૧. વિભઙ્ગવારો

હેતુપચ્ચયો

૪૦૧. કુસલો ધમ્મો કુસલસ્સ ધમ્મસ્સ હેતુપચ્ચયેન પચ્ચયો – કુસલા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. કુસલો ધમ્મો અબ્યાકતસ્સ ધમ્મસ્સ હેતુપચ્ચયેન પચ્ચયો – કુસલા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. કુસલો ધમ્મો કુસલસ્સ ચ અબ્યાકતસ્સ ચ ધમ્મસ્સ હેતુપચ્ચયેન પચ્ચયો – કુસલા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૪૦૨. અકુસલો ધમ્મો અકુસલસ્સ ધમ્મસ્સ હેતુપચ્ચયેન પચ્ચયો – અકુસલા હેતૂ સમ્પયુત્તકાનં ખન્ધાનં હેતુપચ્ચયેન પચ્ચયો. અકુસલો ધમ્મો અબ્યાકતસ્સ ધમ્મસ્સ હેતુપચ્ચયેન પચ્ચયો – અકુસલા હેતૂ ચિત્તસમુટ્ઠાનાનં રૂપાનં હેતુપચ્ચયેન પચ્ચયો. અકુસલો ધમ્મો અકુસલસ્સ ચ અબ્યાકતસ્સ ચ ધમ્મસ્સ હેતુપચ્ચયેન પચ્ચયો – અકુસલા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. (૩)

૪૦૩. અબ્યાકતો ધમ્મો અબ્યાકતસ્સ ધમ્મસ્સ હેતુપચ્ચયેન પચ્ચયો – વિપાકાબ્યાકતા કિરિયાબ્યાકતા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો; પટિસન્ધિક્ખણે વિપાકાબ્યાકતા હેતૂ સમ્પયુત્તકાનં ખન્ધાનં કટત્તા ચ રૂપાનં હેતુપચ્ચયેન પચ્ચયો. (૧)

આરમ્મણપચ્ચયો

૪૦૪. કુસલો ધમ્મો કુસલસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, ઝાના વુટ્ઠહિત્વા ઝાનં પચ્ચવેક્ખતિ, સેક્ખા ગોત્રભું પચ્ચવેક્ખન્તિ, વોદાનં પચ્ચવેક્ખન્તિ, સેક્ખા મગ્ગા વુટ્ઠહિત્વા મગ્ગં પચ્ચવેક્ખન્તિ, સેક્ખા વા પુથુજ્જના વા કુસલં અનિચ્ચતો દુક્ખતો અનત્તતો વિપસ્સન્તિ, ચેતોપરિયઞાણેન કુસલચિત્તસમઙ્ગિસ્સ ચિત્તં જાનન્તિ. આકાસાનઞ્ચાયતનકુસલં વિઞ્ઞાણઞ્ચાયતનકુસલસ્સ આરમ્મણપચ્ચયેન પચ્ચયો. આકિઞ્ચઞ્ઞાયતનકુસલં નેવસઞ્ઞાનાસઞ્ઞાયતનકુસલસ્સ આરમ્મણપચ્ચયેન પચ્ચયો. કુસલા ખન્ધા ઇદ્ધિવિધઞાણસ્સ ચેતોપરિયઞાણસ્સ પુબ્બેનિવાસાનુસ્સતિઞાણસ્સ યથાકમ્મૂપગઞાણસ્સ અનાગતંસઞાણસ્સ આરમ્મણપચ્ચયેન પચ્ચયો. (૧)

૪૦૫. કુસલો ધમ્મો અકુસલસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. પુબ્બે સુચિણ્ણાનિ અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. ઝાના વુટ્ઠહિત્વા ઝાનં અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ. ઝાને પરિહીને વિપ્પટિસારિસ્સ દોમનસ્સં ઉપ્પજ્જતિ. (૨)

૪૦૬. કુસલો ધમ્મો અબ્યાકતસ્સ ધમ્મસ્સ આરમ્મણપચ્ચયેન પચ્ચયો – અરહા મગ્ગા વુટ્ઠહિત્વા મગ્ગં પચ્ચવેક્ખતિ; પુબ્બે સુચિણ્ણાનિ પચ્ચવેક્ખતિ; કુસલં અનિચ્ચતો દુક્ખતો અનત્તતો વિપ્પસ્સતિ; ચેતોપરિયઞાણેન કુસલચિત્તસમઙ્ગિસ્સ ચિત્તં જાનાતિ. સેક્ખા વા પુથુજ્જના વા કુસલં અનિચ્ચતો દુક્ખતો અનત્તતો વિપસ્સન્તિ, કુસલે નિરુદ્ધે વિપાકો તદારમ્મણતા ઉપ્પજ્જતિ. કુસલં અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ, અકુસલે નિરુદ્ધે વિપાકો તદારમ્મણતા ઉપ્પજ્જતિ. આકાસાનઞ્ચાયતનકુસલં વિઞ્ઞાણઞ્ચાયતનવિપાકસ્સ ચ, કિરિયસ્સ ચ આરમ્મણપચ્ચયેન પચ્ચયો. આકિઞ્ચઞ્ઞાયતનકુસલં નેવસઞ્ઞાનાસઞ્ઞાયતનવિપાકસ્સ ચ, કિરિયસ્સ ચ આરમ્મણપચ્ચયેન પચ્ચયો. કુસલા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૩)

૪૦૭. અકુસલો ધમ્મો અકુસલસ્સ ધમ્મસ્સ આરમ્મણપચ્ચયેન પચ્ચયો – રાગં અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. દિટ્ઠિં અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. વિચિકિચ્છં આરબ્ભ વિચિકિચ્છા ઉપ્પજ્જતિ, દિટ્ઠિ ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. ઉદ્ધચ્ચં આરબ્ભ ઉદ્ધચ્ચં ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, દોમનસ્સં ઉપ્પજ્જતિ. દોમનસ્સં આરબ્ભ દોમનસ્સં ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ. (૧)

૪૦૮. અકુસલો ધમ્મો કુસલસ્સ ધમ્મસ્સ આરમ્મણપચ્ચયેન પચ્ચયો – સેક્ખા પહીને કિલેસે [પહીનકિલેસે (સ્યા.)] પચ્ચવેક્ખન્તિ, વિક્ખમ્ભિતે કિલેસે [વિક્ખમ્ભિતકિલેસે (સ્યા.)] પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ, સેક્ખા વા પુથુજ્જના વા અકુસલં અનિચ્ચતો દુક્ખતો અનત્તતો વિપસ્સન્તિ, ચેતોપરિયઞાણેન અકુસલચિત્તસમઙ્ગિસ્સ ચિત્તં જાનન્તિ. અકુસલા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, યથાકમ્મૂપગઞાણસ્સ અનાગતંસઞાણસ્સ આરમ્મણપચ્ચયેન પચ્ચયો. (૨)

૪૦૯. અકુસલો ધમ્મો અબ્યાકતસ્સ ધમ્મસ્સ આરમ્મણપચ્ચયેન પચ્ચયો – અરહા પહીને કિલેસે પચ્ચવેક્ખતિ, પુબ્બે સમુદાચિણ્ણે કિલેસે જાનાતિ, અકુસલં અનિચ્ચતો દુક્ખતો અનત્તતો વિપસ્સતિ, ચેતોપરિયઞાણેન અકુસલચિત્તસમઙ્ગિસ્સ ચિત્તં જાનાતિ, સેક્ખા વા પુથુજ્જના વા અકુસલં અનિચ્ચતો દુક્ખતો અનત્તતો વિપસ્સન્તિ, કુસલે નિરુદ્ધે વિપાકો તદારમ્મણતા ઉપ્પજ્જતિ. અકુસલં અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. અકુસલે નિરુદ્ધે વિપાકો તદારમ્મણતા ઉપ્પજ્જતિ. અકુસલા ખન્ધા ચેતોપરિયઞાણસ્સ પુબ્બેનિવાસાનુસ્સતિઞાણસ્સ યથાકમ્મૂપગઞાણસ્સ અનાગતંસઞાણસ્સ આવજ્જનાય આરમ્મણપચ્ચયેન પચ્ચયો. (૩)

૪૧૦. અબ્યાકતો ધમ્મો અબ્યાકતસ્સ ધમ્મસ્સ આરમ્મણપચ્ચયેન પચ્ચયો – અરહા ફલં પચ્ચવેક્ખતિ, નિબ્બાનં પચ્ચવેક્ખતિ. નિબ્બાનં ફલસ્સ આવજ્જનાય આરમ્મણપચ્ચયેન પચ્ચયો. અરહા ચક્ખું અનિચ્ચતો દુક્ખતો અનત્તતો વિપસ્સતિ. સોતં… ઘાનં… જિવ્હં… કાયં… રૂપે… સદ્દે… ગન્ધે… રસે… ફોટ્ઠબ્બે… વત્થું… વિપાકાબ્યાકતે કિરિયાબ્યાકતે ખન્ધે અનિચ્ચતો દુક્ખતો અનત્તતો વિપસ્સતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન વિપાકાબ્યાકતકિરિયાબ્યાકતચિત્તસમઙ્ગિસ્સ ચિત્તં જાનાતિ. આકાસાનઞ્ચાયતનકિરિયં વિઞ્ઞાણઞ્ચાયતનકિરિયસ્સ આરમ્મણપચ્ચયેન પચ્ચયો. આકિઞ્ચઞ્ઞાયતનકિરિયં નેવસઞ્ઞાનાસઞ્ઞાયતનકિરિયસ્સ આરમ્મણપચ્ચયેન પચ્ચયો. રૂપાયતનં ચક્ખુવિઞ્ઞાણસ્સ આરમ્મણપચ્ચયેન પચ્ચયો. સદ્દાયતનં સોતવિઞ્ઞાણસ્સ… ગન્ધાયતનં ઘાનવિઞ્ઞાણસ્સ… રસાયતનં જિવ્હાવિઞ્ઞાણસ્સ … ફોટ્ઠબ્બાયતનં કાયવિઞ્ઞાણસ્સ આરમ્મણપચ્ચયેન પચ્ચયો. અબ્યાકતા ખન્ધા ઇદ્ધિવિધઞાણસ્સ, ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ, આવજ્જનાય આરમ્મણપચ્ચયેન પચ્ચયો. (૧)

૪૧૧. અબ્યાકતો ધમ્મો કુસલસ્સ ધમ્મસ્સ આરમ્મણપચ્ચયેન પચ્ચયો – સેક્ખા ફલં પચ્ચવેક્ખન્તિ, નિબ્બાનં પચ્ચવેક્ખન્તિ. નિબ્બાનં ગોત્રભુસ્સ વોદાનસ્સ મગ્ગસ્સ આરમ્મણપચ્ચયેન પચ્ચયો. સેક્ખા વા પુથુજ્જના વા ચક્ખું અનિચ્ચતો દુક્ખતો અનત્તતો વિપ્પસ્સન્તિ. સોતં… ઘાનં… જિવ્હં… કાયં… રૂપે… સદ્દે… ગન્ધે… રસે… ફોટ્ઠબ્બે… વત્થું… વિપાકાબ્યાકતે કિરિયાબ્યાકતે ખન્ધે અનિચ્ચતો દુક્ખતો અનત્તતો વિપસ્સન્તિ, દિબ્બેન ચક્ખુના રૂપં પસ્સન્તિ, દિબ્બાય સોતધાતુયા સદ્દં સુણન્તિ, ચેતોપરિયઞાણેન વિપાકાબ્યાકતકિરિયાબ્યાકતચિત્તસમઙ્ગિસ્સ ચિત્તં જાનન્તિ. અબ્યાકતા ખન્ધા ઇદ્ધિવિધઞાણસ્સ ચેતોપરિયઞાણસ્સ પુબ્બેનિવાસાનુસ્સતિઞાણસ્સ અનાગતંસઞાણસ્સ આરમ્મણપચ્ચયેન પચ્ચયો.

૪૧૨. અબ્યાકતો ધમ્મો અકુસલસ્સ ધમ્મસ્સ આરમ્મણપચ્ચયેન પચ્ચયો – ચક્ખું અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. સોતં… ઘાનં… જિવ્હં… કાયં… રૂપે… સદ્દે… ગન્ધે… રસે… ફોટ્ઠબ્બે… વત્થું… વિપાકાબ્યાકતે કિરિયાબ્યાકતે ખન્ધે અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. (૩)

અધિપતિપચ્ચયો

૪૧૩. કુસલો ધમ્મો કુસલસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા, તં ગરું કત્વા પચ્ચવેક્ખતિ, પુબ્બે સુચિણ્ણાનિ ગરું કત્વા પચ્ચવેક્ખતિ, ઝાના વુટ્ઠહિત્વા ઝાનં ગરું કત્વા પચ્ચવેક્ખતિ. સેક્ખા ગોત્રભું ગરું કત્વા પચ્ચવેક્ખન્તિ, વોદાનં ગરું કત્વા પચ્ચવેક્ખન્તિ. સેક્ખા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ. સહજાતાધિપતિ – કુસલાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

૪૧૪. કુસલો ધમ્મો અકુસલસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા, તં ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ, પુબ્બે સુચિણ્ણાનિ ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. ઝાના વુટ્ઠહિત્વા ઝાનં ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ.

કુસલો ધમ્મો અબ્યાકતસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ, સહજાતાધિપતિ. આરમ્મણાધિપતિ – અરહા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખતિ. સહજાતાધિપતિ – કુસલાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૩)

કુસલો ધમ્મો કુસલસ્સ ચ અબ્યાકતસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – કુસલાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૪)

૪૧૫. અકુસલો ધમ્મો અકુસલસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ, સહજાતાધિપતિ. આરમ્મણાધિપતિ – રાગં ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. દિટ્ઠિં ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – અકુસલાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અકુસલાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

અકુસલો ધમ્મો અકુસલસ્સ ચ અબ્યાકતસ્સ ચ ધમ્મસ્સ અધિપતિ પચ્ચયેન પચ્ચયો. સહજાતાધિપતિ – અકુસલાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૪૧૬. અબ્યાકતો ધમ્મો અબ્યાકતસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ, સહજાતાધિપતિ. આરમ્મણાધિપતિ – અરહા ફલં ગરું કત્વા પચ્ચવેક્ખતિ, નિબ્બાનં ગરું કત્વા પચ્ચવેક્ખતિ. નિબ્બાનં ફલસ્સ અધિપતિપચ્ચયેન પચ્ચયો. સહજાતાધિપતિ – વિપાકાબ્યાકતકિરિયાબ્યાકતાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

અબ્યાકતો ધમ્મો કુસલસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – સેક્ખા ફલં ગરું કત્વા પચ્ચવેક્ખન્તિ, નિબ્બાનં ગરું કત્વા પચ્ચવેક્ખન્તિ. નિબ્બાનં ગોત્રભુસ્સ, વોદાનસ્સ, મગ્ગસ્સ અધિપતિપચ્ચયેન પચ્ચયો. (૨)

અબ્યાકતો ધમ્મો અકુસલસ્સ ધમ્મસ્સ અધિપતિપચ્ચયેન પચ્ચયો. આરમ્મણાધિપતિ – ચક્ખું ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સોતં… ઘાનં… જિવ્હં… કાયં… રૂપે… સદ્દે… ગન્ધે… રસે… ફોટ્ઠબ્બે… વત્થું… વિપાકાબ્યાકતે કિરિયાબ્યાકતે ખન્ધે ગરું કત્વા અસ્સાદેતિ અભિનન્દતિ; તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. (૩)

અનન્તરપચ્ચયો

૪૧૭. કુસલો ધમ્મો કુસલસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા કુસલા ખન્ધા પચ્છિમાનં પચ્છિમાનં કુસલાનં ખન્ધાનં અનન્તરપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ અનન્તરપચ્ચયેન પચ્ચયો. (૧)

કુસલો ધમ્મો અબ્યાકતસ્સ ધમ્મસ્સ અનન્તરપચ્ચયેન પચ્ચયો. કુસલં વુટ્ઠાનસ્સ… મગ્ગો ફલસ્સ… અનુલોમં સેક્ખાય ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકુસલં ફલસમાપત્તિયા અનન્તરપચ્ચયેન પચ્ચયો. (૨)

અકુસલો ધમ્મો અકુસલસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અકુસલા ખન્ધા પચ્છિમાનં પચ્છિમાનં અકુસલાનં ખન્ધાનં અનન્તરપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ અનન્તરપચ્ચયેન પચ્ચયો. અકુસલં વુટ્ઠાનસ્સ અનન્તરપચ્ચયેન પચ્ચયો. (૨)

અબ્યાકતો ધમ્મો અબ્યાકતસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા વિપાકાબ્યાકતા કિરિયાબ્યાકતા ખન્ધા પચ્છિમાનં પચ્છિમાનં વિપાકાબ્યાકતાનં કિરિયાબ્યાકતાનં ખન્ધાનં અનન્તરપચ્ચયેન પચ્ચયો. ભવઙ્ગં આવજ્જનાય… કિરિયં વુટ્ઠાનસ્સ… અરહતો અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકિરિયં ફલસમાપત્તિયા અનન્તરપચ્ચયેન પચ્ચયો. (૧)

અબ્યાકતો ધમ્મો કુસલસ્સ ધમ્મસ્સ અનન્તરપચ્ચયેન પચ્ચયો – આવજ્જના કુસલાનં ખન્ધાનં અનન્તરપચ્ચયેન પચ્ચયો. (૨)

અબ્યાકતો ધમ્મો અકુસલસ્સ ધમ્મસ્સ અનન્તરપચ્ચયેન પચ્ચયો – આવજ્જના અકુસલાનં ખન્ધાનં અનન્તરપચ્ચયેન પચ્ચયો. (૩)

સમનન્તરપચ્ચયો

૪૧૮. કુસલો ધમ્મો કુસલસ્સ ધમ્મસ્સ સમનન્તરપચ્ચયેન પચ્ચયો – પુરિમા પુરિમા કુસલા ખન્ધા પચ્છિમાનં પચ્છિમાનં કુસલાનં ખન્ધાનં સમનન્તરપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ સમનન્તરપચ્ચયેન પચ્ચયો.

કુસલો ધમ્મો અબ્યાકતસ્સ ધમ્મસ્સ સમનન્તરપચ્ચયેન પચ્ચયો. કુસલં વુટ્ઠાનસ્સ… મગ્ગો ફલસ્સ… અનુલોમં સેક્ખાય ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકુસલં ફલસમાપત્તિયા સમનન્તરપચ્ચયેન પચ્ચયો. (૨)

અકુસલો ધમ્મો અકુસલસ્સ ધમ્મસ્સ સમનન્તરપચ્ચયેન પચ્ચયો – પુરિમા પુરિમા અકુસલા ખન્ધા પચ્છિમાનં પચ્છિમાનં અકુસલાનં ખન્ધાનં સમનન્તરપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ સમનન્તરપચ્ચયેન પચ્ચયો – અકુસલં વુટ્ઠાનસ્સ સમનન્તરપચ્ચયેન પચ્ચયો. (૨)

અબ્યાકતો ધમ્મો અબ્યાકતસ્સ ધમ્મસ્સ સમનન્તરપચ્ચયેન પચ્ચયો – પુરિમા પુરિમા વિપાકાબ્યાકતા કિરિયાબ્યાકતા ખન્ધા પચ્છિમાનં પચ્છિમાનં વિપાકાબ્યાકતાનં કિરિયાબ્યાકતાનં ખન્ધાનં સમનન્તરપચ્ચયેન પચ્ચયો. ભવઙ્ગં આવજ્જનાય… કિરિયં વુટ્ઠાનસ્સ… અરહતો અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકિરિયં ફલસમાપત્તિયા સમનન્તરપચ્ચયેન પચ્ચયો. (૧)

અબ્યાકતો ધમ્મો કુસલસ્સ ધમ્મસ્સ સમનન્તરપચ્ચયેન પચ્ચયો – આવજ્જના કુસલાનં ખન્ધાનં સમનન્તરપચ્ચયેન પચ્ચયો. (૨)

અબ્યાકતો ધમ્મો અકુસલસ્સ ધમ્મસ્સ સમનન્તરપચ્ચયેન પચ્ચયો – આવજ્જના અકુસલાનં ખન્ધાનં સમનન્તરપચ્ચયેન પચ્ચયો. (૩)

સહજાતપચ્ચયો

૪૧૯. કુસલો ધમ્મો કુસલસ્સ ધમ્મસ્સ સહજાતપચ્ચયેન પચ્ચયો – કુસલો એકો ખન્ધો તિણ્ણન્નં ખન્ધાનં સહજાતપચ્ચયેન પચ્ચયો. તયો ખન્ધા એકસ્સ ખન્ધસ્સ સહજાતપચ્ચયેન પચ્ચયો. દ્વે ખન્ધા દ્વિન્નં ખન્ધાનં સહજાતપચ્ચયેન પચ્ચયો. (૧)

કુસલો ધમ્મો અબ્યાકતસ્સ ધમ્મસ્સ સહજાતપચ્ચયેન પચ્ચયો – કુસલા ખન્ધા ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૨)

કુસલો ધમ્મો કુસલસ્સ ચ અબ્યાકતસ્સ ચ ધમ્મસ્સ સહજાતપચ્ચયેન પચ્ચયો – કુસલો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. તયો ખન્ધા એકસ્સ ખન્ધસ્સ ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. દ્વે ખન્ધા દ્વિન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. (૩)

અકુસલો ધમ્મો અકુસલસ્સ ધમ્મસ્સ સહજાતપચ્ચયેન પચ્ચયો – અકુસલો એકો ખન્ધો તિણ્ણન્નં ખન્ધાનં સહજાતપચ્ચયેન પચ્ચયો. તયો ખન્ધા એકસ્સ ખન્ધસ્સ સહજાતપચ્ચયેન પચ્ચયો. દ્વે ખન્ધા દ્વિન્નં ખન્ધાનં સહજાતપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ સહજાતપચ્ચયેન પચ્ચયો – અકુસલા ખન્ધા ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૨)

અકુસલો ધમ્મો અકુસલસ્સ ચ અબ્યાકતસ્સ ચ ધમ્મસ્સ સહજાતપચ્ચયેન પચ્ચયો – અકુસલો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. તયો ખન્ધા એકસ્સ ખન્ધસ્સ ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. દ્વે ખન્ધા દ્વિન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. (૩)

અબ્યાકતો ધમ્મો અબ્યાકતસ્સ ધમ્મસ્સ સહજાતપચ્ચયેન પચ્ચયો – વિપાકાબ્યાકતો કિરિયાબ્યાકતો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. તયો ખન્ધા એકસ્સ ખન્ધસ્સ ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. દ્વે ખન્ધા દ્વિન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો. પટિસન્ધિક્ખણે વિપાકાબ્યાકતો એકો ખન્ધો તિણ્ણન્નં ખન્ધાનં કટત્તા ચ રૂપાનં સહજાતપચ્ચયેન પચ્ચયો. તયો ખન્ધા એકસ્સ ખન્ધસ્સ કટત્તા ચ રૂપાનં સહજાતપચ્ચયેન પચ્ચયો. દ્વે ખન્ધા દ્વિન્નં ખન્ધાનં કટત્તા ચ રૂપાનં સહજાતપચ્ચયેન પચ્ચયો. ખન્ધા વત્થુસ્સ સહજાતપચ્ચયેન પચ્ચયો. વત્થુ ખન્ધાનં સહજાતપચ્ચયેન પચ્ચયો. એકં મહાભૂતં તિણ્ણન્નં મહાભૂતાનં સહજાતપચ્ચયેન પચ્ચયો. તયો મહાભૂતા એકસ્સ મહાભૂતસ્સ સહજાતપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં સહજાતપચ્ચયેન પચ્ચયો. મહાભૂતા ચિત્તસમુટ્ઠાનાનં રૂપાનં કટત્તારૂપાનં ઉપાદારૂપાનં સહજાતપચ્ચયેન પચ્ચયો. બાહિરં એકં મહાભૂતં તિણ્ણન્નં મહાભૂતાનં સહજાતપચ્ચયેન પચ્ચયો. તયો મહાભૂતા એકસ્સ મહાભૂતસ્સ સહજાતપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં સહજાતપચ્ચયેન પચ્ચયો. મહાભૂતા ઉપાદારૂપાનં સહજાતપચ્ચયેન પચ્ચયો. આહારસમુટ્ઠાનં એકં મહાભૂતં તિણ્ણન્નં મહાભૂતાનં સહજાતપચ્ચયેન પચ્ચયો. તયો મહાભૂતા એકસ્સ મહાભૂતસ્સ સહજાતપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં સહજાતપચ્ચયેન પચ્ચયો. મહાભૂતા ઉપાદારૂપાનં સહજાતપચ્ચયેન પચ્ચયો. ઉતુસમુટ્ઠાનં એકં મહાભૂતં તિણ્ણન્નં મહાભૂતાનં સહજાતપચ્ચયેન પચ્ચયો. તયો મહાભૂતા એકસ્સ મહાભૂતસ્સ સહજાતપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં સહજાતપચ્ચયેન પચ્ચયો. મહાભૂતા ઉપાદારૂપાનં સહજાતપચ્ચયેન પચ્ચયો. અસઞ્ઞસત્તાનં એકં મહાભૂતં તિણ્ણન્નં મહાભૂતાનં સહજાતપચ્ચયેન પચ્ચયો. તયો મહાભૂતા એકસ્સ મહાભૂતસ્સ સહજાતપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં સહજાતપચ્ચયેન પચ્ચયો. મહાભૂતા કટત્તારૂપાનં ઉપાદારૂપાનં સહજાતપચ્ચયેન પચ્ચયો. (૧)

કુસલો ચ અબ્યાકતો ચ ધમ્મા અબ્યાકતસ્સ ધમ્મસ્સ સહજાતપચ્ચયેન પચ્ચયો – કુસલા ખન્ધા ચ મહાભૂતા ચ ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૧)

અકુસલો ચ અબ્યાકતો ચ ધમ્મા અબ્યાકતસ્સ ધમ્મસ્સ સહજાતપચ્ચયેન પચ્ચયો – અકુસલા ખન્ધા ચ મહાભૂતા ચ ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૧)

અઞ્ઞમઞ્ઞપચ્ચયો

૪૨૦. કુસલો ધમ્મો કુસલસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – કુસલો એકો ખન્ધો તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો. તયો ખન્ધા એકસ્સ ખન્ધસ્સ અઞ્ઞમઞ્ઞપચ્ચયેન પચ્ચયો. દ્વે ખન્ધા દ્વિન્નં ખન્ધાનં અઞ્ઞમઞ્ઞપચ્ચયેન પચ્ચયો. (૧)

અકુસલો ધમ્મો અકુસલસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – અકુસલો એકો ખન્ધો તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો. તયો ખન્ધા એકસ્સ ખન્ધસ્સ અઞ્ઞમઞ્ઞપચ્ચયેન પચ્ચયો. દ્વે ખન્ધા દ્વિન્નં ખન્ધાનં અઞ્ઞમઞ્ઞપચ્ચયેન પચ્ચયો. (૧)

અબ્યાકતો ધમ્મો અબ્યાકતસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – વિપાકાબ્યાકતો કિરિયાબ્યાકતો એકો ખન્ધો તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો. તયો ખન્ધા એકસ્સ ખન્ધસ્સ અઞ્ઞમઞ્ઞપચ્ચયેન પચ્ચયો. દ્વે ખન્ધા દ્વિન્નં ખન્ધાનં અઞ્ઞમઞ્ઞપચ્ચયેન પચ્ચયો. પટિસન્ધિક્ખણે વિપાકાબ્યાકતો એકો ખન્ધો તિણ્ણન્નં ખન્ધાનં વત્થુસ્સ ચ અઞ્ઞમઞ્ઞપચ્ચયેન પચ્ચયો. તયો ખન્ધા એકસ્સ ખન્ધસ્સ વત્થુસ્સ ચ અઞ્ઞમઞ્ઞપચ્ચયેન પચ્ચયો. દ્વે ખન્ધા દ્વિન્નં ખન્ધાનં વત્થુસ્સ ચ અઞ્ઞમઞ્ઞપચ્ચયેન પચ્ચયો. ખન્ધા વત્થુસ્સ અઞ્ઞમઞ્ઞપચ્ચયેન પચ્ચયો. વત્થુ ખન્ધાનં અઞ્ઞમઞ્ઞપચ્ચયેન પચ્ચયો. એકં મહાભૂતં તિણ્ણન્નં મહાભૂતાનં અઞ્ઞમઞ્ઞપચ્ચયેન પચ્ચયો. તયો મહાભૂતા એકસ્સ મહાભૂતસ્સ અઞ્ઞમઞ્ઞપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં અઞ્ઞમઞ્ઞપચ્ચયેન પચ્ચયો; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં તિણ્ણન્નં મહાભૂતાનં અઞ્ઞમઞ્ઞપચ્ચયેન પચ્ચયો…પે… દ્વે મહાભૂતા દ્વિન્નં મહાભૂતાનં અઞ્ઞમઞ્ઞપચ્ચયેન પચ્ચયો. (૧)

નિસ્સયપચ્ચયો

૪૨૧. કુસલો ધમ્મો કુસલસ્સ ધમ્મસ્સ નિસ્સયપચ્ચયેન પચ્ચયો – કુસલો એકો ખન્ધો તિણ્ણન્નં ખન્ધાનં નિસ્સયપચ્ચયેન પચ્ચયો. તયો ખન્ધા એકસ્સ ખન્ધસ્સ નિસ્સયપચ્ચયેન પચ્ચયો. દ્વે ખન્ધા દ્વિન્નં ખન્ધાનં નિસ્સયપચ્ચયેન પચ્ચયો. (૧)

કુસલો ધમ્મો અબ્યાકતસ્સ ધમ્મસ્સ નિસ્સયપચ્ચયેન પચ્ચયો – કુસલા ખન્ધા ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૨)

કુસલો ધમ્મો કુસલસ્સ ચ અબ્યાકતસ્સ ચ ધમ્મસ્સ નિસ્સયપચ્ચયેન પચ્ચયો – કુસલો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. તયો ખન્ધા એકસ્સ ખન્ધસ્સ ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. દ્વે ખન્ધા દ્વિન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. (૩)

અકુસલો ધમ્મો અકુસલસ્સ ધમ્મસ્સ નિસ્સયપચ્ચયેન પચ્ચયો – અકુસલો એકો ખન્ધો તિણ્ણન્નં ખન્ધાનં નિસ્સયપચ્ચયેન પચ્ચયો. તયો ખન્ધા એકસ્સ ખન્ધસ્સ નિસ્સયપચ્ચયેન પચ્ચયો. દ્વે ખન્ધા દ્વિન્નં ખન્ધાનં નિસ્સયપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ નિસ્સયપચ્ચયેન પચ્ચયો – અકુસલા ખન્ધા ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૨)

અકુસલો ધમ્મો અકુસલસ્સ ચ અબ્યાકતસ્સ ચ ધમ્મસ્સ નિસ્સયપચ્ચયેન પચ્ચયો – અકુસલો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. તયો ખન્ધા એકસ્સ ખન્ધસ્સ ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. દ્વે ખન્ધા દ્વિન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. (૩)

અબ્યાકતો ધમ્મો અબ્યાકતસ્સ ધમ્મસ્સ નિસ્સયપચ્ચયેન પચ્ચયો – વિપાકાબ્યાકતો કિરિયાબ્યાકતો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. તયો ખન્ધા એકસ્સ ખન્ધસ્સ ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. દ્વે ખન્ધા દ્વિન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો. પટિસન્ધિક્ખણે વિપાકાબ્યાકતો એકો ખન્ધો તિણ્ણન્નં ખન્ધાનં કટત્તા ચ રૂપાનં નિસ્સયપચ્ચયેન પચ્ચયો. તયો ખન્ધા એકસ્સ ખન્ધસ્સ કટત્તા ચ રૂપાનં નિસ્સયપચ્ચયેન પચ્ચયો. દ્વે ખન્ધા દ્વિન્નં ખન્ધાનં કટત્તા ચ રૂપાનં નિસ્સયપચ્ચયેન પચ્ચયો. ખન્ધા વત્થુસ્સ નિસ્સયપચ્ચયેન પચ્ચયો. વત્થુ ખન્ધાનં નિસ્સયપચ્ચયેન પચ્ચયો. એકં મહાભૂતં તિણ્ણન્નં મહાભૂતાનં નિસ્સયપચ્ચયેન પચ્ચયો. તયો મહાભૂતા એકસ્સ મહાભૂતસ્સ નિસ્સયપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં નિસ્સયપચ્ચયેન પચ્ચયો. મહાભૂતા ચિત્તસમુટ્ઠાનાનં રૂપાનં, કટત્તારૂપાનં, ઉપાદારૂપાનં નિસ્સયપચ્ચયેન પચ્ચયો; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં તિણ્ણન્નં મહાભૂતાનં નિસ્સયપચ્ચયેન પચ્ચયો. તયો મહાભૂતા એકસ્સ મહાભૂતસ્સ નિસ્સયપચ્ચયેન પચ્ચયો. દ્વે મહાભૂતા દ્વિન્નં મહાભૂતાનં નિસ્સયપચ્ચયેન પચ્ચયો. મહાભૂતા કટત્તારૂપાનં, ઉપાદારૂપાનં નિસ્સયપચ્ચયેન પચ્ચયો. ચક્ખાયતનં ચક્ખુવિઞ્ઞાણસ્સ નિસ્સયપચ્ચયેન પચ્ચયો. સોતાયતનં…પે… ઘાનાયતનં…પે… જિવ્હાયતનં …પે… કાયાયતનં કાયવિઞ્ઞાણસ્સ નિસ્સયપચ્ચયેન પચ્ચયો. વત્થુ વિપાકાબ્યાકતાનં કિરિયાબ્યાકતાનં ખન્ધાનં નિસ્સયપચ્ચયેન પચ્ચયો.

અબ્યાકતો ધમ્મો કુસલસ્સ ધમ્મસ્સ નિસ્સયપચ્ચયેન પચ્ચયો – વત્થુ કુસલાનં ખન્ધાનં નિસ્સયપચ્ચયેન પચ્ચયો. (૨)

અબ્યાકતો ધમ્મો અકુસલસ્સ ધમ્મસ્સ નિસ્સયપચ્ચયેન પચ્ચયો – વત્થુ અકુસલાનં ખન્ધાનં નિસ્સયપચ્ચયેન પચ્ચયો. (૩)

૪૨૨. કુસલો ચ અબ્યાકતો ચ ધમ્મા કુસલસ્સ ધમ્મસ્સ નિસ્સયપચ્ચયેન પચ્ચયો – કુસલો એકો ખન્ધો ચ વત્થુ ચ તિણ્ણન્નં ખન્ધાનં નિસ્સયપચ્ચયેન પચ્ચયો. તયો ખન્ધા ચ વત્થુ ચ એકસ્સ ખન્ધસ્સ નિસ્સયપચ્ચયેન પચ્ચયો. દ્વે ખન્ધા ચ વત્થુ ચ દ્વિન્નં ખન્ધાનં નિસ્સયપચ્ચયેન પચ્ચયો. (૧)

કુસલો ચ અબ્યાકતો ચ ધમ્મા અબ્યાકતસ્સ ધમ્મસ્સ નિસ્સયપચ્ચયેન પચ્ચયો – કુસલા ખન્ધા ચ મહાભૂતા ચ ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૨)

અકુસલો ચ અબ્યાકતો ચ ધમ્મા અકુસલસ્સ ધમ્મસ્સ નિસ્સયપચ્ચયેન પચ્ચયો – અકુસલો એકો ખન્ધો ચ વત્થુ ચ તિણ્ણન્નં ખન્ધાનં નિસ્સયપચ્ચયેન પચ્ચયો. તયો ખન્ધા ચ વત્થુ ચ એકસ્સ ખન્ધસ્સ નિસ્સયપચ્ચયેન પચ્ચયો. દ્વે ખન્ધા ચ વત્થુ ચ દ્વિન્નં ખન્ધાનં નિસ્સયપચ્ચયેન પચ્ચયો. (૧)

અકુસલો ચ અબ્યાકતો ચ ધમ્મા અબ્યાકતસ્સ ધમ્મસ્સ નિસ્સયપચ્ચયેન પચ્ચયો – અકુસલા ખન્ધા ચ મહાભૂતા ચ ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૨)

ઉપનિસ્સયપચ્ચયો

૪૨૩. કુસલો ધમ્મો કુસલસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો.

આરમ્મણૂપનિસ્સયો – દાનં દત્વા સીલં સમાદિયિત્વા ઉપોસથકમ્મં કત્વા, તં ગરું કત્વા પચ્ચવેક્ખતિ, પુબ્બે સુચિણ્ણાનિ ગરું કત્વા પચ્ચવેક્ખતિ, ઝાના વુટ્ઠહિત્વા ઝાનં ગરું કત્વા પચ્ચવેક્ખતિ, સેક્ખા ગોત્રભું ગરું કત્વા પચ્ચવેક્ખન્તિ, વોદાનં ગરું કત્વા પચ્ચવેક્ખન્તિ, સેક્ખા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ.

અનન્તરૂપનિસ્સયો – પુરિમા પુરિમા કુસલા ખન્ધા પચ્છિમાનં પચ્છિમાનં કુસલાનં ખન્ધાનં ઉપનિસ્સયપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ ઉપનિસ્સયપચ્ચયેન પચ્ચયો.

પકતૂપનિસ્સયો – સદ્ધં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. સીલં…પે… સુતં…પે… ચાગં…પે… પઞ્ઞં ઉપનિસ્સય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. સદ્ધા… સીલં… સુતં… ચાગો… પઞ્ઞા … સદ્ધાય… સીલસ્સ… સુતસ્સ… ચાગસ્સ… પઞ્ઞાય ઉપનિસ્સયપચ્ચયેન પચ્ચયો.

પઠમસ્સ ઝાનસ્સ પરિકમ્મં પઠમસ્સ ઝાનસ્સ ઉપનિસ્સયપચ્ચયેન પચ્ચયો. દુતિયસ્સ ઝાનસ્સ પરિકમ્મં દુતિયસ્સ ઝાનસ્સ ઉપનિસ્સયપચ્ચયેન પચ્ચયો. તતિયસ્સ ઝાનસ્સ પરિકમ્મં તતિયસ્સ ઝાનસ્સ ઉપનિસ્સયપચ્ચયેન પચ્ચયો. ચતુત્થસ્સ ઝાનસ્સ પરિકમ્મં ચતુત્થસ્સ ઝાનસ્સ ઉપનિસ્સયપચ્ચયેન પચ્ચયો. આકાસાનઞ્ચાયતનસ્સ પરિકમ્મં આકાસાનઞ્ચાયતનસ્સ ઉપનિસ્સયપચ્ચયેન પચ્ચયો. વિઞ્ઞાણઞ્ચાયતનસ્સ પરિકમ્મં વિઞ્ઞાણઞ્ચાયતનસ્સ ઉપનિસ્સયપચ્ચયેન પચ્ચયો. આકિઞ્ચઞ્ઞાયતનસ્સ પરિકમ્મં આકિઞ્ચઞ્ઞાયતનસ્સ ઉપનિસ્સયપચ્ચયેન પચ્ચયો. નેવસઞ્ઞાનાસઞ્ઞાયતનસ્સ પરિકમ્મં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. પઠમં ઝાનં દુતિયસ્સ ઝાનસ્સ ઉપનિસ્સયપચ્ચયેન પચ્ચયો. દુતિયં ઝાનં તતિયસ્સ ઝાનસ્સ ઉપનિસ્સયપચ્ચયેન પચ્ચયો. તતિયં ઝાનં ચતુત્થસ્સ ઝાનસ્સ ઉપનિસ્સયપચ્ચયેન પચ્ચયો. ચતુત્થં ઝાનં આકાસાનઞ્ચાયતનસ્સ ઉપનિસ્સયપચ્ચયેન પચ્ચયો. આકાસાનઞ્ચાયતનં વિઞ્ઞાણઞ્ચાયતનસ્સ ઉપનિસ્સયપચ્ચયેન પચ્ચયો. વિઞ્ઞાણઞ્ચાયતનં આકિઞ્ચઞ્ઞાયતનસ્સ ઉપનિસ્સયપચ્ચયેન પચ્ચયો. આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. દિબ્બસ્સ ચક્ખુસ્સ પરિકમ્મં દિબ્બસ્સ ચક્ખુસ્સ ઉપનિસ્સયપચ્ચયેન પચ્ચયો. દિબ્બાય સોતધાતુયા પરિકમ્મં દિબ્બાય સોતધાતુયા ઉપનિસ્સયપચ્ચયેન પચ્ચયો. ઇદ્ધિવિધઞાણસ્સ પરિકમ્મં ઇદ્ધિવિધઞાણસ્સ ઉપનિસ્સયપચ્ચયેન પચ્ચયો. ચેતોપરિયઞાણસ્સ પરિકમ્મં ચેતોપરિયઞાણસ્સ ઉપનિસ્સયપચ્ચયેન પચ્ચયો. પુબ્બેનિવાસાનુસ્સતિઞાણસ્સ પરિકમ્મં પુબ્બેનિવાસાનુસ્સતિઞાણસ્સ ઉપનિસ્સયપચ્ચયેન પચ્ચયો. યથાકમ્મૂપગઞાણસ્સ પરિકમ્મં યથાકમ્મૂપગઞાણસ્સ ઉપનિસ્સયપચ્ચયેન પચ્ચયો. અનાગતંસઞાણસ્સ પરિકમ્મં અનાગતંસઞાણસ્સ ઉપનિસ્સયપચ્ચયેન પચ્ચયો. દિબ્બચક્ખુ દિબ્બાય સોતધાતુયા ઉપનિસ્સયપચ્ચયેન પચ્ચયો. દિબ્બસોતધાતુ ઇદ્ધિવિધઞાણસ્સ ઉપનિસ્સયપચ્ચયેન પચ્ચયો. ઇદ્ધિવિધઞાણં ચેતોપરિયઞાણસ્સ ઉપનિસ્સયપચ્ચયેન પચ્ચયો. ચેતોપરિયઞાણં પુબ્બેનિવાસાનુસ્સતિઞાણસ્સ ઉપનિસ્સયપચ્ચયેન પચ્ચયો. પુબ્બેનિવાસાનુસ્સતિઞાણં યથાકમ્મૂપગઞાણસ્સ ઉપનિસ્સયપચ્ચયેન પચ્ચયો. યથાકમ્મૂપગઞાણં અનાગતંસઞાણસ્સ ઉપનિસ્સયપચ્ચયેન પચ્ચયો. પઠમસ્સ મગ્ગસ્સ પરિકમ્મં પઠમસ્સ મગ્ગસ્સ ઉપનિસ્સયપચ્ચયેન પચ્ચયો. દુતિયસ્સ મગ્ગસ્સ પરિકમ્મં દુતિયસ્સ મગ્ગસ્સ ઉપનિસ્સયપચ્ચયેન પચ્ચયો. તતિયસ્સ મગ્ગસ્સ પરિકમ્મં તતિયસ્સ મગ્ગસ્સ ઉપનિસ્સયપચ્ચયેન પચ્ચયો. ચતુત્થસ્સ મગ્ગસ્સ પરિકમ્મં ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. પઠમો મગ્ગો દુતિયસ્સ મગ્ગસ્સ ઉપનિસ્સયપચ્ચયેન પચ્ચયો. દુતિયો મગ્ગો તતિયસ્સ મગ્ગસ્સ ઉપનિસ્સયપચ્ચયેન પચ્ચયો. તતિયો મગ્ગો ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. સેક્ખા મગ્ગં ઉપનિસ્સાય અનુપ્પન્નં સમાપત્તિં ઉપ્પાદેન્તિ, ઉપ્પન્નં સમાપજ્જન્તિ, સઙ્ખારે અનિચ્ચતો દુક્ખતો અનત્તતો વિપસ્સન્તિ. મગ્ગો સેક્ખાનં અત્થપ્પટિસમ્ભિદાય, ધમ્મપ્પટિસમ્ભિદાય, નિરુત્તિપ્પટિસમ્ભિદાય, પટિભાનપ્પટિસમ્ભિદાય, ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો. (૧)

કુસલો ધમ્મો અકુસલસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, પકતૂપનિસ્સયો.

આરમ્મણૂપનિસ્સયો – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. પુબ્બે સુચિણ્ણાનિ ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. ઝાના વુટ્ઠહિત્વા ઝાનં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ.

પકતૂપનિસ્સયો – સદ્ધં ઉપનિસ્સાય માનં જપ્પેતિ, દિટ્ઠિં ગણ્હાતિ. સીલં…પે… સુતં…પે… ચાગં…પે… પઞ્ઞં ઉપનિસ્સાય માનં જપ્પેતિ, દિટ્ઠિં ગણ્હાતિ. સદ્ધા… સીલં… સુતં… ચાગો… પઞ્ઞા રાગસ્સ… દોસસ્સ… મોહસ્સ… માનસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. (૨)

કુસલો ધમ્મો અબ્યાકતસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો.

આરમ્મણૂપનિસ્સયો – અરહા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખતિ.

અનન્તરૂપનિસ્સયો – કુસલં વુટ્ઠાનસ્સ… મગ્ગો ફલસ્સ… અનુલોમં સેક્ખાય ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકુસલં ફલસમાપત્તિયા ઉપનિસ્સયપચ્ચયેન પચ્ચયો.

પકતૂપનિસ્સયો – સદ્ધં ઉપનિસ્સાય અત્તાનં આતાપેતિ પરિતાપેતિ, પરિયિટ્ઠિમૂલકં દુક્ખં પચ્ચનુભોતિ. સીલં…પે… સુતં…પે… ચાગં…પે… પઞ્ઞં ઉપનિસ્સાય અત્તાનં આતાપેતિ પરિતાપેતિ, પરિયિટ્ઠિમૂલકં દુક્ખં પચ્ચનુભોતિ. સદ્ધા… સીલં… સુતં… ચાગો… પઞ્ઞા કાયિકસ્સ સુખસ્સ… કાયિકસ્સ દુક્ખસ્સ… ફલસમાપત્તિયા ઉપનિસ્સયપચ્ચયેન પચ્ચયો. કુસલં કમ્મં વિપાકસ્સ ઉપનિસ્સયપચ્ચયેન પચ્ચયો. અરહા મગ્ગં ઉપનિસ્સાય અનુપ્પન્નં કિરિયસમાપત્તિં ઉપ્પાદેતિ, ઉપ્પન્નં સમાપજ્જતિ, સઙ્ખારે અનિચ્ચતો દુક્ખતો અનત્તતો વિપસ્સતિ. મગ્ગો અરહતો અત્થપ્પટિસમ્ભિદાય, ધમ્મપ્પટિસમ્ભિદાય, નિરુત્તિપ્પટિસમ્ભિદાય, પટિભાનપ્પટિસમ્ભિદાય, ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો. મગ્ગો ફલસમાપત્તિયા ઉપનિસ્સયપચ્ચયેન પચ્ચયો. (૩)

અકુસલો ધમ્મો અકુસલસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો.

આરમ્મણૂપનિસ્સયો – રાગં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. દિટ્ઠિં ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ.

અનન્તરૂપનિસ્સયો – પુરિમા પુરિમા અકુસલા ખન્ધા પચ્છિમાનં પચ્છિમાનં અકુસલાનં ખન્ધાનં ઉપનિસ્સયપચ્ચયેન પચ્ચયો.

પકતૂપનિસ્સયો – રાગં ઉપનિસ્સાય પાણં હનતિ, અદિન્નં આદિયતિ, મુસા ભણતિ, પિસુણં ભણતિ, ફરુસં ભણતિ, સમ્ફં પલપતિ, સન્ધિં છિન્દતિ, નિલ્લોપં હરતિ, એકાગારિકં કરોતિ, પરિપન્થે તિટ્ઠતિ, પરદારં ગચ્છતિ, ગામઘાતં કરોતિ, નિગમઘાતં કરોતિ, માતરં જીવિતા વોરોપેતિ, પિતરં જીવિતા વોરોપેતિ, અરહન્તં જીવિતા વોરોપેતિ, દુટ્ઠેન ચિત્તેન તથાગતસ્સ લોહિતં ઉપ્પાદેતિ, સઙ્ઘં ભિન્દતિ. દોસં ઉપનિસ્સાય…પે… મોહં ઉપનિસ્સાય…પે… માનં ઉપનિસ્સાય…પે… દિટ્ઠિં ઉપનિસ્સાય…પે… પત્થનં ઉપનિસ્સાય પાણં હનતિ…પે… સઙ્ઘં ભિન્દતિ. રાગો… દોસો… મોહો… માનો… દિટ્ઠિ… પત્થના રાગસ્સ… દોસસ્સ… મોહસ્સ… માનસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. પાણાતિપાતો પાણાતિપાતસ્સ ઉપનિસ્સયપચ્ચયેન પચ્ચયો. પાણાતિપાતો અદિન્નાદાનસ્સ…પે… કામેસુમિચ્છાચારસ્સ…પે… મુસાવાદસ્સ…પે… પિસુણાય વાચાય…પે… ફરુસાય વાચાય…પે… સમ્ફપ્પલાપસ્સ…પે… અભિજ્ઝાય…પે… બ્યાપાદસ્સ…પે… મિચ્છાદિટ્ઠિયા ઉપનિસ્સયપચ્ચયેન પચ્ચયો. અદિન્નાદાનં અદિન્નાદાનસ્સ… કામેસુમિચ્છાચારસ્સ… મુસાવાદસ્સ… (સંખિત્તં) મિચ્છાદિટ્ઠિયા… પાણાતિપાતસ્સ ઉપનિસ્સયપચ્ચયેન પચ્ચયો. (ચક્કં બન્ધિતબ્બં.) કામેસુમિચ્છાચારો…પે… મુસાવાદો…પે… પિસુણવાચા…પે… ફરુસવાચા…પે… સમ્ફપ્પલાપો…પે… અભિજ્ઝા…પે… બ્યાપાદો…પે… મિચ્છાદિટ્ઠિ મિચ્છાદિટ્ઠિયા ઉપનિસ્સયપચ્ચયેન પચ્ચયો. મિચ્છાદિટ્ઠિ પાણાતિપાતસ્સ… અદિન્નાદાનસ્સ… કામેસુમિચ્છાચારસ્સ… મુસાવાદસ્સ… પિસુણાય વાચાય… ફરુસાય વાચાય… સમ્ફપ્પલાપસ્સ… અભિજ્ઝાય… બ્યાપાદસ્સ ઉપનિસ્સયપચ્ચયેન પચ્ચયો. માતુઘાતિકમ્મં માતુઘાતિકમ્મસ્સ ઉપનિસ્સયપચ્ચયેન પચ્ચયો. માતુઘાતિકમ્મં પિતુઘાતિકમ્મસ્સ ઉપનિસ્સય…પે… અરહન્તઘાતિકમ્મસ્સ… રુહિરુપ્પાદકમ્મસ્સ… સઙ્ઘભેદકમ્મસ્સ… નિયતમિચ્છાદિટ્ઠિયા ઉપનિસ્સયપચ્ચયેન પચ્ચયો. પિતુઘાતિકમ્મં પિતુઘાતિકમ્મસ્સ… અરહન્તઘાતિકમ્મસ્સ… રુહિરુપ્પાદકમ્મસ્સ… સઙ્ઘભેદકમ્મસ્સ… નિયતમિચ્છાદિટ્ઠિયા… માતુઘાતિકમ્મસ્સ ઉપનિસ્સયપચ્ચયેન પચ્ચયો. અરહન્તઘાતિકમ્મં અરહન્તઘાતિકમ્મસ્સ… રુહિરુપ્પાદકમ્મસ્સ…પે… રુહિરુપ્પાદકમ્મં રુહિરુપ્પાદકમ્મસ્સ…પે… સઙ્ઘભેદકમ્મં સઙ્ઘભેદકમ્મસ્સ…પે… નિયતમિચ્છાદિટ્ઠિ નિયતમિચ્છાદિટ્ઠિયા ઉપનિસ્સયપચ્ચયેન પચ્ચયો. નિયતમિચ્છાદિટ્ઠિ માતુઘાતિકમ્મસ્સ ઉપનિસ્સય…પે… અરહન્તઘાતિકમ્મસ્સ… રુહિરુપ્પાદકમ્મસ્સ… સઙ્ઘભેદકમ્મસ્સ ઉપનિસ્સયપચ્ચયેન પચ્ચયો. (ચક્કં કાતબ્બં.) (૧)

અકુસલો ધમ્મો કુસલસ્સ ધમ્મસ્સ ઉપનિસ્સયપચ્ચયેન પચ્ચયો. પકતૂપનિસ્સયો – રાગં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. દોસં…પે… મોહં…પે… માનં…પે… દિટ્ઠિં…પે… પત્થનં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. રાગો… દોસો… મોહો… માનો… દિટ્ઠિ… પત્થના સદ્ધાય… સીલસ્સ… સુતસ્સ… ચાગસ્સ … પઞ્ઞાય ઉપનિસ્સયપચ્ચયેન પચ્ચયો. પાણં હન્ત્વા તસ્સ પટિઘાતત્થાય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. અદિન્નં આદિયિત્વા…પે… મુસા ભણિત્વા…પે… પિસુણં ભણિત્વા…પે… ફરુસં ભણિત્વા…પે… સમ્ફં પલપિત્વા…પે… સન્ધિં છિન્દિત્વા…પે… નિલ્લોપં હરિત્વા…પે… એકાગારિકં કરિત્વા…પે… પરિપન્થે ઠત્વા…પે… પરદારં ગન્ત્વા…પે… ગામઘાતં કરિત્વા…પે… નિગમઘાતં કરિત્વા તસ્સ પટિઘાતત્થાય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. માતરં જીવિતા વોરોપેત્વા તસ્સ પટિઘાતત્થાય દાનં દેતિ, સીલં સમાદિયતિ, ઉપોસથકમ્મં કરોતિ. પિતરં જીવિતા વોરોપેત્વા…પે… અરહન્તં જીવિતા વોરોપેત્વા…પે… દુટ્ઠેન ચિત્તેન તથાગતસ્સ લોહિતં ઉપ્પાદેત્વા…પે… સઙ્ઘં ભિન્દિત્વા તસ્સ પટિઘાતત્થાય દાનં દેતિ, સીલં સમાદિયતિ, ઉપોસથકમ્મં કરોતિ. (૨)

અકુસલો ધમ્મો અબ્યાકતસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો.

અનન્તરૂપનિસ્સયો – અકુસલં વુટ્ઠાનસ્સ ઉપનિસ્સયપચ્ચયેન પચ્ચયો.

પકતૂપનિસ્સયો – રાગં ઉપનિસ્સાય અત્તાનં આતાપેતિ પરિતાપેતિ, પરિયિટ્ઠિમૂલકં દુક્ખં પચ્ચનુભોતિ. દોસં…પે… મોહં…પે… માનં …પે… દિટ્ઠિં…પે… પત્થનં ઉપનિસ્સાય અત્તાનં આતાપેતિ પરિતાપેતિ, પરિયિટ્ઠિમૂલકં દુક્ખં પચ્ચનુભોતિ. રાગો… દોસો … મોહો… માનો… દિટ્ઠિ… પત્થના કાયિકસ્સ સુખસ્સ… કાયિકસ્સ દુક્ખસ્સ… ફલસમાપત્તિયા ઉપનિસ્સયપચ્ચયેન પચ્ચયો. અકુસલં કમ્મં વિપાકસ્સ ઉપનિસ્સયપચ્ચયેન પચ્ચયો. (૩)

અબ્યાકતો ધમ્મો અબ્યાકતસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો.

આરમ્મણૂપનિસ્સયો – અરહા ફલં ગરું કત્વા પચ્ચવેક્ખતિ, નિબ્બાનં ગરું કત્વા પચ્ચવેક્ખતિ, નિબ્બાનં ફલસ્સ ઉપનિસ્સયપચ્ચયેન પચ્ચયો.

અનન્તરૂપનિસ્સયો – પુરિમા પુરિમા વિપાકાબ્યાકતા, કિરિયાબ્યાકતા ખન્ધા પચ્છિમાનં પચ્છિમાનં વિપાકાબ્યાકતાનં કિરિયાબ્યાકતાનં ખન્ધાનં ઉપનિસ્સયપચ્ચયેન પચ્ચયો. ભવઙ્ગં આવજ્જનાય… કિરિયં વુટ્ઠાનસ્સ… અરહતો અનુલોમં ફલસમાપત્તિયા… નિરોધા વુટ્ઠહન્તસ્સ નેવસઞ્ઞાનાસઞ્ઞાયતનકિરિયં ફલસમાપત્તિયા ઉપનિસ્સયપચ્ચયેન પચ્ચયો.

પકતૂપનિસ્સયો – કાયિકં સુખં કાયિકસ્સ સુખસ્સ, કાયિકસ્સ દુક્ખસ્સ, ફલસમાપત્તિયા ઉપનિસ્સયપચ્ચયેન પચ્ચયો. કાયિકં દુક્ખં કાયિકસ્સ સુખસ્સ, કાયિકસ્સ દુક્ખસ્સ, ફલસમાપત્તિયા ઉપનિસ્સયપચ્ચયેન પચ્ચયો. ઉતુ કાયિકસ્સ સુખસ્સ, કાયિકસ્સ દુક્ખસ્સ, ફલસમાપત્તિયા ઉપનિસ્સયપચ્ચયેન પચ્ચયો. ભોજનં કાયિકસ્સ સુખસ્સ, કાયિકસ્સ દુક્ખસ્સ, ફલસમાપત્તિયા ઉપનિસ્સયપચ્ચયેન પચ્ચયો. સેનાસનં કાયિકસ્સ સુખસ્સ, કાયિકસ્સ દુક્ખસ્સ, ફલસમાપત્તિયા ઉપનિસ્સયપચ્ચયેન પચ્ચયો. કાયિકં સુખં… કાયિકં દુક્ખં… ઉતુ… ભોજનં… સેનાસનં કાયિકસ્સ સુખસ્સ, કાયિકસ્સ દુક્ખસ્સ, ફલસમાપત્તિયા ઉપનિસ્સયપચ્ચયેન પચ્ચયો. ફલસમાપત્તિ કાયિકસ્સ સુખસ્સ ઉપનિસ્સયપચ્ચયેન પચ્ચયો.

અરહા કાયિકં સુખં ઉપનિસ્સાય અનુપ્પન્નં કિરિયસમાપત્તિં ઉપ્પાદેતિ, ઉપ્પન્નં સમાપજ્જતિ, સઙ્ખારે અનિચ્ચતો દુક્ખતો અનત્તતો વિપસ્સતિ. કાયિકં દુક્ખં… ઉતું… ભોજનં … સેનાસનં ઉપનિસ્સાય અનુપ્પન્નં કિરિયસમાપત્તિં ઉપ્પાદેતિ, ઉપ્પન્નં સમાપજ્જતિ, સઙ્ખારે અનિચ્ચતો દુક્ખતો અનત્તતો વિપસ્સતિ. (૧)

અબ્યાકતો ધમ્મો કુસલસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો.

આરમ્મણૂપનિસ્સયો – સેક્ખા ફલં ગરું કત્વા પચ્ચવેક્ખન્તિ, નિબ્બાનં ગરું કત્વા પચ્ચવેક્ખન્તિ. નિબ્બાનં ગોત્રભુસ્સ… વોદાનસ્સ… મગ્ગસ્સ ઉપનિસ્સયપચ્ચયેન પચ્ચયો.

અનન્તરૂપનિસ્સયો – આવજ્જના કુસલાનં ખન્ધાનં ઉપનિસ્સયપચ્ચયેન પચ્ચયો.

પકતૂપનિસ્સયો – કાયિકં સુખં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. કાયિકં દુક્ખં… ઉતું… ભોજનં… સેનાસનં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, ઝાનં ઉપ્પાદેતિ, વિપસ્સનં ઉપ્પાદેતિ, મગ્ગં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. કાયિકં સુખં… કાયિકં દુક્ખં… ઉતુ… ભોજનં… સેનાસનં સદ્ધાય… સીલસ્સ… સુતસ્સ… ચાગસ્સ… પઞ્ઞાય ઉપનિસ્સયપચ્ચયેન પચ્ચયો. (૨)

અબ્યાકતો ધમ્મો અકુસલસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો.

આરમ્મણૂપનિસ્સયો – ચક્ખું ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સોતં…પે… ઘાનં…પે… જિવ્હં…પે… કાયં…પે… રૂપે…પે… સદ્દે…પે… ગન્ધે…પે… રસે…પે… ફોટ્ઠબ્બે…પે… વત્થું…પે… વિપાકાબ્યાકતે કિરિયાબ્યાકતે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ.

અનન્તરૂપનિસ્સયો – આવજ્જના અકુસલાનં ખન્ધાનં ઉપનિસ્સયપચ્ચયેન પચ્ચયો.

પકતૂપનિસ્સયો – કાયિકં સુખં ઉપનિસ્સાય પાણં હનતિ, અદિન્નં આદિયતિ, મુસા ભણતિ, પિસુણં ભણતિ, ફરુસં ભણતિ, સમ્ફં પલપતિ, સન્ધિં છિન્દતિ, નિલ્લોપં હરતિ, એકાગારિકં કરોતિ, પરિપન્થે તિટ્ઠતિ, પરદારં ગચ્છતિ, ગામઘાતં કરોતિ, નિગમઘાતં કરોતિ, માતરં જીવિતા વોરોપેતિ, પિતરં જીવિતા વોરોપેતિ, અરહન્તં જીવિતા વોરોપેતિ, દુટ્ઠેન ચિત્તેન તથાગતસ્સ લોહિતં ઉપ્પાદેતિ, સઙ્ઘં ભિન્દતિ.

કાયિકં દુક્ખં…પે… ઉતું…પે… ભોજનં…પે… સેનાસનં ઉપનિસ્સાય પાણં હનતિ… (સંખિત્તં.) સઙ્ઘં ભિન્દતિ.

કાયિકં સુખં… કાયિકં દુક્ખં… ઉતુ… ભોજનં… સેનાસનં રાગસ્સ… દોસસ્સ… મોહસ્સ… માનસ્સ… દિટ્ઠિયા… પત્થનાય ઉપનિસ્સયપચ્ચયેન પચ્ચયો. (૩)

પુરેજાતપચ્ચયો

૪૨૪. અબ્યાકતો ધમ્મો અબ્યાકતસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં.

આરમ્મણપુરેજાતં – અરહા ચક્ખું અનિચ્ચતો દુક્ખતો અનત્તતો વિપસ્સતિ. સોતં…પે… ઘાનં…પે… જિવ્હં…પે… કાયં…પે… રૂપે…પે… સદ્દે…પે… ગન્ધે…પે… રસે…પે… ફોટ્ઠબ્બે…પે… વત્થું અનિચ્ચતો દુક્ખતો અનત્તતો વિપસ્સતિ, દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. રૂપાયતનં ચક્ખુવિઞ્ઞાણસ્સ પુરેજાતપચ્ચયેન પચ્ચયો. સદ્દાયતનં સોતવિઞ્ઞાણસ્સ…પે… ગન્ધાયતનં ઘાનવિઞ્ઞાણસ્સ…પે… રસાયતનં જિવ્હાવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો.

વત્થુપુરેજાતં – ચક્ખાયતનં ચક્ખુવિઞ્ઞાણસ્સ પુરેજાતપચ્ચયેન પચ્ચયો. સોતાયતનં સોતવિઞ્ઞાણસ્સ …પે… ઘાનાયતનં ઘાનવિઞ્ઞાણસ્સ…પે… જિવ્હાયતનં જિવ્હાવિઞ્ઞાણસ્સ…પે… કાયાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુ વિપાકાબ્યાકતાનં કિરિયાબ્યાકતાનં ખન્ધાનં પુરેજાતપચ્ચયેન પચ્ચયો. (૧)

અબ્યાકતો ધમ્મો કુસલસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં.

આરમ્મણપુરેજાતં – સેક્ખા વા પુથુજ્જના વા ચક્ખું અનિચ્ચતો દુક્ખતો અનત્તતો વિપસ્સન્તિ. સોતં…પે… ઘાનં…પે… જિવ્હં…પે… કાયં…પે… રૂપે…પે… સદ્દે…પે… ગન્ધે…પે… રસે…પે… ફોટ્ઠબ્બે…પે… વત્થું અનિચ્ચતો દુક્ખતો અનત્તતો વિપસ્સન્તિ. દિબ્બેન ચક્ખુના રૂપં પસ્સન્તિ. દિબ્બાય સોતધાતુયા સદ્દં સુણન્તિ.

વત્થુપુરેજાતં – વત્થુ કુસલાનં ખન્ધાનં પુરેજાતપચ્ચયેન પચ્ચયો. (૨)

અબ્યાકતો ધમ્મો અકુસલસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ, દિટ્ઠિ ઉપ્પજ્જતિ, વિચિકિચ્છા ઉપ્પજ્જતિ, ઉદ્ધચ્ચં ઉપ્પજ્જતિ, દોમનસ્સં ઉપ્પજ્જતિ. સોતં…પે… ઘાનં…પે… જિવ્હં…પે… કાયં…પે… રૂપે…પે… સદ્દે…પે… ગન્ધે…પે… રસે…પે… ફોટ્ઠબ્બે…પે… વત્થું અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ.

વત્થુપુરેજાતં – વત્થુ અકુસલાનં ખન્ધાનં પુરેજાતપચ્ચયેન પચ્ચયો. (૩)

પચ્છાજાતપચ્ચયો

૪૨૫. કુસલો ધમ્મો અબ્યાકતસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા કુસલા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અકુસલા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

અબ્યાકતો ધમ્મો અબ્યાકતસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા વિપાકાબ્યાકતા કિરિયાબ્યાકતા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

આસેવનપચ્ચયો

૪૨૬. કુસલો ધમ્મો કુસલસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા કુસલા ખન્ધા પચ્છિમાનં પચ્છિમાનં કુસલાનં ખન્ધાનં આસેવનપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૧)

અકુસલો ધમ્મો અકુસલસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા અકુસલા ખન્ધા પચ્છિમાનં પચ્છિમાનં અકુસલાનં ખન્ધાનં આસેવનપચ્ચયેન પચ્ચયો. (૧)

અબ્યાકતો ધમ્મો અબ્યાકતસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા કિરિયાબ્યાકતા ખન્ધા પચ્છિમાનં પચ્છિમાનં કિરિયાબ્યાકતાનં ખન્ધાનં આસેવનપચ્ચયેન પચ્ચયો. (૧)

કમ્મપચ્ચયો

૪૨૭. કુસલો ધમ્મો કુસલસ્સ ધમ્મસ્સ કમ્મપચ્ચયેન પચ્ચયો – કુસલા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

કુસલો ધમ્મો અબ્યાકતસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા [નાનાખણિકા (ક.)]. સહજાતા – કુસલા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો.

નાનાક્ખણિકા – કુસલા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૨)

કુસલો ધમ્મો કુસલસ્સ ચ અબ્યાકતસ્સ ચ ધમ્મસ્સ કમ્મપચ્ચયેન પચ્ચયો – કુસલા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

અકુસલો ધમ્મો અકુસલસ્સ ધમ્મસ્સ કમ્મપચ્ચયેન પચ્ચયો – અકુસલા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અકુસલા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. નાનાક્ખણિકા – અકુસલા ચેતના વિપાકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૨)

અકુસલો ધમ્મો અકુસલસ્સ ચ અબ્યાકતસ્સ ચ ધમ્મસ્સ કમ્મપચ્ચયેન પચ્ચયો – અકુસલા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

અબ્યાકતો ધમ્મો અબ્યાકતસ્સ ધમ્મસ્સ કમ્મપચ્ચયેન પચ્ચયો – વિપાકાબ્યાકતા કિરિયાબ્યાકતા ચેતના સમ્પયુત્તકાનં ખન્ધાનં, ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. પટિસન્ધિક્ખણે વિપાકાબ્યાકતા ચેતના સમ્પયુત્તકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. ચેતના વત્થુસ્સ કમ્મપચ્ચયેન પચ્ચયો. (૧)

વિપાકપચ્ચયો

૪૨૮. અબ્યાકતો ધમ્મો અબ્યાકતસ્સ ધમ્મસ્સ વિપાકપચ્ચયેન પચ્ચયો – વિપાકાબ્યાકતો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં વિપાકપચ્ચયેન પચ્ચયો. તયો ખન્ધા એકસ્સ ખન્ધસ્સ ચિત્તસમુટ્ઠાનાનઞ્ચ રૂપાનં વિપાકપચ્ચયેન પચ્ચયો. દ્વે ખન્ધા દ્વિન્નં ખન્ધાનં ચિત્તસમુટ્ઠાનાનઞ્ચ રૂપાનં વિપાકપચ્ચયેન પચ્ચયો. પટિસન્ધિક્ખણે વિપાકાબ્યાકતો એકો ખન્ધો તિણ્ણન્નં ખન્ધાનં કટત્તા ચ રૂપાનં વિપાકપચ્ચયેન પચ્ચયો. તયો ખન્ધા એકસ્સ ખન્ધસ્સ કટત્તા ચ રૂપાનં વિપાકપચ્ચયેન પચ્ચયો. દ્વે ખન્ધા દ્વિન્નં ખન્ધાનં કટત્તા ચ રૂપાનં વિપાકપચ્ચયેન પચ્ચયો. ખન્ધા વત્થુસ્સ વિપાકપચ્ચયેન પચ્ચયો. (૧)

આહારપચ્ચયો

૪૨૯. કુસલો ધમ્મો કુસલસ્સ ધમ્મસ્સ આહારપચ્ચયેન પચ્ચયો – કુસલા આહારા સમ્પયુત્તકાનં ખન્ધાનં આહારપચ્ચયેન પચ્ચયો. (૧)

કુસલો ધમ્મો અબ્યાકતસ્સ ધમ્મસ્સ આહારપચ્ચયેન પચ્ચયો – કુસલા આહારા ચિત્તસમુટ્ઠાનાનં રૂપાનં આહારપચ્ચયેન પચ્ચયો. (૨)

કુસલો ધમ્મો કુસલસ્સ ચ અબ્યાકતસ્સ ચ ધમ્મસ્સ આહારપચ્ચયેન પચ્ચયો – કુસલા આહારા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં આહારપચ્ચયેન પચ્ચયો. (૩)

અકુસલો ધમ્મો અકુસલસ્સ ધમ્મસ્સ આહારપચ્ચયેન પચ્ચયો – અકુસલા આહારા સમ્પયુત્તકાનં ખન્ધાનં આહારપચ્ચયેન પચ્ચયો.

અકુસલો ધમ્મો અબ્યાકતસ્સ ધમ્મસ્સ આહારપચ્ચયેન પચ્ચયો – અકુસલા આહારા ચિત્તસમુટ્ઠાનાનં રૂપાનં આહારપચ્ચયેન પચ્ચયો. (૨)

અકુસલો ધમ્મો અકુસલસ્સ ચ અબ્યાકતસ્સ ચ ધમ્મસ્સ આહારપચ્ચયેન પચ્ચયો – અકુસલા આહારા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં આહારપચ્ચયેન પચ્ચયો. (૩)

અબ્યાકતો ધમ્મો અબ્યાકતસ્સ ધમ્મસ્સ આહારપચ્ચયેન પચ્ચયો – વિપાકાબ્યાકતા કિરિયાબ્યાકતા આહારા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં આહારપચ્ચયેન પચ્ચયો. પટિસન્ધિક્ખણે વિપાકાબ્યાકતા આહારા સમ્પયુત્તકાનં ખન્ધાનં કટત્તા ચ રૂપાનં આહારપચ્ચયેન પચ્ચયો. કબળીકારો આહારો ઇમસ્સ કાયસ્સ આહારપચ્ચયેન પચ્ચયો. (૧)

ઇન્દ્રિયપચ્ચયો

૪૩૦. કુસલો ધમ્મો કુસલસ્સ ધમ્મસ્સ ઇન્દ્રિયપચ્ચયેન પચ્ચયો – કુસલા ઇન્દ્રિયા સમ્પયુત્તકાનં ખન્ધાનં ઇન્દ્રિયપચ્ચયેન પચ્ચયો. (૧)

કુસલો ધમ્મો અબ્યાકતસ્સ ધમ્મસ્સ ઇન્દ્રિયપચ્ચયેન પચ્ચયો – કુસલા ઇન્દ્રિયા ચિત્તસમુટ્ઠાનાનં રૂપાનં ઇન્દ્રિયપચ્ચયેન પચ્ચયો. (૨)

કુસલો ધમ્મો કુસલસ્સ ચ અબ્યાકતસ્સ ચ ધમ્મસ્સ ઇન્દ્રિયપચ્ચયેન પચ્ચયો – કુસલા ઇન્દ્રિયા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં ઇન્દ્રિયપચ્ચયેન પચ્ચયો. (૩)

અકુસલો ધમ્મો અકુસલસ્સ ધમ્મસ્સ ઇન્દ્રિયપચ્ચયેન પચ્ચયો – અકુસલા ઇન્દ્રિયા સમ્પયુત્તકાનં ખન્ધાનં ઇન્દ્રિયપચ્ચયેન પચ્ચયો. (૧)

અકુસલો ધમ્મો અબ્યાકતસ્સ ધમ્મસ્સ ઇન્દ્રિયપચ્ચયેન પચ્ચયો – અકુસલા ઇન્દ્રિયા ચિત્તસમુટ્ઠાનાનં રૂપાનં ઇન્દ્રિયપચ્ચયેન પચ્ચયો. (૨)

અકુસલો ધમ્મો અકુસલસ્સ ચ અબ્યાકતસ્સ ચ ધમ્મસ્સ ઇન્દ્રિયપચ્ચયેન પચ્ચયો – અકુસલા ઇન્દ્રિયા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં ઇન્દ્રિયપચ્ચયેન પચ્ચયો. (૩)

અબ્યાકતો ધમ્મો અબ્યાકતસ્સ ધમ્મસ્સ ઇન્દ્રિયપચ્ચયેન પચ્ચયો – વિપાકાબ્યાકતા કિરિયાબ્યાકતા ઇન્દ્રિયા સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં ઇન્દ્રિયપચ્ચયેન પચ્ચયો. પટિસન્ધિક્ખણે વિપાકાબ્યાકતા ઇન્દ્રિયા સમ્પયુત્તકાનં ખન્ધાનં કટત્તા ચ રૂપાનં ઇન્દ્રિયપચ્ચયેન પચ્ચયો. ચક્ખુન્દ્રિયં ચક્ખુવિઞ્ઞાણસ્સ ઇન્દ્રિયપચ્ચયેન પચ્ચયો. સોતિન્દ્રિયં સોતવિઞ્ઞાણસ્સ …પે… ઘાનિન્દ્રિયં ઘાનવિઞ્ઞાણસ્સ…પે… જિવ્હિન્દ્રિયં જિવ્હાવિઞ્ઞાણસ્સ…પે… કાયિન્દ્રિયં કાયવિઞ્ઞાણસ્સ ઇન્દ્રિયપચ્ચયેન પચ્ચયો. રૂપજીવિતિન્દ્રિયં કટત્તારૂપાનં ઇન્દ્રિયપચ્ચયેન પચ્ચયો. (૧)