૧. વિભઙ્ગવારો

નહેતુપચ્ચયો

૧૯. અનિયતં ધમ્મં પચ્ચયા અનિયતો ધમ્મો ઉપ્પજ્જતિ નહેતુપચ્ચયા – અહેતુકં અનિયતં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… અહેતુકપટિસન્ધિક્ખણે…પે… ખન્ધે પચ્ચયા વત્થુ, વત્થું પચ્ચયા ખન્ધા. એકં મહાભૂતં…પે… અસઞ્ઞસત્તાનં…પે… ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં. વત્થું પચ્ચયા અહેતુકા અનિયતા ખન્ધા. વિચિકિચ્છાસહગતે ઉદ્ધચ્ચસહગતે ખન્ધે ચ વત્થુઞ્ચ પચ્ચયા વિચિકિચ્છાસહગતો ઉદ્ધચ્ચસહગતો મોહો. (૧)

નઆરમ્મણપચ્ચયો

૨૦. મિચ્છત્તનિયતં ધમ્મં પચ્ચયા અનિયતો ધમ્મો ઉપ્પજ્જતિ નઆરમ્મણપચ્ચયા – મિચ્છત્તનિયતે ખન્ધે પચ્ચયા ચિત્તસમુટ્ઠાનં રૂપં (કુસલત્તિકસદિસં, પઞ્ચ કાતબ્બા).

નઅધિપતિપચ્ચયો

૨૧. મિચ્છત્તનિયતં ધમ્મં પચ્ચયા મિચ્છત્તનિયતો ધમ્મો ઉપ્પજ્જતિ નઅધિપતિપચ્ચયા – મિચ્છત્તનિયતે ખન્ધે પચ્ચયા મિચ્છત્તનિયતાધિપતિ. (૧)

સમ્મત્તનિયતં ધમ્મં પચ્ચયા સમ્મત્તનિયતો ધમ્મો ઉપ્પજ્જતિ નઅધિપતિપચ્ચયા – સમ્મત્તનિયતે ખન્ધે પચ્ચયા સમ્મત્તનિયતાધિપતિ. (૧)

અનિયતં ધમ્મં પચ્ચયા અનિયતો ધમ્મો ઉપ્પજ્જતિ નઅધિપતિપચ્ચયા – અનિયતં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે …પે… અસઞ્ઞસત્તાનં…પે… ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં. વત્થું પચ્ચયા અનિયતા ખન્ધા. (૧)

અનિયતં ધમ્મં પચ્ચયા મિચ્છત્તનિયતો ધમ્મો ઉપ્પજ્જતિ નઅધિપતિપચ્ચયા – વત્થું પચ્ચયા મિચ્છત્તનિયતાધિપતિ. (૨)

અનિયતં ધમ્મં પચ્ચયા સમ્મત્તનિયતો ધમ્મો ઉપ્પજ્જતિ નઅધિપતિપચ્ચયા – વત્થું પચ્ચયા સમ્મત્તનિયતાધિપતિ. (૩)

મિચ્છત્તનિયતઞ્ચ અનિયતઞ્ચ ધમ્મં પચ્ચયા મિચ્છત્તનિયતો ધમ્મો ઉપ્પજ્જતિ નઅધિપતિપચ્ચયા – મિચ્છત્તનિયતે ખન્ધે ચ વત્થુઞ્ચ પચ્ચયા મિચ્છત્તનિયતાધિપતિ. (૧)

સમ્મત્તનિયતઞ્ચ અનિયતઞ્ચ ધમ્મં પચ્ચયા સમ્મત્તનિયતો ધમ્મો ઉપ્પજ્જતિ નઅધિપતિપચ્ચયા – સમ્મત્તનિયતે ખન્ધે ચ વત્થુઞ્ચ પચ્ચયા સમ્મત્તનિયતાધિપતિ. (૧)

નઅનન્તરપચ્ચયાદિ

૨૨. મિચ્છત્તનિયતં ધમ્મં પચ્ચયા અનિયતો ધમ્મો ઉપ્પજ્જતિ નઅનન્તરપચ્ચયા…પે… નોનત્થિપચ્ચયા… નોવિગતપચ્ચયા.