૧. વિભઙ્ગવારો

હેતુપચ્ચયો

૭૨. સહેતુકં ધમ્મં પચ્ચયા સહેતુકો ધમ્મો ઉપ્પજ્જતિ હેતુપચ્ચયા (સહેતુકમૂલકં પટિચ્ચવારસદિસં).

અહેતુકં ધમ્મં પચ્ચયા અહેતુકો ધમ્મો…પે… (પટિચ્ચવારસદિસંયેવ). (૧)

અહેતુકં ધમ્મં પચ્ચયા સહેતુકો ધમ્મો ઉપ્પજ્જતિ હેતુપચ્ચયા – વત્થું પચ્ચયા સહેતુકા ખન્ધા, વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા; પટિસન્ધિક્ખણે વત્થું પચ્ચયા સહેતુકા ખન્ધા. (૨)

અહેતુકં ધમ્મં પચ્ચયા સહેતુકો ચ અહેતુકો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા સહેતુકા ખન્ધા, મહાભૂતે પચ્ચયા ચિત્તસમુટ્ઠાનં રૂપં, વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે વત્થું…પે…. (૩)

૭૩. સહેતુકઞ્ચ અહેતુકઞ્ચ ધમ્મં પચ્ચયા સહેતુકો ધમ્મો ઉપ્પજ્જતિ હેતુપચ્ચયા – સહેતુકં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પચ્ચયા તયો ખન્ધા…પે… દ્વે ખન્ધે…પે… પટિસન્ધિક્ખણે…પે…. (૧)

સહેતુકઞ્ચ અહેતુકઞ્ચ ધમ્મં પચ્ચયા અહેતુકો ધમ્મો ઉપ્પજ્જતિ હેતુપચ્ચયા – સહેતુકે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પચ્ચયા ચિત્તસમુટ્ઠાનં રૂપં; પટિસન્ધિક્ખણે…પે…. (૨)

સહેતુકઞ્ચ અહેતુકઞ્ચ ધમ્મં પચ્ચયા સહેતુકો ચ અહેતુકો ચ ધમ્મા ઉપ્પજ્જન્તિ હેતુપચ્ચયા – સહેતુકં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… સહેતુકે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે સહેતુકં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… સહેતુકે ખન્ધે ચ મહાભૂતે ચ પચ્ચયા કટત્તારૂપં. (૩)

આરમ્મણપચ્ચયો

૭૪. સહેતુકં ધમ્મં પચ્ચયા સહેતુકો ધમ્મો ઉપ્પજ્જતિ આરમ્મણપચ્ચયા – સહેતુકં એકં ખન્ધં પચ્ચયા તયો ખન્ધા…પે… પટિસન્ધિક્ખણે…પે…. (૧)

સહેતુકં ધમ્મં પચ્ચયા અહેતુકો ધમ્મો ઉપ્પજ્જતિ આરમ્મણપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે પચ્ચયા વિચિકિચ્છાસહગતો ઉદ્ધચ્ચસહગતો મોહો. (૨)

સહેતુકં ધમ્મં પચ્ચયા સહેતુકો ચ અહેતુકો ચ ધમ્મા ઉપ્પજ્જન્તિ આરમ્મણપચ્ચયા – વિચિકિચ્છાસહગતં ઉદ્ધચ્ચસહગતં એકં ખન્ધં પચ્ચયા તયો ખન્ધા મોહો ચ…પે… દ્વે ખન્ધે…પે…. (૩)

૭૫. અહેતુકં ધમ્મં પચ્ચયા અહેતુકો ધમ્મો ઉપ્પજ્જતિ આરમ્મણપચ્ચયા – અહેતુકં એકં ખન્ધં…પે… દ્વે ખન્ધે…પે… પટિસન્ધિક્ખણે વત્થું પચ્ચયા ખન્ધા, ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા અહેતુકા ખન્ધા. (૧)

અહેતુકં ધમ્મં પચ્ચયા સહેતુકો ધમ્મો ઉપ્પજ્જતિ આરમ્મણપચ્ચયા – વત્થું પચ્ચયા સહેતુકા ખન્ધા, વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા; પટિસન્ધિક્ખણે…પે…. (૨)

અહેતુકં ધમ્મં પચ્ચયા સહેતુકો ચ અહેતુકો ચ ધમ્મા ઉપ્પજ્જન્તિ આરમ્મણપચ્ચયા – વત્થું પચ્ચયા વિચિકિચ્છાસહગતા ઉદ્ધચ્ચસહગતા ખન્ધા મોહો ચ. (૩)

૭૬. સહેતુકઞ્ચ અહેતુકઞ્ચ ધમ્મં પચ્ચયા સહેતુકો ધમ્મો ઉપ્પજ્જતિ આરમ્મણપચ્ચયા – સહેતુકં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પચ્ચયા તયો ખન્ધા…પે… દ્વે ખન્ધે…પે… પટિસન્ધિક્ખણે…પે…. (૧)

સહેતુકઞ્ચ અહેતુકઞ્ચ ધમ્મં પચ્ચયા અહેતુકો ધમ્મો ઉપ્પજ્જતિ આરમ્મણપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે ચ વત્થુઞ્ચ પચ્ચયા વિચિકિચ્છાસહગતો ઉદ્ધચ્ચસહગતો મોહો. (૨)

સહેતુકઞ્ચ અહેતુકઞ્ચ ધમ્મં પચ્ચયા સહેતુકો ચ અહેતુકો ચ ધમ્મા ઉપ્પજ્જન્તિ આરમ્મણપચ્ચયા – વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ વત્થુઞ્ચ પચ્ચયા તયો ખન્ધા મોહો ચ…પે… દ્વે ખન્ધે…પે…. (૩)

અધિપતિપચ્ચયો

૭૭. સહેતુકં ધમ્મં પચ્ચયા સહેતુકો ધમ્મો ઉપ્પજ્જતિ અધિપતિપચ્ચયા (અધિપતિયા નવ પઞ્હા પવત્તેયેવ).

અનન્તરપચ્ચયાદિ

૭૮. સહેતુકં ધમ્મં પચ્ચયા સહેતુકો ધમ્મો ઉપ્પજ્જતિ અનન્તરપચ્ચયા… સમનન્તરપચ્ચયા… સહજાતપચ્ચયા… તીણિ (પટિચ્ચવારસદિસા).

અહેતુકં ધમ્મં પચ્ચયા અહેતુકો ધમ્મો ઉપ્પજ્જતિ સહજાતપચ્ચયા – અહેતુકં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… (યાવ અસઞ્ઞસત્તા), ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા અહેતુકા ખન્ધા. (૧)

અહેતુકં ધમ્મં પચ્ચયા સહેતુકો ધમ્મો ઉપ્પજ્જતિ સહજાતપચ્ચયા – વત્થું પચ્ચયા સહેતુકા ખન્ધા, વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા; પટિસન્ધિક્ખણે…પે…. (૨)

અહેતુકં ધમ્મં પચ્ચયા સહેતુકો ચ અહેતુકો ચ ધમ્મા ઉપ્પજ્જન્તિ સહજાતપચ્ચયા – વત્થું પચ્ચયા સહેતુકા ખન્ધા, મહાભૂતે પચ્ચયા ચિત્તસમુટ્ઠાનં રૂપં, વિચિકિચ્છાસહગતં ઉદ્ધચ્ચસહગતં મોહં પચ્ચયા સમ્પયુત્તકા ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે વત્થું…પે…. (૩)

૭૯. સહેતુકઞ્ચ અહેતુકઞ્ચ ધમ્મં પચ્ચયા સહેતુકો ધમ્મો ઉપ્પજ્જતિ સહજાતપચ્ચયા – સહેતુકં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પચ્ચયા તયો ખન્ધા…પે… દ્વે ખન્ધે…પે… પટિસન્ધિક્ખણે…પે…. (૧)

સહેતુકઞ્ચ અહેતુકઞ્ચ ધમ્મં પચ્ચયા અહેતુકો ધમ્મો ઉપ્પજ્જતિ સહજાતપચ્ચયા – સહેતુકે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પચ્ચયા ચિત્તસમુટ્ઠાનં રૂપં; પટિસન્ધિક્ખણે…પે… વિચિકિચ્છાસહગતે ઉદ્ધચ્ચસહગતે ખન્ધે ચ વત્થુઞ્ચ પચ્ચયા વિચિકિચ્છાસહગતો ઉદ્ધચ્ચસહગતો મોહો. (૨)

સહેતુકઞ્ચ અહેતુકઞ્ચ ધમ્મં પચ્ચયા સહેતુકો ચ અહેતુકો ચ ધમ્મા ઉપ્પજ્જન્તિ સહજાતપચ્ચયા – સહેતુકં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… સહેતુકે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં, વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… સહેતુકે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ વત્થુઞ્ચ પચ્ચયા તયો ખન્ધા મોહો ચ…પે… પટિસન્ધિક્ખણે સહેતુકં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… સહેતુકે ખન્ધે ચ મહાભૂતે ચ પચ્ચયા કટત્તારૂપં. (૩)

અઞ્ઞમઞ્ઞપચ્ચયાદિ

૮૦. સહેતુકં ધમ્મં પચ્ચયા સહેતુકો ધમ્મો ઉપ્પજ્જતિ અઞ્ઞમઞ્ઞપચ્ચયા…પે… અવિગતપચ્ચયા.