૧૨. દ્વાદસમવગ્ગો

(૧૧૬) ૧. સંવરો કમ્મન્તિકથા

૬૩૦. સંવરો કમ્મન્તિ? આમન્તા. ચક્ખુન્દ્રિયસંવરો ચક્ખુકમ્મન્તિ? ન હેવં વત્તબ્બે…પે… સોતિન્દ્રિયસંવરો…પે… ઘાનિન્દ્રિયસંવરો…પે… જિવ્હિન્દ્રિયસંવરો…પે… કાયિન્દ્રિયસંવરો કાયકમ્મન્તિ? ન હેવં વત્તબ્બે…પે….

કાયિન્દ્રિયસંવરો કાયકમ્મન્તિ? આમન્તા. ચક્ખુન્દ્રિયસંવરો ચક્ખુકમ્મન્તિ? ન હેવં વત્તબ્બે…પે… કાયિન્દ્રિયસંવરો કાયકમ્મન્તિ? આમન્તા. સોતિન્દ્રિયસંવરો…પે… ઘાનિન્દ્રિયસંવરો…પે… જિવ્હિન્દ્રિયસંવરો જિવ્હાકમ્મન્તિ? ન હેવં વત્તબ્બે…પે… મનિન્દ્રિયસંવરો મનોકમ્મન્તિ? ન હેવં વત્તબ્બે…પે….

મનિન્દ્રિયસંવરો મનોકમ્મન્તિ? આમન્તા. ચક્ખુન્દ્રિયસંવરો ચક્ખુકમ્મન્તિ? ન હેવં વત્તબ્બે…પે… મનિન્દ્રિયસંવરો મનોકમ્મન્તિ? આમન્તા. સોતિન્દ્રિયસંવરો …પે… ઘાનિન્દ્રિયસંવરો… જિવ્હિન્દ્રિયસંવરો…પે… કાયિન્દ્રિયસંવરો કાયકમ્મન્તિ? ન હેવં વત્તબ્બે…પે….

૬૩૧. અસંવરો કમ્મન્તિ? આમન્તા. ચક્ખુન્દ્રિયઅસંવરો ચક્ખુકમ્મન્તિ? ન હેવં વત્તબ્બે…પે… સોતિન્દ્રિયઅસંવરો…પે… ઘાનિન્દ્રિયઅસંવરો…પે… જિવ્હિન્દ્રિયઅસંવરો… કાયિન્દ્રિયઅસંવરો કાયકમ્મન્તિ? ન હેવં વત્તબ્બે…પે….

કાયિન્દ્રિયઅસંવરો કાયકમ્મન્તિ? આમન્તા. ચક્ખુન્દ્રિયઅસંવરો ચક્ખુકમ્મન્તિ? ન હેવં વત્તબ્બે…પે… કાયિન્દ્રિયઅસંવરો કાયકમ્મન્તિ? આમન્તા. સોતિન્દ્રિયઅસંવરો…પે… ઘાનિન્દ્રિયઅસંવરો…પે… જિવ્હિન્દ્રિયઅસંવરો જિવ્હાકમ્મન્તિ? ન હેવં વત્તબ્બે…પે… મનિન્દ્રિયઅસંવરો મનોકમ્મન્તિ? ન હેવં વત્તબ્બે…પે….

મનિન્દ્રિયઅસંવરો મનોકમ્મન્તિ? આમન્તા. ચક્ખુન્દ્રિયઅસંવરો ચક્ખુકમ્મન્તિ? ન હેવં વત્તબ્બે…પે… મનિન્દ્રિયઅસંવરો મનોકમ્મન્તિ? આમન્તા. સોતિન્દ્રિયઅસંવરો…પે… ઘાનિન્દ્રિયઅસંવરો…પે… જિવ્હિન્દ્રિયઅસંવરો…પે… કાયિન્દ્રિયઅસંવરો કાયકમ્મન્તિ? ન હેવં વત્તબ્બે…પે….

૬૩૨. ન વત્તબ્બં – ‘‘સંવરોપિ અસંવરોપિ કમ્મ’’ન્તિ? આમન્તા. નનુ વુત્તં ભગવતા – ‘‘ઇધ, ભિક્ખવે, ભિક્ખુ ચક્ખુના રૂપં દિસ્વા નિમિત્તગ્ગાહી હોતિ…પે… ન નિમિત્તગ્ગાહી હોતિ, સોતેન સદ્દં સુત્વા…પે… મનસા ધમ્મં વિઞ્ઞાય નિમિત્તગ્ગાહી હોતિ…પે… ન નિમિત્તગ્ગાહી હોતી’’તિ! અત્થેવ સુત્તન્તોતિ? આમન્તા. તેન હિ સંવરોપિ અસંવરોપિ કમ્મન્તિ.

સંવરો કમ્મન્તિકથા નિટ્ઠિતા.

૧૨. દ્વાદસમવગ્ગો

(૧૧૭) ૨. કમ્મકથા

૬૩૩. સબ્બં કમ્મં સવિપાકન્તિ? આમન્તા. સબ્બા ચેતના સવિપાકાતિ? ન હેવં વત્તબ્બે…પે… સબ્બા ચેતના સવિપાકાતિ? આમન્તા. વિપાકાબ્યાકતા ચેતના સવિપાકાતિ? ન હેવં વત્તબ્બે…પે… સબ્બા ચેતના સવિપાકાતિ? આમન્તા. કિરિયાબ્યાકતા ચેતના સવિપાકાતિ? ન હેવં વત્તબ્બે…પે….

સબ્બા ચેતના સવિપાકાતિ? આમન્તા. કામાવચરા વિપાકાબ્યાકતા ચેતના સવિપાકાતિ? ન હેવં વત્તબ્બે…પે… સબ્બા ચેતના સવિપાકાતિ? આમન્તા. રૂપાવચરા અરૂપાવચરા અપરિયાપન્ના વિપાકાબ્યાકતા ચેતના સવિપાકાતિ? ન હેવં વત્તબ્બે…પે….

સબ્બા ચેતના સવિપાકાતિ? આમન્તા. કામાવચરા કિરિયાબ્યાકતા ચેતના સવિપાકાતિ? ન હેવં વત્તબ્બે…પે… સબ્બા ચેતના સવિપાકાતિ? આમન્તા. રૂપાવચરા અરૂપાવચરા કિરિયાબ્યાકતા ચેતના સવિપાકાતિ? ન હેવં વત્તબ્બે…પે….

૬૩૪. વિપાકાબ્યાકતા ચેતના અવિપાકાતિ? આમન્તા. હઞ્ચિ વિપાકાબ્યાકતા ચેતના અવિપાકા, નો ચ વત રે વત્તબ્બે – ‘‘સબ્બા ચેતના સવિપાકા’’તિ.

કિરિયાબ્યાકતા ચેતના અવિપાકાતિ? આમન્તા. હઞ્ચિ કિરિયાબ્યાકતા ચેતના અવિપાકા, નો ચ વત રે વત્તબ્બે – ‘‘સબ્બા ચેતના સવિપાકા’’તિ.

કામાવચરા રૂપાવચરા અરૂપાવચરા અપરિયાપન્ના વિપાકાબ્યાકતા ચેતના અવિપાકાતિ? આમન્તા. હઞ્ચિ અપરિયાપન્ના વિપાકાબ્યાકતા ચેતના અવિપાકા, નો ચ વત રે વત્તબ્બે – ‘‘સબ્બા ચેતના સવિપાકા’’તિ.

કામાવચરા રૂપાવચરા અરૂપાવચરા કિરિયાબ્યાકતા ચેતના અવિપાકાતિ? આમન્તા. હઞ્ચિ અરૂપાવચરા કિરિયાબ્યાકતા ચેતના અવિપાકા, નો ચ વત રે વત્તબ્બે – ‘‘સબ્બા ચેતના સવિપાકા’’તિ.

૬૩૫. ન વત્તબ્બં – ‘‘સબ્બં કમ્મં સવિપાક’’ન્તિ? આમન્તા. નનુ વુત્તં ભગવતા – ‘‘નાહં, ભિક્ખવે, સઞ્ચેતનિકાનં કમ્માનં કતાનં ઉપચિતાનં અપ્પટિસંવિદિત્વા બ્યન્તિભાવં વદામિ, તઞ્ચ ખો દિટ્ઠેવ ધમ્મે ઉપપજ્જે [ઉપપજ્જં (અ. નિ. ૧૦.૧૭)] વા અપરે વા પરિયાયે’’તિ [અ. નિ. ૧૦.૨૧૭]! અત્થેવ સુત્તન્તોતિ? આમન્તા. તેન હિ સબ્બં કમ્મં સવિપાકન્તિ.

કમ્મકથા નિટ્ઠિતા.

૧૨. દ્વાદસમવગ્ગો

(૧૧૮) ૩. સદ્દો વિપાકોતિકથા

૬૩૬. સદ્દો વિપાકોતિ? આમન્તા. સુખવેદનિયો દુક્ખવેદનિયો અદુક્ખમસુખવેદનિયો, સુખાય વેદનાય સમ્પયુત્તો, દુક્ખાય વેદનાય સમ્પયુત્તો, અદુક્ખમસુખાય વેદનાય સમ્પયુત્તો, ફસ્સેન સમ્પયુત્તો, વેદનાય સમ્પયુત્તો, સઞ્ઞાય સમ્પયુત્તો, ચેતનાય સમ્પયુત્તો, ચિત્તેન સમ્પયુત્તો, સારમ્મણો; અત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધીતિ? ન હેવં વત્તબ્બે…પે… નનુ ન સુખવેદનિયો ન દુક્ખવેદનિયો…પે… અનારમ્મણો, નત્થિ તસ્સ આવટ્ટના…પે… પણિધીતિ? આમન્તા. હઞ્ચિ ન સુખવેદનિયો…પે… અનારમ્મણો, નત્થિ તસ્સ આવટ્ટના…પે… પણિધિ, નો ચ વત રે વત્તબ્બે – ‘‘સદ્દો વિપાકો’’તિ.

ફસ્સો વિપાકો, ફસ્સો સુખવેદનિયો…પે… સારમ્મણો, અત્થિ તસ્સ આવટ્ટના…પે… પણિધીતિ? આમન્તા. સદ્દો વિપાકો, સદ્દો સુખવેદનિયો…પે… સારમ્મણો, અત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….

સદ્દો વિપાકો, સદ્દો ન સુખવેદનિયો…પે… અનારમ્મણો, નત્થિ તસ્સ આવટ્ટના…પે… પણિધીતિ? આમન્તા. ફસ્સો વિપાકો, ફસ્સો ન સુખવેદનિયો, ન દુક્ખવેદનિયો…પે… અનારમ્મણો, નત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….

૬૩૭. ન વત્તબ્બં – ‘‘સદ્દો વિપાકો’’તિ? આમન્તા. નનુ વુત્તં ભગવતા – ‘‘સો તસ્સ કમ્મસ્સ કતત્તા ઉપચિતત્તા ઉસ્સન્નત્તા વિપુલત્તા બ્રહ્મસ્સરો હોતિ કરવિકભાણી’’તિ [દીઘનિકાયે]! અત્થેવ સુત્તન્તોતિ? આમન્તા. તેન હિ સદ્દો વિપાકોતિ.

સદ્દો વિપાકોતિકથા નિટ્ઠિતા.

૧૨. દ્વાદસમવગ્ગો

(૧૧૯) ૪. સળાયતનકથા

૬૩૮. ચક્ખાયતનં વિપાકોતિ? આમન્તા. સુખવેદનિયં દુક્ખવેદનિયં…પે… સારમ્મણં, અત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે… નનુ ન સુખવેદનિયં…પે… અનારમ્મણં, નત્થિ તસ્સ આવટ્ટના…પે… પણિધીતિ? આમન્તા. હઞ્ચિ ન સુખવેદનિયં…પે… અનારમ્મણં, નત્થિ તસ્સ આવટ્ટના…પે… પણિધિ, નો ચ વત રે વત્તબ્બે – ‘‘ચક્ખાયતનં વિપાકો’’તિ…પે….

ફસ્સો વિપાકો, ફસ્સો સુખવેદનિયો…પે… સારમ્મણો, અત્થિ તસ્સ આવટ્ટના…પે… પણિધીતિ? આમન્તા. ચક્ખાયતનં વિપાકો, ચક્ખાયતનં સુખવેદનિયં…પે… સારમ્મણં, અત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….

ચક્ખાયતનં વિપાકો, ચક્ખાયતનં ન સુખવેદનિયં…પે… અનારમ્મણં, નત્થિ તસ્સ આવટ્ટના…પે… પણિધીતિ? આમન્તા. ફસ્સો વિપાકો, ફસ્સો ન સુખવેદનિયો…પે… અનારમ્મણો, નત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….

૬૩૯. સોતાયતનં…પે… ઘાનાયતનં…પે… જિવ્હાયતનં…પે… કાયાયતનં વિપાકોતિ? આમન્તા. સુખવેદનિયં…પે… સારમ્મણં, અત્થિ તસ્સ આવટ્ટના…પે… પણિધીતિ? ન હેવં વત્તબ્બે …પે… નનુ ન સુખવેદનિયં…પે… અનારમ્મણં, નત્થિ તસ્સ આવટ્ટના…પે… પણિધીતિ? આમન્તા. હઞ્ચિ ન સુખવેદનિયં…પે… અનારમ્મણં, નત્થિ તસ્સ આવટ્ટના…પે… પણિધિ, નો ચ વત રે વત્તબ્બે – ‘‘કાયાયતનં વિપાકો’’તિ.

ફસ્સો વિપાકો, ફસ્સો સુખવેદનિયો…પે… સારમ્મણો, અત્થિ તસ્સ આવટ્ટના…પે… પણિધીતિ? આમન્તા. કાયાયતનં વિપાકો, કાયાયતનં સુખવેદનિયં…પે… સારમ્મણં, અત્થિ તસ્સ આવટ્ટના…પે… પણિધીતિ? ન હેવં વત્તબ્બે …પે… કાયાયતનં વિપાકો, કાયાયતનં ન સુખવેદનિયં…પે… અનારમ્મણં, નત્થિ તસ્સ આવટ્ટના…પે… પણિધીતિ? આમન્તા. ફસ્સો વિપાકો, ફસ્સો ન સુખવેદનિયો…પે… અનારમ્મણો, નત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….

૬૪૦. ન વત્તબ્બં – ‘‘સળાયતનં વિપાકો’’તિ? આમન્તા. નનુ સળાયતનં કમ્મસ્સ કતત્તા ઉપ્પન્નન્તિ? આમન્તા. હઞ્ચિ સળાયતનં કમ્મસ્સ કતત્તા ઉપ્પન્નં, તેન વત રે વત્તબ્બે – ‘‘સળાયતનં વિપાકો’’તિ.

સળાયતનકથા નિટ્ઠિતા.

૧૨. દ્વાદસમવગ્ગો

(૧૨૦) ૫. સત્તક્ખત્તુપરમકથા

૬૪૧. સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? આમન્તા. માતા જીવિતા વોરોપિતા… પિતા જીવિતા વોરોપિતો… અરહા જીવિતા વોરોપિતો… દુટ્ઠેન ચિત્તેન તથાગતસ્સ લોહિતં ઉપ્પાદિતં… સઙ્ઘો ભિન્નોતિ? ન હેવં વત્તબ્બે…પે….

સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? આમન્તા. અભબ્બો અન્તરા ધમ્મં અભિસમેતુન્તિ? ન હેવં વત્તબ્બે…પે…. અભબ્બો અન્તરા ધમ્મં અભિસમેતુન્તિ? આમન્તા. માતા જીવિતા વોરોપિતા… પિતા જીવિતા વોરોપિતો… અરહા જીવિતા વોરોપિતો… દુટ્ઠેન ચિત્તેન તથાગતસ્સ લોહિતં ઉપ્પાદિતં… સઙ્ઘો ભિન્નોતિ? ન હેવં વત્તબ્બે…પે….

૬૪૨. સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? આમન્તા. અત્થિ સો નિયમો યેન નિયમેન સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? ન હેવં વત્તબ્બે…પે… અત્થિ તે સતિપટ્ઠાના…પે… સમ્મપ્પધાના… ઇદ્ધિપાદા… ઇન્દ્રિયા… બલા… બોજ્ઝઙ્ગા યેહિ બોજ્ઝઙ્ગેહિ સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? ન હેવં વત્તબ્બે…પે….

૬૪૩. નત્થિ સો નિયમો યેન નિયમેન સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? આમન્તા. હઞ્ચિ નત્થિ સો નિયમો યેન નિયમેન સત્તક્ખત્તુપરમો પુગ્ગલો સત્તક્ખત્તુપરમતાનિયતો, નો ચ વત રે વત્તબ્બે – ‘‘સત્તક્ખત્તુપરમો પુગ્ગલો સત્તક્ખત્તુપરમતાનિયતો’’તિ.

નત્થિ તે સતિપટ્ઠાના… બોજ્ઝઙ્ગા યેહિ બોજ્ઝઙ્ગેહિ સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? આમન્તા. હઞ્ચિ નત્થિ તે બોજ્ઝઙ્ગા યેહિ બોજ્ઝઙ્ગેહિ સત્તક્ખત્તુપરમો પુગ્ગલો સત્તક્ખત્તુપરમતાનિયતો, નો ચ વત રે વત્તબ્બે – ‘‘સત્તક્ખત્તુપરમો પુગ્ગલો સત્તક્ખત્તુપરમતાનિયતો’’તિ.

૬૪૪. સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? આમન્તા. સકદાગામિનિયમેનાતિ? ન હેવં વત્તબ્બે…પે… અનાગામિનિયમેનાતિ? ન હેવં વત્તબ્બે…પે… અરહત્તનિયમેનાતિ? ન હેવં વત્તબ્બે…પે….

કતમેન નિયમેનાતિ? સોતાપત્તિનિયમેનાતિ. સત્તક્ખત્તુપરમો પુગ્ગલો સત્તક્ખત્તુપરમતાનિયતોતિ? આમન્તા. યે કેચિ સોતાપત્તિનિયામં ઓક્કમન્તિ, સબ્બે તે સત્તક્ખત્તુપરમતાનિયતાતિ? ન હેવં વત્તબ્બે…પે….

૬૪૫. ન વત્તબ્બં – ‘‘સત્તક્ખત્તુપરમો પુગ્ગલો સત્તક્ખત્તુપરમતાનિયતો’’તિ? આમન્તા. નનુ સો સત્તક્ખત્તુપરમોતિ? આમન્તા. હઞ્ચિ સો સત્તક્ખત્તુપરમો, તેન વત રે વત્તબ્બે – ‘‘સત્તક્ખત્તુપરમો પુગ્ગલો સત્તક્ખત્તુપરમતાનિયતો’’તિ.

સત્તક્ખત્તુપરમકથા નિટ્ઠિતા.

૧૨. દ્વાદસમવગ્ગો

(૧૨૧) ૬. કોલઙ્કોલકથા

૬૪૬. ન વત્તબ્બં – ‘‘કોલઙ્કોલો પુગ્ગલો કોલઙ્કોલતાનિયતો’’તિ? આમન્તા. નનુ સો કોલઙ્કોલોતિ? આમન્તા. હઞ્ચિ સો કોલઙ્કોલો, તેન વત રે વત્તબ્બે – ‘‘કોલઙ્કોલો પુગ્ગલો કોલઙ્કોલતાનિયતો’’તિ.

કોલઙ્કોલકથા નિટ્ઠિતા.

૧૨. દ્વાદસમવગ્ગો

(૧૨૨) ૭. એકબીજીકથા

૬૪૭. ન વત્તબ્બં – ‘‘એકબીજી પુગ્ગલો એકબીજિતાનિયતો’’તિ? આમન્તા. નનુ સો એકબીજીતિ? આમન્તા. હઞ્ચિ સો એકબીજી, તેન વત રે વત્તબ્બે – ‘‘એકબીજી પુગ્ગલો એકબીજિતાનિયતો’’તિ.

એકબીજીકથા નિટ્ઠિતા.

૧૨. દ્વાદસમવગ્ગો

(૧૨૩) ૮. જીવિતા વોરોપનકથા

૬૪૮. દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યાતિ? આમન્તા. દિટ્ઠિસમ્પન્નો પુગ્ગલો સઞ્ચિચ્ચ માતરં જીવિતા વોરોપેય્ય…પે… પિતરં જીવિતા વોરોપેય્ય …પે… અરહન્તં જીવિતા વોરોપેય્ય…પે… દુટ્ઠેન ચિત્તેન તથાગતસ્સ લોહિતં ઉપ્પાદેય્ય…પે… સઙ્ઘં ભિન્દેય્યાતિ? ન હેવં વત્તબ્બે…પે….

દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યાતિ? આમન્તા. દિટ્ઠિસમ્પન્નો પુગ્ગલો સત્થરિ અગારવોતિ? ન હેવં વત્તબ્બે…પે… ધમ્મે…પે… સઙ્ઘે…પે… સિક્ખાય અગારવોતિ? ન હેવં વત્તબ્બે…પે….

નનુ દિટ્ઠિસમ્પન્નો પુગ્ગલો સત્થરિ સગારવોતિ? આમન્તા. હઞ્ચિ દિટ્ઠિસમ્પન્નો પુગ્ગલો સત્થરિ સગારવો, નો ચ વત રે વત્તબ્બે – ‘‘દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યા’’તિ. નનુ દિટ્ઠિસમ્પન્નો પુગ્ગલો ધમ્મે…પે… સઙ્ઘે…પે… સિક્ખાય સગારવોતિ? આમન્તા. હઞ્ચિ દિટ્ઠિસમ્પન્નો પુગ્ગલો સિક્ખાય સગારવો, નો ચ વત રે વત્તબ્બે – ‘‘દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યા’’તિ.

૬૪૯. દિટ્ઠિસમ્પન્નો પુગ્ગલો સત્થરિ અગારવોતિ? આમન્તા. દિટ્ઠિસમ્પન્નો પુગ્ગલો બુદ્ધથૂપે ઓહદેય્ય ઓમુત્તેય્ય નિટ્ઠુભેય્ય બુદ્ધથૂપે અપબ્યામતો [અસબ્યાકતો (સી. ક.)] કરેય્યાતિ? ન હેવં વત્તબ્બે…પે….

દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યાતિ? આમન્તા. નનુ વુત્તં ભગવતા – ‘‘સેય્યથાપિ, ભિક્ખવે, મહાસમુદ્દો ઠિતધમ્મો વેલં નાતિવત્તતિ; એવમેવ ખો, ભિક્ખવે, યં મયા સાવકાનં સિક્ખાપદં પઞ્ઞત્તં તં મમ સાવકા જીવિતહેતુપિ નાતિક્કમન્તી’’તિ [ચૂળવ. ૩૮૫; અ. નિ. ૮.૨૦; ઉદા. ૪૫]! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્યા’’તિ.

જીવિતા વોરોપનકથા નિટ્ઠિતા.

૧૨. દ્વાદસમવગ્ગો

(૧૨૪) ૯. દુગ્ગતિકથા

૬૫૦. દિટ્ઠિસમ્પન્નસ્સ પુગ્ગલસ્સ પહીના દુગ્ગતીતિ? આમન્તા. દિટ્ઠિસમ્પન્નો પુગ્ગલો આપાયિકે રૂપે રજ્જેય્યાતિ? આમન્તા. હઞ્ચિ દિટ્ઠિસમ્પન્નો પુગ્ગલો આપાયિકે રૂપે રજ્જેય્ય, નો ચ વત રે વત્તબ્બે – ‘‘દિટ્ઠિસમ્પન્નસ્સ પુગ્ગલસ્સ પહીના દુગ્ગતી’’તિ.

દિટ્ઠિસમ્પન્નસ્સ પુગ્ગલસ્સ પહીના દુગ્ગતીતિ? આમન્તા. દિટ્ઠિસમ્પન્નો પુગ્ગલો આપાયિકે સદ્દે…પે… ગન્ધે… રસે… ફોટ્ઠબ્બે…પે… અમનુસ્સિત્થિયા તિરચ્છાનગતિત્થિયા નાગકઞ્ઞાય મેથુનં ધમ્મં પટિસેવેય્ય, અજેળકં પટિગ્ગણ્હેય્ય, કુક્કુટસૂકરં પટિગ્ગણ્હેય્ય, હત્થિગવસ્સવળવં પટિગ્ગણ્હેય્ય… તિત્તિરવટ્ટકમોરકપિઞ્જરં [… કપિઞ્જલં (સ્યા. કં. પી.)] પટિગ્ગણ્હેય્યાતિ? આમન્તા. હઞ્ચિ દિટ્ઠિસમ્પન્નો પુગ્ગલો તિત્તિરવટ્ટકમોરકપિઞ્જરં પટિગ્ગણ્હેય્ય, નો ચ વત રે વત્તબ્બે – ‘‘દિટ્ઠિસમ્પન્નસ્સ પુગ્ગલસ્સ પહીના દુગ્ગતી’’તિ.

૬૫૧. દિટ્ઠિસમ્પન્નસ્સ પુગ્ગલસ્સ પહીના દુગ્ગતિ, દિટ્ઠિસમ્પન્નો પુગ્ગલો આપાયિકે રૂપે રજ્જેય્યાતિ? આમન્તા. અરહતો પહીના દુગ્ગતિ, અરહા આપાયિકે રૂપે રજ્જેય્યાતિ? ન હેવં વત્તબ્બે…પે… દિટ્ઠિસમ્પન્નસ્સ પુગ્ગલસ્સ પહીના દુગ્ગતિ, દિટ્ઠિસમ્પન્નો પુગ્ગલો આપાયિકે સદ્દે… ગન્ધે… રસે… ફોટ્ઠબ્બે…પે… તિત્તિરવટ્ટકમોરકપિઞ્જરં પટિગ્ગણ્હેય્યાતિ? આમન્તા. અરહતો પહીના દુગ્ગતિ, અરહા તિત્તિરવટ્ટકમોરકપિઞ્જરં પટિગ્ગણ્હેય્યાતિ? ન હેવં વત્તબ્બે…પે….

અરહતો પહીના દુગ્ગતિ, ન ચ અરહા આપાયિકે રૂપે રજ્જેય્યાતિ? આમન્તા. દિટ્ઠિસમ્પન્નસ્સ પુગ્ગલસ્સ પહીના દુગ્ગતિ, ન ચ દિટ્ઠિસમ્પન્નો પુગ્ગલો આપાયિકે રૂપે રજ્જેય્યાતિ? ન હેવં વત્તબ્બે…પે… અરહતો પહીના દુગ્ગતિ, ન ચ અરહા આપાયિકે સદ્દે…પે… ગન્ધે…પે… રસે…પે… ફોટ્ઠબ્બે…પે… અમનુસ્સિત્થિયા તિરચ્છાનગતિત્થિયા નાગકઞ્ઞાય મેથુનં ધમ્મં પટિસેવેય્ય, અજેળકં પટિગ્ગણ્હેય્ય, કુક્કુટસૂકરં પટિગ્ગણ્હેય્ય, હત્થિગવસ્સવળવં પટિગ્ગણ્હેય્ય…પે… તિત્તિરવટ્ટકમોરકપિઞ્જરં પટિગ્ગણ્હેય્યાતિ? આમન્તા. દિટ્ઠિસમ્પન્નસ્સ પુગ્ગલસ્સ પહીના દુગ્ગતિ, ન ચ દિટ્ઠિસમ્પન્નો પુગ્ગલો તિત્તિરવટ્ટકમોરકપિઞ્જરં પટિગ્ગણ્હેય્યાતિ? ન હેવં વત્તબ્બે…પે….

૬૫૨. [અટ્ઠકથાનુલોમં પરવાદીપુચ્છાલક્ખણં. તથાપાયં પુચ્છા સકવાદિસ્સ, પુરિમાયો ચ ઇમિસ્સં દુગ્ગતિકથાયં પરવાદિસ્સાતિ ગહેતબ્બા વિય દિસ્સન્તિ] ન વત્તબ્બં – ‘‘દિટ્ઠિસમ્પન્નસ્સ પુગ્ગલસ્સ પહીના દુગ્ગતી’’તિ? આમન્તા. દિટ્ઠિસમ્પન્નો પુગ્ગલો નિરયં ઉપપજ્જેય્ય…પે… તિરચ્છાનયોનિં ઉપપજ્જેય્ય… પેત્તિવિસયં ઉપપજ્જેય્યાતિ? ન હેવં વત્તબ્બે. તેન હિ દિટ્ઠિસમ્પન્નસ્સ પુગ્ગલસ્સ પહીના દુગ્ગતીતિ.

દુગ્ગતિકથા નિટ્ઠિતા.

૧૨. દ્વાદસમવગ્ગો

(૧૨૫) ૧૦. સત્તમભવિકકથા

૬૫૩. ન વત્તબ્બં ‘‘સત્તમભવિકસ્સ પુગ્ગલસ્સ પહીના દુગ્ગતી’’તિ? આમન્તા. સત્તમભવિકો પુગ્ગલો નિરયં ઉપપજ્જેય્ય, તિરચ્છાનયોનિં ઉપપજ્જેય્ય, પેત્તિવિસયં ઉપપજ્જેય્યાતિ? ન હેવં વત્તબ્બે. તેન હિ સત્તમભવિકસ્સ પુગ્ગલસ્સ પહીના દુગ્ગતીતિ.

સત્તમભવિકકથા નિટ્ઠિતા.

દ્વાદસમવગ્ગો.

તસ્સુદ્દાનં –

સંવરો કમ્મં તથેવ અસંવરો, સબ્બકમ્મં સવિપાકં, સદ્દો વિપાકો, સળાયતનં વિપાકો, સત્તક્ખત્તુપરમો પુગ્ગલો સત્તક્ખત્તુપરમતાનિયતો, કોલઙ્કોલપુગ્ગલો કોલઙ્કોલતાનિયતો, એકબીજી પુગ્ગલો એકબીજિતાનિયતો, દિટ્ઠિસમ્પન્નો પુગ્ગલો સઞ્ચિચ્ચ પાણં જીવિતા વોરોપેય્ય, દિટ્ઠિસમ્પન્નસ્સ પુગ્ગલસ્સ પહીના દુગ્ગતિ, તથેવ સત્તમભવિકસ્સાતિ.