૧. વિભઙ્ગવારો

હેતુપચ્ચયો

૨૯. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ હેતુપચ્ચયેન પચ્ચયો – અનિદસ્સનઅપ્પટિઘા હેતૂ સમ્પયુત્તકાનં ખન્ધાનં અનિદસ્સનઅપ્પટિઘાનઞ્ચ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા હેતૂ સમ્પયુત્તકાનં ખન્ધાનં અનિદસ્સનઅપ્પટિઘાનઞ્ચ કટત્તારૂપાનં હેતુપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ હેતુપચ્ચયેન પચ્ચયો – અનિદસ્સનઅપ્પટિઘા હેતૂ સનિદસ્સનસપ્પટિઘાનં ચિત્તસમુટ્ઠાનાનં રૂપાનં હેતુપચ્ચયેન પચ્ચયો. પટિસન્ધિક્ખણે…પે…. (૨)

(અનિદસ્સનઅપ્પટિઘમૂલકેયેવ ઇમિના કારણેન સત્ત પઞ્હા વિભજિતબ્બા.)

આરમ્મણપચ્ચયો

૩૦. સનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ આરમ્મણપચ્ચયેન પચ્ચયો – રૂપે અનિચ્ચતો દુક્ખતો અનત્તતો વિપસ્સતિ, અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, રૂપાયતનં ચક્ખુવિઞ્ઞાણસ્સ આરમ્મણપચ્ચયેન પચ્ચયો. સનિદસ્સનસપ્પટિઘા ખન્ધા ઇદ્ધિવિધઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ આરમ્મણપચ્ચયેન પચ્ચયો. ચક્ખું…પે… કાયં… સદ્દે… ગન્ધે… રસે… ફોટ્ઠબ્બે… અનિચ્ચતો…પે… દોમનસ્સં ઉપ્પજ્જતિ, દિબ્બાય સોતધાતુયા સદ્દં સુણાતિ, સદ્દાયતનં સોતવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ…પે… અનિદસ્સનસપ્પટિઘા ખન્ધા ઇદ્ધિવિધઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

૩૧. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, ઝાના…પે… અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ, નિબ્બાનં પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ, આવજ્જનાય આરમ્મણપચ્ચયેન પચ્ચયો. અરિયા પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ…પે… વત્થું… ઇત્થિન્દ્રિયં… પુરિસિન્દ્રિયં… જીવિતિન્દ્રિયં… આપોધાતું… કબળીકારં આહારં… અનિદસ્સનઅપ્પટિઘે ખન્ધે અનિચ્ચતો…પે… દોમનસ્સં ઉપ્પજ્જતિ, ચેતોપરિયઞાણેન અનિદસ્સનઅપ્પટિઘચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ આરમ્મણપચ્ચયેન પચ્ચયો. આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ…પે… અનિદસ્સનઅપ્પટિઘા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અધિપતિપચ્ચયો

૩૨. સનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – રૂપં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૧)

અનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – ચક્ખું…પે… કાયં… સદ્દે… ગન્ધે… રસે… ફોટ્ઠબ્બે… ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૧)

૩૩. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા…પે… ઝાના વુટ્ઠહિત્વા…પે… અરિયા મગ્ગા વુટ્ઠહિત્વા…પે… ફલા વુટ્ઠહિત્વા…પે… ફલં ગરું કત્વા…પે… નિબ્બાનં ગરું કત્વા… નિબ્બાનં ગોત્રભુસ્સ, વોદાનસ્સ, મગ્ગસ્સ, ફલસ્સ અધિપતિપચ્ચયેન પચ્ચયો. વત્થું… ઇત્થિન્દ્રિયં… પુરિસિન્દ્રિયં… જીવિતિન્દ્રિયં… આપોધાતું… કબળીકારં આહારં… અનિદસ્સનઅપ્પટિઘે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – અનિદસ્સનઅપ્પટિઘાધિપતિ સમ્પયુત્તકાનં ખન્ધાનં અનિદસ્સનઅપ્પટિઘાનઞ્ચ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અનિદસ્સનઅપ્પટિઘાધિપતિ સનિદસ્સનસપ્પટિઘાનં ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

(અનિદસ્સનઅપ્પટિઘમૂલકે સત્તપિ પઞ્હા વિભજિતબ્બા, અધિપતિ તિવિધરૂપસઙ્ગહેન.)

અનન્તરપચ્ચયો

૩૪. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અનિદસ્સનઅપ્પટિઘા ખન્ધા પચ્છિમાનં પચ્છિમાનં અનિદસ્સનઅપ્પટિઘાનં ખન્ધાનં અનન્તરપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ… મગ્ગો ફલસ્સ… ફલં ફલસ્સ… અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. (૧)

સમનન્તરપચ્ચયો

૩૫. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ સમનન્તરપચ્ચયેન પચ્ચયો (અનન્તરસદિસં).

સહજાતપચ્ચયાદિ

૩૬. અનિદસ્સનસપ્પટિઘો ધમ્મો અનિદસ્સનસપ્પટિઘસ્સ ધમ્મસ્સ સહજાતપચ્ચયેન પચ્ચયો (પટિચ્ચવારસદિસં સાધુકં કાતબ્બં. અઞ્ઞમઞ્ઞપચ્ચયે પટિચ્ચવારે અઞ્ઞમઞ્ઞસદિસં, નિસ્સયપચ્ચયે પટિચ્ચવારસદિસં).

ઉપનિસ્સયપચ્ચયો

૩૭. સનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, પકતૂપનિસ્સયો…પે…. પકતૂપનિસ્સયો – વણ્ણસમ્પદં પત્થયમાનો દાનં દેતિ, સીલં સમાદિયતિ, ઉપોસથકમ્મં…પે… વણ્ણસમ્પદા સદ્ધાય…પે… પઞ્ઞાય, રાગસ્સ…પે… પત્થનાય, કાયિકસ્સ સુખસ્સ, કાયિકસ્સ દુક્ખસ્સ, મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો. (૧)

અનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, પકતૂપનિસ્સયો…પે…. પકતૂપનિસ્સયો – ચક્ખુસમ્પદં પત્થયમાનો…પે… કાયસમ્પદં… સદ્દસમ્પદં…પે… ફોટ્ઠબ્બસમ્પદં પત્થયમાનો દાનં દેતિ, સીલં સમાદિયતિ, ઉપોસથકમ્મં… ઉતું… સેનાસનં ઉપનિસ્સાય દાનં દેતિ સીલં સમાદિયતિ. ઉપોસથકમ્મં, ઝાનં… વિપસ્સનં… મગ્ગં… અભિઞ્ઞં… સમાપત્તિં ઉપ્પાદેતિ પાણં હનતિ…પે… સઙ્ઘં ભિન્દતિ. ચક્ખુસમ્પદા…પે… ફોટ્ઠબ્બસમ્પદા, ઉતુ, સેનાસનં સદ્ધાય…પે… પઞ્ઞાય, રાગસ્સ…પે… પત્થનાય, કાયિકસ્સ સુખસ્સ, કાયિકસ્સ દુક્ખસ્સ, મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો. (૧)

૩૮. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – સદ્ધં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં… ઝાનં… સમાપત્તિં ઉપ્પાદેતિ, માનં જપ્પેતિ, દિટ્ઠિં ગણ્હાતિ. સીલં…પે… પઞ્ઞં… રાગં…પે… પત્થનં, કાયિકં સુખં… કાયિકં દુક્ખં… ભોજનં ઉપનિસ્સાય દાનં દેતિ…પે… સઙ્ઘં ભિન્દતિ. સદ્ધા …પે… પઞ્ઞા, રાગો…પે… પત્થના, કાયિકં સુખં… કાયિકં દુક્ખં… ભોજનં સદ્ધાય…પે… પઞ્ઞાય, મગ્ગસ્સ, ફલસમાપત્તિયા ઉપનિસ્સયપચ્ચયેન પચ્ચયો. (૧)

પુરેજાતપચ્ચયો

૩૯. સનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ પુરેજાતપચ્ચયેન પચ્ચયો. આરમ્મણપુરેજાતં – રૂપે અનિચ્ચતો દુક્ખતો અનત્તતો વિપસ્સતિ, અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ…પે… વિચિકિચ્છા…પે… ઉદ્ધચ્ચં…પે… દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, રૂપાયતનં ચક્ખુવિઞ્ઞાણસ્સ પુરેજાતપચ્ચયેન પચ્ચયો. (૧)

અનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું…પે… કાયં… સદ્દે…પે… ફોટ્ઠબ્બે અનિચ્ચતો…પે… દોમનસ્સં ઉપ્પજ્જતિ, દિબ્બાય સોતધાતુયા સદ્દં સુણાતિ, સદ્દાયતનં સોતવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ પુરેજાતપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – વત્થું… ઇત્થિન્દ્રિયં… પુરિસિન્દ્રિયં… જીવિતિન્દ્રિયં… આપોધાતું… કબળીકારં આહારં… અનિચ્ચતો…પે… દોમનસ્સં ઉપ્પજ્જતિ. વત્થુપુરેજાતં – વત્થુ અનિદસ્સનઅપ્પટિઘાનં ખન્ધાનં પુરેજાતપચ્ચયેન પચ્ચયો. (૧)

૪૦. સનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. રૂપાયતનઞ્ચ વત્થુ ચ અનિદસ્સનઅપ્પટિઘાનં ખન્ધાનં પુરેજાતપચ્ચયેન પચ્ચયો. (૧)

અનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. ચક્ખાયતનઞ્ચ વત્થુ ચ…પે… ફોટ્ઠબ્બાયતનઞ્ચ વત્થુ ચ અનિદસ્સનઅપ્પટિઘાનં ખન્ધાનં પુરેજાતપચ્ચયેન પચ્ચયો. (૧)

સનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. રૂપાયતનઞ્ચ ચક્ખાયતનઞ્ચ ચક્ખુવિઞ્ઞાણસ્સ પુરેજાતપચ્ચયેન પચ્ચયો. (૧)

પચ્છાજાતપચ્ચયો

૪૧. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અનિદસ્સનઅપ્પટિઘા ખન્ધા પુરેજાતસ્સ ઇમસ્સ અનિદસ્સનઅપ્પટિઘસ્સ કાયસ્સ પચ્છાજાતપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અનિદસ્સનઅપ્પટિઘા ખન્ધા પુરેજાતસ્સ ઇમસ્સ સનિદસ્સનસપ્પટિઘસ્સ કાયસ્સ પચ્છાજાતપચ્ચયેન પચ્ચયો. (૨)

(એવં સત્ત પઞ્હા વિભજિતબ્બા, તિવિધરૂપસઙ્ગહો.) (૭)

આસેવનપચ્ચયો

૪૨. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા અનિદસ્સનઅપ્પટિઘા ખન્ધા પચ્છિમાનં પચ્છિમાનં અનિદસ્સનઅપ્પટિઘાનં ખન્ધાનં આસેવનપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૧)

કમ્મપચ્ચયો

૪૩. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અનિદસ્સનઅપ્પટિઘા ચેતના સમ્પયુત્તકાનં ખન્ધાનં અનિદસ્સનઅપ્પટિઘાનઞ્ચ ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. પટિસન્ધિક્ખણે…પે…. નાનાક્ખણિકા – અનિદસ્સનઅપ્પટિઘા ચેતના વિપાકાનં ખન્ધાનં અનિદસ્સનઅપ્પટિઘાનઞ્ચ કટત્તારૂપાનં કમ્મપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અનિદસ્સનઅપ્પટિઘા ચેતના સનિદસ્સનસપ્પટિઘાનં ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. પટિસન્ધિક્ખણે…પે…. નાનાક્ખણિકા – અનિદસ્સનઅપ્પટિઘા ચેતના સનિદસ્સનસપ્પટિઘાનં કટત્તારૂપાનં કમ્મપચ્ચયેન પચ્ચયો. (૨)

(એવં સત્ત પઞ્હા સહજાતા નાનાક્ખણિકા ઇમિના કારણેન વિભજિતબ્બા, તિવિધરૂપસઙ્ગહો.) (૭)

વિપાકપચ્ચયો

૪૪. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ વિપાકપચ્ચયેન પચ્ચયો – વિપાકો અનિદસ્સનઅપ્પટિઘો એકો ખન્ધો તિણ્ણન્નં ખન્ધાનં અનિદસ્સનઅપ્પટિઘાનં ચિત્તસમુટ્ઠાનાનઞ્ચ રૂપાનં વિપાકપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે અનિદસ્સનઅપ્પટિઘો એકો ખન્ધો તિણ્ણન્નં ખન્ધાનં અનિદસ્સનઅપ્પટિઘાનઞ્ચ કટત્તારૂપાનં વિપાકપચ્ચયેન પચ્ચયો…પે… ખન્ધા વત્થુસ્સ વિપાકપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ વિપાકપચ્ચયેન પચ્ચયો – વિપાકા અનિદસ્સનઅપ્પટિઘા ખન્ધા સનિદસ્સનસપ્પટિઘાનં ચિત્તસમુટ્ઠાનાનં રૂપાનં વિપાકપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા ખન્ધા સનિદસ્સનસપ્પટિઘાનં કટત્તારૂપાનં વિપાકપચ્ચયેન પચ્ચયો. (૨)

(એવં સત્ત પઞ્હા વિત્થારેતબ્બા, પવત્તિપટિસન્ધિ.) (૭)

આહારપચ્ચયો

૪૫. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ આહારપચ્ચયેન પચ્ચયો – અનિદસ્સનઅપ્પટિઘા આહારા સમ્પયુત્તકાનં ખન્ધાનં અનિદસ્સનઅપ્પટિઘાનઞ્ચ ચિત્તસમુટ્ઠાનાનં રૂપાનં આહારપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા આહારા સમ્પયુત્તકાનં ખન્ધાનં અનિદસ્સનઅપ્પટિઘાનઞ્ચ કટત્તારૂપાનં આહારપચ્ચયેન પચ્ચયો. કબળીકારો આહારો ઇમસ્સ અનિદસ્સનઅપ્પટિઘસ્સ કાયસ્સ આહારપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ આહારપચ્ચયેન પચ્ચયો – અનિદસ્સનઅપ્પટિઘા આહારા સનિદસ્સનસપ્પટિઘાનં ચિત્તસમુટ્ઠાનાનં રૂપાનં આહારપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા આહારા સનિદસ્સનસપ્પટિઘાનં કટત્તારૂપાનં આહારપચ્ચયેન પચ્ચયો. કબળીકારો આહારો ઇમસ્સ સનિદસ્સનસપ્પટિઘસ્સ કાયસ્સ આહારપચ્ચયેન પચ્ચયો. (૨)

(એવં સત્ત પઞ્હા પવત્તિપટિસન્ધિ વિભજિતબ્બા, સત્તસુપિ કબળીકારો આહારો કાતબ્બો.) (૭)

ઇન્દ્રિયપચ્ચયો

૪૬. અનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ ઇન્દ્રિયપચ્ચયેન પચ્ચયો – ચક્ખુન્દ્રિયં ચક્ખુવિઞ્ઞાણસ્સ…પે… કાયિન્દ્રિયં કાયવિઞ્ઞાણસ્સ ઇન્દ્રિયપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ ઇન્દ્રિયપચ્ચયેન પચ્ચયો – અનિદસ્સનઅપ્પટિઘા ઇન્દ્રિયા સમ્પયુત્તકાનં ખન્ધાનં અનિદસ્સનઅપ્પટિઘાનં ચિત્તસમુટ્ઠાનાનઞ્ચ રૂપાનં ઇન્દ્રિયપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા ઇન્દ્રિયા સમ્પયુત્તકાનં ખન્ધાનં અનિદસ્સનઅપ્પટિઘાનઞ્ચ કટત્તારૂપાનં ઇન્દ્રિયપચ્ચયેન પચ્ચયો. રૂપજીવિતિન્દ્રિયં અનિદસ્સનઅપ્પટિઘાનં કટત્તારૂપાનં ઇન્દ્રિયપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ ઇન્દ્રિયપચ્ચયેન પચ્ચયો – અનિદસ્સનઅપ્પટિઘા ઇન્દ્રિયા સનિદસ્સનસપ્પટિઘાનં ચિત્તસમુટ્ઠાનાનં રૂપાનં ઇન્દ્રિયપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા ઇન્દ્રિયા સનિદસ્સનસપ્પટિઘાનં કટત્તારૂપાનં ઇન્દ્રિયપચ્ચયેન પચ્ચયો. રૂપજીવિતિન્દ્રિયં સનિદસ્સનસપ્પટિઘાનં કટત્તારૂપાનં ઇન્દ્રિયપચ્ચયેન પચ્ચયો. (૨)

(એવં પવત્તિપટિસન્ધિ સત્ત પઞ્હા વિભજિતબ્બા, રૂપજીવિતિન્દ્રિયઞ્ચ અન્તે અન્તે.) (૭)

૪૭. અનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ ઇન્દ્રિયપચ્ચયેન પચ્ચયો – ચક્ખુન્દ્રિયઞ્ચ ચક્ખુવિઞ્ઞાણઞ્ચ ચક્ખુવિઞ્ઞાણસહગતાનં ખન્ધાનં ઇન્દ્રિયપચ્ચયેન પચ્ચયો…પે… કાયિન્દ્રિયઞ્ચ કાયવિઞ્ઞાણઞ્ચ કાયવિઞ્ઞાણસહગતાનં ખન્ધાનં ઇન્દ્રિયપચ્ચયેન પચ્ચયો. (૧)

ઝાનપચ્ચયાદિ

૪૮. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો – અનિદસ્સનઅપ્પટિઘો એકો ખન્ધો તિણ્ણન્નં ખન્ધાનં સમ્પયુત્તપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે….

વિપ્પયુત્તપચ્ચયો

૪૯. અનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ વિપ્પયુત્તપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતા – અનિદસ્સનઅપ્પટિઘા ખન્ધા અનિદસ્સનઅપ્પટિઘાનં ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા ખન્ધા અનિદસ્સનઅપ્પટિઘાનં કટત્તારૂપાનં વિપ્પયુત્તપચ્ચયેન પચ્ચયો. ખન્ધા વત્થુસ્સ વિપ્પયુત્તપચ્ચયેન પચ્ચયો. વત્થુ ખન્ધાનં વિપ્પયુત્તપચ્ચયેન પચ્ચયો. પુરેજાતં – વત્થુ અનિદસ્સનઅપ્પટિઘાનં ખન્ધાનં વિપ્પયુત્તપચ્ચયેન પચ્ચયો. પચ્છાજાતા – અનિદસ્સનઅપ્પટિઘા ખન્ધા પુરેજાતસ્સ ઇમસ્સ અનિદસ્સનઅપ્પટિઘસ્સ કાયસ્સ વિપ્પયુત્તપચ્ચયેન પચ્ચયો. (૧)

અનિદસ્સનઅપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – અનિદસ્સનઅપ્પટિઘા ખન્ધા સનિદસ્સનસપ્પટિઘાનં ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પટિસન્ધિક્ખણે અનિદસ્સનઅપ્પટિઘા ખન્ધા સનિદસ્સનસપ્પટિઘાનં કટત્તારૂપાનં વિપ્પયુત્તપચ્ચયેન પચ્ચયો. પચ્છાજાતા – અનિદસ્સનઅપ્પટિઘા ખન્ધા પુરેજાતસ્સ ઇમસ્સ સનિદસ્સનસપ્પટિઘસ્સ કાયસ્સ વિપ્પયુત્તપચ્ચયેન પચ્ચયો. (૨)

(અવસેસા પઞ્ચ પઞ્હા એવં વિત્થારેતબ્બા. સહજાતા, પચ્છાજાતા.)

અત્થિપચ્ચયો

૫૦. સનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ અત્થિપચ્ચયેન પચ્ચયો. પુરેજાતં – રૂપે અનિચ્ચતો…પે… દોમનસ્સં ઉપ્પજ્જતિ, દિબ્બેન ચક્ખુના રૂપં પસ્સતિ, રૂપાયતનં ચક્ખુવિઞ્ઞાણસ્સ અત્થિપચ્ચયેન પચ્ચયો. (૧)

૫૧. અનિદસ્સનસપ્પટિઘો ધમ્મો અનિદસ્સનસપ્પટિઘસ્સ ધમ્મસ્સ અત્થિપચ્ચયેન પચ્ચયો – અનિદસ્સનસપ્પટિઘં એકં મહાભૂતં દ્વિન્નં મહાભૂતાનં અત્થિપચ્ચયેન પચ્ચયો. દ્વે મહાભૂતા એકસ્સ મહાભૂતસ્સ અત્થિપચ્ચયેન પચ્ચયો. અનિદસ્સનસપ્પટિઘા મહાભૂતા અનિદસ્સનસપ્પટિઘાનં ચિત્તસમુટ્ઠાનાનં રૂપાનં કટત્તારૂપાનં ઉપાદારૂપાનં અત્થિપચ્ચયેન પચ્ચયો. ફોટ્ઠબ્બાયતનં ચક્ખાયતનસ્સ…પે… રસાયતનસ્સ અત્થિપચ્ચયેન પચ્ચયો. બાહિરં… આહારસમુટ્ઠાનં… ઉતુસમુટ્ઠાનં… એકં મહાભૂતં દ્વિન્નં મહાભૂતાનં અત્થિપચ્ચયેન પચ્ચયો. દ્વે મહાભૂતા એકસ્સ મહાભૂતસ્સ અત્થિપચ્ચયેન પચ્ચયો. ઉતુસમુટ્ઠાના મહાભૂતા અનિદસ્સનસપ્પટિઘાનં ઉપાદારૂપાનં અત્થિપચ્ચયેન પચ્ચયો. અસઞ્ઞસત્તાનં અનિદસ્સનસપ્પટિઘં એકં મહાભૂતં દ્વિન્નં મહાભૂતાનં અત્થિપચ્ચયેન પચ્ચયો. દ્વે મહાભૂતા…પે…. (૧)

અનિદસ્સનસપ્પટિઘો ધમ્મો સનિદસ્સનસપ્પટિઘસ્સ ધમ્મસ્સ અત્થિપચ્ચયેન પચ્ચયો. (૨)

(પટિચ્ચવારે નિસ્સયપચ્ચયસદિસં.)

અનિદસ્સનસપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતા – અનિદસ્સનસપ્પટિઘા મહાભૂતા અનિદસ્સનઅપ્પટિઘાનં ચિત્તસમુટ્ઠાનાનં રૂપાનં કટત્તારૂપાનં ઉપાદારૂપાનં અત્થિપચ્ચયેન પચ્ચયો (યાવ અસઞ્ઞસત્તા વિત્થારેતબ્બા). પુરેજાતં – ચક્ખું…પે… કાયં, સદ્દે…પે… ફોટ્ઠબ્બે અનિચ્ચતો…પે… દોમનસ્સં ઉપ્પજ્જતિ, ચક્ખાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ અત્થિપચ્ચયેન પચ્ચયો. (૩)

(અવસેસા ચત્તારો પઞ્હા વિત્થારેતબ્બા. પટિચ્ચવારે સહજાતપચ્ચયસદિસા, નિન્નાનાકરણા.) (૭)

૫૨. અનિદસ્સનઅપ્પટિઘો ધમ્મો અનિદસ્સનઅપ્પટિઘસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – અનિદસ્સનઅપ્પટિઘો એકો ખન્ધો તિણ્ણન્નં ખન્ધાનં અનિદસ્સનઅપ્પટિઘાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો. દ્વે ખન્ધા…પે… પટિસન્ધિક્ખણે…પે… આપોધાતુ અનિદસ્સનઅપ્પટિઘાનં ચિત્તસમુટ્ઠાનાનં રૂપાનં કટત્તારૂપાનં ઉપાદારૂપાનં…પે… આપોધાતુ ઇત્થિન્દ્રિયસ્સ…પે… કબળીકારાહારસ્સ ચ અત્થિપચ્ચયેન પચ્ચયો. બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં આપોધાતુ અનિદસ્સનઅપ્પટિઘાનં કટત્તારૂપાનં ઉપાદારૂપાનં અત્થિપચ્ચયેન પચ્ચયો. પુરેજાતં – વત્થું… ઇત્થિન્દ્રિયં… પુરિસિન્દ્રિયં… જીવિતિન્દ્રિયં… આપોધાતું… કબળીકારં આહારં… અનિચ્ચતો…પે… દોમનસ્સં ઉપ્પજ્જતિ, વત્થુ અનિદસ્સનઅપ્પટિઘાનં ખન્ધાનં અત્થિપચ્ચયેન પચ્ચયો. પચ્છાજાતા – અનિદસ્સનઅપ્પટિઘા ખન્ધા પુરેજાતસ્સ ઇમસ્સ અનિદસ્સનઅપ્પટિઘસ્સ કાયસ્સ અત્થિપચ્ચયેન પચ્ચયો. કબળીકારો આહારો ઇમસ્સ અનિદસ્સનઅપ્પટિઘસ્સ કાયસ્સ અત્થિપચ્ચયેન પચ્ચયો. રૂપજીવિતિન્દ્રિયં અનિદસ્સનઅપ્પટિઘાનં કટત્તારૂપાનં અત્થિપચ્ચયેન પચ્ચયો (એવં અવસેસા છ પઞ્હા વિભજિતબ્બા. સહજાતં, પચ્છાજાતં, આહારં, ઇન્દ્રિયમ્પિ કાતબ્બા). (૭)

૫૩. સનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ અત્થિપચ્ચયેન પચ્ચયો. પુરેજાતં – રૂપાયતનઞ્ચ વત્થુ ચ અનિદસ્સનઅપ્પટિઘાનં ખન્ધાનં અત્થિપચ્ચયેન પચ્ચયો. (૧)

અનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા સનિદસ્સનસપ્પટિઘસ્સ ધમ્મસ્સ અત્થિપચ્ચયેન પચ્ચયો – અનિદસ્સનઅપ્પટિઘા ખન્ધા ચ મહાભૂતા ચ સનિદસ્સનસપ્પટિઘાનં ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પટિસન્ધિક્ખણે… (સંખિત્તં, અસઞ્ઞસત્તાનઞ્ચ કાતબ્બા). (૧)

અનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનસપ્પટિઘસ્સ ધમ્મસ્સ અત્થિપચ્ચયેન પચ્ચયો (સંખિત્તં). (૨)

૫૪. અનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતા – અનિદસ્સનઅપ્પટિઘા ખન્ધા ચ મહાભૂતા ચ અનિદસ્સનઅપ્પટિઘાનં ચિત્તસમુટ્ઠાનાનં રૂપાનં…પે… (યાવ અસઞ્ઞસત્તા કાતબ્બા). પુરેજાતં – ચક્ખાયતનઞ્ચ વત્થુ ચ…પે… ફોટ્ઠબ્બાયતનઞ્ચ વત્થુ ચ અનિદસ્સનઅપ્પટિઘાનં ખન્ધાનં અત્થિપચ્ચયેન પચ્ચયો. (૩) (અવસેસા ચતસ્સો પઞ્હા વિભજિતબ્બા.) (૭)

૫૫. સનિદસ્સનસપ્પટિઘો ચ અનિદસ્સનસપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ અત્થિપચ્ચયેન પચ્ચયો. પુરેજાતં – રૂપાયતનઞ્ચ ચક્ખાયતનઞ્ચ ચક્ખુવિઞ્ઞાણસ્સ અત્થિપચ્ચયેન પચ્ચયો. (૧)

સનિદસ્સનસપ્પટિઘો ચ અનિદસ્સનસપ્પટિઘો ચ અનિદસ્સનઅપ્પટિઘો ચ ધમ્મા અનિદસ્સનઅપ્પટિઘસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. રૂપાયતનઞ્ચ ચક્ખાયતનઞ્ચ ચક્ખુવિઞ્ઞાણઞ્ચ ચક્ખુવિઞ્ઞાણસહગતાનં ખન્ધાનં અત્થિપચ્ચયેન પચ્ચયો. (૧)

(નત્થિવિગતપચ્ચયં અનન્તરસદિસં. અવિગતપચ્ચયં અત્થિસદિસં.)