૭. એકચ્ચં અત્થીતિકથા

૧. અતીતાદિએકચ્ચકથા

૨૯૯. અતીતં અત્થીતિ? એકચ્ચં અત્થિ, એકચ્ચં નત્થીતિ. એકચ્ચં નિરુદ્ધં, એકચ્ચં ન નિરુદ્ધં; એકચ્ચં વિગતં, એકચ્ચં અવિગતં; એકચ્ચં અત્થઙ્ગતં, એકચ્ચં ન અત્થઙ્ગતં; એકચ્ચં અબ્ભત્થઙ્ગતં, એકચ્ચં ન અબ્ભત્થઙ્ગતન્તિ? ન હેવં વત્તબ્બે…પે….

અતીતં એકચ્ચં અત્થિ, એકચ્ચં નત્થીતિ? આમન્તા. અતીતા અવિપક્કવિપાકા ધમ્મા એકચ્ચે અત્થિ, એકચ્ચે નત્થીતિ? ન હેવં વત્તબ્બે…પે… અતીતં એકચ્ચં અત્થિ, એકચ્ચં નત્થીતિ? આમન્તા. અતીતા વિપક્કવિપાકા ધમ્મા એકચ્ચે અત્થિ, એકચ્ચે નત્થીતિ? ન હેવં વત્તબ્બે…પે… અતીતં એકચ્ચં અત્થિ, એકચ્ચં નત્થીતિ? આમન્તા. અતીતા અવિપાકા ધમ્મા એકચ્ચે અત્થિ એકચ્ચે નત્થીતિ? ન હેવં વત્તબ્બે…પે….

અતીતં એકચ્ચં અત્થિ એકચ્ચં નત્થીતિ? આમન્તા. કિં અત્થિ કિં નત્થીતિ? અતીતા અવિપક્કવિપાકા ધમ્મા – તે અત્થિ; અતીતા વિપક્કવિપાકા ધમ્મા – તે નત્થીતિ. અતીતા અવિપક્કવિપાકા ધમ્મા – તે અત્થીતિ? આમન્તા. અતીતા વિપક્કવિપાકા ધમ્મા – તે અત્થીતિ? ન હેવં વત્તબ્બે…પે… અતીતા અવિપક્કવિપાકા ધમ્મા – તે અત્થીતિ? આમન્તા. અતીતા અવિપાકા ધમ્મા – તે અત્થીતિ [અતીતા અવિપક્કવિપાકા ધમ્મા તે નત્થીતિ (ક.)]? ન હેવં વત્તબ્બે…પે….

અતીતા વિપક્કવિપાકા ધમ્મા – તે નત્થીતિ? આમન્તા. અતીતા અવિપક્કવિપાકા ધમ્મા – તે નત્થીતિ? ન હેવં વત્તબ્બે …પે….

અતીતા અવિપાકા [વિપક્કવિપાકા (સ્યા.), અવિપક્કવિપાકા (ક.)] ધમ્મા – તે નત્થીતિ? આમન્તા. અતીતા અવિપક્કવિપાકા [અવિપાકા (સ્યા.)] ધમ્મા – તે નત્થીતિ? ન હેવં વત્તબ્બે…પે….

અતીતા અવિપક્કવિપાકા ધમ્મા – તે અત્થીતિ? આમન્તા. નનુ અતીતા અવિપક્કવિપાકા ધમ્મા નિરુદ્ધાતિ? આમન્તા. હઞ્ચિ અતીતા અવિપક્કવિપાકા ધમ્મા નિરુદ્ધા, નો ચ વત રે વત્તબ્બે – ‘‘અતીતા અવિપક્કવિપાકા ધમ્મા – તે [ધમ્મા નિરુદ્ધા તે (સ્યા. ક.)] અત્થી’’તિ.

અતીતા અવિપક્કવિપાકા ધમ્મા નિરુદ્ધા – તે અત્થીતિ? આમન્તા. અતીતા વિપક્કવિપાકા ધમ્મા નિરુદ્ધા – તે અત્થીતિ? ન હેવં વત્તબ્બે…પે… અતીતા અવિપક્કવિપાકા ધમ્મા નિરુદ્ધા – તે અત્થીતિ? આમન્તા. અતીતા અવિપાકા [અવિપક્કવિપાકા (સી. ક.)] ધમ્મા નિરુદ્ધા – તે અત્થીતિ? ન હેવં વત્તબ્બે…પે….

અતીતા વિપક્કવિપાકા ધમ્મા નિરુદ્ધા – તે નત્થીતિ? આમન્તા. અતીતા અવિપક્કવિપાકા ધમ્મા નિરુદ્ધા – તે નત્થીતિ? ન હેવં વત્તબ્બે…પે….

અતીતા અવિપાકા [વિપક્કવિપાકા (સ્યા.), અવિપક્કવિપાકા (ક.)] ધમ્મા નિરુદ્ધા – તે નત્થીતિ? આમન્તા. અતીતા અવિપક્કવિપાકા [અવિપાકા (સ્યા.)] ધમ્મા નિરુદ્ધા – તે નત્થીતિ? ન હેવં વત્તબ્બે…પે….

અતીતા અવિપક્કવિપાકા ધમ્મા નિરુદ્ધા – તે અત્થીતિ? આમન્તા. અતીતા વિપક્કવિપાકા ધમ્મા નિરુદ્ધા – તે નત્થીતિ? આમન્તા. અતીતા એકદેસં વિપક્કવિપાકા ધમ્મા એકદેસં અવિપક્કવિપાકા ધમ્મા નિરુદ્ધા – તે એકચ્ચે અત્થિ એકચ્ચે નત્થીતિ? ન હેવં વત્તબ્બે…પે….

ન વત્તબ્બં – ‘‘અતીતા અવિપક્કવિપાકા ધમ્મા – તે અત્થી’’તિ? આમન્તા. નનુ અતીતા અવિપક્કવિપાકા ધમ્મા વિપચ્ચિસ્સન્તીતિ? આમન્તા. હઞ્ચિ અતીતા અવિપક્કવિપાકા ધમ્મા વિપચ્ચિસ્સન્તિ, તેન વત રે વત્તબ્બે – ‘‘અતીતા અવિપક્કવિપાકા ધમ્મા – તે અત્થી’’તિ.

અતીતા અવિપક્કવિપાકા ધમ્મા વિપચ્ચિસ્સન્તીતિ કત્વા તે અત્થીતિ? આમન્તા. વિપચ્ચિસ્સન્તીતિ કત્વા પચ્ચુપ્પન્નાતિ? ન હેવં વત્તબ્બે…પે… વિપચ્ચિસ્સન્તીતિ કત્વા પચ્ચુપ્પન્નાતિ? આમન્તા. પચ્ચુપ્પન્ના ધમ્મા નિરુજ્ઝિસ્સન્તીતિ કત્વા તે નત્થીતિ? ન હેવં વત્તબ્બે…પે….

૨. અનાગતાદિએકચ્ચકથા

૩૦૦. અનાગતં અત્થીતિ? એકચ્ચં અત્થિ, એકચ્ચં નત્થીતિ. એકચ્ચં જાતં, એકચ્ચં અજાતં; એકચ્ચં સઞ્જાતં, એકચ્ચં અસઞ્જાતં; એકચ્ચં નિબ્બત્તં, એકચ્ચં અનિબ્બત્તં; એકચ્ચં પાતુભૂતં, એકચ્ચં અપાતુભૂતન્તિ? ન હેવં વત્તબ્બે…પે….

અનાગતં એકચ્ચં અત્થિ, એકચ્ચં નત્થીતિ? આમન્તા. અનાગતા ઉપ્પાદિનો ધમ્મા એકચ્ચે અત્થિ, એકચ્ચે નત્થીતિ? ન હેવં વત્તબ્બે…પે… અનાગતં એકચ્ચં અત્થિ, એકચ્ચં નત્થીતિ? આમન્તા. અનાગતા અનુપ્પાદિનો ધમ્મા એકચ્ચે અત્થિ, એકચ્ચે નત્થીતિ? ન હેવં વત્તબ્બે…પે….

અનાગતં એકચ્ચં અત્થિ, એકચ્ચં નત્થીતિ? આમન્તા. કિં અત્થિ, કિં નત્થીતિ? અનાગતા ઉપ્પાદિનો ધમ્મા – તે અત્થિ; અનાગતા અનુપ્પાદિનો ધમ્મા – તે નત્થીતિ. અનાગતા ઉપ્પાદિનો ધમ્મા – તે અત્થીતિ? આમન્તા. અનાગતા અનુપ્પાદિનો ધમ્મા – તે અત્થીતિ? ન હેવં વત્તબ્બે…પે… અનાગતા અનુપ્પાદિનો ધમ્મા – તે નત્થીતિ? આમન્તા. અનાગતા ઉપ્પાદિનો ધમ્મા – તે નત્થીતિ? ન હેવં વત્તબ્બે…પે….

અનાગતા ઉપ્પાદિનો ધમ્મા – તે અત્થીતિ? આમન્તા. નનુ અનાગતા ઉપ્પાદિનો ધમ્મા અજાતાતિ? આમન્તા. હઞ્ચિ અનાગતા ઉપ્પાદિનો ધમ્મા અજાતા, નો ચ વત રે વત્તબ્બે – ‘‘અનાગતા ઉપ્પાદિનો ધમ્મા – તે અત્થી’’તિ.

અનાગતા ઉપ્પાદિનો ધમ્મા અજાતા – તે અત્થીતિ? આમન્તા. અનાગતા અનુપ્પાદિનો ધમ્મા અજાતા – તે અત્થીતિ? ન હેવં વત્તબ્બે…પે… અનાગતા અનુપ્પાદિનો ધમ્મા અજાતા – તે નત્થીતિ? આમન્તા. અનાગતા ઉપ્પાદિનો ધમ્મા અજાતા – તે નત્થીતિ? ન હેવં વત્તબ્બે…પે….

ન વત્તબ્બં – ‘‘અનાગતા ઉપ્પાદિનો ધમ્મા – તે અત્થી’’તિ? આમન્તા. નનુ અનાગતા ઉપ્પાદિનો ધમ્મા ઉપ્પજ્જિસ્સન્તીતિ? આમન્તા. હઞ્ચિ અનાગતા ઉપ્પાદિનો ધમ્મા ઉપ્પજ્જિસ્સન્તિ, તેન વત રે વત્તબ્બે – ‘‘અનાગતા ઉપ્પાદિનો ધમ્મા – તે અત્થી’’તિ.

અનાગતા ઉપ્પાદિનો ધમ્મા ઉપ્પજ્જિસ્સન્તીતિ કત્વા તે અત્થીતિ? આમન્તા. ઉપ્પજ્જિસ્સન્તીતિ કત્વા પચ્ચુપ્પન્નાતિ? ન હેવં વત્તબ્બે…પે… ઉપ્પજ્જિસ્સન્તીતિ કત્વા પચ્ચુપ્પન્નાતિ? આમન્તા. પચ્ચુપ્પન્ના ધમ્મા નિરુજ્ઝિસ્સન્તીતિ કત્વા તે નત્થીતિ? ન હેવં વત્તબ્બે…પે….

એકચ્ચં અત્થીતિકથા નિટ્ઠિતા.