(૧૬૪) ૯. રૂપં રૂપાવચરારૂપાવચરન્તિકથા

૭૬૮. અત્થિ રૂપં રૂપાવચરન્તિ? આમન્તા. સમાપત્તેસિયં ઉપપત્તેસિયં દિટ્ઠધમ્મસુખવિહારં, સમાપત્તેસિયેન ચિત્તેન ઉપપત્તેસિયેન ચિત્તેન દિટ્ઠધમ્મસુખવિહારેન ચિત્તેન સહગતં સહજાતં સંસટ્ઠં સમ્પયુત્તં એકુપ્પાદં એકનિરોધં એકવત્થુકં એકારમ્મણન્તિ? ન હેવં વત્તબ્બે…પે… નનુ ન સમાપત્તેસિયં ન ઉપપત્તેસિયં ન દિટ્ઠધમ્મસુખવિહારં, ન સમાપત્તેસિયેન ચિત્તેન ન ઉપપત્તેસિયેન ચિત્તેન ન દિટ્ઠધમ્મસુખવિહારેન ચિત્તેન સહગતં સહજાતં સંસટ્ઠં સમ્પયુત્તં એકુપ્પાદં એકનિરોધં એકવત્થુકં એકારમ્મણન્તિ? આમન્તા. હઞ્ચિ ન સમાપત્તેસિયં ન ઉપપત્તેસિયં ન દિટ્ઠધમ્મસુખવિહારં, ન સમાપત્તેસિયેન ચિત્તેન…પે… એકારમ્મણં, નો ચ વત રે વત્તબ્બે – ‘‘અત્થિ રૂપં રૂપાવચર’’ન્તિ.

૭૬૯. અત્થિ રૂપં અરૂપાવચરન્તિ? આમન્તા. સમાપત્તેસિયં ઉપપત્તેસિયં દિટ્ઠધમ્મસુખવિહારં, સમાપત્તેસિયેન ચિત્તેન ઉપપત્તેસિયેન ચિત્તેન દિટ્ઠધમ્મસુખવિહારેન ચિત્તેન સહગતં સહજાતં સંસટ્ઠં સમ્પયુત્તં એકુપ્પાદં એકનિરોધં એકવત્થુકં એકારમ્મણન્તિ? ન હેવં વત્તબ્બે…પે… નનુ ન સમાપત્તેસિયં ન ઉપપત્તેસિયં ન દિટ્ઠધમ્મસુખવિહારં, ન સમાપત્તેસિયેન ચિત્તેન …પે… એકારમ્મણન્તિ? આમન્તા. હઞ્ચિ ન સમાપત્તેસિયં ન ઉપપત્તેસિયં…પે… એકવત્થુકં એકારમ્મણં, નો ચ વત રે વત્તબ્બે – ‘‘અત્થિ રૂપં અરૂપાવચર’’ન્તિ.

૭૭૦. ન વત્તબ્બં – ‘‘અત્થિ રૂપં રૂપાવચરં, અત્થિ રૂપં અરૂપાવચર’’ન્તિ? આમન્તા. નનુ કામાવચરકમ્મસ્સ કતત્તા રૂપં કામાવચરન્તિ? આમન્તા. હઞ્ચિ કામાવચરકમ્મસ્સ કતત્તા રૂપં કામાવચરં, તેન વત રે વત્તબ્બે – ‘‘રૂપાવચરકમ્મસ્સ કતત્તા રૂપં રૂપાવચરં, અરૂપાવચરકમ્મસ્સ કતત્તા રૂપં અરૂપાવચર’’ન્તિ.

રૂપં રૂપાવચરારૂપાવચરન્તિકથા નિટ્ઠિતા.