૧. વિભઙ્ગવારો

હેતુપચ્ચયો

૧૧. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ હેતુપચ્ચયેન પચ્ચયો – અજ્ઝત્તારમ્મણા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. પટિસન્ધિક્ખણે અજ્ઝત્તારમ્મણા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. (૧)

બહિદ્ધારમ્મણો ધમ્મો બહિદ્ધારમ્મણસ્સ ધમ્મસ્સ હેતુપચ્ચયેન પચ્ચયો – બહિદ્ધારમ્મણા હેતૂ સમ્પયુત્તકાનં ખન્ધાનં…પે… પટિસન્ધિક્ખણે…પે…. (૧)

આરમ્મણપચ્ચયો

૧૨. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ આરમ્મણપચ્ચયેન પચ્ચયો – અજ્ઝત્તં વિઞ્ઞાણઞ્ચાયતનં પચ્ચવેક્ખતિ, નેવસઞ્ઞાનાસઞ્ઞાયતનં પચ્ચવેક્ખતિ, અજ્ઝત્તારમ્મણં અજ્ઝત્તં દિબ્બં ચક્ખું પચ્ચવેક્ખતિ, દિબ્બં સોતધાતું…પે… ઇદ્ધિવિધઞાણં…પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં પચ્ચવેક્ખતિ. અરિયા અજ્ઝત્તારમ્મણે પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. અજ્ઝત્તારમ્મણે અજ્ઝત્તે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ અજ્ઝત્તારમ્મણો રાગો ઉપ્પજ્જતિ…પે… દોમનસ્સં ઉપ્પજ્જતિ. અજ્ઝત્તારમ્મણા અજ્ઝત્તા ખન્ધા પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

અજ્ઝત્તારમ્મણો ધમ્મો બહિદ્ધારમ્મણસ્સ ધમ્મસ્સ આરમ્મણપચ્ચયેન પચ્ચયો – બહિદ્ધા વિઞ્ઞાણઞ્ચાયતનં પચ્ચવેક્ખતિ, નેવસઞ્ઞાનાસઞ્ઞાયતનં પચ્ચવેક્ખતિ. અજ્ઝત્તારમ્મણં બહિદ્ધા દિબ્બં ચક્ખું પચ્ચવેક્ખતિ, દિબ્બં સોતધાતું…પે… ઇદ્ધિવિધઞાણં…પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં પચ્ચવેક્ખતિ, અજ્ઝત્તારમ્મણે બહિદ્ધા ખન્ધે અનિચ્ચતો દુક્ખતો અનત્તતો વિપસ્સતિ…પે… ચેતોપરિયઞાણેન અજ્ઝત્તારમ્મણબહિદ્ધાચિત્તસમઙ્ગિસ્સ ચિત્તં જાનાતિ, અજ્ઝત્તારમ્મણા બહિદ્ધા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

૧૩. બહિદ્ધારમ્મણો ધમ્મો બહિદ્ધારમ્મણસ્સ ધમ્મસ્સ આરમ્મણપચ્ચયેન પચ્ચયો – બહિદ્ધારમ્મણં બહિદ્ધા દિબ્બં ચક્ખું પચ્ચવેક્ખતિ, દિબ્બં સોતધાતું પચ્ચવેક્ખતિ. ઇદ્ધિવિધઞાણં…પે… ચેતોપરિયઞાણં…પે… પુબ્બેનિવાસાનુસ્સતિઞાણં…પે… યથાકમ્મૂપગઞાણં…પે… અનાગતંસઞાણં પચ્ચવેક્ખતિ. બહિદ્ધારમ્મણે બહિદ્ધા ખન્ધે અનિચ્ચતો દુક્ખતો અનત્તતો વિપસ્સતિ…પે… ચેતોપરિયઞાણેન બહિદ્ધારમ્મણબહિદ્ધાચિત્તસમઙ્ગિસ્સ ચિત્તં જાનાતિ. બહિદ્ધારમ્મણા બહિદ્ધા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

બહિદ્ધારમ્મણો ધમ્મો અજ્ઝત્તારમ્મણસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, ઝાના વુટ્ઠહિત્વા ઝાનં પચ્ચવેક્ખતિ. અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ, બહિદ્ધારમ્મણે પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. બહિદ્ધારમ્મણં અજ્ઝત્તં દિબ્બં ચક્ખું પચ્ચવેક્ખતિ, દિબ્બં સોતધાતું… ઇદ્ધિવિધઞાણં… ચેતોપરિયઞાણં… પુબ્બેનિવાસાનુસ્સતિઞાણં… યથાકમ્મૂપગઞાણં… અનાગતંસઞાણં… બહિદ્ધારમ્મણે અજ્ઝત્તે ખન્ધે અનિચ્ચતો…પે… વિપસ્સતિ, અસ્સાદેતિ અભિનન્દતિ, તં આરબ્ભ અજ્ઝત્તારમ્મણો રાગો ઉપ્પજ્જતિ…પે… દોમનસ્સં ઉપ્પજ્જતિ. બહિદ્ધારમ્મણા અજ્ઝત્તા ખન્ધા ઇદ્ધિવિધઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૨)

અધિપતિપચ્ચયો

૧૪. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અજ્ઝત્તં વિઞ્ઞાણઞ્ચાયતનં ગરું કત્વા પચ્ચવેક્ખતિ, નેવસઞ્ઞાનાસઞ્ઞાયતનં ગરું કત્વા પચ્ચવેક્ખતિ. અજ્ઝત્તારમ્મણં અજ્ઝત્તં દિબ્બં ચક્ખું ગરું કત્વા…પે… દિબ્બં સોતધાતું…પે… ઇદ્ધિવિધઞાણં… પુબ્બેનિવાસાનુસ્સતિઞાણં… યથાકમ્મૂપગઞાણં… અનાગતંસઞાણં ગરું કત્વા…પે… અજ્ઝત્તારમ્મણે અજ્ઝત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા અજ્ઝત્તારમ્મણો રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – અજ્ઝત્તારમ્મણાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

૧૫. બહિદ્ધારમ્મણો ધમ્મો બહિદ્ધારમ્મણસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – બહિદ્ધારમ્મણાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

બહિદ્ધારમ્મણો ધમ્મો અજ્ઝત્તારમ્મણસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે સુચિણ્ણાનિ…પે… ઝાના વુટ્ઠહિત્વા…પે… અરિયા મગ્ગા વુટ્ઠહિત્વા મગ્ગં… ફલં ગરું કત્વા પચ્ચવેક્ખન્તિ. બહિદ્ધારમ્મણં અજ્ઝત્તં દિબ્બં ચક્ખું ગરું કત્વા…પે… દિબ્બં સોતધાતું… ઇદ્ધિવિધઞાણં… ચેતોપરિયઞાણં… પુબ્બેનિવાસાનુસ્સતિઞાણં… યથાકમ્મૂપગઞાણં… અનાગતંસઞાણં ગરું કત્વા પચ્ચવેક્ખતિ, બહિદ્ધારમ્મણે અજ્ઝત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા અજ્ઝત્તારમ્મણો રાગો ઉપ્પજ્જતિ, દિટ્ઠિ ઉપ્પજ્જતિ. (૨)

અનન્તરપચ્ચયો

૧૬. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અજ્ઝત્તારમ્મણા ખન્ધા પચ્છિમાનં પચ્છિમાનં અજ્ઝત્તારમ્મણાનં ખન્ધાનં અનન્તરપચ્ચયેન પચ્ચયો. (૧)

અજ્ઝત્તારમ્મણો ધમ્મો બહિદ્ધારમ્મણસ્સ ધમ્મસ્સ અનન્તરપચ્ચયેન પચ્ચયો – અજ્ઝત્તારમ્મણં ચુતિચિત્તં બહિદ્ધારમ્મણસ્સ ઉપપત્તિચિત્તસ્સ અનન્તરપચ્ચયેન પચ્ચયો. અજ્ઝત્તારમ્મણં ભવઙ્ગં બહિદ્ધારમ્મણાય આવજ્જનાય અનન્તરપચ્ચયેન પચ્ચયો. અજ્ઝત્તારમ્મણા ખન્ધા બહિદ્ધારમ્મણસ્સ વુટ્ઠાનસ્સ અનન્તરપચ્ચયેન પચ્ચયો. અજ્ઝત્તારમ્મણં અનુલોમં ગોત્રભુસ્સ… અનુલોમં વોદાનસ્સ… અનુલોમં ફલસમાપત્તિયા… નિરોધા વુટ્ઠહન્તસ્સ… નેવસઞ્ઞાનાસઞ્ઞાયતનં ફલસમાપત્તિયા અનન્તરપચ્ચયેન પચ્ચયો. (૨)

૧૭. બહિદ્ધારમ્મણો ધમ્મો બહિદ્ધારમ્મણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા બહિદ્ધારમ્મણા ખન્ધા પચ્છિમાનં પચ્છિમાનં બહિદ્ધારમ્મણાનં ખન્ધાનં અનન્તરપચ્ચયેન પચ્ચયો. બહિદ્ધારમ્મણં અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ… મગ્ગો ફલસ્સ… ફલં ફલસ્સ… અનુલોમં ફલસમાપત્તિયા અનન્તરપચ્ચયેન પચ્ચયો. (૧)

બહિદ્ધારમ્મણો ધમ્મો અજ્ઝત્તારમ્મણસ્સ ધમ્મસ્સ અનન્તરપચ્ચયેન પચ્ચયો – બહિદ્ધારમ્મણં ચુતિચિત્તં અજ્ઝત્તારમ્મણસ્સ ઉપપત્તિચિત્તસ્સ અનન્તરપચ્ચયેન પચ્ચયો. બહિદ્ધારમ્મણં ભવઙ્ગં અજ્ઝત્તારમ્મણાય આવજ્જનાય અનન્તરપચ્ચયેન પચ્ચયો. બહિદ્ધારમ્મણા ખન્ધા અજ્ઝત્તારમ્મણસ્સ વુટ્ઠાનસ્સ અનન્તરપચ્ચયેન પચ્ચયો. (૨)

સમનન્તરપચ્ચયાદિ

૧૮. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ સમનન્તરપચ્ચયેન પચ્ચયો…પે… સહજાતપચ્ચયેન પચ્ચયો… અઞ્ઞમઞ્ઞપચ્ચયેન પચ્ચયો… નિસ્સયપચ્ચયેન પચ્ચયો.

ઉપનિસ્સયપચ્ચયો

૧૯. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અજ્ઝત્તારમ્મણા અનિચ્ચાનુપસ્સના, દુક્ખાનુપસ્સના, અનત્તાનુપસ્સના, અજ્ઝત્તારમ્મણાય અનિચ્ચાનુપસ્સનાય, દુક્ખાનુપસ્સનાય, અનત્તાનુપસ્સનાય ઉપનિસ્સયપચ્ચયેન પચ્ચયો. (૧)

અજ્ઝત્તારમ્મણો ધમ્મો બહિદ્ધારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અજ્ઝત્તારમ્મણા અનિચ્ચાનુપસ્સના, દુક્ખાનુપસ્સના, અનત્તાનુપસ્સના બહિદ્ધારમ્મણાય અનિચ્ચાનુપસ્સનાય, દુક્ખાનુપસ્સનાય, અનત્તાનુપસ્સનાય ઉપનિસ્સયપચ્ચયેન પચ્ચયો. (૨)

૨૦. બહિદ્ધારમ્મણો ધમ્મો બહિદ્ધારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – બહિદ્ધારમ્મણા અનિચ્ચાનુપસ્સના, દુક્ખાનુપસ્સના, અનત્તાનુપસ્સના બહિદ્ધારમ્મણાય અનિચ્ચાનુપસ્સનાય, દુક્ખાનુપસ્સનાય, અનત્તાનુપસ્સનાય ઉપનિસ્સયપચ્ચયેન પચ્ચયો. (૧)

બહિદ્ધારમ્મણો ધમ્મો અજ્ઝત્તારમ્મણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – બહિદ્ધારમ્મણા અનિચ્ચાનુપસ્સના, દુક્ખાનુપસ્સના, અનત્તાનુપસ્સના અજ્ઝત્તારમ્મણાય અનિચ્ચાનુપસ્સનાય, દુક્ખાનુપસ્સનાય, અનત્તાનુપસ્સનાય ઉપનિસ્સયપચ્ચયેન પચ્ચયો. (૨)

આસેવનપચ્ચયો

૨૧. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા અજ્ઝત્તારમ્મણા ખન્ધા પચ્છિમાનં પચ્છિમાનં અજ્ઝત્તારમ્મણાનં ખન્ધાનં આસેવનપચ્ચયેન પચ્ચયો. (૧)

અજ્ઝત્તારમ્મણો ધમ્મો બહિદ્ધારમ્મણસ્સ ધમ્મસ્સ આસેવનપચ્ચયેન પચ્ચયો – અજ્ઝત્તારમ્મણં અનુલોમં ગોત્રભુસ્સ, અનુલોમં વોદાનસ્સ આસેવનપચ્ચયેન પચ્ચયો. (૨)

બહિદ્ધારમ્મણો ધમ્મો બહિદ્ધારમ્મણસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા બહિદ્ધારમ્મણા ખન્ધા પચ્છિમાનં પચ્છિમાનં બહિદ્ધારમ્મણાનં ખન્ધાનં આસેવનપચ્ચયેન પચ્ચયો. બહિદ્ધારમ્મણં અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૧)

કમ્મપચ્ચયો

૨૨. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અજ્ઝત્તારમ્મણા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. પટિસન્ધિક્ખણે…પે…. નાનાક્ખણિકા – અજ્ઝત્તારમ્મણા ચેતના વિપાકાનં અજ્ઝત્તારમ્મણાનં ખન્ધાનં કમ્મપચ્ચયેન પચ્ચયો. (૧)

અજ્ઝત્તારમ્મણો ધમ્મો બહિદ્ધારમ્મણસ્સ ધમ્મસ્સ કમ્મપચ્ચયેન પચ્ચયો. નાનાક્ખણિકા – અજ્ઝત્તારમ્મણા ચેતના વિપાકાનં બહિદ્ધારમ્મણાનં ખન્ધાનં કમ્મપચ્ચયેન પચ્ચયો. (૨)

બહિદ્ધારમ્મણો ધમ્મો બહિદ્ધારમ્મણસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – બહિદ્ધારમ્મણા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. પટિસન્ધિક્ખણે…પે…. નાનાક્ખણિકા – બહિદ્ધારમ્મણા ચેતના વિપાકાનં બહિદ્ધારમ્મણાનં ખન્ધાનં કમ્મપચ્ચયેન પચ્ચયો. (૧)

બહિદ્ધારમ્મણો ધમ્મો અજ્ઝત્તારમ્મણસ્સ ધમ્મસ્સ કમ્મપચ્ચયેન પચ્ચયો. નાનાક્ખણિકા – બહિદ્ધારમ્મણા ચેતના વિપાકાનં અજ્ઝત્તારમ્મણાનં ખન્ધાનં કમ્મપચ્ચયેન પચ્ચયો. (૨)

વિપાકપચ્ચયાદિ

૨૩. અજ્ઝત્તારમ્મણો ધમ્મો અજ્ઝત્તારમ્મણસ્સ ધમ્મસ્સ વિપાકપચ્ચયેન પચ્ચયો…પે… આહારપચ્ચયેન પચ્ચયો… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો … મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો… અત્થિપચ્ચયેન પચ્ચયો… નત્થિપચ્ચયેન પચ્ચયો…વિગતપચ્ચયેન પચ્ચયો… અવિગતપચ્ચયેન પચ્ચયો.