૨. પરિહાનિકથા

૧. વાદયુત્તિપરિહાનિ

૨૩૯. પરિહાયતિ અરહા અરહત્તાતિ? આમન્તા. સબ્બત્થ અરહા અરહત્તા પરિહાયતીતિ? ન હેવં વત્તબ્બે…પે… સબ્બત્થ અરહા અરહત્તા પરિહાયતીતિ? આમન્તા. સબ્બત્થ અરહતો પરિહાનીતિ? ન હેવં વત્તબ્બે…પે….

પરિહાયતિ અરહા અરહત્તાતિ? આમન્તા. સબ્બદા અરહા અરહત્તા પરિહાયતીતિ? ન હેવં વત્તબ્બે…પે… સબ્બદા અરહા અરહત્તા પરિહાયતીતિ? આમન્તા. સબ્બદા અરહતો પરિહાનીતિ? ન હેવં વત્તબ્બે…પે….

પરિહાયતિ અરહા અરહત્તાતિ? આમન્તા. સબ્બેવ અરહન્તો અરહત્તા પરિહાયન્તીતિ? ન હેવં વત્તબ્બે…પે… સબ્બેવ અરહન્તો અરહત્તા પરિહાયન્તીતિ? આમન્તા. સબ્બેસંયેવ અરહન્તાનં પરિહાનીતિ? ન હેવં વત્તબ્બે…પે….

પરિહાયતિ અરહા અરહત્તાતિ? આમન્તા. અરહા અરહત્તા પરિહાયમાનો ચતૂહિ ફલેહિ પરિહાયતીતિ? ન હેવં વત્તબ્બે…પે….

ચતૂહિ સતસહસ્સેહિ સેટ્ઠી સેટ્ઠિત્તં કારેન્તો સતસહસ્સે પરિહીને સેટ્ઠિત્તા પરિહીનો હોતીતિ? આમન્તા. સબ્બસાપતેય્યા પરિહીનો હોતીતિ? ન હેવં વત્તબ્બે…પે….

ચતૂહિ સતસહસ્સેહિ સેટ્ઠી સેટ્ઠિત્તં કારેન્તો સતસહસ્સે પરિહીને ભબ્બો સબ્બસાપતેય્યા પરિહાયિતુન્તિ? આમન્તા. અરહા અરહત્તા પરિહાયમાનો ભબ્બો ચતૂહિ ફલેહિ પરિહાયિતુન્તિ? ન હેવં વત્તબ્બે…પે….

૨. અરિયપુગ્ગલસંસન્દનપરિહાનિ

૨૪૦. પરિહાયતિ અરહા અરહત્તાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

પરિહાયતિ અરહા અરહત્તાતિ? આમન્તા. પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

પરિહાયતિ અરહા અરહત્તાતિ? આમન્તા. પરિહાયતિ અનાગામી અનાગામિફલાતિ? ન હેવં વત્તબ્બે…પે….

પરિહાયતિ અનાગામી અનાગામિફલાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

પરિહાયતિ અનાગામી અનાગામિફલાતિ? આમન્તા. પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

પરિહાયતિ સકદાગામી સકદાગામિફલાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

ન પરિહાયતિ સોતાપન્નો સોતાપત્તિફલાતિ? આમન્તા. ન પરિહાયતિ અરહા અરહત્તાતિ? ન હેવં વત્તબ્બે…પે….

ન પરિહાયતિ સકદાગામી સકદાગામિફલાતિ? આમન્તા. ન પરિહાયતિ અરહા અરહત્તાતિ? ન હેવં વત્તબ્બે…પે….

ન પરિહાયતિ અનાગામી અનાગામિફલાતિ? આમન્તા. ન પરિહાયતિ અરહા અરહત્તાતિ? ન હેવં વત્તબ્બે…પે….

ન પરિહાયતિ સોતાપન્નો સોતાપત્તિફલાતિ? આમન્તા. ન પરિહાયતિ અનાગામી અનાગામિફલાતિ? ન હેવં વત્તબ્બે…પે….

ન પરિહાયતિ સકદાગામી સકદાગામિફલાતિ? આમન્તા. ન પરિહાયતિ અનાગામી અનાગામિફલાતિ? ન હેવં વત્તબ્બે…પે….

ન પરિહાયતિ સોતાપન્નો સોતાપત્તિફલાતિ? આમન્તા. ન પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

૨૪૧. પરિહાયતિ અરહા અરહત્તાતિ? આમન્તા. અરહા અરહત્તા પરિહાયમાનો કત્થ સણ્ઠાતીતિ? અનાગામિફલેતિ. અનાગામી અનાગામિફલા પરિહાયમાનો કત્થ સણ્ઠાતીતિ? સકદાગામિફલેતિ. સકદાગામી સકદાગામિફલા પરિહાયમાનો કત્થ સણ્ઠાતીતિ? સોતાપત્તિફલેતિ. સોતાપન્નો સોતાપત્તિફલા પરિહાયમાનો પુથુજ્જનભૂમિયં સણ્ઠાતીતિ? ન હેવં વત્તબ્બે.

આજાનાહિ નિગ્ગહં. હઞ્ચિ અરહા અરહત્તા પરિહાયમાનો અનાગામિફલે સણ્ઠાતિ, અનાગામી અનાગામિફલા પરિહાયમાનો સકદાગામિફલે સણ્ઠાતિ, સકદાગામી સકદાગામિફલા પરિહાયમાનો સોતાપત્તિફલે સણ્ઠાતિ; તેન વત રે વત્તબ્બે – ‘‘સોતાપન્નો સોતાપત્તિફલા પરિહાયમાનો પુથુજ્જનભૂમિયં સણ્ઠાતી’’તિ.

અરહા અરહત્તા પરિહાયમાનો સોતાપત્તિફલે સણ્ઠાતીતિ? આમન્તા. સોતાપત્તિફલસ્સ અનન્તરા અરહત્તંયેવ સચ્છિકરોતીતિ? ન હેવં વત્તબ્બે…પે….

૨૪૨. પરિહાયતિ અરહા અરહત્તાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે… કસ્સ બહુતરા કિલેસા પહીના અરહતો વા સોતાપન્નસ્સ વાતિ? અરહતો. હઞ્ચિ અરહતો બહુતરા કિલેસા પહીના, પરિહાયતિ અરહા અરહત્તા; તેન વત રે વત્તબ્બે – ‘‘પરિહાયતિ સોતાપન્નો સોતાપત્તિફલા’’તિ.

પરિહાયતિ અરહા અરહત્તાતિ? આમન્તા. પરિહાયતિ સકદાગામી સકદાગામિફલાતિ? ન હેવં વત્તબ્બે…પે… કસ્સ બહુતરા કિલેસા પહીના અરહતો વા સકદાગામિસ્સ વાતિ? અરહતો. હઞ્ચિ અરહતો બહુતરા કિલેસા પહીના, પરિહાયતિ અરહા અરહત્તા; તેન વત રે વત્તબ્બે – ‘‘પરિહાયતિ સકદાગામી સકદાગામિફલા’’તિ.

પરિહાયતિ અરહા અરહત્તાતિ? આમન્તા. પરિહાયતિ અનાગામી અનાગામિફલાતિ? ન હેવં વત્તબ્બે…પે… કસ્સ બહુતરા કિલેસા પહીના અરહતો વા અનાગામિસ્સ વાતિ? અરહતો. હઞ્ચિ અરહતો બહુતરા કિલેસા પહીના, પરિહાયતિ અરહા અરહત્તા; તેન વત રે વત્તબ્બે – ‘‘પરિહાયતિ અનાગામી અનાગામિફલા’’તિ.

પરિહાયતિ અનાગામી અનાગામિફલાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે… કસ્સ બહુતરા કિલેસા પહીના અનાગામિસ્સ વા સોતાપન્નસ્સ વાતિ? અનાગામિસ્સ. હઞ્ચિ અનાગામિસ્સ બહુતરા કિલેસા પહીના, પરિહાયતિ અનાગામી અનાગામિફલા; તેન વત રે વત્તબ્બે – ‘‘પરિહાયતિ સોતાપન્નો સોતાપત્તિફલા’’તિ.

૨૪૩. પરિહાયતિ અનાગામી અનાગામિફલાતિ? આમન્તા. પરિહાયતિ સકદાગામી સકદાગામિફલાતિ? ન હેવં વત્તબ્બે…પે… કસ્સ બહુતરા કિલેસા પહીના અનાગામિસ્સ વા સકદાગામિસ્સ વાતિ? અનાગામિસ્સ. હઞ્ચિ અનાગામિસ્સ બહુતરા કિલેસા પહીના, પરિહાયતિ અનાગામી અનાગામિફલા; તેન વત રે વત્તબ્બે – ‘‘પરિહાયતિ સકદાગામી સકદાગામિફલા’’તિ.

પરિહાયતિ સકદાગામી સકદાગામિફલાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે… કસ્સ બહુતરા કિલેસા પહીના સકદાગામિસ્સ વા સોતાપન્નસ્સ વાતિ? સકદાગામિસ્સ. હઞ્ચિ સકદાગામિસ્સ બહુતરા કિલેસા પહીના, પરિહાયતિ સકદાગામી સકદાગામિફલા; તેન વત રે વત્તબ્બે – ‘‘પરિહાયતિ સોતાપન્નો સોતાપત્તિફલા’’તિ.

૨૪૪. પરિહાયતિ અરહા અરહત્તાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે… કસ્સ અધિમત્તા મગ્ગભાવના અરહતો વા સોતાપન્નસ્સ વાતિ? અરહતો. હઞ્ચિ અરહતો અધિમત્તા મગ્ગભાવના, પરિહાયતિ અરહા અરહત્તા; તેન વત રે વત્તબ્બે – ‘‘પરિહાયતિ સોતાપન્નો સોતાપત્તિફલા’’તિ.

પરિહાયતિ અરહા અરહત્તાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે… કસ્સ અધિમત્તા સતિપટ્ઠાનભાવના…પે… સમ્મપ્પધાનભાવના… ઇદ્ધિપાદભાવના… ઇન્દ્રિયભાવના … બલભાવના… બોજ્ઝઙ્ગભાવના અરહતો વા સોતાપન્નસ્સ વાતિ? અરહતો. હઞ્ચિ અરહતો અધિમત્તા બોજ્ઝઙ્ગભાવના, પરિહાયતિ અરહા અરહત્તા; તેન વત રે વત્તબ્બે – ‘‘પરિહાયતિ સોતાપન્નો સોતાપત્તિફલા’’તિ.

પરિહાયતિ અરહા અરહત્તાતિ? આમન્તા. પરિહાયતિ સકદાગામી સકદાગામિફલાતિ? ન હેવં વત્તબ્બે…પે… કસ્સ અધિમત્તા મગ્ગભાવના…પે… બોજ્ઝઙ્ગભાવના અરહતો વા સકદાગામિસ્સ વાતિ? અરહતો. હઞ્ચિ અરહતો અધિમત્તા બોજ્ઝઙ્ગભાવના, પરિહાયતિ અરહા અરહત્તા; તેન વત રે વત્તબ્બે – ‘‘પરિહાયતિ સકદાગામી સકદાગામિફલા’’તિ.

પરિહાયતિ અરહા અરહત્તાતિ? આમન્તા. પરિહાયતિ અનાગામી અનાગામિફલાતિ? ન હેવં વત્તબ્બે…પે… કસ્સ અધિમત્તા મગ્ગભાવના…પે… બોજ્ઝઙ્ગભાવના અરહતો વા અનાગામિસ્સ વાતિ? અરહતો. હઞ્ચિ અરહતો અધિમત્તા બોજ્ઝઙ્ગભાવના, પરિહાયતિ અરહા અરહત્તા; તેન વત રે વત્તબ્બે – ‘‘પરિહાયતિ અનાગામી અનાગામિફલા’’તિ.

૨૪૫. પરિહાયતિ અનાગામી અનાગામિફલાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે… કસ્સ અધિમત્તા મગ્ગભાવના…પે… બોજ્ઝઙ્ગભાવના અનાગામિસ્સ વા સોતાપન્નસ્સ વાતિ? અનાગામિસ્સ. હઞ્ચિ અનાગામિસ્સ અધિમત્તા બોજ્ઝઙ્ગભાવના, પરિહાયતિ અનાગામી અનાગામિફલા; તેન વત રે વત્તબ્બે – ‘‘પરિહાયતિ સોતાપન્નો સોતાપત્તિફલા’’તિ.

પરિહાયતિ અનાગામી અનાગામિફલાતિ? આમન્તા. પરિહાયતિ સકદાગામી સકદાગામિફલાતિ? ન હેવં વત્તબ્બે…પે… કસ્સ અધિમત્તા મગ્ગભાવના…પે… બોજ્ઝઙ્ગભાવના અનાગામિસ્સ વા સકદાગામિસ્સ વાતિ? અનાગામિસ્સ. હઞ્ચિ અનાગામિસ્સ અધિમત્તા બોજ્ઝઙ્ગભાવના, પરિહાયતિ અનાગામી અનાગામિફલા; તેન વત રે વત્તબ્બે – ‘‘પરિહાયતિ સકદાગામી સકદાગામિફલા’’તિ.

૨૪૬. પરિહાયતિ સકદાગામી સકદાગામિફલાતિ? આમન્તા. પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે… કસ્સ અધિમત્તા મગ્ગભાવના…પે… બોજ્ઝઙ્ગભાવના સકદાગામિસ્સ વા સોતાપન્નસ્સ વાતિ? સકદાગામિસ્સ. હઞ્ચિ સકદાગામિસ્સ અધિમત્તા બોજ્ઝઙ્ગભાવના, પરિહાયતિ સકદાગામી સકદાગામિફલા; તેન વત રે વત્તબ્બે – ‘‘પરિહાયતિ સોતાપન્નો સોતાપત્તિફલા’’તિ…પે….

૨૪૭. અરહતા દુક્ખં દિટ્ઠં, પરિહાયતિ અરહા અરહત્તાતિ? આમન્તા. સોતાપન્નેન દુક્ખં દિટ્ઠં, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતા સમુદયો દિટ્ઠો, પરિહાયતિ અરહા અરહત્તાતિ? આમન્તા. સોતાપન્નેન સમુદયો દિટ્ઠો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતા નિરોધો દિટ્ઠો, પરિહાયતિ અરહા અરહત્તાતિ? આમન્તા. સોતાપન્નેન નિરોધો દિટ્ઠો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતા મગ્ગો દિટ્ઠો, પરિહાયતિ અરહા અરહત્તાતિ? આમન્તા. સોતાપન્નેન મગ્ગો દિટ્ઠો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતા ચત્તારિ સચ્ચાનિ દિટ્ઠાનિ, પરિહાયતિ અરહા અરહત્તાતિ? આમન્તા. સોતાપન્નેન ચત્તારિ સચ્ચાનિ દિટ્ઠાનિ, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતા દુક્ખં દિટ્ઠં, પરિહાયતિ અરહા અરહત્તાતિ? આમન્તા. સકદાગામિના દુક્ખં દિટ્ઠં, પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

અરહતા સમુદયો દિટ્ઠો…પે… નિરોધો દિટ્ઠો…પે… મગ્ગો દિટ્ઠો…પે… ચત્તારિ સચ્ચાનિ દિટ્ઠાનિ, પરિહાયતિ અરહા અરહત્તાતિ? આમન્તા. સકદાગામિના ચત્તારિ સચ્ચાનિ દિટ્ઠાનિ, પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

અરહતા દુક્ખં દિટ્ઠં, પરિહાયતિ અરહા અરહત્તાતિ? આમન્તા. અનાગામિના દુક્ખં દિટ્ઠં, પરિહાયતિ અનાગામી અનાગામિફલાતિ? ન હેવં વત્તબ્બે…પે….

અરહતા સમુદયો દિટ્ઠો…પે… નિરોધો દિટ્ઠો…પે… મગ્ગો દિટ્ઠો…પે… ચત્તારિ સચ્ચાનિ દિટ્ઠાનિ, પરિહાયતિ અરહા અરહત્તાતિ? આમન્તા. અનાગામિના ચત્તારિ સચ્ચાનિ દિટ્ઠાનિ, પરિહાયતિ અનાગામી અનાગામિફલાતિ? ન હેવં વત્તબ્બે…પે….

૨૪૮. અનાગામિના દુક્ખં દિટ્ઠં, પરિહાયતિ અનાગામી અનાગામિફલાતિ? આમન્તા. સોતાપન્નેન દુક્ખં દિટ્ઠં, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અનાગામિના સમુદયો દિટ્ઠો…પે… નિરોધો દિટ્ઠો…પે… મગ્ગો દિટ્ઠો…પે… ચત્તારિ સચ્ચાનિ દિટ્ઠાનિ, પરિહાયતિ અનાગામી અનાગામિફલાતિ? આમન્તા. સોતાપન્નેન ચત્તારિ સચ્ચાનિ દિટ્ઠાનિ, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અનાગામિના દુક્ખં દિટ્ઠં, પરિહાયતિ અનાગામી અનાગામિફલાતિ? આમન્તા. સકદાગામિના દુક્ખં દિટ્ઠં, પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

અનાગામિના સમુદયો દિટ્ઠો…પે… નિરોધો દિટ્ઠો…પે… મગ્ગો દિટ્ઠો…પે… ચત્તારિ સચ્ચાનિ દિટ્ઠાનિ, પરિહાયતિ અનાગામી અનાગામિફલાતિ? આમન્તા. સકદાગામિના ચત્તારિ સચ્ચાનિ દિટ્ઠાનિ, પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

૨૪૯. સકદાગામિના દુક્ખં દિટ્ઠં, પરિહાયતિ સકદાગામી સકદાગામિફલાતિ? આમન્તા. સોતાપન્નેન દુક્ખં દિટ્ઠં, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

સકદાગામિના સમુદયો દિટ્ઠો…પે… નિરોધો દિટ્ઠો…પે… મગ્ગો દિટ્ઠો…પે… ચત્તારિ સચ્ચાનિ દિટ્ઠાનિ, પરિહાયતિ સકદાગામી સકદાગામિફલાતિ? આમન્તા. સોતાપન્નેન ચત્તારિ સચ્ચાનિ દિટ્ઠાનિ, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

૨૫૦. સોતાપન્નેન દુક્ખં દિટ્ઠં, ન પરિહાયતિ સોતાપન્નો સોતાપત્તિફલાતિ? આમન્તા. અરહતા દુક્ખં દિટ્ઠં, ન પરિહાયતિ અરહા અરહત્તાતિ? ન હેવં વત્તબ્બે…પે….

સોતાપન્નેન સમુદયો દિટ્ઠો…પે… નિરોધો દિટ્ઠો…પે… મગ્ગો દિટ્ઠો…પે… ચત્તારિ સચ્ચાનિ દિટ્ઠાનિ, ન પરિહાયતિ સોતાપન્નો સોતાપત્તિફલાતિ? આમન્તા. અરહતા ચત્તારિ સચ્ચાનિ દિટ્ઠાનિ, ન પરિહાયતિ અરહા અરહત્તાતિ? ન હેવં વત્તબ્બે…પે….

સકદાગામિના દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ સકદાગામી સકદાગામિફલાતિ? આમન્તા. અરહતા ચત્તારિ સચ્ચાનિ દિટ્ઠાનિ, ન પરિહાયતિ અરહા અરહત્તાતિ? ન હેવં વત્તબ્બે…પે….

અનાગામિના દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ અનાગામી અનાગામિફલાતિ? આમન્તા. અરહતા ચત્તારિ સચ્ચાનિ દિટ્ઠાનિ, ન પરિહાયતિ અરહા અરહત્તાતિ? ન હેવં વત્તબ્બે…પે….

સોતાપન્નેન દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ સોતાપન્નો સોતાપત્તિફલાતિ? આમન્તા.

અનાગામિના દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ અનાગામી અનાગામિફલાતિ? ન હેવં વત્તબ્બે…પે….

સકદાગામિના દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ સકદાગામી સકદાગામિફલાતિ? આમન્તા. અનાગામિના દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ અનાગામી અનાગામિફલાતિ? ન હેવં વત્તબ્બે…પે….

સોતાપન્નેન દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ સોતાપન્નો સોતાપત્તિફલાતિ? આમન્તા. સકદાગામિના દુક્ખં દિટ્ઠં…પે… ચત્તારિ સચ્ચાનિ દિટ્ઠાનિ, ન પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

૨૫૧. અરહતો રાગો પહીનો, પરિહાયતિ અરહા અરહત્તાતિ? આમન્તા. સોતાપન્નસ્સ સક્કાયદિટ્ઠિ પહીના, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતો રાગો પહીનો, પરિહાયતિ અરહા અરહત્તાતિ? આમન્તા. સોતાપન્નસ્સ વિચિકિચ્છા પહીના…પે… સીલબ્બતપરામાસો પહીનો…પે… અપાયગમનીયો રાગો પહીનો …પે… અપાયગમનીયો દોસો પહીનો…પે… અપાયગમનીયો મોહો પહીનો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતો દોસો પહીનો…પે… મોહો પહીનો… માનો પહીનો… દિટ્ઠિ પહીના… વિચિકિચ્છા પહીના… થિનં [થીનં (સી. સ્યા. કં. પી.)] પહીનં… ઉદ્ધચ્ચં પહીનં… અહિરિકં પહીનં…પે… અનોત્તપ્પં પહીનં, પરિહાયતિ અરહા અરહત્તાતિ? આમન્તા. સોતાપન્નસ્સ સક્કાયદિટ્ઠિ પહીના, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતો અનોત્તપ્પં પહીનં, પરિહાયતિ અરહા અરહત્તાતિ? આમન્તા. સોતાપન્નસ્સ વિચિકિચ્છા પહીના…પે… સીલબ્બતપરામાસો પહીનો…પે… અપાયગમનીયો રાગો પહીનો…પે… અપાયગમનીયો દોસો પહીનો…પે… અપાયગમનીયો મોહો પહીનો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે…પે….

અરહતો રાગો પહીનો, પરિહાયતિ અરહા અરહત્તાતિ? આમન્તા. સકદાગામિસ્સ સક્કાયદિટ્ઠિ પહીના, પરિહાયતિ સકદાગામી સકદાગામિફલાતિ? ન હેવં વત્તબ્બે.

અરહતો રાગો પહીનો, પરિહાયતિ અરહા અરહત્તાતિ? આમન્તા. સકદાગામિસ્સ વિચિકિચ્છા પહીના…પે… સીલબ્બતપરામાસો પહીનો…પે… ઓળારિકો કામરાગો પહીનો… ઓળારિકો બ્યાપાદો પહીનો, પરિહાયતિ સકદાગામી સકદાગામિફલાતિ? ન હેવં વત્તબ્બે…પે….

અરહતો દોસો પહીનો…પે… અનોત્તપ્પં પહીનં, પરિહાયતિ અરહા અરહત્તાતિ? આમન્તા. સકદાગામિસ્સ સક્કાયદિટ્ઠિ પહીના…પે… ઓળારિકો બ્યાપાદો પહીનો, પરિહાયતિ સકદાગામી સકદાગામિફલાતિ? ન હેવં વત્તબ્બે.

અરહતો રાગો પહીનો, પરિહાયતિ અરહા અરહત્તાતિ? આમન્તા. અનાગામિસ્સ સક્કાયદિટ્ઠિ પહીના, પરિહાયતિ અનાગામી અનાગામિફલાતિ? ન હેવં વત્તબ્બે…પે….

અરહતો રાગો પહીનો, પરિહાયતિ અરહા અરહત્તાતિ? આમન્તા. અનાગામિસ્સ વિચિકિચ્છા પહીના…પે… સીલબ્બતપરામાસો પહીનો… અણુસહગતો કામરાગો પહીનો… અણુસહગતો બ્યાપાદો પહીનો, પરિહાયતિ અનાગામી અનાગામિફલાતિ? ન હેવં વત્તબ્બે.

અરહતો દોસો પહીનો…પે… અનોત્તપ્પં પહીનં, પરિહાયતિ અરહા અરહત્તાતિ? આમન્તા. અનાગામિસ્સ સક્કાયદિટ્ઠિ પહીના…પે… અણુસહગતો બ્યાપાદો પહીનો, પરિહાયતિ અનાગામી અનાગામિફલાતિ? ન હેવં વત્તબ્બે.

૨૫૨. અનાગામિસ્સ સક્કાયદિટ્ઠિ પહીના, પરિહાયતિ અનાગામી અનાગામિફલાતિ? આમન્તા. સોતાપન્નસ્સ સક્કાયદિટ્ઠિ પહીના, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે.

અનાગામિસ્સ સક્કાયદિટ્ઠિ પહીના, પરિહાયતિ અનાગામી અનાગામિફલાતિ? આમન્તા. સોતાપન્નસ્સ વિચિકિચ્છા પહીના…પે… અપાયગમનીયો મોહો પહીનો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે.

અનાગામિસ્સ વિચિકિચ્છા પહીના…પે… અણુસહગતો બ્યાપાદો પહીનો, પરિહાયતિ અનાગામી અનાગામિફલાતિ? આમન્તા. સોતાપન્નસ્સ સક્કાયદિટ્ઠિ પહીના…પે… અપાયગમનીયો મોહો પહીનો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે.

અનાગામિસ્સ સક્કાયદિટ્ઠિ પહીના, પરિહાયતિ અનાગામી અનાગામિફલાતિ? આમન્તા. સકદાગામિસ્સ સક્કાયદિટ્ઠિ પહીના, પરિહાયતિ સકદાગામી સકદાગામિફલાતિ? ન હેવં વત્તબ્બે.

અનાગામિસ્સ સક્કાયદિટ્ઠિ પહીના, પરિહાયતિ અનાગામી અનાગામિફલાતિ? આમન્તા. સકદાગામિસ્સ વિચિકિચ્છા પહીના…પે… સીલબ્બતપરામાસો પહીનો… ઓળારિકો કામરાગો પહીનો… ઓળારિકો બ્યાપાદો પહીનો, પરિહાયતિ સકદાગામી સકદાગામિફલાતિ? ન હેવં વત્તબ્બે.

અનાગામિસ્સ વિચિકિચ્છા પહીના…પે… અણુસહગતો બ્યાપાદો પહીનો, પરિહાયતિ અનાગામી અનાગામિફલાતિ? આમન્તા. સકદાગામિસ્સ સક્કાયદિટ્ઠિ પહીના…પે… ઓળારિકો બ્યાપાદો પહીનો, પરિહાયતિ સકદાગામી સકદાગામિફલાતિ? ન હેવં વત્તબ્બે.

૨૫૩. સકદાગામિસ્સ સક્કાયદિટ્ઠિ પહીના, પરિહાયતિ સકદાગામી સકદાગામિફલાતિ? આમન્તા. સોતાપન્નસ્સ સક્કાયદિટ્ઠિ પહીના, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે.

સકદાગામિસ્સ સક્કાયદિટ્ઠિ પહીના, પરિહાયતિ સકદાગામી સકદાગામિફલાતિ? આમન્તા. સોતાપન્નસ્સ વિચિકિચ્છા પહીના…પે… અપાયગમનીયો મોહો પહીનો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે.

સકદાગામિસ્સ વિચિકિચ્છા પહીના…પે… ઓળારિકો કામરાગો પહીનો… ઓળારિકો બ્યાપાદો પહીનો, પરિહાયતિ સકદાગામી સકદાગામિફલાતિ? આમન્તા. સોતાપન્નસ્સ સક્કાયદિટ્ઠિ પહીના…પે… અપાયગમનીયો મોહો પહીનો, પરિહાયતિ સોતાપન્નો સોતાપત્તિફલાતિ? ન હેવં વત્તબ્બે.

૨૫૪. સોતાપન્નસ્સ સક્કાયદિટ્ઠિ પહીના, ન પરિહાયતિ સોતાપન્નો સોતાપત્તિફલાતિ? આમન્તા. અરહતો રાગો પહીનો, ન પરિહાયતિ અરહા અરહત્તાતિ? ન હેવં વત્તબ્બે.

સોતાપન્નસ્સ સક્કાયદિટ્ઠિ પહીના, ન પરિહાયતિ સોતાપન્નો સોતાપત્તિફલાતિ? આમન્તા. અરહતો દોસો પહીનો…પે… અનોત્તપ્પં પહીનં, ન પરિહાયતિ અરહા અરહત્તાતિ? ન હેવં વત્તબ્બે.

સોતાપન્નસ્સ વિચિકિચ્છા પહીના…પે… અપાયગમનીયો મોહો પહીનો, ન પરિહાયતિ સોતાપન્નો સોતાપત્તિફલાતિ? આમન્તા. અરહતો રાગો પહીનો…પે… અનોત્તપ્પં પહીનં, ન પરિહાયતિ અરહા અરહત્તાતિ? ન હેવં વત્તબ્બે.

૨૫૫. સકદાગામિસ્સ સક્કાયદિટ્ઠિ પહીના, ન પરિહાયતિ સકદાગામી સકદાગામિફલાતિ? આમન્તા. અરહતો રાગો પહીનો…પે… અનોત્તપ્પં પહીનં, ન પરિહાયતિ અરહા અરહત્તાતિ? ન હેવં વત્તબ્બે.

સકદાગામિસ્સ વિચિકિચ્છા પહીના…પે… ઓળારિકો બ્યાપાદો પહીનો, ન પરિહાયતિ સકદાગામી સકદાગામિફલાતિ? આમન્તા. અરહતો રાગો પહીનો…પે… અનોત્તપ્પં પહીનં, ન પરિહાયતિ અરહા અરહત્તાતિ? ન હેવં વત્તબ્બે.

૨૫૬. અનાગામિસ્સ સક્કાયદિટ્ઠિ પહીના, ન પરિહાયતિ અનાગામી અનાગામિફલાતિ? આમન્તા. અરહતો રાગો પહીનો…પે… અનોત્તપ્પં પહીનં, ન પરિહાયતિ અરહા અરહત્તાતિ? ન હેવં વત્તબ્બે.

અનાગામિસ્સ વિચિકિચ્છા પહીના…પે… અણુસહગતો બ્યાપાદો પહીનો, ન પરિહાયતિ અનાગામી અનાગામિફલાતિ? આમન્તા. અરહતો રાગો પહીનો…પે… અનોત્તપ્પં પહીનં, ન પરિહાયતિ અરહા અરહત્તાતિ? ન હેવં વત્તબ્બે.

૨૫૭. સોતાપન્નસ્સ સક્કાયદિટ્ઠિ પહીના, ન પરિહાયતિ સોતાપન્નો સોતાપત્તિફલાતિ? આમન્તા. અનાગામિસ્સ સક્કાયદિટ્ઠિ પહીના… અણુસહગતો બ્યાપાદો પહીનો, ન પરિહાયતિ અનાગામી અનાગામિફલાતિ? ન હેવં વત્તબ્બે.

સોતાપન્નસ્સ વિચિકિચ્છા પહીના…પે… અપાયગમનીયો મોહો પહીનો, ન પરિહાયતિ સોતાપન્નો સોતાપત્તિફલાતિ? આમન્તા. અનાગામિસ્સ સક્કાયદિટ્ઠિ પહીના…પે… અણુસહગતો બ્યાપાદો પહીનો, ન પરિહાયતિ અનાગામી અનાગામિફલાતિ? ન હેવં વત્તબ્બે.

૨૫૮. સકદાગામિસ્સ સક્કાયદિટ્ઠિ પહીના, ન પરિહાયતિ સકદાગામી સકદાગામિફલાતિ? આમન્તા. અનાગામિસ્સ સક્કાયદિટ્ઠિ પહીના…પે… અણુસહગતો બ્યાપાદો પહીનો, ન પરિહાયતિ અનાગામી અનાગામિફલાતિ? ન હેવં વત્તબ્બે.

સકદાગામિસ્સ વિચિકિચ્છા પહીના…પે… ઓળારિકો બ્યાપાદો પહીનો, ન પરિહાયતિ સકદાગામી સકદાગામિફલાતિ? આમન્તા. અનાગામિસ્સ સક્કાયદિટ્ઠિ પહીના…પે… અણુસહગતો બ્યાપાદો પહીનો, ન પરિહાયતિ અનાગામી અનાગામિફલાતિ? ન હેવં વત્તબ્બે.

૨૫૯. સોતાપન્નસ્સ સક્કાયદિટ્ઠિ પહીના, ન પરિહાયતિ સોતાપન્નો સોતાપત્તિફલાતિ? આમન્તા. સકદાગામિસ્સ સક્કાયદિટ્ઠિ પહીના…પે… ઓળારિકો બ્યાપાદો પહીનો, ન પરિહાયતિ સકદાગામી સકદાગામિફલાતિ? ન હેવં વત્તબ્બે.

સોતાપન્નસ્સ વિચિકિચ્છા પહીના…પે… અપાયગમનીયો મોહો પહીનો, ન પરિહાયતિ સોતાપન્નો સોતાપત્તિફલાતિ? આમન્તા. સકદાગામિસ્સ સક્કાયદિટ્ઠિ પહીના…પે… ઓળારિકો બ્યાપાદો પહીનો, ન પરિહાયતિ સકદાગામી સકદાગામિફલાતિ? ન હેવં વત્તબ્બે.

૨૬૦. પરિહાયતિ અરહા અરહત્તાતિ? આમન્તા. નનુ અરહતો રાગો પહીનો ઉચ્છિન્નમૂલો તાલાવત્થુકતો અનભાવઙ્કતો [અનભાવકતો (સી.)] આયતિં અનુપ્પાદધમ્મોતિ? આમન્તા. હઞ્ચિ અરહતો રાગો પહીનો ઉચ્છિન્નમૂલો તાલાવત્થુકતો અનભાવઙ્કતો આયતિં અનુપ્પાદધમ્મો, નો ચ વત રે [નો વત રે (સ્યા. પી.) એવમુપરિપિ] વત્તબ્બે – ‘‘પરિહાયતિ અરહા અરહત્તા’’તિ.

પરિહાયતિ અરહા અરહત્તાતિ? આમન્તા. નનુ અરહતો દોસો પહીનો…પે… મોહો પહીનો… માનો પહીનો… દિટ્ઠિ પહીના… વિચિકિચ્છા પહીના… થિનં પહીનં… ઉદ્ધચ્ચં પહીનં… અહિરિકં પહીનં… અનોત્તપ્પં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મન્તિ? આમન્તા. હઞ્ચિ અરહતો અનોત્તપ્પં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મં, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

પરિહાયતિ અરહા અરહત્તાતિ? આમન્તા. નનુ અરહતો રાગપ્પહાનાય મગ્ગો ભાવિતોતિ? આમન્તા. હઞ્ચિ અરહતો રાગપ્પહાનાય મગ્ગો ભાવિતો, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

પરિહાયતિ અરહા અરહત્તાતિ? આમન્તા. નનુ અરહતો રાગપ્પહાનાય સતિપટ્ઠાના ભાવિતા…પે… સમ્મપ્પધાના ભાવિતા… ઇદ્ધિપાદા ભાવિતા… ઇન્દ્રિયા ભાવિતા… બલા ભાવિતા… બોજ્ઝઙ્ગા ભાવિતાતિ? આમન્તા. હઞ્ચિ અરહતો રાગપ્પહાનાય બોજ્ઝઙ્ગા ભાવિતા, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

પરિહાયતિ અરહા અરહત્તાતિ? આમન્તા. નનુ અરહતો દોસપ્પહાનાય…પે… અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતાતિ? આમન્તા. હઞ્ચિ અરહતો અનોત્તપ્પપહાનાય બોજ્ઝઙ્ગા ભાવિતા, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

૨૬૧. પરિહાયતિ અરહા અરહત્તાતિ? આમન્તા. નનુ અરહા વીતરાગો વીતદોસો વીતમોહો કતકરણીયો ઓહિતભારો અનુપ્પત્તસદત્થો પરિક્ખીણભવસંયોજનો સમ્મદઞ્ઞાવિમુત્તો ઉક્ખિત્તપલિઘો સઙ્કિણ્ણપરિખો અબ્બૂળ્હેસિકો નિરગ્ગળો અરિયો પન્નદ્ધજો પન્નભારો વિસઞ્ઞુત્તો સુવિજિતવિજયો; દુક્ખં તસ્સ પરિઞ્ઞાતં, સમુદયો પહીનો, નિરોધો સચ્છિકતો, મગ્ગો ભાવિતો, અભિઞ્ઞેય્યં અભિઞ્ઞાતં, પરિઞ્ઞેય્યં પરિઞ્ઞાતં, પહાતબ્બં પહીનં, ભાવેતબ્બં ભાવિતં, સચ્છિકાતબ્બં સચ્છિકતન્તિ? આમન્તા. હઞ્ચિ અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

૨૬૨. પરિહાયતિ અરહા અરહત્તાતિ? ( ) [(આમન્તા) (ક.)] સમયવિમુત્તો અરહા અરહત્તા પરિહાયતિ, અસમયવિમુત્તો અરહા અરહત્તા ન પરિહાયતીતિ. સમયવિમુત્તો અરહા અરહત્તા પરિહાયતીતિ? આમન્તા. અસમયવિમુત્તો અરહા અરહત્તા પરિહાયતીતિ [ન પરિહાયતીતિ (ક.)]? ન હેવં વત્તબ્બે.

અસમયવિમુત્તો અરહા અરહત્તા ન પરિહાયતીતિ? આમન્તા. સમયવિમુત્તો અરહા અરહત્તા ન પરિહાયતીતિ? ન હેવં વત્તબ્બે.

સમયવિમુત્તસ્સ અરહતો રાગો પહીનો, પરિહાયતિ સમયવિમુત્તો અરહા અરહત્તાતિ? આમન્તા. અસમયવિમુત્તસ્સ અરહતો રાગો પહીનો, પરિહાયતિ અસમયવિમુત્તો અરહા અરહત્તાતિ? ન હેવં વત્તબ્બે.

સમયવિમુત્તસ્સ અરહતો દોસો પહીનો…પે… અનોત્તપ્પં પહીનં, પરિહાયતિ સમયવિમુત્તો અરહા અરહત્તાતિ? આમન્તા. અસમયવિમુત્તસ્સ અરહતો અનોત્તપ્પં પહીનં, પરિહાયતિ અસમયવિમુત્તો અરહા અરહત્તાતિ? ન હેવં વત્તબ્બે.

સમયવિમુત્તસ્સ અરહતો રાગપ્પહાનાય મગ્ગો ભાવિતો, પરિહાયતિ સમયવિમુત્તો અરહા અરહત્તાતિ? આમન્તા. અસમયવિમુત્તસ્સ અરહતો રાગપ્પહાનાય મગ્ગો ભાવિતો, પરિહાયતિ અસમયવિમુત્તો અરહા અરહત્તાતિ? ન હેવં વત્તબ્બે.

સમયવિમુત્તસ્સ અરહતો રાગપ્પહાનાય સતિપટ્ઠાના ભાવિતા…પે… સમ્મપ્પધાના ભાવિતા… ઇદ્ધિપાદા ભાવિતા… ઇન્દ્રિયા ભાવિતા… બલા ભાવિતા… બોજ્ઝઙ્ગા ભાવિતા, પરિહાયતિ સમયવિમુત્તો અરહા અરહત્તાતિ? આમન્તા. અસમયવિમુત્તસ્સ અરહતો રાગપ્પહાનાય સતિપટ્ઠાના ભાવિતા…પે… બોજ્ઝઙ્ગા ભાવિતા, પરિહાયતિ અસમયવિમુત્તો અરહા અરહત્તાતિ? ન હેવં વત્તબ્બે.

સમયવિમુત્તસ્સ અરહતો દોસપ્પહાનાય…પે… અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતા, પરિહાયતિ સમયવિમુત્તો અરહા અરહત્તાતિ? આમન્તા. અસમયવિમુત્તસ્સ અરહતો અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતા, પરિહાયતિ અસમયવિમુત્તો અરહા અરહત્તાતિ? ન હેવં વત્તબ્બે…પે….

સમયવિમુત્તો અરહા વીતરાગો વીતદોસો વીતમોહો કતકરણીયો ઓહિતભારો અનુપ્પત્તસદત્થો પરિક્ખીણભવસંયોજનો સમ્મદઞ્ઞાવિમુત્તો ઉક્ખિત્તપલિઘો સઙ્કિણ્ણપરિખો અબ્બૂળ્હેસિકો નિરગ્ગળો અરિયો પન્નદ્ધજો પન્નભારો વિસઞ્ઞુત્તો સુવિજિતવિજયો, દુક્ખં તસ્સ પરિઞ્ઞાતં, સમુદયો પહીનો, નિરોધો સચ્છિકતો, મગ્ગો ભાવિતો, અભિઞ્ઞેય્યં અભિઞ્ઞાતં, પરિઞ્ઞેય્યં પરિઞ્ઞાતં, પહાતબ્બં પહીનં, ભાવેતબ્બં ભાવિતં, સચ્છિકાતબ્બં સચ્છિકતં, પરિહાયતિ સમયવિમુત્તો અરહા અરહત્તાતિ? આમન્તા. અસમયવિમુત્તો અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, પરિહાયતિ અસમયવિમુત્તો અરહા અરહત્તાતિ? ન હેવં વત્તબ્બે.

૨૬૩. અસમયવિમુત્તસ્સ અરહતો રાગો પહીનો, ન પરિહાયતિ અસમયવિમુત્તો અરહા અરહત્તાતિ? આમન્તા. સમયવિમુત્તસ્સ અરહતો રાગો પહીનો, ન પરિહાયતિ સમયવિમુત્તો અરહા અરહત્તાતિ? ન હેવં વત્તબ્બે.

અસમયવિમુત્તસ્સ અરહતો દોસો પહીનો…પે… અનોત્તપ્પં પહીનં, ન પરિહાયતિ અસમયવિમુત્તો અરહા અરહત્તાતિ? આમન્તા. સમયવિમુત્તસ્સ અરહતો અનોત્તપ્પં પહીનં, ન પરિહાયતિ સમયવિમુત્તો અરહા અરહત્તાતિ? ન હેવં વત્તબ્બે.

અસમયવિમુત્તસ્સ અરહતો રાગપ્પહાનાય મગ્ગો ભાવિતો…પે… બોજ્ઝઙ્ગા ભાવિતા, ન પરિહાયતિ અસમયવિમુત્તો અરહા અરહત્તાતિ? આમન્તા. સમયવિમુત્તસ્સ અરહતો રાગપ્પહાનાય મગ્ગો ભાવિતો…પે… બોજ્ઝઙ્ગા ભાવિતા, ન પરિહાયતિ સમયવિમુત્તો અરહા અરહત્તાતિ? ન હેવં વત્તબ્બે.

અસમયવિમુત્તસ્સ અરહતો દોસપ્પહાનાય…પે… અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતા, ન પરિહાયતિ અસમયવિમુત્તો અરહા અરહત્તાતિ? આમન્તા. સમયવિમુત્તસ્સ અરહતો અનોત્તપ્પપહાનાય મગ્ગો ભાવિતો…પે… બોજ્ઝઙ્ગા ભાવિતા, ન પરિહાયતિ સમયવિમુત્તો અરહા અરહત્તાતિ? ન હેવં વત્તબ્બે.

અસમયવિમુત્તો અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, ન પરિહાયતિ અસમયવિમુત્તો અરહા અરહત્તાતિ? આમન્તા. સમયવિમુત્તો અરહા વીતરાગો વીતદોસો વીતમોહો…પે… સચ્છિકાતબ્બં સચ્છિકતં, ન પરિહાયતિ સમયવિમુત્તો અરહા અરહત્તાતિ? ન હેવં વત્તબ્બે…પે….

૨૬૪. પરિહાયતિ અરહા અરહત્તાતિ? આમન્તા. સારિપુત્તો થેરો પરિહાયિત્થ અરહત્તાતિ? ન હેવં વત્તબ્બે. મહામોગ્ગલ્લાનો [મહામોગ્ગલાનો (ક.)] થેરો… મહાકસ્સપો થેરો… મહાકચ્ચાયનો [મહાકચ્ચાનો (મ. નિ. ૧.૨૦૨ આદયો)] થેરો… મહાકોટ્ઠિકો [મહાકોટ્ઠિતો (સી. સ્યા. કં. પી.)] થેરો… મહાપન્થકો થેરો પરિહાયિત્થ અરહત્તાતિ? ન હેવં વત્તબ્બે.

સારિપુત્તો થેરો ન પરિહાયિત્થ અરહત્તાતિ? આમન્તા. હઞ્ચિ સારિપુત્તો થેરો ન પરિહાયિત્થ અરહત્તા, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

મહામોગ્ગલ્લાનો થેરો… મહાકસ્સપો થેરો… મહાકચ્ચાયનો થેરો… મહાકોટ્ઠિકો થેરો… મહાપન્થકો થેરો ન પરિહાયિત્થ અરહત્તાતિ? આમન્તા. હઞ્ચિ મહાપન્થકો થેરો ન પરિહાયિત્થ અરહત્તા, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

અરિયપુગ્ગલસંસન્દનં.

૩. સુત્તસાધનપરિહાનિ

૨૬૫. પરિહાયતિ અરહા અરહત્તાતિ? આમન્તા. નનુ વુત્તં ભગવતા –

‘‘ઉચ્ચાવચા હિ પટિપદા [પટિપાદા (અટ્ઠ.)], સમણેન પકાસિતા;

ન પારં દિગુણં યન્તિ, નયિદં એકગુણં મુત’’ન્તિ [સુ. નિ. ૭૧૯ સુત્તનિપાતે].

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘પરિહાયતિ અરહા અરહત્તા’’તિ.

પરિહાયતિ અરહા અરહત્તાતિ? આમન્તા. અત્થિ છિન્નસ્સ છેદિયન્તિ? ન હેવં વત્તબ્બે.

અત્થિ છિન્નસ્સ છેદિયન્તિ? આમન્તા. નનુ વુત્તં ભગવતા –

‘‘વીતતણ્હો અનાદાનો, કિચ્ચં યસ્સ ન વિજ્જતિ;

છિન્નસ્સ છેદિયં નત્થિ, ઓઘપાસો સમૂહતો’’તિ.

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘અત્થિ છિન્નસ્સ છેદિય’’ન્તિ.

૨૬૬. પરિહાયતિ અરહા અરહત્તાતિ? આમન્તા. અત્થિ કતસ્સ પતિચયોતિ? ન હેવં વત્તબ્બે.

અત્થિ કતસ્સ પતિચયોતિ? આમન્તા. નનુ વુત્તં ભગવતા –

‘‘તસ્સ સમ્મા વિમુત્તસ્સ, સન્તચિત્તસ્સ ભિક્ખુનો;

કતસ્સ પતિચયો નત્થિ, કરણીયં ન વિજ્જતિ.

‘‘સેલો યથા એકગ્ઘનો, વાતેન ન સમીરતિ;

એવં રૂપા રસા સદ્દા, ગન્ધા ફસ્સા ચ કેવલા.

‘‘ઇટ્ઠા ધમ્મા અનિટ્ઠા ચ, નપ્પવેધેન્તિ તાદિનો;

ઠિતં ચિત્તં વિપ્પમુત્તં, વયં ચસ્સાનુપસ્સતી’’તિ [મહાવ. ૨૪૪; અ. નિ. ૬.૫૫].

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘અત્થિ કતસ્સ પતિચયો’’તિ.

૨૬૭. ન વત્તબ્બં – ‘‘પરિહાયતિ અરહા અરહત્તા’’તિ? આમન્તા. નનુ વુત્તં ભગવતા – ‘‘પઞ્ચિમે, ભિક્ખવે, ધમ્મા સમયવિમુત્તસ્સ ભિક્ખુનો પરિહાનાય સંવત્તન્તિ. કતમે પઞ્ચ? કમ્મારામતા, ભસ્સારામતા, નિદ્દારામતા, સઙ્ગણિકારામતા, યથાવિમુત્તં ચિત્તં ન પચ્ચવેક્ખતિ. ઇમે ખો, ભિક્ખવે, પઞ્ચ ધમ્મા સમયવિમુત્તસ્સ ભિક્ખુનો પરિહાનાય સંવત્તન્તી’’તિ [અ. નિ. ૫.૧૪૯]. અત્થેવ સુત્તન્તોતિ? આમન્તા. તેન હિ પરિહાયતિ અરહા અરહત્તાતિ.

અત્થિ અરહતો કમ્મારામતાતિ? ન હેવં વત્તબ્બે.

અત્થિ અરહતો કમ્મારામતાતિ? આમન્તા. અત્થિ અરહતો રાગો કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણન્તિ? ન હેવં વત્તબ્બે.

અત્થિ અરહતો ભસ્સારામતા, અત્થિ અરહતો નિદ્દારામતા, અત્થિ અરહતો સઙ્ગણિકારામતાતિ? ન હેવં વત્તબ્બે.

અત્થિ અરહતો સઙ્ગણિકારામતાતિ? આમન્તા. અત્થિ અરહતો રાગો કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણન્તિ? ન હેવં વત્તબ્બે.

૨૬૮. પરિહાયતિ અરહા અરહત્તાતિ? આમન્તા. અરહા અરહત્તા પરિહાયમાનો કિં પરિયુટ્ઠિતો પરિહાયતીતિ? રાગપરિયુટ્ઠિતો પરિહાયતીતિ. પરિયુટ્ઠાનં કિં પટિચ્ચ ઉપ્પજ્જતીતિ? અનુસયં પટિચ્ચ ઉપ્પજ્જતીતિ. અત્થિ અરહતો અનુસયાતિ? ન હેવં વત્તબ્બે.

અત્થિ અરહતો અનુસયાતિ? આમન્તા. અત્થિ અરહતો કામરાગાનુસયો પટિઘાનુસયો માનાનુસયો દિટ્ઠાનુસયો વિચિકિચ્છાનુસયો ભવરાગાનુસયો અવિજ્જાનુસયોતિ? ન હેવં વત્તબ્બે.

દોસપરિયુટ્ઠિતો પરિહાયતીતિ…પે… મોહપરિયુટ્ઠિતો પરિહાયતીતિ…. પરિયુટ્ઠાનં કિં પટિચ્ચ ઉપ્પજ્જતીતિ? અનુસયં પટિચ્ચ ઉપ્પજ્જતીતિ. અત્થિ અરહતો અનુસયાતિ? ન હેવં વત્તબ્બે…પે….

અત્થિ અરહતો અનુસયાતિ? આમન્તા. અત્થિ અરહતો કામરાગાનુસયો…પે… અવિજ્જાનુસયોતિ? ન હેવં વત્તબ્બે.

પરિહાયતિ અરહા અરહત્તાતિ? આમન્તા. અરહતો અરહત્તા પરિહાયમાનસ્સ કિં ઉપચયં ગચ્છતીતિ? રાગો ઉપચયં ગચ્છતીતિ. સક્કાયદિટ્ઠિ ઉપચયં ગચ્છતીતિ, વિચિકિચ્છા ઉપચયં ગચ્છતીતિ, સીલબ્બતપરામાસો ઉપચયં ગચ્છતીતિ? ન હેવં વત્તબ્બે. દોસો ઉપચયં ગચ્છતીતિ…પે… મોહો ઉપચયં ગચ્છતીતિ, સક્કાયદિટ્ઠિ ઉપચયં ગચ્છતીતિ, વિચિકિચ્છા ઉપચયં ગચ્છતીતિ, સીલબ્બતપરામાસો ઉપચયં ગચ્છતીતિ? ન હેવં વત્તબ્બે.

પરિહાયતિ અરહા અરહત્તાતિ? આમન્તા. અરહા આચિનતીતિ? ન હેવં વત્તબ્બે. અરહા અપચિનતીતિ? ન હેવં વત્તબ્બે. અરહા પજહતીતિ? ન હેવં વત્તબ્બે. અરહા ઉપાદિયતીતિ? ન હેવં વત્તબ્બે. અરહા વિસિનેતીતિ? ન હેવં વત્તબ્બે. અરહા ઉસ્સિનેતીતિ? ન હેવં વત્તબ્બે. અરહા વિધૂપેતીતિ? ન હેવં વત્તબ્બે. અરહા સન્ધૂપેતીતિ? ન હેવં વત્તબ્બે.

નનુ અરહા નેવાચિનતિ ન અપચિનતિ અપચિનિત્વા ઠિતોતિ? આમન્તા. હઞ્ચિ અરહા નેવાચિનતિ ન અપચિનતિ અપચિનિત્વા ઠિતો, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

નનુ અરહા નેવ પજહતિ ન ઉપાદિયતિ પજહિત્વા ઠિતોતિ? આમન્તા. હઞ્ચિ અરહા નેવ પજહતિ ન ઉપાદિયતિ પજહિત્વા ઠિતો, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

નનુ અરહા નેવ વિસિનેતિ ન ઉસ્સિનેતિ વિસિનિત્વા ઠિતોતિ? આમન્તા. હઞ્ચિ અરહા નેવ વિસિનેતિ ન ઉસ્સિનેતિ વિસિનિત્વા ઠિતો, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

નનુ અરહા નેવ વિધૂપેતિ ન સન્ધૂપેતિ વિધૂપેત્વા ઠિતોતિ? આમન્તા. હઞ્ચિ અરહા નેવ વિધૂપેતિ ન સન્ધૂપેતિ વિધૂપેત્વા ઠિતો, નો ચ વત રે વત્તબ્બે – ‘‘પરિહાયતિ અરહા અરહત્તા’’તિ.

પરિહાનિકથા નિટ્ઠિતા.