(૨૧૧) ૪. ધમ્માભિસમયકથા

૮૯૭. અત્થિ ગબ્ભસેય્યાય ધમ્માભિસમયોતિ? આમન્તા. અત્થિ ગબ્ભસેય્યાય ધમ્મદેસના, ધમ્મસ્સવનં, ધમ્મસાકચ્છા, પરિપુચ્છા, સીલસમાદાનં, ઇન્દ્રિયેસુ ગુત્તદ્વારતા, ભોજને મત્તઞ્ઞુતા, પુબ્બરત્તાપરરત્તં જાગરિયાનુયોગોતિ? ન હેવં વત્તબ્બે…પે… નત્થિ ગબ્ભસેય્યાય ધમ્મદેસના, ધમ્મસ્સવનં…પે… પુબ્બરત્તાપરરત્તં જાગરિયાનુયોગોતિ? આમન્તા. હઞ્ચિ નત્થિ ગબ્ભસેય્યાય ધમ્મદેસના, ધમ્મસ્સવનં…પે… પુબ્બરત્તાપરરત્તં જાગરિયાનુયોગો, નો ચ વત રે વત્તબ્બે – ‘‘અત્થિ ગબ્ભસેય્યાય ધમ્માભિસમયો’’તિ.

અત્થિ ગબ્ભસેય્યાય ધમ્માભિસમયોતિ? આમન્તા. નનુ દ્વે પચ્ચયા સમ્માદિટ્ઠિયા ઉપ્પાદાય – પરતો ચ ઘોસો, યોનિસો ચ મનસિકારોતિ? આમન્તા. હઞ્ચિ દ્વે પચ્ચયા સમ્માદિટ્ઠિયા ઉપ્પાદાય – પરતો ચ ઘોસો, યોનિસો ચ મનસિકારો, નો ચ વત રે વત્તબ્બે – ‘‘અત્થિ ગબ્ભસેય્યાય ધમ્માભિસમયો’’તિ.

અત્થિ ગબ્ભસેય્યાય ધમ્માભિસમયોતિ? આમન્તા. સુત્તસ્સ પમત્તસ્સ મુટ્ઠસ્સતિસ્સ અસમ્પજાનસ્સ ધમ્માભિસમયોતિ? ન હેવં વત્તબ્બે…પે….

ધમ્માભિસમયકથા નિટ્ઠિતા.