(૧૮૭) ૨. સુઞ્ઞતાકથા

૮૩૨. સુઞ્ઞતા સઙ્ખારક્ખન્ધપરિયાપન્નાતિ? આમન્તા. અનિમિત્તં સઙ્ખારક્ખન્ધપરિયાપન્નન્તિ? ન હેવં વત્તબ્બે…પે… સુઞ્ઞતા સઙ્ખારક્ખન્ધપરિયાપન્નાતિ? આમન્તા. અપ્પણિહિતો સઙ્ખારક્ખન્ધપરિયાપન્નોતિ? ન હેવં વત્તબ્બે…પે… અનિમિત્તં ન વત્તબ્બં – ‘‘સઙ્ખારક્ખન્ધપરિયાપન્ન’’ન્તિ? આમન્તા. સુઞ્ઞતા ન વત્તબ્બા – ‘‘સઙ્ખારક્ખન્ધપરિયાપન્ના’’તિ? ન હેવં વત્તબ્બે…પે… અપ્પણિહિતો ન વત્તબ્બો – ‘‘સઙ્ખારક્ખન્ધપરિયાપન્નો’’તિ? આમન્તા. સુઞ્ઞતા ન વત્તબ્બા – ‘‘સઙ્ખારક્ખન્ધપરિયાપન્ના’’તિ? ન હેવં વત્તબ્બે…પે….

સુઞ્ઞતા સઙ્ખારક્ખન્ધપરિયાપન્નાતિ? આમન્તા. સઙ્ખારક્ખન્ધો ન અનિચ્ચો ન સઙ્ખતો ન પટિચ્ચસમુપ્પન્નો ન ખયધમ્મો ન વયધમ્મો ન વિરાગધમ્મો ન નિરોધધમ્મો ન વિપરિણામધમ્મોતિ? ન હેવં વત્તબ્બે…પે… નનુ સઙ્ખારક્ખન્ધો અનિચ્ચો સઙ્ખતો પટિચ્ચસમુપ્પન્નો ખયધમ્મો વયધમ્મો વિરાગધમ્મો નિરોધધમ્મો વિપરિણામધમ્મોતિ? આમન્તા. હઞ્ચિ સઙ્ખારક્ખન્ધો અનિચ્ચો…પે… વિપરિણામધમ્મો, નો ચ વત રે વત્તબ્બે – ‘‘સુઞ્ઞતા સઙ્ખારક્ખન્ધપરિયાપન્ના’’તિ.

૮૩૩. રૂપક્ખન્ધસ્સ સુઞ્ઞતા સઙ્ખારક્ખન્ધપરિયાપન્નાતિ? આમન્તા. સઙ્ખારક્ખન્ધસ્સ સુઞ્ઞતા રૂપક્ખન્ધપરિયાપન્નાતિ? ન હેવં વત્તબ્બે…પે… વેદનાક્ખન્ધસ્સ…પે… સઞ્ઞાક્ખન્ધસ્સ… વિઞ્ઞાણક્ખન્ધસ્સ સુઞ્ઞતા સઙ્ખારક્ખન્ધપરિયાપન્નાતિ? આમન્તા. સઙ્ખારક્ખન્ધસ્સ સુઞ્ઞતા વિઞ્ઞાણક્ખન્ધપરિયાપન્નાતિ? ન હેવં વત્તબ્બે…પે….

સઙ્ખારક્ખન્ધસ્સ સુઞ્ઞતા ન વત્તબ્બા – ‘‘રૂપક્ખન્ધપરિયાપન્ના’’તિ? આમન્તા. રૂપક્ખન્ધસ્સ સુઞ્ઞતા ન વત્તબ્બા – ‘‘સઙ્ખારક્ખન્ધપરિયાપન્ના’’તિ? ન હેવં વત્તબ્બે…પે… સઙ્ખારક્ખન્ધસ્સ સુઞ્ઞતા ન વત્તબ્બા – ‘‘વેદનાક્ખન્ધપરિયાપન્ના…પે… સઞ્ઞાક્ખન્ધપરિયાપન્ના… વિઞ્ઞાણક્ખન્ધપરિયાપન્ના’’તિ? આમન્તા. વિઞ્ઞાણક્ખન્ધસ્સ સુઞ્ઞતા ન વત્તબ્બા – ‘‘સઙ્ખારક્ખન્ધપરિયાપન્ના’’તિ? ન હેવં વત્તબ્બે…પે….

૮૩૪. ન વત્તબ્બં – સુઞ્ઞતા સઙ્ખારક્ખન્ધપરિયાપન્ના’’તિ? આમન્તા. નનુ વુત્તં ભગવતા – ‘‘સુઞ્ઞમિદં, ભિક્ખવે, સઙ્ખારા અત્તેન વા અત્તનિયેન વા’’તિ [મ. નિ. ૩.૬૯ આનેઞ્જસપ્પાયે]! અત્થેવ સુત્તન્તોતિ? આમન્તા. તેન હિ સુઞ્ઞતા સઙ્ખારક્ખન્ધપરિયાપન્નાતિ.

સુઞ્ઞતાકથા નિટ્ઠિતા.