૧. વિભઙ્ગવારો

નહેતુપચ્ચયો

૩૫૧. અકુસલં ધમ્મં સંસટ્ઠો અકુસલો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે સંસટ્ઠો વિચિકિચ્છાસહગતો ઉદ્ધચ્ચસહગતો મોહો. (૧)

અબ્યાકતં ધમ્મં સંસટ્ઠો અબ્યાકતો ધમ્મો ઉપ્પજ્જતિ નહેતુપચ્ચયા – અહેતુકં વિપાકાબ્યાકતં કિરિયાબ્યાકતં એકં ખન્ધં સંસટ્ઠા તયો ખન્ધા, તયો ખન્ધે સંસટ્ઠો એકો ખન્ધો, દ્વે ખન્ધે સંસટ્ઠા દ્વે ખન્ધા; અહેતુકપટિસન્ધિક્ખણે વિપાકાબ્યાકતં એકં ખન્ધં સંસટ્ઠા તયો ખન્ધા, તયો ખન્ધે સંસટ્ઠો એકો ખન્ધો, દ્વે ખન્ધે સંસટ્ઠા દ્વે ખન્ધા. (૧)

નઅધિપતિઆદિપચ્ચયા

૩૫૨. કુસલં ધમ્મં સંસટ્ઠો કુસલો ધમ્મો ઉપ્પજ્જતિ નઅધિપતિપચ્ચયા… નપુરેજાતપચ્ચયા – અરૂપે [આરુપ્પે (સબ્બત્થ)] કુસલં એકં ખન્ધં સંસટ્ઠા તયો ખન્ધા…પે… દ્વે ખન્ધે સંસટ્ઠા દ્વે ખન્ધા. અકુસલં ધમ્મં…પે… અબ્યાકતં ધમ્મં…પે….

નપચ્છાજાત-નઆસેવનપચ્ચયા

૩૫૩. કુસલં ધમ્મં સંસટ્ઠો કુસલો ધમ્મો ઉપ્પજ્જતિ નપચ્છાજાતપચ્ચયા… તીણિ. નઆસેવનપચ્ચયા… તીણિ.

નકમ્મપચ્ચયો

૩૫૪. કુસલં ધમ્મં સંસટ્ઠો કુસલો ધમ્મો ઉપ્પજ્જતિ નકમ્મપચ્ચયા. કુસલે ખન્ધે સંસટ્ઠા કુસલા ચેતના. (૧)

અકુસલં ધમ્મં સંસટ્ઠો અકુસલો ધમ્મો ઉપ્પજ્જતિ નકમ્મપચ્ચયા. અકુસલે ખન્ધે સંસટ્ઠા અકુસલા ચેતના. (૧)

અબ્યાકતં ધમ્મં સંસટ્ઠો અબ્યાકતો ધમ્મો ઉપ્પજ્જતિ નકમ્મપચ્ચયા. કિરિયાબ્યાકતે ખન્ધે સંસટ્ઠા કિરિયાબ્યાકતા ચેતના. (૧)

નવિપાકપચ્ચયો

૩૫૫. કુસલં ધમ્મં સંસટ્ઠો…પે… અકુસલં ધમ્મં…પે… અબ્યાકતં ધમ્મં સંસટ્ઠો અબ્યાકતો ધમ્મો ઉપ્પજ્જતિ નવિપાકપચ્ચયા – કિરિયાબ્યાકતં એકં ખન્ધં.

(સંસટ્ઠવારે પચ્ચનીયવિભઙ્ગે નકમ્મે ચ નવિપાકે ચ પટિસન્ધિ નત્થિ; અવસેસેસુ સબ્બત્થ અત્થિ.)

નઝાનપચ્ચયો

૩૫૬. અબ્યાકતં ધમ્મં સંસટ્ઠો અબ્યાકતો ધમ્મો ઉપ્પજ્જતિ નઝાનપચ્ચયા – પઞ્ચવિઞ્ઞાણસહગતં એકં ખન્ધં સંસટ્ઠા તયો ખન્ધા…પે… દ્વે ખન્ધે સંસટ્ઠા દ્વે ખન્ધા. (૧)

નમગ્ગપચ્ચયો

૩૫૭. અબ્યાકતં ધમ્મં સંસટ્ઠો અબ્યાકતો ધમ્મો ઉપ્પજ્જતિ નમગ્ગપચ્ચયા – અહેતુકં વિપાકાબ્યાકતં કિરિયાબ્યાકતં એકં ખન્ધં સંસટ્ઠા તયો ખન્ધા…પે… દ્વે ખન્ધે સંસટ્ઠા દ્વે ખન્ધા; અહેતુકપટિસન્ધિક્ખણે…પે…. (૧)

નવિપ્પયુત્તપચ્ચયો

૩૫૮. કુસલં ધમ્મં સંસટ્ઠો કુસલો ધમ્મો ઉપ્પજ્જતિ નવિપ્પયુત્તપચ્ચયા – અરૂપે કુસલં એકં ખન્ધં સંસટ્ઠા તયો ખન્ધા…પે… દ્વે ખન્ધે સંસટ્ઠા દ્વે ખન્ધા. (૧)

અકુસલં ધમ્મં સંસટ્ઠો અકુસલો ધમ્મો ઉપ્પજ્જતિ નવિપ્પયુત્તપચ્ચયા – અરૂપે અકુસલં એકં ખન્ધં સંસટ્ઠા તયો ખન્ધા…પે… દ્વે ખન્ધે સંસટ્ઠા દ્વે ખન્ધા. (૧)

અબ્યાકતં ધમ્મં સંસટ્ઠો અબ્યાકતો ધમ્મો ઉપ્પજ્જતિ નવિપ્પયુત્તપચ્ચયા – અરૂપે વિપાકાબ્યાકતં કિરિયાબ્યાકતં એકં ખન્ધં સંસટ્ઠા તયો ખન્ધા…પે… દ્વે ખન્ધે સંસટ્ઠા દ્વે ખન્ધા. (નવિપ્પયુત્તે પટિસન્ધિ નત્થિ.) (૧)