૩. બ્રહ્મચરિયકથા

૧. સુદ્ધબ્રહ્મચરિયકથા

૨૬૯. નત્થિ દેવેસુ બ્રહ્મચરિયવાસોતિ? આમન્તા. સબ્બે દેવા જળા એલમૂગા [એળમૂગા (સ્યા.)] અવિઞ્ઞૂ હત્થસંવાચિકા નપ્પટિબલા સુભાસિતદુબ્ભાસિતાનં અત્થમઞ્ઞાતું, સબ્બે દેવા ન બુદ્ધે પસન્ના ન ધમ્મે પસન્ના ન સઙ્ઘે પસન્ના, ન બુદ્ધં ભગવન્તં પયિરુપાસન્તિ, ન બુદ્ધં ભગવન્તં પઞ્હં પુચ્છન્તિ, ન બુદ્ધેન ભગવતા પઞ્હે વિસ્સજ્જિતે અત્તમના, સબ્બે દેવા કમ્માવરણેન સમન્નાગતા કિલેસાવરણેન સમન્નાગતા વિપાકાવરણેન સમન્નાગતા અસ્સદ્ધા અચ્છન્દિકા દુપ્પઞ્ઞા અભબ્બા નિયામં ઓક્કમિતું કુસલેસુ ધમ્મેસુ સમ્મત્તં, સબ્બે દેવા માતુઘાતકા પિતુઘાતકા અરહન્તઘાતકા રુહિરુપ્પાદકા સઙ્ઘભેદકા, સબ્બે દેવા પાણાતિપાતિનો અદિન્નાદાયિનો કામેસુમિચ્છાચારિનો મુસાવાદિનો પિસુણવાચા ફરુસાવાચા સમ્ફપ્પલાપિનો અભિજ્ઝાલુનો બ્યાપન્નચિત્તા મિચ્છાદિટ્ઠિકાતિ? ન હેવં વત્તબ્બે…પે….

નનુ અત્થિ દેવા અજળા અનેલમૂગા વિઞ્ઞૂ ન હત્થસંવાચિકા પટિબલા સુભાસિતદુબ્ભાસિતાનં અત્થમઞ્ઞાતું, અત્થિ દેવા બુદ્ધે પસન્ના ધમ્મે પસન્ના સઙ્ઘે પસન્ના, બુદ્ધં ભગવન્તં પયિરુપાસન્તિ, બુદ્ધં ભગવન્તં પઞ્હં પુચ્છન્તિ, બુદ્ધેન ભગવતા પઞ્હે વિસ્સજ્જિતે અત્તમના હોન્તિ, અત્થિ દેવા ન કમ્માવરણેન સમન્નાગતા ન કિલેસાવરણેન સમન્નાગતા ન વિપાકાવરણેન સમન્નાગતા સદ્ધા છન્દિકા પઞ્ઞવન્તો ભબ્બા નિયામં ઓક્કમિતું કુસલેસુ ધમ્મેસુ સમ્મત્તં, અત્થિ દેવા ન માતુઘાતકા ન પિતુઘાતકા ન અરહન્તઘાતકા ન રુહિરુપ્પાદકા ન સઙ્ઘભેદકા, અત્થિ દેવા ન પાણાતિપાતિનો ન અદિન્નાદાયિનો ન કામેસુમિચ્છાચારિનો ન મુસાવાદિનો ન પિસુણાવાચા ન ફરુસાવાચા ન સમ્ફપ્પલાપિનો ન અભિજ્ઝાલુનો અબ્યાપન્નચિત્તા સમ્માદિટ્ઠિકાતિ? આમન્તા.

હઞ્ચિ અત્થિ દેવા અજળા અનેલમૂગા વિઞ્ઞૂ ન હત્થસંવાચિકા પટિબલા સુભાસિતદુબ્ભાસિતાનં અત્થમઞ્ઞાતું…પે… અત્થિ દેવા બુદ્ધે પસન્ના…પે… સમ્માદિટ્ઠિકા, નો ચ વત રે વત્તબ્બે – ‘‘નત્થિ દેવેસુ બ્રહ્મચરિયવાસો’’તિ.

૨૭૦. અત્થિ દેવેસુ બ્રહ્મચરિયવાસોતિ? આમન્તા. અત્થિ તત્થ પબ્બજ્જા મુણ્ડિયં કાસાવધારણા પત્તધારણા, દેવેસુ સમ્માસમ્બુદ્ધા ઉપ્પજ્જન્તિ, પચ્ચેકસમ્બુદ્ધા ઉપ્પજ્જન્તિ, સાવકયુગં ઉપ્પજ્જતીતિ? ન હેવં વત્તબ્બે…પે….

દેવેસુ પબ્બજ્જા નત્થીતિ, નત્થિ દેવેસુ બ્રહ્મચરિયવાસોતિ? આમન્તા. યત્થ અત્થિ પબ્બજ્જા તત્થેવ બ્રહ્મચરિયવાસો, યત્થ નત્થિ પબ્બજ્જા નત્થિ તત્થ બ્રહ્મચરિયવાસોતિ? ન હેવં વત્તબ્બે…પે… યત્થ અત્થિ પબ્બજ્જા તત્થેવ બ્રહ્મચરિયવાસો, યત્થ નત્થિ પબ્બજ્જા નત્થિ તત્થ બ્રહ્મચરિયવાસોતિ? આમન્તા. યો પબ્બજતિ તસ્સેવ બ્રહ્મચરિયવાસો, યો ન પબ્બજતિ નત્થિ તસ્સ બ્રહ્મચરિયવાસોતિ? ન હેવં વત્તબ્બે…પે….

દેવેસુ મુણ્ડિયં નત્થીતિ, નત્થિ દેવેસુ બ્રહ્મચરિયવાસોતિ? આમન્તા. યત્થ અત્થિ મુણ્ડિયં તત્થેવ બ્રહ્મચરિયવાસો, યત્થ નત્થિ મુણ્ડિયં નત્થિ તત્થ બ્રહ્મચરિયવાસોતિ? ન હેવં વત્તબ્બે…પે… યત્થ અત્થિ મુણ્ડિયં તત્થેવ બ્રહ્મચરિયવાસો, યત્થ નત્થિ મુણ્ડિયં નત્થિ તત્થ બ્રહ્મચરિયવાસોતિ? આમન્તા. યો મુણ્ડો હોતિ તસ્સેવ બ્રહ્મચરિયવાસો, યો મુણ્ડો ન હોતિ નત્થિ તસ્સ બ્રહ્મચરિયવાસોતિ? ન હેવં વત્તબ્બે…પે….

દેવેસુ કાસાવધારણા નત્થીતિ, નત્થિ દેવેસુ બ્રહ્મચરિયવાસોતિ? આમન્તા. યત્થ અત્થિ કાસાવધારણા તત્થેવ બ્રહ્મચરિયવાસો, યત્થ નત્થિ કાસાવધારણા નત્થિ તત્થ બ્રહ્મચરિયવાસોતિ? ન હેવં વત્તબ્બે…પે… યત્થ અત્થિ કાસાવધારણા તત્થેવ બ્રહ્મચરિયવાસો, યત્થ નત્થિ કાસાવધારણા નત્થિ તત્થ બ્રહ્મચરિયવાસોતિ? આમન્તા. યો કાસાવં ધારેતિ તસ્સેવ બ્રહ્મચરિયવાસો, યો કાસાવં ન ધારેતિ નત્થિ તસ્સ બ્રહ્મચરિયવાસોતિ? ન હેવં વત્તબ્બે…પે….

દેવેસુ પત્તધારણા નત્થીતિ, નત્થિ દેવેસુ બ્રહ્મચરિયવાસોતિ? આમન્તા. યત્થ અત્થિ પત્તધારણા તત્થેવ બ્રહ્મચરિયવાસો, યત્થ નત્થિ પત્તધારણા નત્થિ તત્થ બ્રહ્મચરિયવાસોતિ? ન હેવં વત્તબ્બે…પે… યત્થ અત્થિ પત્તધારણા તત્થેવ બ્રહ્મચરિયવાસો, યત્થ નત્થિ પત્તધારણા નત્થિ તત્થ બ્રહ્મચરિયવાસોતિ? આમન્તા? યો પત્તં ધારેતિ તસ્સેવ બ્રહ્મચરિયવાસો, યો પત્તં ન ધારેતિ નત્થિ તસ્સ બ્રહ્મચરિયવાસોતિ? ન હેવં વત્તબ્બે…પે….

દેવેસુ સમ્માસમ્બુદ્ધા નુપ્પજ્જન્તીતિ, નત્થિ દેવેસુ બ્રહ્મચરિયવાસોતિ? આમન્તા. યત્થ સમ્માસમ્બુદ્ધા ઉપ્પજ્જન્તિ તત્થેવ બ્રહ્મચરિયવાસો, યત્થ સમ્માસમ્બુદ્ધા નુપ્પજ્જન્તિ નત્થિ તત્થ બ્રહ્મચરિયવાસોતિ? ન હેવં વત્તબ્બે…પે… યત્થ સમ્માસમ્બુદ્ધા ઉપ્પજ્જન્તિ તત્થેવ બ્રહ્મચરિયવાસો, યત્થ સમ્માસમ્બુદ્ધા નુપ્પજ્જન્તિ નત્થિ તત્થ બ્રહ્મચરિયવાસોતિ? આમન્તા. લુમ્બિનિયા ભગવા જાતો, બોધિયા મૂલે અભિસમ્બુદ્ધો, બારાણસિયં ભગવતા ધમ્મચક્કં પવત્તિતં; તત્થેવ બ્રહ્મચરિયવાસો, નત્થઞ્ઞત્ર બ્રહ્મચરિયવાસોતિ? ન હેવં વત્તબ્બે…પે….

દેવેસુ પચ્ચેકસમ્બુદ્ધા નુપ્પજ્જન્તીતિ, નત્થિ દેવેસુ બ્રહ્મચરિયવાસોતિ? આમન્તા. યત્થ પચ્ચેકસમ્બુદ્ધા ઉપ્પજ્જન્તિ તત્થેવ બ્રહ્મચરિયવાસો, યત્થ પચ્ચેકસમ્બુદ્ધા નુપ્પજ્જન્તિ નત્થિ તત્થ બ્રહ્મચરિયવાસોતિ? ન હેવં વત્તબ્બે…પે… યત્થ પચ્ચેકસમ્બુદ્ધા ઉપ્પજ્જન્તિ તત્થેવ બ્રહ્મચરિયવાસો, યત્થ પચ્ચેકસમ્બુદ્ધા નુપ્પજ્જન્તિ નત્થિ તત્થ બ્રહ્મચરિયવાસોતિ? આમન્તા. મજ્ઝિમેસુ જનપદેસુ પચ્ચેકસમ્બુદ્ધા ઉપ્પજ્જન્તિ, તત્થેવ બ્રહ્મચરિયવાસો, નત્થઞ્ઞત્ર બ્રહ્મચરિયવાસોતિ? ન હેવં વત્તબ્બે…પે….

દેવેસુ સાવકયુગં નુપ્પજ્જતીતિ, નત્થિ દેવેસુ બ્રહ્મચરિયવાસોતિ? આમન્તા. યત્થ સાવકયુગં ઉપ્પજ્જતિ તત્થેવ બ્રહ્મચરિયવાસો, યત્થ સાવકયુગં નુપ્પજ્જતિ નત્થિ તત્થ બ્રહ્મચરિયવાસોતિ? ન હેવં વત્તબ્બે…પે… યત્થ સાવકયુગં ઉપ્પજ્જતિ તત્થેવ બ્રહ્મચરિયવાસો, યત્થ સાવકયુગં નુપ્પજ્જતિ નત્થિ તત્થ બ્રહ્મચરિયવાસોતિ? આમન્તા. મગધેસુ સાવકયુગં ઉપ્પન્નં, તત્થેવ બ્રહ્મચરિયવાસો, નત્થઞ્ઞત્ર બ્રહ્મચરિયવાસોતિ? ન હેવં વત્તબ્બે…પે….

૨૭૧. અત્થિ દેવેસુ બ્રહ્મચરિયવાસોતિ? આમન્તા. સબ્બદેવેસુ અત્થિ બ્રહ્મચરિયવાસોતિ? ન હેવં વત્તબ્બે…પે….

અત્થિ મનુસ્સેસુ બ્રહ્મચરિયવાસોતિ? આમન્તા. સબ્બમનુસ્સેસુ અત્થિ બ્રહ્મચરિયવાસોતિ? ન હેવં વત્તબ્બે…પે….

અત્થિ દેવેસુ બ્રહ્મચરિયવાસોતિ? આમન્તા. અસઞ્ઞસત્તેસુ દેવેસુ અત્થિ બ્રહ્મચરિયવાસોતિ? ન હેવં વત્તબ્બે…પે….

અત્થિ મનુસ્સેસુ બ્રહ્મચરિયવાસોતિ? આમન્તા. પચ્ચન્તિમેસુ જનપદેસુ અત્થિ બ્રહ્મચરિયવાસો મિલક્ખેસુ [મિલક્ખૂસુ (સ્યા. ક.)] અવિઞ્ઞાતારેસુ યત્થ નત્થિ ગતિ ભિક્ખૂનં ભિક્ખુનીનં ઉપાસકાનં ઉપાસિકાનન્તિ? ન હેવં વત્તબ્બે.

અત્થિ દેવેસુ બ્રહ્મચરિયવાસોતિ? અત્થિ યત્થ અત્થિ, અત્થિ યત્થ નત્થીતિ. અસઞ્ઞસત્તેસુ દેવેસુ અત્થિ યત્થ અત્થિ, અત્થિ યત્થ નત્થિ બ્રહ્મચરિયવાસો, સઞ્ઞસત્તેસુ [અસઞ્ઞસત્તેસુ (ક.)] દેવેસુ અત્થિ યત્થ અત્થિ, અત્થિ યત્થ નત્થિ બ્રહ્મચરિયવાસોતિ? ન હેવં વત્તબ્બે.

દેવેસુ અત્થિ યત્થ અત્થિ, અત્થિ યત્થ નત્થિ બ્રહ્મચરિયવાસોતિ? આમન્તા. કત્થ અત્થિ, કત્થ નત્થીતિ? અસઞ્ઞસત્તેસુ દેવેસુ નત્થિ બ્રહ્મચરિયવાસો, સઞ્ઞસત્તેસુ [અસઞ્ઞસત્તેસુ (ક.)] દેવેસુ અત્થિ બ્રહ્મચરિયવાસોતિ. અસઞ્ઞસત્તેસુ દેવેસુ નત્થિ બ્રહ્મચરિયવાસોતિ? આમન્તા. સઞ્ઞસત્તેસુ [અસઞ્ઞસત્તેસુ (ક.)] દેવેસુ નત્થિ બ્રહ્મચરિયવાસોતિ? ન હેવં વત્તબ્બે.

સઞ્ઞસત્તેસુ દેવેસુ અત્થિ બ્રહ્મચરિયવાસોતિ? આમન્તા. અસઞ્ઞસત્તેસુ દેવેસુ અત્થિ બ્રહ્મચરિયવાસોતિ? ન હેવં વત્તબ્બે.

અત્થિ મનુસ્સેસુ બ્રહ્મચરિયવાસોતિ? અત્થિ યત્થ અત્થિ, અત્થિ યત્થ નત્થીતિ. પચ્ચન્તિમેસુ જનપદેસુ અત્થિ યત્થ અત્થિ, અત્થિ યત્થ નત્થિ બ્રહ્મચરિયવાસો મિલક્ખેસુ અવિઞ્ઞાતારેસુ યત્થ નત્થિ ગતિ ભિક્ખૂનં ભિક્ખુનીનં ઉપાસકાનં ઉપાસિકાનં, મજ્ઝિમેસુ જનપદેસુ અત્થિ યત્થ અત્થિ, અત્થિ યત્થ નત્થિ બ્રહ્મચરિયવાસોતિ? ન હેવં વત્તબ્બે.

મનુસ્સેસુ અત્થિ યત્થ અત્થિ, અત્થિ યત્થ નત્થિ બ્રહ્મચરિયવાસોતિ? આમન્તા. કત્થ અત્થિ, કત્થ નત્થીતિ? પચ્ચન્તિમેસુ જનપદેસુ નત્થિ બ્રહ્મચરિયવાસો મિલક્ખેસુ અવિઞ્ઞાતારેસુ યત્થ નત્થિ ગતિ ભિક્ખૂનં ભિક્ખુનીનં ઉપાસકાનં ઉપાસિકાનં, મજ્ઝિમેસુ જનપદેસુ અત્થિ બ્રહ્મચરિયવાસોતિ. પચ્ચન્તિમેસુ જનપદેસુ નત્થિ બ્રહ્મચરિયવાસો મિલક્ખેસુ અવિઞ્ઞાતારેસુ યત્થ નત્થિ ગતિ ભિક્ખૂનં ભિક્ખુનીનં ઉપાસકાનં ઉપાસિકાનન્તિ? આમન્તા. મજ્ઝિમેસુ જનપદેસુ નત્થિ બ્રહ્મચરિયવાસોતિ? ન હેવં વત્તબ્બે.

મજ્ઝિમેસુ જનપદેસુ અત્થિ બ્રહ્મચરિયવાસોતિ? આમન્તા. પચ્ચન્તિમેસુ જનપદેસુ અત્થિ બ્રહ્મચરિયવાસો મિલક્ખેસુ અવિઞ્ઞાતારેસુ યત્થ નત્થિ ગતિ ભિક્ખૂનં ભિક્ખુનીનં ઉપાસકાનં ઉપાસિકાનન્તિ? ન હેવં વત્તબ્બે.

અત્થિ દેવેસુ બ્રહ્મચરિયવાસોતિ? આમન્તા. નનુ વુત્તં ભગવતા – ‘‘તીહિ, ભિક્ખવે, ઠાનેહિ જમ્બુદીપકા મનુસ્સા ઉત્તરકુરુકે ચ મનુસ્સે અધિગ્ગણ્હન્તિ દેવે ચ તાવતિંસે! કતમેહિ તીહિ? સૂરા, સતિમન્તો, ઇધ બ્રહ્મચરિયવાસો’’તિ [અ. નિ. ૯.૨૧]. અત્થેવ સુત્તન્તોતિ? આમન્તા. તેન હિ નત્થિ દેવેસુ બ્રહ્મચરિયવાસોતિ.

સાવત્થિયં વુત્તં ભગવતા – ‘‘ઇધ બ્રહ્મચરિયવાસો’’તિ? આમન્તા. સાવત્થિયંયેવ બ્રહ્મચરિયવાસો, નત્થિ અઞ્ઞત્ર બ્રહ્મચરિયવાસોતિ? ન હેવં વત્તબ્બે.

૨૭૨. અનાગામિસ્સ પુગ્ગલસ્સ પઞ્ચોરમ્ભાગિયાનિ સંયોજનાનિ પહીનાનિ, પઞ્ચુદ્ધમ્ભાગિયાનિ સંયોજનાનિ અપ્પહીનાનિ, ઇતો ચુતસ્સ તત્થ ઉપપન્નસ્સ કુહિં ફલુપ્પત્તીતિ? તત્થેવ. હઞ્ચિ અનાગામિસ્સ પુગ્ગલસ્સ પઞ્ચોરમ્ભાગિયાનિ સંયોજનાનિ પહીનાનિ, પઞ્ચુદ્ધમ્ભાગિયાનિ સંયોજનાનિ અપ્પહીનાનિ, ઇતો ચુતસ્સ તત્થ ઉપપન્નસ્સ તહિં ફલુપ્પત્તિ; નો ચ વત રે વત્તબ્બે – ‘‘નત્થિ દેવેસુ બ્રહ્મચરિયવાસો’’તિ.

અનાગામિસ્સ પુગ્ગલસ્સ પઞ્ચોરમ્ભાગિયાનિ સંયોજનાનિ પહીનાનિ, પઞ્ચુદ્ધમ્ભાગિયાનિ સંયોજનાનિ અપ્પહીનાનિ, ઇતો ચુતસ્સ તત્થ ઉપપન્નસ્સ કુહિં ભારોહરણં, કુહિં દુક્ખપરિઞ્ઞાતં, કુહિં કિલેસપ્પહાનં, કુહિં નિરોધસચ્છિકિરિયા, કુહિં અકુપ્પપટિવેધોતિ? તત્થેવ. હઞ્ચિ અનાગામિસ્સ પુગ્ગલસ્સ પઞ્ચોરમ્ભાગિયાનિ સંયોજનાનિ પહીનાનિ, પઞ્ચુદ્ધમ્ભાગિયાનિ સંયોજનાનિ અપ્પહીનાનિ, ઇતો ચુતસ્સ તત્થ ઉપપન્નસ્સ તહિં અકુપ્પપટિવેધો; નો ચ વત રે વત્તબ્બે – ‘‘નત્થિ દેવેસુ બ્રહ્મચરિયવાસો’’તિ.

અનાગામિસ્સ પુગ્ગલસ્સ પઞ્ચોરમ્ભાગિયાનિ સંયોજનાનિ પહીનાનિ, પઞ્ચુદ્ધમ્ભાગિયાનિ સંયોજનાનિ અપ્પહીનાનિ, ઇતો ચુતસ્સ તત્થ ઉપપન્નસ્સ તહિં ફલુપ્પત્તિ, તહિં ભારોહરણં, તહિં દુક્ખપરિઞ્ઞાતં, તહિં કિલેસપ્પહાનં, તહિં નિરોધસચ્છિકિરિયા, તહિં અકુપ્પપટિવેધો; કેનટ્ઠેન વદેસિ – ‘‘નત્થિ દેવેસુ બ્રહ્મચરિયવાસો’’તિ? હન્દ હિ અનાગામી પુગ્ગલો ઇધ ભાવિતેન મગ્ગેન તત્થ ફલં સચ્છિકરોતીતિ [સચ્છિકરોતિ (બહૂસુ)].

૨. સંસન્દનબ્રહ્મચરિયકથા

૨૭૩. અનાગામી પુગ્ગલો ઇધ ભાવિતેન મગ્ગેન તત્થ ફલં સચ્છિકરોતીતિ? આમન્તા. સોતાપન્નો પુગ્ગલો તત્થ ભાવિતેન મગ્ગેન ઇધ ફલં સચ્છિકરોતીતિ? ન હેવં વત્તબ્બે.

અનાગામી પુગ્ગલો ઇધ ભાવિતેન મગ્ગેન તત્થ ફલં સચ્છિકરોતીતિ? આમન્તા. સકદાગામી પુગ્ગલો ઇધ પરિનિબ્બાયિપુગ્ગલો [ઇધપરિનિબ્બાયી (?)] તત્થ ભાવિતેન મગ્ગેન ઇધ ફલં સચ્છિકરોતીતિ? ન હેવં વત્તબ્બે.

સોતાપન્નો પુગ્ગલો ઇધ ભાવિતેન મગ્ગેન ઇધ ફલં સચ્છિકરોતીતિ? આમન્તા. અનાગામી પુગ્ગલો તત્થ ભાવિતેન મગ્ગેન તત્થ ફલં સચ્છિકરોતીતિ? ન હેવં વત્તબ્બે.

સકદાગામી પુગ્ગલો ઇધ પરિનિબ્બાયિપુગ્ગલો ઇધ ભાવિતેન મગ્ગેન ઇધ ફલં સચ્છિકરોતીતિ? આમન્તા. અનાગામી પુગ્ગલો તત્થ ભાવિતેન મગ્ગેન તત્થ ફલં સચ્છિકરોતીતિ? ન હેવં વત્તબ્બે…પે….

ઇધ વિહાય નિટ્ઠસ્સ પુગ્ગલસ્સ મગ્ગો ચ ભાવીયતિ, ન ચ કિલેસા પહીયન્તીતિ? આમન્તા. સોતાપત્તિફલસચ્છિકિરિયાય પટિપન્નસ્સ પુગ્ગલસ્સ મગ્ગો ચ ભાવીયતિ, ન ચ કિલેસા પહીયન્તીતિ? ન હેવં વત્તબ્બે…પે….

ઇધ વિહાય નિટ્ઠસ્સ પુગ્ગલસ્સ મગ્ગો ચ ભાવીયતિ, ન ચ કિલેસા પહીયન્તીતિ? આમન્તા. સકદાગામિફલસચ્છિકિરિયાય પટિપન્નસ્સ પુગ્ગલસ્સ…પે… અરહત્તસચ્છિકિરિયાય પટિપન્નસ્સ પુગ્ગલસ્સ મગ્ગો ચ ભાવીયતિ, ન ચ કિલેસા પહીયન્તીતિ? ન હેવં વત્તબ્બે…પે….

સોતાપત્તિફલસચ્છિકિરિયાય પટિપન્નસ્સ પુગ્ગલસ્સ અપુબ્બં અચરિમં મગ્ગો ચ ભાવીયતિ, કિલેસા ચ પહીયન્તીતિ? આમન્તા. ઇધ વિહાય નિટ્ઠસ્સ પુગ્ગલસ્સ અપુબ્બં અચરિમં મગ્ગો ચ ભાવીયતિ, કિલેસા ચ પહીયન્તીતિ? ન હેવં વત્તબ્બે.

સકદાગામિફલસચ્છિકિરિયાય પટિપન્નસ્સ પુગ્ગલસ્સ…પે… અરહત્તસચ્છિકિરિયાય પટિપન્નસ્સ પુગ્ગલસ્સ અપુબ્બં અચરિમં મગ્ગો ચ ભાવીયતિ, કિલેસા ચ પહીયન્તીતિ? આમન્તા. ઇધ વિહાય નિટ્ઠસ્સ પુગ્ગલસ્સ અપુબ્બં અચરિમં મગ્ગો ચ ભાવીયતિ, કિલેસા ચ પહીયન્તીતિ? ન હેવં વત્તબ્બે.

અનાગામી પુગ્ગલો કતકરણીયો ભાવિતભાવનો તત્થ ઉપપજ્જતીતિ? આમન્તા. અરહા ઉપપજ્જતીતિ? ન હેવં વત્તબ્બે.

અરહા ઉપપજ્જતીતિ? આમન્તા. અત્થિ અરહતો પુનબ્ભવોતિ? ન હેવં વત્તબ્બે.

અત્થિ અરહતો પુનબ્ભવોતિ? આમન્તા. અરહા ભવેન ભવં ગચ્છતિ, ગતિયા ગતિં ગચ્છતિ, સંસારેન સંસારં ગચ્છતિ, ઉપપત્તિયા ઉપપત્તિં ગચ્છતીતિ? ન હેવં વત્તબ્બે.

અનાગામી પુગ્ગલો કતકરણીયો ભાવિતભાવનો અનોહટભારો તત્થ ઉપપજ્જતીતિ? આમન્તા. ભારોહરણાય પુન મગ્ગં ભાવેતીતિ? ન હેવં વત્તબ્બે.

અનાગામી પુગ્ગલો કતકરણીયો ભાવિતભાવનો અપરિઞ્ઞાતદુક્ખો અપ્પહીનકિલેસો અસચ્છિકતનિરોધો અપ્પટિવિદ્ધાકુપ્પો તત્થ ઉપપજ્જતીતિ? આમન્તા. અકુપ્પપટિવેધાય પુન મગ્ગં ભાવેતીતિ? ન હેવં વત્તબ્બે.

અનાગામી પુગ્ગલો કતકરણીયો ભાવિતભાવનો અનોહટભારો તત્થ ઉપપજ્જતિ, ન ચ ભારોહરણાય પુન મગ્ગં ભાવેતીતિ? આમન્તા. અનોહટભારો ચ તત્થ પરિનિબ્બાયતીતિ? ન હેવં વત્તબ્બે.

અનાગામી પુગ્ગલો કતકરણીયો ભાવિતભાવનો અપરિઞ્ઞાતદુક્ખો અપ્પહીનકિલેસો અસચ્છિકતનિરોધો અપ્પટિવિદ્ધાકુપ્પો તત્થ ઉપપજ્જતિ, ન ચ અકુપ્પપટિવેધાય પુન મગ્ગં ભાવેતીતિ? આમન્તા. અપ્પટિવિદ્ધાકુપ્પો ચ તત્થ પરિનિબ્બાયતીતિ? ન હેવં વત્તબ્બે. યથા મિગો સલ્લેન વિદ્ધો દૂરમ્પિ ગન્ત્વા કાલં કરોતિ, એવમેવં અનાગામી પુગ્ગલો ઇધ ભાવિતેન મગ્ગેન તત્થ ફલં સચ્છિકરોતીતિ.

યથા મિગો સલ્લેન વિદ્ધો દૂરમ્પિ ગન્ત્વા સસલ્લોવ કાલં કરોતિ, એવમેવં અનાગામી પુગ્ગલો ઇધ ભાવિતેન મગ્ગેન તત્થ સસલ્લોવ પરિનિબ્બાયતીતિ? ન હેવં વત્તબ્બે…પે….

બ્રહ્મચરિયકથા નિટ્ઠિતા.

૩. ઓધિસોકથા

૨૭૪. ઓધિસોધિસો કિલેસે જહતીતિ? આમન્તા. સોતાપત્તિફલસચ્છિકિરિયાય પટિપન્નો પુગ્ગલો દુક્ખદસ્સનેન કિં જહતીતિ? સક્કાયદિટ્ઠિં વિચિકિચ્છં સીલબ્બતપરામાસં તદેકટ્ઠે ચ કિલેસે એકદેસે જહતીતિ. એકદેસં સોતાપન્નો, એકદેસં ન સોતાપન્નો, એકદેસં સોતાપત્તિફલપ્પત્તો [સોતાપત્તિફલં પત્તો (?)] પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતિ, એકદેસં સત્તક્ખત્તુપરમો, કોલઙ્કોલો, એકબીજી, બુદ્ધે અવેચ્ચપ્પસાદેન સમન્નાગતો, ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો એકદેસં અરિયકન્તેહિ સીલેહિ ન સમન્નાગતોતિ? ન હેવં વત્તબ્બે…પે….

સમુદયદસ્સનેન કિં જહતીતિ? સક્કાયદિટ્ઠિં જહતિ, વિચિકિચ્છં સીલબ્બતપરામાસં તદેકટ્ઠે ચ કિલેસે એકદેસે જહતીતિ. એકદેસં સોતાપન્નો, એકદેસં ન સોતાપન્નો…પે… એકદેસં અરિયકન્તેહિ સીલેહિ સમન્નાગતો, એકદેસં અરિયકન્તેહિ સીલેહિ ન સમન્નાગતોતિ? ન હેવં વત્તબ્બે…પે….

નિરોધદસ્સનેન કિં જહતીતિ? વિચિકિચ્છં સીલબ્બતપરામાસં તદેકટ્ઠે ચ કિલેસે એકદેસે જહતીતિ. એકદેસં સોતાપન્નો, એકદેસં ન સોતાપન્નો…પે… એકદેસં અરિયકન્તેહિ સીલેહિ સમન્નાગતો, એકદેસં અરિયકન્તેહિ સીલેહિ ન સમન્નાગતોતિ? ન હેવં વત્તબ્બે…પે….

મગ્ગદસ્સનેન કિં જહતીતિ? સીલબ્બતપરામાસં તદેકટ્ઠે ચ કિલેસે જહતીતિ. એકદેસં સોતાપન્નો, એકદેસં ન સોતાપન્નો, એકદેસં સોતાપત્તિફલપ્પત્તો પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતિ, એકદેસં સત્તક્ખત્તુપરમો, કોલઙ્કોલો, એકબીજી, બુદ્ધે અવેચ્ચપ્પસાદેન સમન્નાગતો, ધમ્મે…પે… સઙ્ઘે…પે… અરિયકન્તેહિ સીલેહિ સમન્નાગતો, એકદેસં અરિયકન્તેહિ સીલેહિ ન સમન્નાગતોતિ? ન હેવં વત્તબ્બે…પે….

૨૭૫. સકદાગામિફલસચ્છિકિરિયાય પટિપન્નો પુગ્ગલો દુક્ખદસ્સનેન કિં જહતીતિ? ઓળારિકં કામરાગં જહતિ, ઓળારિકં બ્યાપાદં તદેકટ્ઠે ચ કિલેસે એકદેસે જહતીતિ. એકદેસં સકદાગામી, એકદેસં ન સકદાગામી, એકદેસં સકદાગામિફલપ્પત્તો [સકદાગામિફલં પત્તો (?)] પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતીતિ? ન હેવં વત્તબ્બે…પે….

સમુદયદસ્સનેન કિં જહતીતિ? ઓળારિકં કામરાગં જહતિ, ઓળારિકં બ્યાપાદં તદેકટ્ઠે ચ કિલેસે એકદેસે જહતીતિ. એકદેસં સકદાગામી, એકદેસં ન સકદાગામી, એકદેસં સકદાગામિફલપ્પત્તો પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતીતિ? ન હેવં વત્તબ્બે…પે….

નિરોધદસ્સનેન કિં જહતીતિ? ઓળારિકં બ્યાપાદં જહતિ, તદેકટ્ઠે ચ કિલેસે એકદેસે જહતીતિ. એકદેસં સકદાગામી, એકદેસં ન સકદાગામી, એકદેસં સકદાગામિફલપ્પત્તો પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતીતિ? ન હેવં વત્તબ્બે…પે….

મગ્ગદસ્સનેન કિં જહતીતિ? ઓળારિકં બ્યાપાદં જહતિ, તદેકટ્ઠે ચ કિલેસે જહતીતિ. એકદેસં સકદાગામી, એકદેસં ન સકદાગામી, એકદેસં સકદાગામિફલપ્પત્તો પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતીતિ? ન હેવં વત્તબ્બે…પે….

૨૭૬. અનાગામિફલસચ્છિકિરિયાય પટિપન્નો પુગ્ગલો દુક્ખદસ્સનેન કિં જહતીતિ? અણુસહગતં કામરાગં જહતિ, અણુસહગતં બ્યાપાદં તદેકટ્ઠે ચ કિલેસે એકદેસે જહતીતિ. એકદેસં અનાગામી, એકદેસં ન અનાગામી, એકદેસં અનાગામિફલપ્પત્તો [અનાગામિફલં પત્તો (?)] પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતિ, એકદેસં અન્તરાપરિનિબ્બાયી, ઉપહચ્ચપરિનિબ્બાયી, અસઙ્ખારપરિનિબ્બાયી, સસઙ્ખારપરિનિબ્બાયી, ઉદ્ધંસોતો અકનિટ્ઠગામી, એકદેસં ન ઉદ્ધંસોતો અકનિટ્ઠગામીતિ? ન હેવં વત્તબ્બે…પે….

સમુદયદસ્સનેન કિં જહતીતિ? અણુસહગતં કામરાગં જહતિ, અણુસહગતં બ્યાપાદં તદેકટ્ઠે ચ કિલેસે એકદેસે જહતીતિ. એકદેસં અનાગામી, એકદેસં ન અનાગામી…પે… એકદેસં ઉદ્ધંસોતો અકનિટ્ઠગામી, એકદેસં ન ઉદ્ધંસોતો અકનિટ્ઠગામીતિ? ન હેવં વત્તબ્બે…પે….

નિરોધદસ્સનેન કિં જહતીતિ? અણુસહગતં બ્યાપાદં જહતિ, તદેકટ્ઠે ચ કિલેસે એકદેસે જહતીતિ. એકદેસં અનાગામી, એકદેસં ન અનાગામી…પે… એકદેસં ઉદ્ધંસોતો અકનિટ્ઠગામી, એકદેસં ન ઉદ્ધંસોતો અકનિટ્ઠગામીતિ? ન હેવં વત્તબ્બે…પે….

મગ્ગદસ્સનેન કિં જહતીતિ? તદેકટ્ઠે ચ કિલેસે જહતીતિ. એકદેસં અનાગામી, એકદેસં ન અનાગામી, એકદેસં અનાગામિફલપ્પત્તો પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતિ, એકદેસં અન્તરાપરિનિબ્બાયી, ઉપહચ્ચપરિનિબ્બાયી, અસઙ્ખારપરિનિબ્બાયી, સસઙ્ખારપરિનિબ્બાયી, ઉદ્ધંસોતો અકનિટ્ઠગામી, એકદેસં ન ઉદ્ધંસોતો અકનિટ્ઠગામીતિ? ન હેવં વત્તબ્બે…પે….

૨૭૭. અરહત્તસચ્છિકિરિયાય પટિપન્નો પુગ્ગલો દુક્ખદસ્સનેન કિં જહતીતિ? રૂપરાગં અરૂપરાગં માનં ઉદ્ધચ્ચં અવિજ્જં તદેકટ્ઠે ચ કિલેસે એકદેસે જહતીતિ. એકદેસં અરહા, એકદેસં ન અરહા, એકદેસં અરહત્તપ્પત્તો [અરહત્તં પત્તો (?)] પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતિ, એકદેસં વીતરાગો વીતદોસો વીતમોહો કતકરણીયો ઓહિતભારો અનુપ્પત્તસદત્થો પરિક્ખીણભવસંયોજનો સમ્મદઞ્ઞાવિમુત્તો ઉક્ખિત્તપલિઘો સઙ્કિણ્ણપરિખો અબ્બૂળ્હેસિકો નિરગ્ગળો અરિયો પન્નદ્ધજો પન્નભારો વિસઞ્ઞુત્તો સુવિજિતવિજયો, દુક્ખં તસ્સ પરિઞ્ઞાતં, સમુદયો પહીનો, નિરોધો સચ્છિકતો, મગ્ગો ભાવિતો, અભિઞ્ઞેય્યં અભિઞ્ઞાતં, પરિઞ્ઞેય્યં પરિઞ્ઞાતં, પહાતબ્બં પહીનં, ભાવેતબ્બં ભાવિતં, સચ્છિકાતબ્બં સચ્છિકતં, (એકદેસં સચ્છિકાતબ્બં સચ્છિકતં,) [( ) (?)] એકદેસં સચ્છિકાતબ્બં ન સચ્છિકતન્તિ? ન હેવં વત્તબ્બે…પે….

સમુદયદસ્સનેન કિં જહતીતિ? રૂપરાગં અરૂપરાગં જહતિ, માનં ઉદ્ધચ્ચં અવિજ્જં તદેકટ્ઠે ચ કિલેસે એકદેસે જહતીતિ. એકદેસં અરહા, એકદેસં ન અરહા…પે… એકદેસં સચ્છિકાતબ્બં સચ્છિકતં, એકદેસં સચ્છિકાતબ્બં ન સચ્છિકતન્તિ? ન હેવં વત્તબ્બે…પે….

નિરોધદસ્સનેન કિં જહતીતિ? માનં જહતિ, ઉદ્ધચ્ચં અવિજ્જં તદેકટ્ઠે ચ કિલેસે એકદેસે જહતીતિ. એકદેસં અરહા, એકદેસં ન અરહા …પે… એકદેસં સચ્છિકાતબ્બં સચ્છિકતં, એકદેસં સચ્છિકાતબ્બં ન સચ્છિકતન્તિ? ન હેવં વત્તબ્બે…પે….

મગ્ગદસ્સનેન કિં જહતીતિ? ઉદ્ધચ્ચં અવિજ્જં તદેકટ્ઠે ચ કિલેસે જહતીતિ. એકદેસં અરહા, એકદેસં ન અરહા, એકદેસં અરહત્તપ્પત્તો પટિલદ્ધો અધિગતો સચ્છિકતો ઉપસમ્પજ્જ વિહરતિ, કાયેન ફુસિત્વા વિહરતિ, એકદેસં ન કાયેન ફુસિત્વા વિહરતિ, એકદેસં વીતરાગો વીતદોસો વીતમોહો કતકરણીયો ઓહિતભારો અનુપ્પત્તસદત્થો પરિક્ખીણભવસંયોજનો સમ્મદઞ્ઞાવિમુત્તો ઉક્ખિત્તપલિઘો સઙ્કિણ્ણપરિખો અબ્બૂળ્હેસિકો નિરગ્ગળો અરિયો પન્નદ્ધજો પન્નભારો વિસઞ્ઞુત્તો સુવિજિતવિજયો, દુક્ખં તસ્સ પરિઞ્ઞાતં, સમુદયો પહીનો, નિરોધો સચ્છિકતો, મગ્ગો ભાવિતો, અભિઞ્ઞેય્યં અભિઞ્ઞાતં, પરિઞ્ઞેય્યં પરિઞ્ઞાતં, પહાતબ્બં પહીનં, ભાવેતબ્બં ભાવિતં, સચ્છિકાતબ્બં સચ્છિકતં, એકદેસં સચ્છિકાતબ્બં સચ્છિકતં, એકદેસં સચ્છિકાતબ્બં ન સચ્છિકતન્તિ? ન હેવં વત્તબ્બે…પે….

૨૭૮. ન વત્તબ્બં – ‘‘ઓધિસોધિસો કિલેસે જહતી’’તિ? આમન્તા. નનુ વુત્તં ભગવતા –

‘‘અનુપુબ્બેન મેધાવી, થોકં થોકં ખણે ખણે;

કમ્મારો રજતસ્સેવ, નિદ્ધમે મલમત્તનો’’તિ [ધ. પ. ૨૩૯ ધમ્મપદે].

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ઓધિસોધિસો કિલેસે જહતી’’તિ.

ઓધિસોધિસો કિલેસે જહતીતિ? આમન્તા. નનુ વુત્તં ભગવતા –

‘‘સહાવસ્સ દસ્સનસમ્પદાય,

તયસ્સુ ધમ્મા જહિતા ભવન્તિ;

સક્કાયદિટ્ઠી વિચિકિચ્છિતઞ્ચ,

સીલબ્બતં વાપિ યદત્થિ કિઞ્ચિ;

ચતૂહપાયેહિ ચ વિપ્પમુત્તો,

છચ્ચાભિઠાનાનિ અભબ્બ [અભબ્બો (સી. સ્યા.)] કાતુ’’ન્તિ [ખુ. પા. ૬.૧૦; સુ. નિ. ૨૩૩].

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ઓધિસોધિસો કિલેસે જહતી’’તિ.

ઓધિસોધિસો કિલેસે જહતીતિ? આમન્તા. નનુ વુત્તં ભગવતા – ‘‘યસ્મિં, ભિક્ખવે, સમયે અરિયસાવકસ્સ વિરજં વીતમલં ધમ્મચક્ખું ઉદપાદિ – ‘યં કિઞ્ચિ સમુદયધમ્મં, સબ્બં તં નિરોધધમ્મ’ન્તિ, સહ દસ્સનુપ્પાદા, ભિક્ખવે, અરિયસાવકસ્સ તીણિ સંયોજનાનિ પહીયન્તિ – સક્કાયદિટ્ઠિ વિચિકિચ્છા સીલબ્બતપરામાસો’’તિ [અઙ્ગુત્તરનિકાયે]. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ઓધિસોધિસો કિલેસે જહતી’’તિ.

ઓધિસોકથા નિટ્ઠિતા.