૧. વિભઙ્ગવારો

હેતુપચ્ચયો

૨૮. પરિત્તં ધમ્મં પચ્ચયા પરિત્તો ધમ્મો ઉપ્પજ્જતિ હેતુપચ્ચયા – પરિત્તં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે…પે… ખન્ધે પચ્ચયા વત્થુ, વત્થું પચ્ચયા ખન્ધા; એકં મહાભૂતં પચ્ચયા…પે… ઉપાદારૂપં, વત્થું પચ્ચયા પરિત્તા ખન્ધા. (૧)

પરિત્તં ધમ્મં પચ્ચયા મહગ્ગતો ધમ્મો ઉપ્પજ્જતિ હેતુપચ્ચયા – વત્થું પચ્ચયા મહગ્ગતા ખન્ધા. પટિસન્ધિક્ખણે વત્થું પચ્ચયા મહગ્ગતા ખન્ધા. (૨)

પરિત્તં ધમ્મં પચ્ચયા અપ્પમાણો ધમ્મો ઉપ્પજ્જતિ હેતુપચ્ચયા – વત્થું પચ્ચયા અપ્પમાણા ખન્ધા. (૩)

પરિત્તં ધમ્મં પચ્ચયા પરિત્તો ચ અપ્પમાણો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા અપ્પમાણા ખન્ધા, મહાભૂતે પચ્ચયા ચિત્તસમુટ્ઠાનં રૂપં. (૪)

પરિત્તં ધમ્મં પચ્ચયા પરિત્તો ચ મહગ્ગતો ચ ધમ્મા ઉપ્પજ્જન્તિ હેતુપચ્ચયા – વત્થું પચ્ચયા મહગ્ગતા ખન્ધા, મહાભૂતે પચ્ચયા ચિત્તસમુટ્ઠાનં રૂપં. પટિસન્ધિક્ખણે વત્થું પચ્ચયા મહગ્ગતા ખન્ધા. (૫)

૨૯. મહગ્ગતં ધમ્મં પચ્ચયા મહગ્ગતો ધમ્મો ઉપ્પજ્જતિ હેતુપચ્ચયા – મહગ્ગતં એકં ખન્ધં પચ્ચયા તયો ખન્ધા…પે… પટિસન્ધિક્ખણે મહગ્ગતં એકં ખન્ધં…પે…. (૧)

મહગ્ગતં ધમ્મં પચ્ચયા પરિત્તો ધમ્મો ઉપ્પજ્જતિ હેતુપચ્ચયા – મહગ્ગતે ખન્ધે પચ્ચયા ચિત્તસમુટ્ઠાનં રૂપં. પટિસન્ધિક્ખણે…પે…. (૨)

મહગ્ગતં ધમ્મં પચ્ચયા પરિત્તો ચ મહગ્ગતો ચ ધમ્મા ઉપ્પજ્જન્તિ હેતુપચ્ચયા – મહગ્ગતં એકં ખન્ધં પચ્ચયા તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે…પે… પટિસન્ધિક્ખણે મહગ્ગતં એકં ખન્ધં…પે…. (૩)

અપ્પમાણં ધમ્મં પચ્ચયા અપ્પમાણો ધમ્મો ઉપ્પજ્જતિ હેતુપચ્ચયા – અપ્પમાણે… તીણિ.

૩૦. પરિત્તઞ્ચ અપ્પમાણઞ્ચ ધમ્મં પચ્ચયા પરિત્તો ધમ્મો ઉપ્પજ્જતિ હેતુપચ્ચયા – અપ્પમાણે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. (૧)

પરિત્તઞ્ચ અપ્પમાણઞ્ચ ધમ્મં પચ્ચયા અપ્પમાણો ધમ્મો ઉપ્પજ્જતિ હેતુપચ્ચયા – અપ્પમાણં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે…. (૨)

પરિત્તઞ્ચ અપ્પમાણઞ્ચ ધમ્મં પચ્ચયા પરિત્તો ચ અપ્પમાણો ચ ધમ્મા ઉપ્પજ્જન્તિ હેતુપચ્ચયા – અપ્પમાણં એકં ખન્ધઞ્ચ વત્થુઞ્ચ પચ્ચયા તયો ખન્ધા…પે… દ્વે ખન્ધે…પે… અપ્પમાણે ખન્ધે ચ મહાભૂતે ચ પચ્ચયા ચિત્તસમુટ્ઠાનં રૂપં. (૩)

પરિત્તઞ્ચ મહગ્ગતઞ્ચ ધમ્મં પચ્ચયા પરિત્તો ધમ્મો ઉપ્પજ્જતિ હેતુપચ્ચયા… તીણિ (પટિસન્ધિક્ખણે તીણિપિ કાતબ્બા).

આરમ્મણપચ્ચયાદિ

૩૧. પરિત્તં ધમ્મં પચ્ચયા પરિત્તો ધમ્મો ઉપ્પજ્જતિ આરમ્મણપચ્ચયા – પરિત્તં એકં ખન્ધં પચ્ચયા તયો ખન્ધા…પે… દ્વે ખન્ધે…પે… પટિસન્ધિક્ખણે…પે… વત્થું પચ્ચયા ખન્ધા, ચક્ખાયતનં પચ્ચયા ચક્ખુવિઞ્ઞાણં…પે… કાયાયતનં પચ્ચયા કાયવિઞ્ઞાણં, વત્થું પચ્ચયા પરિત્તા ખન્ધા (અવસેસા છ પઞ્હા હેતુપચ્ચયસદિસા સત્ત કાતબ્બા), અધિપતિપચ્ચયા (પટિસન્ધિ નત્થિ, સત્તરસ પઞ્હા પરિપુણ્ણા), અનન્તરપચ્ચયા…પે… અવિગતપચ્ચયા.

૧. પચ્ચયાનુલોમં

૨. સઙ્ખ્યાવારો

૩૨. હેતુયા સત્તરસ, આરમ્મણે સત્ત, અધિપતિયા સત્તરસ, અનન્તરે સત્ત, સમનન્તરે સત્ત, સહજાતે સત્તરસ, અઞ્ઞમઞ્ઞે નવ, નિસ્સયે સત્તરસ, ઉપનિસ્સયે સત્ત, પુરેજાતે સત્ત, આસેવને સત્ત, કમ્મે સત્તરસ, વિપાકે સત્તરસ, આહારે સત્તરસ, ઇન્દ્રિયે ઝાને મગ્ગે સત્તરસ, સમ્પયુત્તે સત્ત, વિપ્પયુત્તે સત્તરસ, અત્થિયા સત્તરસ, નત્થિયા સત્ત, વિગતે સત્ત, અવિગતે સત્તરસ (એવં ગણેતબ્બં)

અનુલોમં.