૧. વિભઙ્ગવારો

નહેતુપચ્ચયો

૬૨. સહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૧)

અહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નહેતુપચ્ચયા – અહેતુકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે…. (૧) (સબ્બં યાવ અસઞ્ઞસત્તા તાવ કાતબ્બં.)

નઆરમ્મણપચ્ચયાદિ

૬૩. સહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નઆરમ્મણપચ્ચયા – સહેતુકે ખન્ધે પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે…. (૧)

અહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નઆરમ્મણપચ્ચયા – અહેતુકે ખન્ધે પટિચ્ચ ચિત્તસમુટ્ઠાનં રૂપં, વિચિકિચ્છાસહગતં ઉદ્ધચ્ચસહગતં મોહં પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે… ખન્ધે પટિચ્ચ વત્થુ; એકં મહાભૂતં…પે… અસઞ્ઞસત્તાનં એકં…પે…. (૧)

સહેતુકઞ્ચ અહેતુકઞ્ચ ધમ્મં પટિચ્ચ અહેતુકો ધમ્મો ઉપ્પજ્જતિ નઆરમ્મણપચ્ચયા – સહેતુકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં, વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે…. (૧)

સહેતુકં ધમ્મં પટિચ્ચ સહેતુકો ધમ્મો ઉપ્પજ્જતિ નઅધિપતિપચ્ચયા… (અનુલોમસહજાતસદિસા) નઅનન્તરપચ્ચયા… નસમનન્તરપચ્ચયા… નઅઞ્ઞમઞ્ઞપચ્ચયા… નઉપનિસ્સયપચ્ચયા… નપુરેજાતપચ્ચયા – અરૂપે સહેતુકં એકં ખન્ધં…પે… પટિસન્ધિક્ખણે…પે…. (૧)

૬૪. સહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નપુરેજાતપચ્ચયા – અરૂપે વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો, સહેતુકે ખન્ધે પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે…. (૨)

સહેતુકં ધમ્મં પટિચ્ચ સહેતુકો ચ અહેતુકો ચ ધમ્મા ઉપ્પજ્જન્તિ નપુરેજાતપચ્ચયા – અરૂપે વિચિકિચ્છાસહગતં ઉદ્ધચ્ચસહગતં એકં ખન્ધં પટિચ્ચ તયો ખન્ધા મોહો ચ…પે… દ્વે ખન્ધે…પે… પટિસન્ધિક્ખણે…પે…. (૩)

અહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નપુરેજાતપચ્ચયા – અરૂપે અહેતુકં એકં ખન્ધં…પે… દ્વે ખન્ધે…પે… અહેતુકે ખન્ધે પટિચ્ચ ચિત્તસમુટ્ઠાનં રૂપં, વિચિકિચ્છાસહગતં ઉદ્ધચ્ચસહગતં મોહં પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે… (યાવ અસઞ્ઞસત્તા તાવ વિત્થારો). (૧)

અહેતુકં ધમ્મં પટિચ્ચ સહેતુકો ધમ્મો ઉપ્પજ્જતિ નપુરેજાતપચ્ચયા – અરૂપે વિચિકિચ્છાસહગતં ઉદ્ધચ્ચસહગતં મોહં પટિચ્ચ સમ્પયુત્તકા ખન્ધા; પટિસન્ધિક્ખણે વત્થું પટિચ્ચ સહેતુકા ખન્ધા. (૨)

અહેતુકં ધમ્મં પટિચ્ચ સહેતુકો ચ અહેતુકો ચ ધમ્મા ઉપ્પજ્જન્તિ નપુરેજાતપચ્ચયા – પટિસન્ધિક્ખણે વત્થું પટિચ્ચ સહેતુકા ખન્ધા, મહાભૂતે પટિચ્ચ કટત્તારૂપં. (૩)

૬૫. સહેતુકઞ્ચ અહેતુકઞ્ચ ધમ્મં પટિચ્ચ સહેતુકો ધમ્મો ઉપ્પજ્જતિ નપુરેજાતપચ્ચયા – અરૂપે વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા…પે… દ્વે ખન્ધે…પે… પટિસન્ધિક્ખણે સહેતુકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે…પે…. (૧)

સહેતુકઞ્ચ અહેતુકઞ્ચ ધમ્મં પટિચ્ચ અહેતુકો ધમ્મો ઉપ્પજ્જતિ નપુરેજાતપચ્ચયા – સહેતુકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં, વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પટિચ્ચ ચિત્તસમુટ્ઠાનં રૂપં; પટિસન્ધિક્ખણે…પે…. (૨)

સહેતુકઞ્ચ અહેતુકઞ્ચ ધમ્મં પટિચ્ચ સહેતુકો ચ અહેતુકો ચ ધમ્મા ઉપ્પજ્જન્તિ નપુરેજાતપચ્ચયા – પટિસન્ધિક્ખણે સહેતુકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે…પે… સહેતુકે ખન્ધે ચ મહાભૂતે ચ પટિચ્ચ કટત્તારૂપં. (૩)

નપચ્છાજાતપચ્ચયાદિ

૬૬. સહેતુકં ધમ્મં પટિચ્ચ સહેતુકો ધમ્મો ઉપ્પજ્જતિ નપચ્છાજાતપચ્ચયા… નઆસેવનપચ્ચયા… નકમ્મપચ્ચયા – સહેતુકે ખન્ધે પટિચ્ચ સહેતુકા ચેતના. (૧)

અહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નકમ્મપચ્ચયા – અહેતુકે ખન્ધે પટિચ્ચ અહેતુકા ચેતના… બાહિરં… આહારસમુટ્ઠાનં… ઉતુસમુટ્ઠાનં…પે…. (૧)

અહેતુકં ધમ્મં પટિચ્ચ સહેતુકો ધમ્મો ઉપ્પજ્જતિ નકમ્મપચ્ચયા – વિચિકિચ્છાસહગતં ઉદ્ધચ્ચસહગતં મોહં પટિચ્ચ સમ્પયુત્તકા ચેતના. (૨)

સહેતુકઞ્ચ અહેતુકઞ્ચ ધમ્મં પટિચ્ચ સહેતુકો ધમ્મો ઉપ્પજ્જતિ નકમ્મપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે ચ મોહઞ્ચ પટિચ્ચ સમ્પયુત્તકા ચેતના… નવિપાકપચ્ચયા (પટિસન્ધિ નત્થિ).

નઆહારપચ્ચયાદિ

૬૭. અહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નઆહારપચ્ચયા… નઇન્દ્રિયપચ્ચયા… નઝાનપચ્ચયા… નમગ્ગપચ્ચયા… નસમ્પયુત્તપચ્ચયા.

નવિપ્પયુત્તપચ્ચયાદિ

૬૮. સહેતુકં ધમ્મં પટિચ્ચ સહેતુકો ધમ્મો ઉપ્પજ્જતિ નવિપ્પયુત્તપચ્ચયા – અરૂપે સહેતુકં એકં ખન્ધં…પે…. (૧)

સહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નવિપ્પયુત્તપચ્ચયા – અરૂપે વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૨)

સહેતુકં ધમ્મં પટિચ્ચ સહેતુકો ચ અહેતુકો ચ ધમ્મા ઉપ્પજ્જન્તિ નવિપ્પયુત્તપચ્ચયા – અરૂપે વિચિકિચ્છાસહગતં ઉદ્ધચ્ચસહગતં એકં ખન્ધં પટિચ્ચ તયો ખન્ધા મોહો ચ…પે… દ્વે ખન્ધે…પે…. (૩)

અહેતુકં ધમ્મં પટિચ્ચ અહેતુકો ધમ્મો ઉપ્પજ્જતિ નવિપ્પયુત્તપચ્ચયા – અરૂપે અહેતુકં એકં ખન્ધં પટિચ્ચ તયો ખન્ધા, દ્વે ખન્ધે…પે…. (૧)

અહેતુકં ધમ્મં પટિચ્ચ સહેતુકો ધમ્મો ઉપ્પજ્જતિ નવિપ્પયુત્તપચ્ચયા – અરૂપે વિચિકિચ્છાસહગતં ઉદ્ધચ્ચસહગતં મોહં પટિચ્ચ સમ્પયુત્તકા ખન્ધા. (૨)

સહેતુકઞ્ચ અહેતુકઞ્ચ ધમ્મં પટિચ્ચ સહેતુકો ધમ્મો ઉપ્પજ્જતિ નવિપ્પયુત્તપચ્ચયા – અરૂપે વિચિકિચ્છાસહગતં ઉદ્ધચ્ચસહગતં એકં ખન્ધઞ્ચ મોહઞ્ચ પટિચ્ચ તયો ખન્ધા…પે… દ્વે ખન્ધે…પે… નોનત્થિપચ્ચયા… નોવિગતપચ્ચયા. (૧)