયા (સંખિત્તં)… અવિગતપચ્ચયા.