૨. સુત્તસાધનં

૨૯૮. ન વત્તબ્બં – ‘‘અતીતાનાગતા ખન્ધા ધાતુ આયતનં નત્થિ ચેતે’’તિ? આમન્તા. નનુ વુત્તં ભગવતા – ‘‘તયોમે, ભિક્ખવે, નિરુત્તિપથા અધિવચનપથા પઞ્ઞત્તિ…પે… વિઞ્ઞૂહીતિ…પે…’’. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘અતીતાનાગતા ખન્ધા ધાતુ આયતનં નત્થિ ચેતે’’તિ.

અતીતાનાગતા ખન્ધા ધાતુ આયતનં નત્થિ ચેતેતિ? આમન્તા. નનુ વુત્તં ભગવતા – ‘‘યં કિઞ્ચિ, ભિક્ખવે, રૂપં અતીતાનાગતપચ્ચુપ્પન્નં અજ્ઝત્તં વા બહિદ્ધા વા ઓળારિકં વા સુખુમં વા હીનં વા પણીતં વા યં દૂરે સન્તિકે વા, અયં વુચ્ચતિ રૂપક્ખન્ધો. યા કાચિ વેદના… યા કાચિ સઞ્ઞા… યે કેચિ સઙ્ખારા… યં કિઞ્ચિ વિઞ્ઞાણં અતીતાનાગતપચ્ચુપ્પન્નં…પે… અયં વુચ્ચતિ વિઞ્ઞાણક્ખન્ધો’’તિ. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘અતીતાનાગતા ખન્ધા ધાતુ આયતનં નત્થિ ચેતે’’તિ.

અતીતક્ખન્ધાદિકથા નિટ્ઠિતા.