૧. વિભઙ્ગવારો

હેતુપચ્ચયો

૬૯. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ હેતુપચ્ચયેન પચ્ચયો – દસ્સનેન પહાતબ્બા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ હેતુપચ્ચયેન પચ્ચયો – દસ્સનેન પહાતબ્બા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૨)

દસ્સનેન પહાતબ્બો ધમ્મો દસ્સનેન પહાતબ્બસ્સ ચ નેવદસ્સનેન નભાવનાય પહાતબ્બસ્સ ચ ધમ્મસ્સ હેતુપચ્ચયેન પચ્ચયો – દસ્સનેન પહાતબ્બા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૭૦. ભાવનાય પહાતબ્બો ધમ્મો…પે… ધમ્મસ્સ હેતુપચ્ચયેન પચ્ચયો – ભાવનાય પહાતબ્બા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ…પે… ભાવનાય પહાતબ્બા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. (૨)

ભાવનાય પહાતબ્બો ધમ્મો ભાવનાય પહાતબ્બસ્સ ચ નેવદસ્સનેન નભાવનાય પહાતબ્બસ્સ ચ ધમ્મસ્સ…પે… ભાવનાય પહાતબ્બા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ…પે… નેવદસ્સનેન નભાવનાય પહાતબ્બા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. પટિસન્ધિક્ખણે નેવદસ્સનેન નભાવનાય પહાતબ્બા હેતૂ સમ્પયુત્તકાનં ખન્ધાનં કટત્તા ચ રૂપાનં હેતુપચ્ચયેન પચ્ચયો. (૧)

આરમ્મણપચ્ચયો

૭૧. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ આરમ્મણપચ્ચયેન પચ્ચયો – દસ્સનેન પહાતબ્બં રાગં અસ્સાદેતિ અભિનન્દતિ, તં આરબ્ભ દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ. દસ્સનેન પહાતબ્બં દોમનસ્સં ઉપ્પજ્જતિ, દિટ્ઠિં અસ્સાદેતિ અભિનન્દતિ, તં આરબ્ભ દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ. દસ્સનેન પહાતબ્બં દોમનસ્સં ઉપ્પજ્જતિ, વિચિકિચ્છં આરબ્ભ વિચિકિચ્છા ઉપ્પજ્જતિ, દિટ્ઠિ ઉપ્પજ્જતિ, દસ્સનેન પહાતબ્બં દોમનસ્સં ઉપ્પજ્જતિ. દસ્સનેન પહાતબ્બં દોમનસ્સં આરબ્ભ દસ્સનેન પહાતબ્બં દોમનસ્સં ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ. (૧)

દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ આરમ્મણપચ્ચયેન પચ્ચયો – અરિયા દસ્સનેન પહાતબ્બે પહીને કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. દસ્સનેન પહાતબ્બે ખન્ધે અનિચ્ચતો દુક્ખતો અનત્તતો વિપસ્સન્તિ. ચેતોપરિયઞાણેન દસ્સનેન પહાતબ્બચિત્તસમઙ્ગિસ્સ ચિત્તં જાનન્તિ. દસ્સનેન પહાતબ્બા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૭૨. ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ આરમ્મણપચ્ચયેન પચ્ચયો – ભાવનાય પહાતબ્બં રાગં અસ્સાદેતિ અભિનન્દતિ, તં આરબ્ભ ભાવનાય પહાતબ્બો રાગો ઉપ્પજ્જતિ, ઉદ્ધચ્ચં ઉપ્પજ્જતિ. ભાવનાય પહાતબ્બં દોમનસ્સં ઉપ્પજ્જતિ, ઉદ્ધચ્ચં આરબ્ભ ઉદ્ધચ્ચં ઉપ્પજ્જતિ. ભાવનાય પહાતબ્બં દોમનસ્સં ઉપ્પજ્જતિ, ભાવનાય પહાતબ્બં દોમનસ્સં આરબ્ભ ભાવનાય પહાતબ્બં દોમનસ્સં ઉપ્પજ્જતિ, ઉદ્ધચ્ચં ઉપ્પજ્જતિ. (૧)

ભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ આરમ્મણપચ્ચયેન પચ્ચયો – ભાવનાય પહાતબ્બં રાગં અસ્સાદેતિ અભિનન્દતિ, તં આરબ્ભ દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, દસ્સનેન પહાતબ્બં દોમનસ્સં ઉપ્પજ્જતિ. ઉદ્ધચ્ચં આરબ્ભ દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, દસ્સનેન પહાતબ્બં દોમનસ્સં ઉપ્પજ્જતિ. ભાવનાય પહાતબ્બં દોમનસ્સં આરબ્ભ દસ્સનેન પહાતબ્બં દોમનસ્સં ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ. (૨)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ આરમ્મણપચ્ચયેન પચ્ચયો – અરિયા ભાવનાય પહાતબ્બે પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. ભાવનાય પહાતબ્બે ખન્ધે અનિચ્ચતો દુક્ખતો અનત્તતો વિપસ્સન્તિ, ચેતોપરિયઞાણેન ભાવનાય પહાતબ્બચિત્તસમઙ્ગિસ્સ ચિત્તં જાનન્તિ. ભાવનાય પહાતબ્બા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૩)

૭૩. નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, ઝાના વુટ્ઠહિત્વા ઝાનં પચ્ચવેક્ખતિ. અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ, નિબ્બાનં પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો. ચક્ખું અનિચ્ચતો દુક્ખતો અનત્તતો વિપસ્સતિ; સોતં… ઘાનં… જિવ્હં… કાયં… રૂપે… સદ્દે… ગન્ધે… રસે… ફોટ્ઠબ્બે… વત્થું… નેવદસ્સનેન નભાવનાય પહાતબ્બે ખન્ધે અનિચ્ચતો દુક્ખતો અનત્તતો વિપસ્સતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન નેવદસ્સનેન નભાવનાય પહાતબ્બચિત્તસમઙ્ગિસ્સ ચિત્તં જાનન્તિ, આકાસાનઞ્ચાયતનં વિઞ્ઞાણઞ્ચાયતનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… રૂપાયતનં ચક્ખુવિઞ્ઞાણસ્સ આરમ્મણપચ્ચયેન પચ્ચયો…પે… ફોટ્ઠબ્બાયતનં કાયવિઞ્ઞાણસ્સ આરમ્મણપચ્ચયેન પચ્ચયો…પે… નેવદસ્સનેન નભાવનાય પહાતબ્બા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં અસ્સાદેતિ અભિનન્દતિ, તં આરબ્ભ દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, દસ્સનેન પહાતબ્બં દોમનસ્સં ઉપ્પજ્જતિ. પુબ્બે સુચિણ્ણાનિ અસ્સાદેતિ અભિનન્દતિ…પે… ઝાના વુટ્ઠહિત્વા ઝાનં અસ્સાદેતિ અભિનન્દતિ, તં આરબ્ભ દસ્સનેન પહાતબ્બો રાગો…પે… દિટ્ઠિ…પે… વિચિકિચ્છા…પે… ઝાને પરિહીને વિપ્પટિસારિસ્સ દસ્સનેન પહાતબ્બં દોમનસ્સં ઉપ્પજ્જતિ. ચક્ખું અસ્સાદેતિ અભિનન્દતિ…પે… સોતં… ઘાનં… જિવ્હં… કાયં… રૂપે… સદ્દે… ગન્ધે… રસે… ફોટ્ઠબ્બે… વત્થું… નેવદસ્સનેન નભાવનાય પહાતબ્બે ખન્ધે અસ્સાદેતિ અભિનન્દતિ, તં આરબ્ભ દસ્સનેન પહાતબ્બો રાગો…પે… દિટ્ઠિ…પે… વિચિકિચ્છા…પે… દસ્સનેન પહાતબ્બં દોમનસ્સં ઉપ્પજ્જતિ. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં અસ્સાદેતિ અભિનન્દતિ, તં આરબ્ભ ભાવનાય પહાતબ્બો રાગો ઉપ્પજ્જતિ, ઉદ્ધચ્ચં ઉપ્પજ્જતિ, ભાવનાય પહાતબ્બં દોમનસ્સં ઉપ્પજ્જતિ. પુબ્બે સુચિણ્ણાનિ…પે… ઝાના વુટ્ઠહિત્વા…પે… ચક્ખું…પે… વત્થું… નેવદસ્સનેન નભાવનાય પહાતબ્બે ખન્ધે અસ્સાદેતિ…પે… તં આરબ્ભ ભાવનાય પહાતબ્બો રાગો ઉપ્પજ્જતિ, ઉદ્ધચ્ચં ઉપ્પજ્જતિ, ભાવનાય પહાતબ્બં દોમનસ્સં ઉપ્પજ્જતિ. (૩)

અધિપતિપચ્ચયો

૭૪. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દસ્સનેન પહાતબ્બં રાગં ગરું કત્વા અસ્સાદેતિ અભિનન્દતિ, તં ગરું કત્વા દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ; દિટ્ઠિં ગરું કત્વા અસ્સાદેતિ અભિનન્દતિ, તં ગરું કત્વા દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – દસ્સનેન પહાતબ્બાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – દસ્સનેન પહાતબ્બાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

દસ્સનેન પહાતબ્બો ધમ્મો દસ્સનેન પહાતબ્બસ્સ ચ નેવદસ્સનેન નભાવનાય પહાતબ્બસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – દસ્સનેન પહાતબ્બાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૭૫. ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – ભાવનાય પહાતબ્બં રાગં ગરું કત્વા અસ્સાદેતિ અભિનન્દતિ, તં ગરું કત્વા ભાવનાય પહાતબ્બો રાગો ઉપ્પજ્જતિ. સહજાતાધિપતિ – ભાવનાય પહાતબ્બાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

ભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – ભાવનાય પહાતબ્બં રાગં ગરું કત્વા અસ્સાદેતિ અભિનન્દતિ, તં ગરું કત્વા દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ. (૨)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – ભાવનાય પહાતબ્બાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૩)

ભાવનાય પહાતબ્બો ધમ્મો ભાવનાય પહાતબ્બસ્સ ચ નેવદસ્સનેન નભાવનાય પહાતબ્બસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – ભાવનાય પહાતબ્બાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૪)

૭૬. નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે સુચિણ્ણાનિ…પે… ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, ફલં ગરું કત્વા પચ્ચવેક્ખન્તિ, નિબ્બાનં ગરું કત્વા પચ્ચવેક્ખન્તિ; નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ અધિપતિપચ્ચયેન પચ્ચયો. સહજાતાધિપતિ – નેવદસ્સનેન નભાવનાય પહાતબ્બાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા અસ્સાદેતિ અભિનન્દતિ, તં ગરું કત્વા દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ. પુબ્બે સુચિણ્ણાનિ ગરું કત્વા…પે… ઝાના વુટ્ઠહિત્વા ઝાનં ગરું કત્વા…પે… ચક્ખું…પે… વત્થું… નેવદસ્સનેન નભાવનાય પહાતબ્બે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા અસ્સાદેતિ અભિનન્દતિ, તં ગરું કત્વા ભાવનાય પહાતબ્બો રાગો ઉપ્પજ્જતિ. પુબ્બે…પે… નેવદસ્સનેન નભાવનાય પહાતબ્બે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા ભાવનાય પહાતબ્બો રાગો ઉપ્પજ્જતિ. (૩)

અનન્તરપચ્ચયો

૭૭. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા દસ્સનેન પહાતબ્બા ખન્ધા પચ્છિમાનં પચ્છિમાનં દસ્સનેન પહાતબ્બાનં ખન્ધાનં અનન્તરપચ્ચયેન પચ્ચયો.

દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અનન્તરપચ્ચયેન પચ્ચયો – દસ્સનેન પહાતબ્બા ખન્ધા વુટ્ઠાનસ્સ અનન્તરપચ્ચયેન પચ્ચયો. (૨)

ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા ભાવનાય પહાતબ્બા ખન્ધા પચ્છિમાનં પચ્છિમાનં ભાવનાય પહાતબ્બાનં ખન્ધાનં અનન્તરપચ્ચયેન પચ્ચયો. (૧)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અનન્તરપચ્ચયેન પચ્ચયો – ભાવનાય પહાતબ્બા ખન્ધા વુટ્ઠાનસ્સ અનન્તરપચ્ચયેન પચ્ચયો. (૨)

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા નેવદસ્સનેન નભાવનાય પહાતબ્બા ખન્ધા પચ્છિમાનં પચ્છિમાનં નેવદસ્સનેન નભાવનાય પહાતબ્બાનં ખન્ધાનં અનન્તરપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ… મગ્ગો ફલસ્સ… ફલં ફલસ્સ… અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ…પે… આવજ્જના દસ્સનેન પહાતબ્બાનં ખન્ધાનં અનન્તરપચ્ચયેન પચ્ચયો. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ અનન્તરપચ્ચયેન પચ્ચયો – આવજ્જના ભાવનાય પહાતબ્બાનં ખન્ધાનં અનન્તરપચ્ચયેન પચ્ચયો. (૩)

સમનન્તરપચ્ચયો

૭૮. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ સમનન્તરપચ્ચયેન પચ્ચયો (અનન્તરસદિસં).

સહજાતપચ્ચયો

૭૯. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ સહજાતપચ્ચયેન પચ્ચયો… તીણિ.

ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ… તીણિ.

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ સહજાતપચ્ચયેન પચ્ચયો – નેવદસ્સનેન નભાવનાય પહાતબ્બો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ સહજાતપચ્ચયેન પચ્ચયો. વત્થુ ખન્ધાનં…પે… એકં મહાભૂતં તિણ્ણન્નં મહાભૂતાનં…પે… મહાભૂતા ચિત્તસમુટ્ઠાનાનં રૂપાનં…પે… બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં…પે…. (૧)

દસ્સનેન પહાતબ્બો ચ નેવદસ્સનેન નભાવનાય પહાતબ્બો ચ ધમ્મા નેવદસ્સનેન નભાવનાય પહાતબ્બસ્સ ધમ્મસ્સ સહજાતપચ્ચયેન પચ્ચયો – દસ્સનેન પહાતબ્બા ખન્ધા ચ મહાભૂતા ચ ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૧)

ભાવનાય પહાતબ્બો ચ નેવદસ્સનેન નભાવનાય પહાતબ્બો ચ ધમ્મા નેવદસ્સનેન નભાવનાય પહાતબ્બસ્સ ધમ્મસ્સ સહજાતપચ્ચયેન પચ્ચયો – ભાવનાય પહાતબ્બા ખન્ધા ચ મહાભૂતા ચ ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૧)

અઞ્ઞમઞ્ઞપચ્ચયો

૮૦. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – દસ્સનેન પહાતબ્બો એકો ખન્ધો તિણ્ણન્નં ખન્ધાનં…પે…. (૧)

ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ…પે… ભાવનાય પહાતબ્બો એકો ખન્ધો તિણ્ણન્નં ખન્ધાનં…પે…. (૧)

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ…પે… નેવદસ્સનેન નભાવનાય પહાતબ્બો એકો ખન્ધો તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે નેવદસ્સનેન નભાવનાય પહાતબ્બો એકો ખન્ધો તિણ્ણન્નં ખન્ધાનં વત્થુસ્સ ચ અઞ્ઞમઞ્ઞપચ્ચયેન પચ્ચયો…પે… દ્વે ખન્ધા…પે… ખન્ધા વત્થુસ્સ…પે… વત્થુ ખન્ધાનં…પે… એકં મહાભૂતં તિણ્ણન્નં મહાભૂતાનં અઞ્ઞમઞ્ઞપચ્ચયેન પચ્ચયો…પે… અસઞ્ઞસત્તાનં…પે…. (૧)

નિસ્સયપચ્ચયો

૮૧. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ નિસ્સયપચ્ચયેન પચ્ચયો… તીણિ.

ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ… તીણિ.

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ નિસ્સયપચ્ચયેન પચ્ચયો – નેવદસ્સનેન નભાવનાય પહાતબ્બો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ…પે… વત્થુ ખન્ધાનં…પે… એકં મહાભૂતં…પે… અસઞ્ઞસત્તાનં…પે… ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ…પે…. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ નિસ્સયપચ્ચયેન પચ્ચયો – વત્થુ દસ્સનેન પહાતબ્બાનં ખન્ધાનં નિસ્સયપચ્ચયેન પચ્ચયો. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ નિસ્સયપચ્ચયેન પચ્ચયો – વત્થુ ભાવનાય પહાતબ્બાનં ખન્ધાનં નિસ્સયપચ્ચયેન પચ્ચયો. (૩)

૮૨. દસ્સનેન પહાતબ્બો ચ નેવદસ્સનેન નભાવનાય પહાતબ્બો ચ ધમ્મા દસ્સનેન પહાતબ્બસ્સ ધમ્મસ્સ નિસ્સયપચ્ચયેન પચ્ચયો – દસ્સનેન પહાતબ્બો એકો ખન્ધો ચ વત્થુ ચ તિણ્ણન્નં ખન્ધાનં નિસ્સયપચ્ચયેન પચ્ચયો…પે… દ્વે ખન્ધા…પે…. (૧)

દસ્સનેન પહાતબ્બો ચ નેવદસ્સનેન નભાવનાય પહાતબ્બો ચ ધમ્મા નેવદસ્સનેન નભાવનાય પહાતબ્બસ્સ ધમ્મસ્સ નિસ્સયપચ્ચયેન પચ્ચયો – દસ્સનેન પહાતબ્બા ખન્ધા ચ મહાભૂતા ચ ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૨)

ભાવનાય પહાતબ્બો ચ નેવદસ્સનેન નભાવનાય પહાતબ્બો ચ ધમ્મા ભાવનાય પહાતબ્બસ્સ ધમ્મસ્સ નિસ્સયપચ્ચયેન પચ્ચયો – ભાવનાય પહાતબ્બો એકો ખન્ધો ચ વત્થુ ચ તિણ્ણન્નં ખન્ધાનં નિસ્સયપચ્ચયેન પચ્ચયો…પે… દ્વે ખન્ધા…પે…. (૧)

ભાવનાય પહાતબ્બો ચ નેવદસ્સનેન નભાવનાય પહાતબ્બો ચ ધમ્મા નેવદસ્સનેન નભાવનાય પહાતબ્બસ્સ ધમ્મસ્સ નિસ્સયપચ્ચયેન પચ્ચયો – ભાવનાય પહાતબ્બા ખન્ધા ચ મહાભૂતા ચ ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૨)

ઉપનિસ્સયપચ્ચયો

૮૩. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – દસ્સનેન પહાતબ્બં રાગં ઉપનિસ્સાય પાણં હનતિ, અદિન્નં આદિયતિ…પે… સઙ્ઘં ભિન્દતિ. દસ્સનેન પહાતબ્બં દોસં… મોહં… દિટ્ઠિં… પત્થનં ઉપનિસ્સાય પાણં હનતિ…પે… સઙ્ઘં ભિન્દતિ. દસ્સનેન પહાતબ્બો રાગો… દોસો… મોહો… દિટ્ઠિ… પત્થના દસ્સનેન પહાતબ્બસ્સ રાગસ્સ.. દોસસ્સ… મોહસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. (૧)

દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – દસ્સનેન પહાતબ્બં રાગં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ…પે… સમાપત્તિં ઉપ્પાદેતિ. દસ્સનેન પહાતબ્બં દોસં…પે… પત્થનં ઉપનિસ્સાય દાનં દેતિ…પે… સમાપત્તિં ઉપ્પાદેતિ. દસ્સનેન પહાતબ્બો રાગો… દોસો… મોહો… દિટ્ઠિ… પત્થના સદ્ધાય…પે… પઞ્ઞાય કાયિકસ્સ સુખસ્સ, કાયિકસ્સ દુક્ખસ્સ ફલસમાપત્તિયા ઉપનિસ્સયપચ્ચયેન પચ્ચયો. (૨)

૮૪. ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – ભાવનાય પહાતબ્બો રાગો… દોસો… મોહો… માનો… પત્થના ભાવનાય પહાતબ્બસ્સ રાગસ્સ… દોસસ્સ… મોહસ્સ… માનસ્સ… પત્થનાય ઉપનિસ્સયપચ્ચયેન પચ્ચયો. (૧)

ભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, પકતૂપનિસ્સયો…પે…. પકતૂપનિસ્સયો – ભાવનાય પહાતબ્બં રાગં ઉપનિસ્સાય પાણં હનતિ…પે… સઙ્ઘં ભિન્દતિ. ભાવનાય પહાતબ્બં દોસં… મોહં… માનં… પત્થનં ઉપનિસ્સાય પાણં હનતિ…પે… સઙ્ઘં ભિન્દતિ. ભાવનાય પહાતબ્બો રાગો… દોસો… મોહો… માનો… પત્થના દસ્સનેન પહાતબ્બસ્સ રાગસ્સ… દોસસ્સ… મોહસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. સકભણ્ડે છન્દરાગો પરભણ્ડે છન્દરાગસ્સ ઉપનિસ્સયપચ્ચયેન પચ્ચયો. સકપરિગ્ગહે છન્દરાગો પરપરિગ્ગહે છન્દરાગસ્સ ઉપનિસ્સયપચ્ચયેન પચ્ચયો. (૨)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – ભાવનાય પહાતબ્બં રાગં ઉપનિસ્સાય દાનં દેતિ…પે… સમાપત્તિં ઉપ્પાદેતિ. ભાવનાય પહાતબ્બં દોસં… મોહં… માનં… પત્થનં ઉપનિસ્સાય દાનં દેતિ…પે… સમાપત્તિં ઉપ્પાદેતિ. ભાવનાય પહાતબ્બો રાગો… દોસો… મોહો… માનો… પત્થના સદ્ધાય…પે… ફલસમાપત્તિયા ઉપનિસ્સયપચ્ચયેન પચ્ચયો. (૩)

૮૫. નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ…પે… સમાપત્તિં ઉપ્પાદેતિ. સીલં… સુતં… ચાગં… પઞ્ઞં… કાયિકં… સુખં… કાયિકં દુક્ખં… ઉતું… ભોજનં… સેનાસનં… ઉપનિસ્સાય દાનં દેતિ…પે… સમાપત્તિં ઉપ્પાદેતિ. સદ્ધા… સીલં… સુતં… ચાગો … પઞ્ઞા… કાયિકં સુખં… કાયિકં દુક્ખં… ઉતુ… ભોજનં… સેનાસનં… સદ્ધાય…પે… પઞ્ઞાય કાયિકસ્સ સુખસ્સ, કાયિકસ્સ દુક્ખસ્સ ફલસમાપત્તિયા ઉપનિસ્સયપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દિટ્ઠિં ગણ્હાતિ. સીલં…પે… સેનાસનં ઉપનિસ્સાય પાણં હનતિ…પે… સઙ્ઘં ભિન્દતિ. સદ્ધા…પે… સેનાસનં દસ્સનેન પહાતબ્બસ્સ રાગસ્સ… દોસસ્સ… મોહસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય માનં જપ્પેતિ. સીલં…પે… પઞ્ઞં… કાયિકં સુખં… કાયિકં દુક્ખં… ઉતું… ભોજનં… સેનાસનં… ઉપનિસ્સાય માનં જપ્પેતિ. સદ્ધા…પે… પઞ્ઞા… કાયિકં સુખં… કાયિકં દુક્ખં… ઉતુ… ભોજનં… સેનાસનં ભાવનાય પહાતબ્બસ્સ રાગસ્સ… દોસસ્સ… મોહસ્સ… માનસ્સ… પત્થનાય ઉપનિસ્સયપચ્ચયેન પચ્ચયો. (૩)

પુરેજાતપચ્ચયો

૮૬. નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું અનિચ્ચતો દુક્ખતો અનત્તતો વિપસ્સતિ, સોતં… ઘાનં… જિવ્હં… કાયં… રૂપે… સદ્દે… ગન્ધે… રસે… ફોટ્ઠબ્બે… વત્થું…પે… દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નેવદસ્સનેન નભાવનાય પહાતબ્બાનં ખન્ધાનં પુરેજાતપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું અસ્સાદેતિ અભિનન્દતિ; તં આરબ્ભ દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, દસ્સનેન પહાતબ્બં દોમનસ્સં ઉપ્પજ્જતિ…પે… વત્થું અસ્સાદેતિ અભિનન્દતિ; તં આરબ્ભ દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, દસ્સનેન પહાતબ્બં દોમનસ્સં ઉપ્પજ્જતિ. વત્થુપુરેજાતં – વત્થુ દસ્સનેન પહાતબ્બાનં ખન્ધાનં પુરેજાતપચ્ચયેન પચ્ચયો. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું અસ્સાદેતિ અભિનન્દતિ; તં આરબ્ભ ભાવનાય પહાતબ્બો રાગો ઉપ્પજ્જતિ… ઉદ્ધચ્ચં ઉપ્પજ્જતિ… ભાવનાય પહાતબ્બં દોમનસ્સં ઉપ્પજ્જતિ, સોતં…પે… કાયં… રૂપે…પે… ફોટ્ઠબ્બે… વત્થું અસ્સાદેતિ અભિનન્દતિ; તં આરબ્ભ ભાવનાય પહાતબ્બો રાગો ઉપ્પજ્જતિ, ઉદ્ધચ્ચં ઉપ્પજ્જતિ, ભાવનાય પહાતબ્બં દોમનસ્સં ઉપ્પજ્જતિ. વત્થુપુરેજાતં – વત્થુ ભાવનાય પહાતબ્બાનં ખન્ધાનં પુરેજાતપચ્ચયેન પચ્ચયો. (૩)

પચ્છાજાતપચ્ચયો

૮૭. દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા દસ્સનેન પહાતબ્બા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા ભાવનાય પહાતબ્બા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા નેવદસ્સનેન નભાવનાય પહાતબ્બા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

આસેવનપચ્ચયો

૮૮. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા દસ્સનેન પહાતબ્બા ખન્ધા પચ્છિમાનં પચ્છિમાનં…પે… આસેવનપચ્ચયેન પચ્ચયો. (૧)

ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા ભાવનાય પહાતબ્બા ખન્ધા પચ્છિમાનં પચ્છિમાનં…પે… આસેવનપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા નેવદસ્સનેન નભાવનાય પહાતબ્બા ખન્ધા પચ્છિમાનં પચ્છિમાનં…પે… આસેવનપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૧)

કમ્મપચ્ચયો

૮૯. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ કમ્મપચ્ચયેન પચ્ચયો – દસ્સનેન પહાતબ્બા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – દસ્સનેન પહાતબ્બા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – દસ્સનેન પહાતબ્બા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૨)

દસ્સનેન પહાતબ્બો ધમ્મો દસ્સનેન પહાતબ્બસ્સ ચ નેવદસ્સનેન નભાવનાય પહાતબ્બસ્સ ચ ધમ્મસ્સ કમ્મપચ્ચયેન પચ્ચયો – દસ્સનેન પહાતબ્બા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

ભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ કમ્મપચ્ચયેન પચ્ચયો – ભાવનાય પહાતબ્બા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ કમ્મપચ્ચયેન પચ્ચયો – ભાવનાય પહાતબ્બા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. (૨)

ભાવનાય પહાતબ્બો ધમ્મો ભાવનાય પહાતબ્બસ્સ ચ નેવદસ્સનેન નભાવનાય પહાતબ્બસ્સ ચ ધમ્મસ્સ કમ્મપચ્ચયેન પચ્ચયો – ભાવનાય પહાતબ્બા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – નેવદસ્સનેન નભાવનાય પહાતબ્બા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. પટિસન્ધિક્ખણે નેવદસ્સનેન નભાવનાય પહાતબ્બા ચેતના સમ્પયુત્તકાનં ખન્ધાનં કટત્તા ચ રૂપાનં…પે…. નાનાક્ખણિકા – નેવદસ્સનેન નભાવનાય પહાતબ્બા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

વિપાકપચ્ચયો

૯૦. નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ વિપાકપચ્ચયેન પચ્ચયો – વિપાકો નેવદસ્સનેન નભાવનાય પહાતબ્બો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં વિપાકપચ્ચયેન પચ્ચયો…પે… પટિસન્ધિક્ખણે…પે… ખન્ધા વત્થુસ્સ વિપાકપચ્ચયેન પચ્ચયો.

આહારપચ્ચયાદિ

૯૧. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ આહારપચ્ચયેન પચ્ચયો (સંખિત્તં) કબળીકારો… સત્ત પઞ્હા… ઇન્દ્રિયપચ્ચયેન પચ્ચયો… ચક્ખુન્દ્રિયઞ્ચ…પે… રૂપજીવિતિન્દ્રિયઞ્ચ …પે… સત્ત પઞ્હા ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો.

વિપ્પયુત્તપચ્ચયો

૯૨. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – દસ્સનેન પહાતબ્બા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – દસ્સનેન પહાતબ્બા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

ભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં (ઇદમ્પિ દસ્સનેન સદિસં).

નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતા – નેવદસ્સનેન નભાવનાય પહાતબ્બા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પટિસન્ધિક્ખણે નેવદસ્સનેન નભાવનાય પહાતબ્બા ખન્ધા કટત્તારૂપાનં વિપ્પયુત્તપચ્ચયેન પચ્ચયો, ખન્ધા વત્થુસ્સ વિપ્પયુત્તપચ્ચયેન પચ્ચયો, વત્થુ ખન્ધાનં વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નેવદસ્સનેન નભાવનાય પહાતબ્બાનં ખન્ધાનં વિપ્પયુત્તપચ્ચયેન પચ્ચયો. પચ્છાજાતા – નેવદસ્સનેન નભાવનાય પહાતબ્બા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ વિપ્પયુત્તપચ્ચયેન પચ્ચયો – પુરેજાતં વત્થુ દસ્સનેન પહાતબ્બાનં ખન્ધાનં વિપ્પયુત્તપચ્ચયેન પચ્ચયો. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ વિપ્પયુત્તપચ્ચયેન પચ્ચયો – પુરેજાતં વત્થુ ભાવનાય પહાતબ્બાનં ખન્ધાનં વિપ્પયુત્તપચ્ચયેન પચ્ચયો. (૩)

અત્થિપચ્ચયો

૯૩. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ અત્થિપચ્ચયેન પચ્ચયો – દસ્સનેન પહાતબ્બો એકો ખન્ધો તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા…પે…. (૧)

દસ્સનેન પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – દસ્સનેન પહાતબ્બા ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – દસ્સનેન પહાતબ્બા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

દસ્સનેન પહાતબ્બો ધમ્મો દસ્સનેન પહાતબ્બસ્સ ચ નેવદસ્સનેન નભાવનાય પહાતબ્બસ્સ ચ ધમ્મસ્સ અત્થિપચ્ચયેન પચ્ચયો – દસ્સનેન પહાતબ્બો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં…પે… દ્વે ખન્ધા…પે…. (૩)

ભાવનાય પહાતબ્બો ધમ્મો ભાવનાય પહાતબ્બસ્સ… તીણિ (દસ્સનેન સદિસં કાતબ્બં).

૯૪. નેવદસ્સનેન નભાવનાય પહાતબ્બો ધમ્મો નેવદસ્સનેન નભાવનાય પહાતબ્બસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – નેવદસ્સનેન નભાવનાય પહાતબ્બો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… પટિસન્ધિક્ખણે…પે… ખન્ધા વત્થુસ્સ…પે… વત્થુ ખન્ધાનં અત્થિપચ્ચયેન પચ્ચયો; એકં મહાભૂતં…પે… અસઞ્ઞસત્તાનં એકં મહાભૂતં…પે…. પુરેજાતં – ચક્ખું અનિચ્ચતો દુક્ખતો અનત્તતો વિપસ્સતિ, સોતં…પે… કાયં… રૂપે…પે… ફોટ્ઠબ્બે… વત્થું અનિચ્ચતો દુક્ખતો અનત્તતો વિપસ્સતિ; દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ…પે… વત્થુ નેવદસ્સનેન નભાવનાય પહાતબ્બાનં ખન્ધાનં અત્થિપચ્ચયેન પચ્ચયો. પચ્છાજાતા – નેવદસ્સનેન નભાવનાય પહાતબ્બા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. કબળીકારો આહારો ઇમસ્સ કાયસ્સ…પે… રૂપજીવિતિન્દ્રિયં કટત્તારૂપાનં અત્થિપચ્ચયેન પચ્ચયો. (૧)

નેવદસ્સનેન નભાવનાય પહાતબ્બો ધમ્મો દસ્સનેન પહાતબ્બસ્સ ધમ્મસ્સ અત્થિપચ્ચયેન પચ્ચયો – પુરેજાતં ચક્ખું અસ્સાદેતિ અભિનન્દતિ; તં આરબ્ભ દસ્સનેન પહાતબ્બો રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, દસ્સનેન પહાતબ્બં દોમનસ્સં ઉપ્પજ્જતિ, સોતં…પે… વત્થું અસ્સાદેતિ…પે… વત્થુ દસ્સનેન પહાતબ્બાનં ખન્ધાનં અત્થિપચ્ચયેન પચ્ચયો. (૨)

નેવદસ્સનેન નભાવનાય પહાતબ્બો ધમ્મો ભાવનાય પહાતબ્બસ્સ ધમ્મસ્સ અત્થિપચ્ચયેન પચ્ચયો – પુરેજાતં ચક્ખું અસ્સાદેતિ અભિનન્દતિ; તં આરબ્ભ ભાવનાય પહાતબ્બો રાગો ઉપ્પજ્જતિ, ઉદ્ધચ્ચં ઉપ્પજ્જતિ, ભાવનાય પહાતબ્બં દોમનસ્સં ઉપ્પજ્જતિ, સોતં…પે… વત્થું અસ્સાદેતિ અભિનન્દતિ…પે… વત્થુ ભાવનાય પહાતબ્બાનં ખન્ધાનં અત્થિપચ્ચયેન પચ્ચયો. (૩)

૯૫. દસ્સનેન પહાતબ્બો ચ નેવદસ્સનેન નભાવનાય પહાતબ્બો ચ ધમ્મા દસ્સનેન પહાતબ્બસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – દસ્સનેન પહાતબ્બો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ વત્થુ ચ…પે…. (૧)

દસ્સનેન પહાતબ્બો ચ નેવદસ્સનેન નભાવનાય પહાતબ્બો ચ ધમ્મા નેવદસ્સનેન નભાવનાય પહાતબ્બસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – દસ્સનેન પહાતબ્બા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – દસ્સનેન પહાતબ્બા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – દસ્સનેન પહાતબ્બા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૨)

ભાવનાય પહાતબ્બો ચ નેવદસ્સનેન નભાવનાય પહાતબ્બો ચ ધમ્મા ભાવનાય પહાતબ્બસ્સ…પે… (દ્વે પઞ્હા કાતબ્બા).

નત્થિવિગતાવિગતપચ્ચયા

૯૬. દસ્સનેન પહાતબ્બો ધમ્મો દસ્સનેન પહાતબ્બસ્સ ધમ્મસ્સ નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો.