૧. વિભઙ્ગવારો

નહેતુપચ્ચયો

૨૩૯. અકુસલં ધમ્મં સહજાતો અકુસલો ધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે સહજાતો વિચિકિચ્છાસહગતો ઉદ્ધચ્ચસહગતો મોહો. (૧)

અબ્યાકતં ધમ્મં સહજાતો અબ્યાકતો ધમ્મો ઉપ્પજ્જતિ નહેતુપચ્ચયા – અહેતુકં વિપાકાબ્યાકતં કિરિયાબ્યાકતં એકં ખન્ધં સહજાતા તયો ખન્ધા ચિત્તસમુટ્ઠાનઞ્ચ રૂપં, તયો ખન્ધે સહજાતો એકો ખન્ધો ચિત્તસમુટ્ઠાનઞ્ચ રૂપં, દ્વે ખન્ધે સહજાતા દ્વે ખન્ધા ચિત્તસમુટ્ઠાનઞ્ચ રૂપં; અહેતુકપટિસન્ધિક્ખણે વિપાકાબ્યાકતં એકં ખન્ધં સહજાતા તયો ખન્ધા કટત્તા ચ રૂપં, તયો ખન્ધે સહજાતો એકો ખન્ધો કટત્તા ચ રૂપં, દ્વે ખન્ધે સહજાતા દ્વે ખન્ધા કટત્તા ચ રૂપં, ખન્ધે સહજાતં વત્થુ, વત્થું સહજાતા ખન્ધા; એકં મહાભૂતં સહજાતા તયો મહાભૂતા, તયો મહાભૂતે સહજાતં એકં મહાભૂતં, દ્વે મહાભૂતે સહજાતા દ્વે મહાભૂતા, મહાભૂતે સહજાતં ચિત્તસમુટ્ઠાનં રૂપં કટત્તારૂપં ઉપાદારૂપં; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં સહજાતા તયો મહાભૂતા…પે… મહાભૂતે સહજાતં કટત્તારૂપં ઉપાદારૂપં. (૧)

(યથા પટિચ્ચવારે, એવં વિત્થારેતબ્બં.)