૪. જહતિકથા

૧. નસુત્તાહરણકથા

૨૭૯. જહતિ પુથુજ્જનો કામરાગબ્યાપાદન્તિ? આમન્તા. અચ્ચન્તં જહતિ, અનવસેસં જહતિ, અપ્પટિસન્ધિયં જહતિ, સમૂલં જહતિ, સતણ્હં જહતિ, સાનુસયં જહતિ, અરિયેન ઞાણેન જહતિ, અરિયેન મગ્ગેન જહતિ, અકુપ્પં પટિવિજ્ઝન્તો જહતિ, અનાગામિફલં સચ્છિકરોન્તો જહતીતિ? ન હેવં વત્તબ્બે…પે….

વિક્ખમ્ભેતિ પુથુજ્જનો કામરાગબ્યાપાદન્તિ? આમન્તા. અચ્ચન્તં વિક્ખમ્ભેતિ, અનવસેસં વિક્ખમ્ભેતિ, અપ્પટિસન્ધિયં વિક્ખમ્ભેતિ, સમૂલં વિક્ખમ્ભેતિ, સતણ્હં વિક્ખમ્ભેતિ, સાનુસયં વિક્ખમ્ભેતિ, અરિયેન ઞાણેન વિક્ખમ્ભેતિ, અરિયેન મગ્ગેન વિક્ખમ્ભેતિ, અકુપ્પં પટિવિજ્ઝન્તો વિક્ખમ્ભેતિ, અનાગામિફલં સચ્છિકરોન્તો વિક્ખમ્ભેતીતિ? ન હેવં વત્તબ્બે…પે….

જહતિ અનાગામિફલસચ્છિકિરિયાય પટિપન્નો પુગ્ગલો કામરાગબ્યાપાદં, સો ચ અચ્ચન્તં જહતિ, અનવસેસં જહતિ…પે… અનાગામિફલં સચ્છિકરોન્તો જહતીતિ? આમન્તા. જહતિ પુથુજ્જનો કામરાગબ્યાપાદં, સો ચ અચ્ચન્તં જહતિ, અનવસેસં જહતિ…પે… અનાગામિફલં સચ્છિકરોન્તો જહતીતિ? ન હેવં વત્તબ્બે…પે….

વિક્ખમ્ભેતિ અનાગામિફલસચ્છિકિરિયાય પટિપન્નો પુગ્ગલો કામરાગબ્યાપાદં, સો ચ અચ્ચન્તં વિક્ખમ્ભેતિ, અનવસેસં વિક્ખમ્ભેતિ…પે… અનાગામિફલં સચ્છિકરોન્તો વિક્ખમ્ભેતીતિ? આમન્તા. વિક્ખમ્ભેતિ પુથુજ્જનો કામરાગબ્યાપાદં, સો ચ અચ્ચન્તં વિક્ખમ્ભેતિ, અનવસેસં વિક્ખમ્ભેતિ …પે… અનાગામિફલં સચ્છિકરોન્તો વિક્ખમ્ભેતીતિ? ન હેવં વત્તબ્બે…પે….

જહતિ પુથુજ્જનો કામરાગબ્યાપાદં, સો ચ ન અચ્ચન્તં જહતિ, ન અનવસેસં જહતિ…પે… ન અનાગામિફલં સચ્છિકરોન્તો જહતીતિ? આમન્તા. જહતિ અનાગામિફલસચ્છિકિરિયાય પટિપન્નો પુગ્ગલો કામરાગબ્યાપાદં, સો ચ ન અચ્ચન્તં જહતિ…પે… ન અનાગામિફલં સચ્છિકરોન્તો જહતીતિ? ન હેવં વત્તબ્બે…પે….

વિક્ખમ્ભેતિ પુથુજ્જનો કામરાગબ્યાપાદં, સો ચ ન અચ્ચન્તં વિક્ખમ્ભેતિ, ન અનવસેસં વિક્ખમ્ભેતિ…પે… ન અનાગામિફલં સચ્છિકરોન્તો વિક્ખમ્ભેતીતિ? આમન્તા. વિક્ખમ્ભેતિ અનાગામિફલસચ્છિકિરિયાય પટિપન્નો પુગ્ગલો કામરાગબ્યાપાદં, સો ચ ન અચ્ચન્તં વિક્ખમ્ભેતિ, ન અનવસેસં વિક્ખમ્ભેતિ…પે… ન અનાગામિફલં સચ્છિકરોન્તો વિક્ખમ્ભેતીતિ? ન હેવં વત્તબ્બે…પે….

જહતિ પુથુજ્જનો કામરાગબ્યાપાદન્તિ? આમન્તા. કતમેન મગ્ગેનાતિ? રૂપાવચરેન મગ્ગેનાતિ. રૂપાવચરો મગ્ગો નિય્યાનિકો ખયગામી બોધગામી અપચયગામી અનાસવો અસંયોજનિયો અગન્થનિયો અનોઘનિયો અયોગનિયો અનીવરણિયો અપરામટ્ઠો અનુપાદાનિયો અસંકિલેસિયોતિ? ન હેવં વત્તબ્બે. નનુ રૂપાવચરો મગ્ગો અનિય્યાનિકો ન ખયગામી ન બોધગામી ન અપચયગામી સાસવો સંયોજનિયો…પે… સંકિલેસિયોતિ? આમન્તા. હઞ્ચિ રૂપાવચરો મગ્ગો અનિય્યાનિકો ન ખયગામી…પે… સંકિલેસિયો, નો ચ વત રે વત્તબ્બે – ‘‘જહતિ પુથુજ્જનો રૂપાવચરેન મગ્ગેન કામરાગબ્યાપાદ’’ન્તિ.

જહતિ અનાગામિફલસચ્છિકિરિયાય પટિપન્નો પુગ્ગલો અનાગામિમગ્ગેન કામરાગબ્યાપાદં, સો ચ મગ્ગો નિય્યાનિકો ખયગામી બોધગામી અપચયગામી અનાસવો…પે… અસંકિલેસિયોતિ? આમન્તા. જહતિ પુથુજ્જનો રૂપાવચરેન મગ્ગેન કામરાગબ્યાપાદં, સો ચ મગ્ગો નિય્યાનિકો ખયગામી બોધગામી અપચયગામી અનાસવો…પે… અસંકિલેસિયોતિ? ન હેવં વત્તબ્બે…પે….

જહતિ પુથુજ્જનો રૂપાવચરેન મગ્ગેન કામરાગબ્યાપાદં, સો ચ મગ્ગો અનિય્યાનિકો ન ખયગામી ન બોધગામી ન અપચયગામી સાસવો…પે… સંકિલેસિયોતિ? આમન્તા. જહતિ અનાગામિફલસચ્છિકિરિયાય પટિપન્નો પુગ્ગલો અનાગામિમગ્ગેન કામરાગબ્યાપાદં, સો ચ મગ્ગો અનિય્યાનિકો ન ખયગામી ન બોધગામી ન અપચયગામી સાસવો…પે… સંકિલેસિયોતિ? ન હેવં વત્તબ્બે…પે….

૨૮૦. પુથુજ્જનો કામેસુ વીતરાગો સહ ધમ્માભિસમયા અનાગામિફલે સણ્ઠાતીતિ? આમન્તા. અરહત્તે સણ્ઠાતીતિ? ન હેવં વત્તબ્બે…પે….

પુથુજ્જનો કામેસુ વીતરાગો સહ ધમ્માભિસમયા અનાગામિફલે સણ્ઠાતીતિ? આમન્તા. અપુબ્બં અચરિમં તયો મગ્ગે ભાવેતીતિ? ન હેવં વત્તબ્બે…પે….

અપુબ્બં અચરિમં તયો મગ્ગે ભાવેતીતિ? આમન્તા. અપુબ્બં અચરિમં તીણિ સામઞ્ઞફલાનિ સચ્છિકરોતીતિ? ન હેવં વત્તબ્બે…પે….

અપુબ્બં અચરિમં તીણિ સામઞ્ઞફલાનિ સચ્છિકરોતીતિ? આમન્તા. તિણ્ણં ફસ્સાનં તિસ્સન્નં વેદનાનં તિસ્સન્નં સઞ્ઞાનં તિસ્સન્નં ચેતનાનં તિણ્ણં ચિત્તાનં તિસ્સન્નં સદ્ધાનં તિણ્ણં વીરિયાનં તિસ્સન્નં સતીનં તિણ્ણં સમાધીનં તિસ્સન્નં પઞ્ઞાનં સમોધાનં હોતીતિ? ન હેવં વત્તબ્બે…પે….

પુથુજ્જનો કામેસુ વીતરાગો સહ ધમ્માભિસમયા અનાગામિફલે સણ્ઠાતીતિ? આમન્તા. સોતાપત્તિમગ્ગેનાતિ? ન હેવં વત્તબ્બે…પે….

સકદાગામિમગ્ગેનાતિ? ન હેવં વત્તબ્બે. કતમેન મગ્ગેનાતિ? અનાગામિમગ્ગેનાતિ. અનાગામિમગ્ગેન સક્કાયદિટ્ઠિં વિચિકિચ્છં સીલબ્બતપરામાસં જહતીતિ? ન હેવં વત્તબ્બે…પે….

૨. સુત્તાહરણકથા

૨૮૧. અનાગામિમગ્ગેન સક્કાયદિટ્ઠિં વિચિકિચ્છં સીલબ્બતપરામાસં જહતીતિ? આમન્તા. નનુ તિણ્ણં સંયોજનાનં પહાના સોતાપત્તિફલં વુત્તં ભગવતાતિ? આમન્તા. હઞ્ચિ તિણ્ણં સંયોજનાનં પહાના સોતાપત્તિફલં વુત્તં ભગવતા, નો ચ વત રે વત્તબ્બે – ‘‘અનાગામિમગ્ગેન સક્કાયદિટ્ઠિં વિચિકિચ્છં સીલબ્બતપરામાસં જહતી’’તિ. અનાગામિમગ્ગેન ઓળારિકં કામરાગં ઓળારિકં બ્યાપાદં જહતીતિ? ન હેવં વત્તબ્બે…પે….

અનાગામિમગ્ગેન ઓળારિકં કામરાગં ઓળારિકં બ્યાપાદં જહતીતિ? આમન્તા. નનુ કામરાગબ્યાપાદાનં તનુભાવા સકદાગામિફલં વુત્તં ભગવતાતિ? આમન્તા. હઞ્ચિ કામરાગબ્યાપાદાનં તનુભાવા સકદાગામિફલં વુત્તં ભગવતા, નો ચ વત રે વત્તબ્બે – ‘‘અનાગામિમગ્ગેન ઓળારિકં કામરાગં ઓળારિકં બ્યાપાદં જહતી’’તિ.

પુથુજ્જનો કામેસુ વીતરાગો સહ ધમ્માભિસમયા અનાગામિફલે સણ્ઠાતીતિ? આમન્તા. યે કેચિ ધમ્મં અભિસમેન્તિ, સબ્બે તે સહ ધમ્માભિસમયા અનાગામિફલે સણ્ઠહન્તીતિ? ન હેવં વત્તબ્બે…પે….

ન વત્તબ્બં – ‘‘જહતિ પુથુજ્જનો કામરાગબ્યાપાદ’’ન્તિ? આમન્તા. નનુ વુત્તં ભગવતા –

‘‘અહેસું તે [અહિંસકા (અ. નિ. ૬.૫૪)] અતીતંસે, છ સત્થારો યસસ્સિનો;

નિરામગન્ધા કરુણેધિમુત્તા [કરુણાધિમુત્તા (સી. ક.)], કામસંયોજનાતિગા.

‘‘કામરાગં વિરાજેત્વા, બ્રહ્મલોકૂપગા અહુ;

અહેસું સાવકા તેસં, અનેકાનિ સતાનિપિ.

‘‘નિરામગન્ધા કરુણેધિમુત્તા, કામસંયોજનાતિગા;

કામરાગં વિરાજેત્વા, બ્રહ્મલોકૂપગા અહૂ’’તિ [અ. નિ. ૬.૫૪].

અત્થેવ સુત્તન્તોતિ? આમન્તા. તેન હિ જહતિ પુથુજ્જનો કામરાગબ્યાપાદન્તિ.

જહતિ પુથુજ્જનો કામરાગબ્યાપાદન્તિ? આમન્તા. નનુ વુત્તં ભગવતા – ‘‘સો હિ નામ, ભિક્ખવે, સુનેત્તો સત્થા એવં દીઘાયુકો સમાનો એવં ચિરટ્ઠિતિકો અપરિમુત્તો અહોસિ જાતિયા જરાય મરણેન સોકેહિ પરિદેવેહિ દુક્ખેહિ દોમનસ્સેહિ ઉપાયાસેહિ અપરિમુત્તો દુક્ખસ્માતિ વદામિ. તં કિસ્સ હેતુ? ચતુન્નં ધમ્માનં અનનુબોધા અપ્પટિવેધા. કતમેસં ચતુન્નં? અરિયસ્સ સીલસ્સ અનનુબોધા અપ્પટિવેધા, અરિયસ્સ સમાધિસ્સ, અરિયાય પઞ્ઞાય, અરિયાય વિમુત્તિયા અનનુબોધા અપ્પટિવેધા. તયિદં, ભિક્ખવે, અરિયં સીલં અનુબુદ્ધં પટિવિદ્ધં, અરિયો સમાધિ અનુબુદ્ધો પટિવિદ્ધો, અરિયા પઞ્ઞા અનુબુદ્ધા પટિવિદ્ધા, અરિયા વિમુત્તિ અનુબુદ્ધા પટિવિદ્ધા, ઉચ્છિન્ના ભવતણ્હા, ખીણા ભવનેત્તિ, નત્થિ દાનિ પુનબ્ભવોતિ.

‘‘સીલં સમાધિ પઞ્ઞા ચ, વિમુત્તિ ચ અનુત્તરા;

અનુબુદ્ધા ઇમે ધમ્મા, ગોતમેન યસસ્સિના.

‘‘ઇતિ બુદ્ધો અભિઞ્ઞાય, ધમ્મમક્ખાસિ ભિક્ખુનં;

દુક્ખસ્સન્તકરો સત્થા, ચક્ખુમા પરિનિબ્બુતો’’તિ [અ. નિ. ૭.૬૬].

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘જહતિ પુથુજ્જનો કામરાગબ્યાપાદ’’ન્તિ.

જહતિકથા નિટ્ઠિતા.