(૧૯૪) ૧. અસઞ્ચિચ્ચકથા

૮૫૭. અસઞ્ચિચ્ચ માતરં જીવિતા વોરોપેત્વા આનન્તરિકો હોતીતિ? આમન્તા. અસઞ્ચિચ્ચ પાણં હન્ત્વા પાણાતિપાતી હોતીતિ? ન હેવં વત્તબ્બે…પે… અસઞ્ચિચ્ચ માતરં જીવિતા વોરોપેત્વા આનન્તરિકો હોતીતિ? આમન્તા. અસઞ્ચિચ્ચ અદિન્નં આદિયિત્વા…પે… મુસા ભણિત્વા મુસાવાદી હોતીતિ? ન હેવં વત્તબ્બે…પે….

અસઞ્ચિચ્ચ પાણં હન્ત્વા પાણાતિપાતી ન હોતીતિ? આમન્તા. અસઞ્ચિચ્ચ માતરં જીવિતા વોરોપેત્વા આનન્તરિકો ન હોતીતિ? ન હેવં વત્તબ્બે…પે… અસઞ્ચિચ્ચ અદિન્નં આદિયિત્વા…પે… મુસા ભણિત્વા મુસાવાદી ન હોતીતિ? આમન્તા. અસઞ્ચિચ્ચ માતરં જીવિતા વોરોપેત્વા આનન્તરિકો ન હોતીતિ? ન હેવં વત્તબ્બે…પે….

૮૫૮. અસઞ્ચિચ્ચ માતરં જીવિતા વોરોપેત્વા આનન્તરિકો હોતીતિ? આમન્તા. ‘‘અસઞ્ચિચ્ચ માતરં જીવિતા વોરોપેત્વા આનન્તરિકો હોતી’’તિ – અત્થેવ સુત્તન્તોતિ? નત્થિ. ‘‘સઞ્ચિચ્ચ માતરં જીવિતા વોરોપેત્વા આનન્તરિકો હોતી’’તિ – અત્થેવ સુત્તન્તોતિ? આમન્તા. હઞ્ચિ ‘‘સઞ્ચિચ્ચ માતરં જીવિતા વોરોપેત્વા આનન્તરિકો હોતી’’તિ – અત્થેવ સુત્તન્તો, નો ચ વત રે વત્તબ્બે – ‘‘અસઞ્ચિચ્ચ માતરં જીવિતા વોરોપેત્વા આનન્તરિકો હોતી’’તિ.

૮૫૯. ન વત્તબ્બં – ‘‘માતુઘાતકો આનન્તરિકો’’તિ? આમન્તા. નનુ માતા જીવિતા વોરોપિતાતિ? આમન્તા. હઞ્ચિ માતા જીવિતા વોરોપિતા, તેન વત રે વત્તબ્બે – ‘‘માતુઘાતકો આનન્તરિકો’’તિ.

ન વત્તબ્બં – ‘‘પિતુઘાતકો આનન્તરિકો’’તિ? આમન્તા. નનુ પિતા જીવિતા વોરોપિતોતિ? આમન્તા. હઞ્ચિ પિતા જીવિતા વોરોપિતો, તેન વત રે વત્તબ્બે – ‘‘પિતુઘાતકો આનન્તરિકો’’તિ.

ન વત્તબ્બં – ‘‘અરહન્તઘાતકો આનન્તરિકો’’તિ? આમન્તા. નનુ અરહા જીવિતા વોરોપિતોતિ? આમન્તા. હઞ્ચિ અરહા જીવિતા વોરોપિતો, તેન વત રે વત્તબ્બે – ‘‘અરહન્તઘાતકો આનન્તરિકો’’તિ.

ન વત્તબ્બં – ‘‘રુહિરુપ્પાદકો આનન્તરિકો’’તિ? આમન્તા. નનુ તથાગતસ્સ લોહિતં ઉપ્પાદિતન્તિ? આમન્તા. હઞ્ચિ તથાગતસ્સ લોહિતં ઉપ્પાદિતં, તેન વત રે વત્તબ્બે – ‘‘રુહિરુપ્પાદકો આનન્તરિકો’’તિ.

૮૬૦. સઙ્ઘભેદકો આનન્તરિકોતિ? આમન્તા. સબ્બે સઙ્ઘભેદકા આનન્તરિકાતિ? ન હેવં વત્તબ્બે…પે… સબ્બે સઙ્ઘભેદકા આનન્તરિકાતિ? આમન્તા. ધમ્મસઞ્ઞી સઙ્ઘભેદકો આનન્તરિકોતિ? ન હેવં વત્તબ્બે…પે….

૮૬૧. ધમ્મસઞ્ઞી સઙ્ઘભેદકો આનન્તરિકોતિ? આમન્તા. નનુ વુત્તં ભગવતા – ‘‘અત્થુપાલિ, સઙ્ઘભેદકો આપાયિકો નેરયિકો કપ્પટ્ઠો અતેકિચ્છો; અત્થુપાલિ, સઙ્ઘભેદકો ન આપાયિકો ન નેરયિકો ન કપ્પટ્ઠો ન અતેકિચ્છો’’તિ! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ધમ્મસઞ્ઞી સઙ્ઘભેદકો આનન્તરિકો’’તિ.

૮૬૨. ન વત્તબ્બં – ‘‘ધમ્મસઞ્ઞી સઙ્ઘભેદકો આનન્તરિકો’’તિ? આમન્તા. નનુ વુત્તં ભગવતા –

‘‘આપાયિકો નેરયિકો, કપ્પટ્ઠો સઙ્ઘભેદકો;

વગ્ગરતો અધમ્મટ્ઠો, યોગક્ખેમા પધંસતિ;

સઙ્ઘં સમગ્ગં ભેત્વાન, કપ્પં નિરયમ્હિ પચ્ચતી’’તિ [ચૂળવ. ૩૫૪; અ. નિ. ૧૦.૩૯; ઇતિવુ. ૧૮].

અત્થેવ સુત્તન્તોતિ? આમન્તા. તેન હિ સઙ્ઘભેદકો આનન્તરિકોતિ.

અસઞ્ચિચ્ચકથા નિટ્ઠિતા.