(૧૯૮) ૫. મગ્ગકથા

૮૭૨. પઞ્ચઙ્ગિકો મગ્ગોતિ? આમન્તા. નનુ અટ્ઠઙ્ગિકો મગ્ગો વુત્તો ભગવતા, સેય્યથિદં – સમ્માદિટ્ઠિ…પે… સમ્માસમાધીતિ? આમન્તા. હઞ્ચિ અટ્ઠઙ્ગિકો મગ્ગો વુત્તો ભગવતા, સેય્યથિદં – સમ્માદિટ્ઠિ …પે… સમ્માસમાધિ, નો ચ વત રે વત્તબ્બે – ‘‘પઞ્ચઙ્ગિકો મગ્ગો’’તિ.

પઞ્ચઙ્ગિકો મગ્ગોતિ? આમન્તા. નનુ વુત્તં ભગવતા –

‘‘મગ્ગાનં અટ્ઠઙ્ગિકો સેટ્ઠો, સચ્ચાનં ચતુરો પદા;

વિરાગો સેટ્ઠો ધમ્માનં, દ્વિપદાનઞ્ચ ચક્ખુમા’’તિ [ધ. પ. ૨૭૩ ધમ્મપદે].

અત્થેવ સુત્તન્તોતિ? આમન્તા. તેન હિ અટ્ઠઙ્ગિકો મગ્ગોતિ.

૮૭૩. સમ્માવાચા મગ્ગઙ્ગં, સા ચ ન મગ્ગોતિ? આમન્તા. સમ્માદિટ્ઠિ મગ્ગઙ્ગં, સા ચ ન મગ્ગોતિ? ન હેવં વત્તબ્બે…પે… સમ્માવાચા મગ્ગઙ્ગં, સા ચ ન મગ્ગોતિ? આમન્તા. સમ્માસઙ્કપ્પો…પે… સમ્માવાયામો…પે… સમ્માસતિ…પે… સમ્માસમાધિ મગ્ગઙ્ગં, સો ચ ન મગ્ગોતિ? ન હેવં વત્તબ્બે…પે….

સમ્માકમ્મન્તો…પે… સમ્માઆજીવો મગ્ગઙ્ગં, સો ચ ન મગ્ગોતિ? આમન્તા. સમ્માદિટ્ઠિ…પે… સમ્માસમાધિ મગ્ગઙ્ગં, સો ચ ન મગ્ગોતિ? ન હેવં વત્તબ્બે…પે….

સમ્માદિટ્ઠિ મગ્ગઙ્ગં, સા ચ મગ્ગોતિ? આમન્તા. સમ્માવાચા મગ્ગઙ્ગં, સા ચ મગ્ગોતિ? ન હેવં વત્તબ્બે…પે… સમ્માદિટ્ઠિ મગ્ગઙ્ગં, સા ચ મગ્ગોતિ? આમન્તા. સમ્માકમ્મન્તો…પે… સમ્માઆજીવો મગ્ગઙ્ગં, સો ચ મગ્ગોતિ? ન હેવં વત્તબ્બે…પે….

સમ્માસઙ્કપ્પો…પે… સમ્માવાયામો…પે… સમ્માસતિ…પે… સમ્માસમાધિ મગ્ગઙ્ગં, સો ચ મગ્ગોતિ? આમન્તા. સમ્માવાચા…પે… સમ્માકમ્મન્તો…પે… સમ્માઆજીવો મગ્ગઙ્ગં, સો ચ મગ્ગોતિ? ન હેવં વત્તબ્બે…પે….

૮૭૪. અરિયો અટ્ઠઙ્ગિકો મગ્ગોતિ? આમન્તા. નનુ વુત્તં ભગવતા – ‘‘પુબ્બેવ ખો પનસ્સ કાયકમ્મં વચીકમ્મં આજીવો સુપરિસુદ્ધો હોતિ; એવમસ્સાયં અરિયો અટ્ઠઙ્ગિકો મગ્ગો ભાવનાપારિપૂરિં ગચ્છતી’’તિ [મ. નિ. ૩.૪૩૧]! અત્થેવ સુત્તન્તોતિ? આમન્તા. તેન હિ પઞ્ચઙ્ગિકો મગ્ગોતિ.

૮૭૫. પઞ્ચઙ્ગિકો મગ્ગોતિ? આમન્તા. નનુ વુત્તં ભગવતા – ‘‘યસ્મિં ખો, સુભદ્દ, ધમ્મવિનયે અરિયો અટ્ઠઙ્ગિકો મગ્ગો ન ઉપલબ્ભતિ, સમણોપિ તત્થ ન ઉપલબ્ભતિ, દુતિયોપિ તત્થ સમણો ન ઉપલબ્ભતિ, તતિયોપિ તત્થ સમણો ન ઉપલબ્ભતિ, ચતુત્થોપિ તત્થ સમણો ન ઉપલબ્ભતિ. યસ્મિઞ્ચ ખો, સુભદ્દ, ધમ્મવિનયે અરિયો અટ્ઠઙ્ગિકો મગ્ગો ઉપલબ્ભતિ, સમણોપિ તત્થ ઉપલબ્ભતિ, દુતિયોપિ…પે… તતિયોપિ…પે… ચતુત્થોપિ તત્થ સમણો ઉપલબ્ભતિ. ઇમસ્મિં ખો, સુભદ્દ, ધમ્મવિનયે અરિયો અટ્ઠઙ્ગિકો મગ્ગો ઉપલબ્ભતિ. ઇધેવ, સુભદ્દ, સમણો, ઇધ દુતિયો સમણો, ઇધ તતિયો સમણો, ઇધ ચતુત્થો સમણો. સુઞ્ઞા પરપ્પવાદા સમણેભિ અઞ્ઞેહી’’તિ [દી. નિ. ૨.૨૧૪]! અત્થેવ સુત્તન્તોતિ? આમન્તા. તેન હિ અટ્ઠઙ્ગિકો મગ્ગોતિ.

મગ્ગકથા નિટ્ઠિતા.