૧. વિભઙ્ગવારો

હેતુપચ્ચયો

૧. સંકિલિટ્ઠસંકિલેસિકં ધમ્મં પટિચ્ચ સંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા – સંકિલિટ્ઠસંકિલેસિકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

સંકિલિટ્ઠસંકિલેસિકં ધમ્મં પટિચ્ચ અસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા – સંકિલિટ્ઠસંકિલેસિકે ખન્ધે પટિચ્ચ ચિત્તસમુટ્ઠાનં રૂપં. (૨)

સંકિલિટ્ઠસંકિલેસિકં ધમ્મં પટિચ્ચ સંકિલિટ્ઠસંકિલેસિકો ચ અસંકિલિટ્ઠસંકિલેસિકો ચ ધમ્મા ઉપ્પજ્જન્તિ હેતુપચ્ચયા – સંકિલિટ્ઠસંકિલેસિકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં. (૩)

અસંકિલિટ્ઠસંકિલેસિકં ધમ્મં પટિચ્ચ અસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા – અસંકિલિટ્ઠસંકિલેસિકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે અસંકિલિટ્ઠસંકિલેસિકં એકં ખન્ધં પટિચ્ચ તયો ખન્ધા કટત્તા ચ રૂપં…પે… દ્વે ખન્ધે પટિચ્ચ દ્વે ખન્ધા કટત્તા ચ રૂપં; ખન્ધે પટિચ્ચ વત્થુ, વત્થું પટિચ્ચ ખન્ધા; એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં. (૧)

૨. અસંકિલિટ્ઠઅસંકિલેસિકં ધમ્મં પટિચ્ચ અસંકિલિટ્ઠઅસંકિલેસિકો ધમ્મો ઉપ્પજ્જતિ હેતુપચ્ચયા – અસંકિલિટ્ઠઅસંકિલેસિકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

અસંકિલિટ્ઠઅસંકિલેસિકં ધમ્મં પટિચ્ચ અસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા – અસંકિલિટ્ઠઅસંકિલેસિકે ખન્ધે પટિચ્ચ ચિત્તસમુટ્ઠાનં રૂપં. (૨)

અસંકિલિટ્ઠઅસંકિલેસિકં ધમ્મં પટિચ્ચ અસંકિલિટ્ઠસંકિલેસિકો ચ અસંકિલિટ્ઠઅસંકિલેસિકો ચ ધમ્મા ઉપ્પજ્જન્તિ હેતુપચ્ચયા – અસંકિલિટ્ઠઅસંકિલેસિકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં. (૩)

અસંકિલિટ્ઠસંકિલેસિકઞ્ચ અસંકિલિટ્ઠઅસંકિલેસિકઞ્ચ ધમ્મં પટિચ્ચ અસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા – અસંકિલિટ્ઠઅસંકિલેસિકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

સંકિલિટ્ઠસંકિલેસિકઞ્ચ અસંકિલિટ્ઠસંકિલેસિકઞ્ચ ધમ્મં પટિચ્ચ અસંકિલિટ્ઠસંકિલેસિકો ધમ્મો ઉપ્પજ્જતિ હેતુપચ્ચયા – સંકિલિટ્ઠસંકિલેસિકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં (સંખિત્તં). (૧)