૧૫. પન્નરસમવગ્ગો

(૧૪૬) ૨. અઞ્ઞમઞ્ઞપચ્ચયકથા

૭૧૮. અવિજ્જાપચ્ચયાવ સઙ્ખારા, ન વત્તબ્બં – ‘‘સઙ્ખારપચ્ચયાપિ અવિજ્જા’’તિ? આમન્તા. નનુ અવિજ્જા સઙ્ખારેન સહજાતાતિ? આમન્તા. હઞ્ચિ અવિજ્જા સઙ્ખારેન સહજાતા, તેન વત રે વત્તબ્બે – ‘‘અવિજ્જાપચ્ચયાપિ સઙ્ખારા, સઙ્ખારપચ્ચયાપિ અવિજ્જા’’તિ.

તણ્હાપચ્ચયાવ ઉપાદાનં, ન વત્તબ્બં – ‘‘ઉપાદાનપચ્ચયાપિ તણ્હા’’તિ? આમન્તા. નનુ તણ્હા ઉપાદાનેન સહજાતાતિ? આમન્તા. હઞ્ચિ તણ્હા ઉપાદાનેન સહજાતા, તેન વત રે વત્તબ્બે – ‘‘તણ્હાપચ્ચયાપિ ઉપાદાનં, ઉપાદાનપચ્ચયાપિ તણ્હા’’તિ.

૭૧૯. ‘‘જરામરણપચ્ચયા, ભિક્ખવે, જાતિ, જાતિપચ્ચયા ભવો’’તિ – અત્થેવ સુત્તન્તોતિ? નત્થિ. તેન હિ અવિજ્જાપચ્ચયાવ સઙ્ખારા, ન વત્તબ્બં – ‘‘સઙ્ખારપચ્ચયાપિ અવિજ્જા’’તિ. તણ્હાપચ્ચયાવ ઉપાદાનં, ન વત્તબ્બં – ‘‘ઉપાદાનપચ્ચયાપિ તણ્હા’’તિ.

‘‘વિઞ્ઞાણપચ્ચયા, ભિક્ખવે, નામરૂપં, નામરૂપપચ્ચયાપિ વિઞ્ઞાણ’’ન્તિ [દી. નિ. ૨.૫૮, થોકં પન વિસદિસં] – અત્થેવ સુત્તન્તોતિ? આમન્તા. તેન હિ અવિજ્જાપચ્ચયાપિ સઙ્ખારા, સઙ્ખારપચ્ચયાપિ અવિજ્જા; તણ્હાપચ્ચયાપિ ઉપાદાનં, ઉપાદાનપચ્ચયાપિ તણ્હાતિ.

અઞ્ઞમઞ્ઞપચ્ચયકથા નિટ્ઠિતા.