૧૧. એકાદસમવગ્ગો
(૧૦૬-૧૦૮) ૧-૩. તિસ્સોપિ અનુસયકથા
૬૦૫. અનુસયા અબ્યાકતાતિ? આમન્તા. વિપાકાબ્યાકતા કિરિયાબ્યાકતા રૂપં નિબ્બાનં ચક્ખાયતનં…પે… ફોટ્ઠબ્બાયતનન્તિ? ન હેવં વત્તબ્બે…પે….
કામરાગાનુસયો અબ્યાકતોતિ? આમન્તા. કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણં અબ્યાકતન્તિ? ન હેવં વત્તબ્બે…પે… કામરાગો કામરાગપરિયુટ્ઠાનં…પે… કામચ્છન્દનીવરણં અકુસલન્તિ? આમન્તા. કામરાગાનુસયો અકુસલોતિ? ન હેવં વત્તબ્બે…પે….
પટિઘાનુસયો અબ્યાકતોતિ? આમન્તા. પટિઘં પટિઘપરિયુટ્ઠાનં પટિઘસંયોજનં અબ્યાકતન્તિ? ન હેવં વત્તબ્બે…પે… પટિઘં પટિઘપરિયુટ્ઠાનં પટિઘસંયોજનં અકુસલન્તિ? આમન્તા. પટિઘાનુસયો અકુસલોતિ? ન હેવં વત્તબ્બે…પે….
માનાનુસયો અબ્યાકતોતિ? આમન્તા. માનો માનપરિયુટ્ઠાનં માનસંયોજનં અબ્યાકતન્તિ? ન હેવં વત્તબ્બે …પે… માનો માનપરિયુટ્ઠાનં માનસંયોજનં અકુસલન્તિ? આમન્તા. માનાનુસયો અકુસલોતિ? ન હેવં વત્તબ્બે …પે….
દિટ્ઠાનુસયો અબ્યાકતોતિ? આમન્તા. દિટ્ઠિ દિટ્ઠોઘો દિટ્ઠિયોગો દિટ્ઠિપરિયુટ્ઠાનં દિટ્ઠિસંયોજનં અબ્યાકતન્તિ? ન હેવં વત્તબ્બે…પે… દિટ્ઠિ દિટ્ઠોઘો દિટ્ઠિયોગો દિટ્ઠિપરિયુટ્ઠાનં દિટ્ઠિસંયોજનં અકુસલન્તિ? આમન્તા. દિટ્ઠાનુસયો અકુસલોતિ? ન હેવં વત્તબ્બે…પે….
વિચિકિચ્છાનુસયો અબ્યાકતોતિ? આમન્તા. વિચિકિચ્છા વિચિકિચ્છાપરિયુટ્ઠાનં વિચિકિચ્છાસંયોજનં વિચિકિચ્છાનીવરણં અબ્યાકતન્તિ? ન હેવં વત્તબ્બે…પે… વિચિકિચ્છા વિચિકિચ્છાપરિયુટ્ઠાનં વિચિકિચ્છાસંયોજનં વિચિકિચ્છાનીવરણં અકુસલન્તિ? આમન્તા. વિચિકિચ્છાનુસયો અકુસલોતિ? ન હેવં વત્તબ્બે…પે….
ભવરાગાનુસયો અબ્યાકતોતિ? આમન્તા. ભવરાગો ભવરાગપરિયુટ્ઠાનં ભવરાગસંયોજનં અબ્યાકતન્તિ? ન હેવં વત્તબ્બે…પે… ભવરાગો ભવરાગપરિયુટ્ઠાનં ભવરાગસંયોજનં અકુસલન્તિ? આમન્તા. ભવરાગાનુસયો અકુસલોતિ? ન હેવં વત્તબ્બે…પે….
અવિજ્જાનુસયો અબ્યાકતોતિ? આમન્તા. અવિજ્જા અવિજ્જોઘો અવિજ્જાયોગો અવિજ્જાપરિયુટ્ઠાનં અવિજ્જાસંયોજનં અવિજ્જાનીવરણં અબ્યાકતન્તિ? ન હેવં વત્તબ્બે…પે… અવિજ્જા અવિજ્જોઘો અવિજ્જાયોગો અવિજ્જાપરિયુટ્ઠાનં અવિજ્જાસંયોજનં અવિજ્જાનીવરણં અકુસલન્તિ? આમન્તા. અવિજ્જાનુસયો અકુસલોતિ? ન હેવં વત્તબ્બે…પે….
૬૦૬. ન વત્તબ્બં – ‘‘અનુસયા અબ્યાકતા’’તિ? આમન્તા. પુથુજ્જનો કુસલાબ્યાકતે ચિત્તે વત્તમાને ‘‘સાનુસયો’’તિ વત્તબ્બોતિ? આમન્તા. કુસલાકુસલા ધમ્મા સમ્મુખીભાવં આગચ્છન્તીતિ? ન હેવં વત્તબ્બે…પે… તેન હિ અનુસયા અબ્યાકતાતિ. પુથુજ્જનો કુસલાબ્યાકતે ચિત્તે વત્તમાને ‘‘સરાગો’’તિ વત્તબ્બોતિ? આમન્તા. કુસલાકુસલા ધમ્મા સમ્મુખીભાવં આગચ્છન્તીતિ? ન હેવં વત્તબ્બે…પે… તેન હિ રાગો અબ્યાકતોતિ.
૬૦૭. અનુસયા અહેતુકાતિ? આમન્તા. રૂપં નિબ્બાનં ચક્ખાયતનં…પે… ફોટ્ઠબ્બાયતનન્તિ? ન હેવં વત્તબ્બે…પે….
કામરાગાનુસયો અહેતુકોતિ? આમન્તા. કામરાગો કામરાગપરિયુટ્ઠાનં કામરાગસંયોજનં કામચ્છન્દનીવરણં અહેતુકન્તિ? ન હેવં વત્તબ્બે…પે… કામરાગો કામરાગપરિયુટ્ઠાનં…પે… કામચ્છન્દનીવરણં સહેતુકન્તિ? આમન્તા. કામરાગાનુસયો સહેતુકોતિ? ન હેવં વત્તબ્બે…પે… પટિઘાનુસયો…પે… માનાનુસયો… દિટ્ઠાનુસયો… વિચિકિચ્છાનુસયો… ભવરાગાનુસયો… અવિજ્જાનુસયો અહેતુકોતિ? આમન્તા. અવિજ્જા અવિજ્જોઘો અવિજ્જાયોગો અવિજ્જાપરિયુટ્ઠાનં અવિજ્જાસંયોજનં અવિજ્જાનીવરણં અહેતુકન્તિ? ન હેવં વત્તબ્બે …પે… અવિજ્જા અવિજ્જોઘો…પે… અવિજ્જાનીવરણં સહેતુકન્તિ? આમન્તા. અવિજ્જાનુસયો સહેતુકોતિ? ન હેવં વત્તબ્બે…પે….
૬૦૮. ન વત્તબ્બં – ‘‘અનુસયા અહેતુકા’’તિ? આમન્તા. પુથુજ્જનો કુસલાબ્યાકતે ચિત્તે વત્તમાને ‘‘સાનુસયો’’તિ વત્તબ્બોતિ? આમન્તા. અનુસયા તેન હેતુના સહેતુકાતિ? ન હેવં વત્તબ્બે…પે… તેન હિ અનુસયા અહેતુકાતિ. પુથુજ્જનો કુસલાબ્યાકતે ચિત્તે વત્તમાને ‘‘સરાગો’’તિ વત્તબ્બોતિ? આમન્તા. રાગો તેન હેતુના સહેતુકોતિ? ન હેવં વત્તબ્બે…પે… તેન હિ રાગો અહેતુકોતિ.
૬૦૯. અનુસયા ચિત્તવિપ્પયુત્તાતિ? આમન્તા. રૂપં નિબ્બાનં ચક્ખાયતનં…પે… ફોટ્ઠબ્બાયતનન્તિ? ન હેવં વત્તબ્બે…પે….
કામરાગાનુસયો ચિત્તવિપ્પયુત્તોતિ? આમન્તા. કામરાગો કામરાગપરિયુટ્ઠાનં કામરાગસંયોજનં કામોઘો કામયોગો કામચ્છન્દનીવરણં ચિત્તવિપ્પયુત્તન્તિ? ન હેવં વત્તબ્બે…પે… કામરાગો કામરાગપરિયુટ્ઠાનં…પે… કામચ્છન્દનીવરણં ચિત્તસમ્પયુત્તન્તિ? આમન્તા. કામરાગાનુસયો ચિત્તસમ્પયુત્તોતિ? ન હેવં વત્તબ્બે…પે….
૬૧૦. કામરાગાનુસયો ચિત્તવિપ્પયુત્તોતિ? આમન્તા. કતમક્ખન્ધપરિયાપન્નોતિ? સઙ્ખારક્ખન્ધપરિયાપન્નોતિ. સઙ્ખારક્ખન્ધો ચિત્તવિપ્પયુત્તોતિ? ન હેવં વત્તબ્બે. સઙ્ખારક્ખન્ધો ચિત્તવિપ્પયુત્તોતિ? આમન્તા. વેદનાક્ખન્ધો સઞ્ઞાક્ખન્ધો ચિત્તવિપ્પયુત્તોતિ? ન હેવં વત્તબ્બે…પે….
કામરાગાનુસયો સઙ્ખારક્ખન્ધપરિયાપન્નો ચિત્તવિપ્પયુત્તોતિ? આમન્તા. કામરાગો સઙ્ખારક્ખન્ધપરિયાપન્નો ચિત્તવિપ્પયુત્તોતિ? ન હેવં વત્તબ્બે…પે… કામરાગો સઙ્ખારક્ખન્ધપરિયાપન્નો ચિત્તસમ્પયુત્તોતિ? આમન્તા. કામરાગાનુસયો સઙ્ખારક્ખન્ધપરિયાપન્નો ચિત્તસમ્પયુત્તોતિ? ન હેવં વત્તબ્બે…પે….
કામરાગાનુસયો સઙ્ખારક્ખન્ધપરિયાપન્નો ચિત્તવિપ્પયુત્તો, કામરાગો સઙ્ખારક્ખન્ધપરિયાપન્નો ચિત્તસમ્પયુત્તોતિ? આમન્તા. સઙ્ખારક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? ન હેવં વત્તબ્બે…પે….
સઙ્ખારક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? આમન્તા. વેદનાક્ખન્ધો સઞ્ઞાક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? ન હેવં વત્તબ્બે…પે….
૬૧૧. પટિઘાનુસયો માનાનુસયો દિટ્ઠાનુસયો વિચિકિચ્છાનુસયો ભવરાગાનુસયો અવિજ્જાનુસયો ચિત્તવિપ્પયુત્તોતિ? આમન્તા. અવિજ્જા અવિજ્જોઘો અવિજ્જાયોગો અવિજ્જાનીવરણં ચિત્તવિપ્પયુત્તન્તિ? ન હેવં વત્તબ્બે…પે… અવિજ્જા અવિજ્જોઘો અવિજ્જાયોગો અવિજ્જાનીવરણં ચિત્તસમ્પયુત્તન્તિ? આમન્તા. અવિજ્જાનુસયો ચિત્તસમ્પયુત્તોતિ? ન હેવં વત્તબ્બે…પે….
૬૧૨. અવિજ્જાનુસયો ચિત્તવિપ્પયુત્તોતિ? આમન્તા. કતમક્ખન્ધપરિયાપન્નોતિ? સઙ્ખારક્ખન્ધપરિયાપન્નોતિ. સઙ્ખારક્ખન્ધો ચિત્તવિપ્પયુત્તોતિ? ન હેવં વત્તબ્બે. સઙ્ખારક્ખન્ધો ચિત્તવિપ્પયુત્તોતિ? આમન્તા. વેદનાક્ખન્ધો સઞ્ઞાક્ખન્ધો ચિત્તવિપ્પયુત્તોતિ? ન હેવં વત્તબ્બે…પે….
અવિજ્જાનુસયો સઙ્ખારક્ખન્ધપરિયાપન્નો ચિત્તવિપ્પયુત્તોતિ? આમન્તા. અવિજ્જા સઙ્ખારક્ખન્ધપરિયાપન્ના ચિત્તવિપ્પયુત્તાતિ? ન હેવં વત્તબ્બે…પે… અવિજ્જા સઙ્ખારક્ખન્ધપરિયાપન્ના ચિત્તસમ્પયુત્તાતિ? આમન્તા. અવિજ્જાનુસયો સઙ્ખારક્ખન્ધપરિયાપન્નો ચિત્તસમ્પયુત્તોતિ? ન હેવં વત્તબ્બે…પે….
અવિજ્જાનુસયો સઙ્ખારક્ખન્ધપરિયાપન્નો ચિત્તવિપ્પયુત્તો, અવિજ્જાસઙ્ખારક્ખન્ધપરિયાપન્ના ચિત્તસમ્પયુત્તાતિ? આમન્તા. સઙ્ખારક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? ન હેવં વત્તબ્બે.
સઙ્ખારક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? આમન્તા. વેદનાક્ખન્ધો સઞ્ઞાક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? ન હેવં વત્તબ્બે…પે….
૬૧૩. ન વત્તબ્બં – ‘‘અનુસયા ચિત્તવિપ્પયુત્તા’’તિ? આમન્તા. પુથુજ્જનો કુસલાબ્યાકતે ચિત્તે વત્તમાને ‘‘સાનુસયો’’તિ વત્તબ્બોતિ? આમન્તા. અનુસયા તેન ચિત્તેન સમ્પયુત્તાતિ? ન હેવં વત્તબ્બે. તેન હિ અનુસયા ચિત્તવિપ્પયુત્તાતિ. પુથુજ્જનો કુસલાબ્યાકતે ચિત્તે વત્તમાને ‘‘સરાગો’’તિ વત્તબ્બોતિ? આમન્તા. રાગો તેન ચિત્તેન સમ્પયુત્તોતિ? ન હેવં વત્તબ્બે. તેન હિ રાગો ચિત્તવિપ્પયુત્તોતિ.
તિસ્સોપિ અનુસયકથા નિટ્ઠિતા.
૧૧. એકાદસમવગ્ગો
(૧૦૯) ૪. ઞાણકથા
૬૧૪. અઞ્ઞાણે વિગતે ઞાણવિપ્પયુત્તે ચિત્તે વત્તમાને ન વત્તબ્બં – ‘‘ઞાણી’’તિ? આમન્તા. રાગે વિગતે ન વત્તબ્બં – ‘‘વીતરાગો’’તિ? ન હેવં વત્તબ્બે…પે… અઞ્ઞાણે વિગતે ઞાણવિપ્પયુત્તે ચિત્તે વત્તમાને ન વત્તબ્બં – ‘‘ઞાણી’’તિ? આમન્તા. દોસે વિગતે… મોહે વિગતે… કિલેસે વિગતે ન વત્તબ્બં – ‘‘નિક્કિલેસો’’તિ? ન હેવં વત્તબ્બે…પે….
રાગે વિગતે વત્તબ્બં – ‘‘વીતરાગો’’તિ? આમન્તા. અઞ્ઞાણે વિગતે ઞાણવિપ્પયુત્તે ચિત્તે વત્તમાને વત્તબ્બં – ‘‘ઞાણી’’તિ? ન હેવં વત્તબ્બે…પે… દોસે વિગતે… મોહે વિગતે… કિલેસે વિગતે વત્તબ્બં – ‘‘નિક્કિલેસો’’તિ? આમન્તા. અઞ્ઞાણે વિગતે ઞાણવિપ્પયુત્તે ચિત્તે વત્તમાને વત્તબ્બં – ‘‘ઞાણી’’તિ? ન હેવં વત્તબ્બે…પે….
૬૧૫. અઞ્ઞાણે વિગતે ઞાણવિપ્પયુત્તે ચિત્તે વત્તમાને વત્તબ્બં – ‘‘ઞાણી’’તિ? આમન્તા. અતીતેન ઞાણેન ઞાણી નિરુદ્ધેન વિગતેન પટિપસ્સદ્ધેન ઞાણેન ઞાણીતિ? ન હેવં વત્તબ્બે…પે….
ઞાણકથા નિટ્ઠિતા.
૧૧. એકાદસમવગ્ગો
(૧૧૦) ૫. ઞાણં ચિત્તવિપ્પયુત્તન્તિકથા
૬૧૬. ઞાણં ચિત્તવિપ્પયુત્તન્તિ? આમન્તા. રૂપં નિબ્બાનં ચક્ખાયતનં…પે… ફોટ્ઠબ્બાયતનન્તિ? ન હેવં વત્તબ્બે…પે… ઞાણં ચિત્તવિપ્પયુત્તન્તિ? આમન્તા. પઞ્ઞા પઞ્ઞિન્દ્રિયં પઞ્ઞાબલં સમ્માદિટ્ઠિ ધમ્મવિચયસમ્બોજ્ઝઙ્ગો ચિત્તવિપ્પયુત્તોતિ? ન હેવં વત્તબ્બે…પે… પઞ્ઞા પઞ્ઞિન્દ્રિયં પઞ્ઞાબલં સમ્માદિટ્ઠિ ધમ્મવિચયસમ્બોજ્ઝઙ્ગો ચિત્તસમ્પયુત્તોતિ? આમન્તા. ઞાણં ચિત્તસમ્પયુત્તન્તિ? ન હેવં વત્તબ્બે…પે….
ઞાણં ચિત્તવિપ્પયુત્તન્તિ? આમન્તા. કતમક્ખન્ધપરિયાપન્નન્તિ? સઙ્ખારક્ખન્ધપરિયાપન્નન્તિ. સઙ્ખારક્ખન્ધો ચિત્તવિપ્પયુત્તોતિ? ન હેવં વત્તબ્બે…પે… સઙ્ખારક્ખન્ધો ચિત્તવિપ્પયુત્તોતિ? આમન્તા. વેદનાક્ખન્ધો સઞ્ઞાક્ખન્ધો ચિત્તવિપ્પયુત્તોતિ? ન હેવં વત્તબ્બે…પે… ઞાણં સઙ્ખારક્ખન્ધપરિયાપન્નં ચિત્તવિપ્પયુત્તન્તિ? આમન્તા. પઞ્ઞા સઙ્ખારક્ખન્ધપરિયાપન્ના ચિત્તવિપ્પયુત્તાતિ? ન હેવં વત્તબ્બે…પે… પઞ્ઞા સઙ્ખારક્ખન્ધપરિયાપન્ના ચિત્તસમ્પયુત્તાતિ? આમન્તા. ઞાણં સઙ્ખારક્ખન્ધપરિયાપન્નં ચિત્તસમ્પયુત્તન્તિ? ન હેવં વત્તબ્બે…પે… ઞાણં સઙ્ખારક્ખન્ધપરિયાપન્નં ચિત્તવિપ્પયુત્તં, પઞ્ઞા સઙ્ખારક્ખન્ધપરિયાપન્ના ચિત્તસમ્પયુત્તાતિ? આમન્તા. સઙ્ખારક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? ન હેવં વત્તબ્બે…પે… સઙ્ખારક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? આમન્તા. વેદનાક્ખન્ધો સઞ્ઞાક્ખન્ધો એકદેસો ચિત્તસમ્પયુત્તો એકદેસો ચિત્તવિપ્પયુત્તોતિ? ન હેવં વત્તબ્બે…પે….
૬૧૭. ન વત્તબ્બં – ‘‘ઞાણં ચિત્તવિપ્પયુત્ત’’ન્તિ? આમન્તા. અરહા ચક્ખુવિઞ્ઞાણસમઙ્ગી ‘‘ઞાણી’’તિ વત્તબ્બોતિ? આમન્તા. ઞાણં તેન ચિત્તેન સમ્પયુત્તન્તિ? ન હેવં વત્તબ્બે. તેન હિ ઞાણં ચિત્તવિપ્પયુત્તન્તિ.
અરહા ચક્ખુવિઞ્ઞાણસમઙ્ગી ‘‘પઞ્ઞવા’’તિ વત્તબ્બોતિ [સકવાદીપુચ્છા વિય દિસ્સતિ]? આમન્તા. પઞ્ઞા તેન ચિત્તેન સમ્પયુત્તાતિ? ન હેવં વત્તબ્બે. તેન હિ પઞ્ઞા ચિત્તવિપ્પયુત્તાતિ.
ઞાણં ચિત્તવિપ્પયુત્તન્તિકથા નિટ્ઠિતા.
૧૧. એકાદસમવગ્ગો
(૧૧૧) ૬. ઇદં દુક્ખન્તિકથા
૬૧૮. ‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. ‘‘અયં દુક્ખસમુદયો’’તિ વાચં ભાસતો ‘‘અયં દુક્ખસમુદયો’’તિ ઞાણં પવત્તતીતિ? ન હેવં વત્તબ્બે…પે… ‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. ‘‘અયં દુક્ખનિરોધો’’તિ વાચં ભાસતો ‘‘અયં દુક્ખનિરોધો’’તિ ઞાણં પવત્તતીતિ? ન હેવં વત્તબ્બે…પે… ‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. ‘‘અયં મગ્ગો’’તિ વાચં ભાસતો ‘‘અયં મગ્ગો’’તિ ઞાણં પવત્તતીતિ? ન હેવં વત્તબ્બે…પે….
‘‘અયં સમુદયો’’તિ વાચં ભાસતો ન ચ ‘‘અયં સમુદયો’’તિ ઞાણં પવત્તતીતિ? આમન્તા. ‘‘ઇદં દુક્ખ’’ન્તિ વાચં ભાસતો ન ચ ‘‘ઇદં દુક્ખ’’ન્તિ ઞાણં પવત્તતીતિ? ન હેવં વત્તબ્બે…પે… ‘‘અયં નિરોધો’’તિ… ‘‘અયં મગ્ગો’’તિ વાચં ભાસતો ન ચ ‘‘અયં મગ્ગો’’તિ ઞાણં પવત્તતીતિ? આમન્તા. ‘‘ઇદં દુક્ખ’’ન્તિ વાચં ભાસતો ન ચ ‘‘ઇદં દુક્ખ’’ન્તિ ઞાણં પવત્તતીતિ? ન હેવં વત્તબ્બે…પે….
૬૧૯. ‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. ‘‘રૂપં અનિચ્ચ’’ન્તિ વાચં ભાસતો ‘‘રૂપં અનિચ્ચ’’ન્તિ ઞાણં પવત્તતીતિ? ન હેવં વત્તબ્બે…પે… ‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. વેદના… સઞ્ઞા… સઙ્ખારા… ‘‘વિઞ્ઞાણં અનિચ્ચ’’ન્તિ વાચં ભાસતો ‘‘વિઞ્ઞાણં અનિચ્ચ’’ન્તિ ઞાણં પવત્તતીતિ? ન હેવં વત્તબ્બે…પે….
‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. ‘‘રૂપં અનત્તા’’તિ વાચં ભાસતો ‘‘રૂપં અનત્તા’’તિ ઞાણં પવત્તતીતિ? ન હેવં વત્તબ્બે…પે… ‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. વેદના … સઞ્ઞા… સઙ્ખારા… ‘‘વિઞ્ઞાણં અનત્તા’’તિ વાચં ભાસતો ‘‘વિઞ્ઞાણં અનત્તા’’તિ ઞાણં પવત્તતીતિ? ન હેવં વત્તબ્બે…પે….
‘‘રૂપં અનિચ્ચ’’ન્તિ વાચં ભાસતો ન ચ ‘‘રૂપં અનિચ્ચ’’ન્તિ ઞાણં પવત્તતીતિ? આમન્તા. ‘‘ઇદં દુક્ખ’’ન્તિ વાચં ભાસતો ન ચ ‘‘ઇદં દુક્ખ’’ન્તિ ઞાણં પવત્તતીતિ? ન હેવં વત્તબ્બે…પે… વેદના… સઞ્ઞા… સઙ્ખારા… ‘‘વિઞ્ઞાણં અનિચ્ચ’’ન્તિ વાચં ભાસતો ન ચ ‘‘વિઞ્ઞાણં અનિચ્ચ’’ન્તિ ઞાણં પવત્તતીતિ? આમન્તા. ‘‘ઇદં દુક્ખ’’ન્તિ વાચં ભાસતો ન ચ ‘‘ઇદં દુક્ખ’’ન્તિ ઞાણં પવત્તતીતિ? ન હેવં વત્તબ્બે…પે….
‘‘રૂપં અનત્તા’’તિ વાચં ભાસતો ન ચ ‘‘રૂપં અનત્તા’’તિ ઞાણં પવત્તતીતિ? આમન્તા. ‘‘ઇદં દુક્ખ’’ન્તિ વાચં ભાસતો ન ચ ‘‘ઇદં દુક્ખ’’ન્તિ ઞાણં પવત્તતીતિ? ન હેવં વત્તબ્બે …પે… વેદના… સઞ્ઞા… સઙ્ખારા… ‘‘વિઞ્ઞાણં અનત્તા’’તિ વાચં ભાસતો ન ચ ‘‘વિઞ્ઞાણં અનત્તા’’તિ ઞાણં પવત્તતીતિ? આમન્તા. ‘‘ઇદં દુક્ખ’’ન્તિ વાચં ભાસતો ન ચ ‘‘દુક્ખ’’ન્તિ ઞાણં પવત્તતીતિ? ન હેવં વત્તબ્બે…પે….
૬૨૦. ‘‘ઇદં દુક્ખ’’ન્તિ વાચં ભાસતો ‘‘ઇદં દુક્ખ’’ન્તિ ઞાણં પવત્તતીતિ? આમન્તા. ‘‘ઇ’’તિ [ઈતિ (સ્યા. પી.)] ચ ‘‘દ’’ન્તિ ચ ‘‘દુ’’તિ [દૂતિ (સ્યા. પી.)] ચ ‘‘ખ’’ન્તિ ચ ઞાણં પવત્તતીતિ? ન હેવં વત્તબ્બે…પે….
ઇદં દુક્ખન્તિકથા નિટ્ઠિતા.
૧૧. એકાદસમવગ્ગો
(૧૧૨) ૭. ઇદ્ધિબલકથા
૬૨૧. ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. ઇદ્ધિમયિકો સો આયુ, ઇદ્ધિમયિકા સા ગતિ, ઇદ્ધિમયિકો સો અત્તભાવપ્પટિલાભોતિ? ન હેવં વત્તબ્બે…પે….
ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. અતીતં કપ્પં તિટ્ઠેય્ય, અનાગતં કપ્પં તિટ્ઠેય્યાતિ? ન હેવં વત્તબ્બે…પે… ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. દ્વે કપ્પે તિટ્ઠેય્ય, તયો કપ્પે તિટ્ઠેય્ય, ચત્તારો કપ્પે તિટ્ઠેય્યાતિ? ન હેવં વત્તબ્બે…પે… ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. સતિ જીવિતે જીવિતાવસેસે તિટ્ઠેય્ય, અસતિ જીવિતે જીવિતાવસેસે તિટ્ઠેય્યાતિ? સતિ જીવિતે જીવિતાવસેસે તિટ્ઠેય્યાતિ. હઞ્ચિ સતિ જીવિતે જીવિતાવસેસે તિટ્ઠેય્ય, નો ચ વત રે વત્તબ્બે – ‘‘ઇદ્ધિબલેન સમન્નાગતો કપ્પં તિટ્ઠેય્યા’’તિ. અસતિ જીવિતે જીવિતાવસેસે તિટ્ઠેય્યાતિ, મતો તિટ્ઠેય્ય, કાલઙ્કતો તિટ્ઠેય્યાતિ? ન હેવં વત્તબ્બે…પે….
૬૨૨. ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. ઉપ્પન્નો ફસ્સો મા નિરુજ્ઝીતિ લબ્ભા ઇદ્ધિયા પગ્ગહેતુન્તિ? ન હેવં વત્તબ્બે…પે… ઉપ્પન્ના વેદના…પે… ઉપ્પન્ના સઞ્ઞા …પે… ઉપ્પન્ના ચેતના…પે… ઉપ્પન્નં ચિત્તં… ઉપ્પન્ના સદ્ધા… ઉપ્પન્નં વીરિયં… ઉપ્પન્ના સતિ… ઉપ્પન્નો સમાધિ …પે… ઉપ્પન્ના પઞ્ઞા મા નિરુજ્ઝીતિ લબ્ભા ઇદ્ધિયા પગ્ગહેતુન્તિ? ન હેવં વત્તબ્બે…પે….
ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. રૂપં નિચ્ચં હોતૂતિ લબ્ભા ઇદ્ધિયા પગ્ગહેતુન્તિ? ન હેવં વત્તબ્બે…પે… વેદના…પે… સઞ્ઞા… સઙ્ખારા… વિઞ્ઞાણં નિચ્ચં હોતૂતિ લબ્ભા ઇદ્ધિયા પગ્ગહેતુન્તિ? ન હેવં વત્તબ્બે…પે….
ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. જાતિધમ્મા સત્તા મા જાયિંસૂતિ લબ્ભા ઇદ્ધિયા પગ્ગહેતુન્તિ? ન હેવં વત્તબ્બે…પે… જરાધમ્મા સત્તા મા જીરિંસૂતિ…પે… બ્યાધિધમ્મા સત્તા મા બ્યાધિયિંસૂતિ…પે… મરણધમ્મા સત્તા મા મીયિંસૂતિ લબ્ભા ઇદ્ધિયા પગ્ગહેતુન્તિ? ન હેવં વત્તબ્બે…પે….
૬૨૩. ન વત્તબ્બં – ‘‘ઇદ્ધિબલેન સમન્નાગતો કપ્પં તિટ્ઠેય્યા’’તિ? આમન્તા. નનુ વુત્તં ભગવતા – ‘‘યસ્સ કસ્સચિ, આનન્દ, ચત્તારો ઇદ્ધિપાદા ભાવિતા બહુલીકતા યાનીકતા વત્થુકતા અનુટ્ઠિતા પરિચિતા સુસમારદ્ધા, સો આકઙ્ખમાનો કપ્પં વા તિટ્ઠેય્ય કપ્પાવસેસં વા’’તિ [દી. નિ. ૨.૧૬૬; સં. નિ. ૫.૮૨૨; ઉદા. ૫૧]! અત્થેવ સુત્તન્તોતિ? આમન્તા. તેન હિ ઇદ્ધિબલેન સમન્નાગતો કપ્પં તિટ્ઠેય્યાતિ.
૬૨૪. ઇદ્ધિબલેન સમન્નાગતો કપ્પં તિટ્ઠેય્યાતિ? આમન્તા. નનુ વુત્તં ભગવતા – ‘‘ચતુન્નં, ભિક્ખવે, ધમ્માનં નત્થિ કોચિ પાટિભોગો સમણો વા બ્રાહ્મણો વા દેવો વા મારો વા બ્રહ્મા વા કોચિ વા લોકસ્મિં! કતમેસં ચતુન્નં? જરાધમ્મો ‘‘મા જીરી’’તિ નત્થિ કોચિ પાટિભોગો સમણો વા બ્રાહ્મણો વા દેવો વા મારો વા બ્રહ્મા વા કોચિ વા લોકસ્મિં. બ્યાધિધમ્મો ‘‘મા બ્યાધિયી’’તિ…પે… મરણધમ્મો ‘‘મા મીયી’’તિ…પે… યાનિ ખો પન તાનિ પુબ્બે કતાનિ પાપકાનિ કમ્માનિ સંકિલેસિકાનિ પોનોબ્ભવિકાનિ [પોનોભવિકાનિ (સી. પી.)] સદરાનિ [નિસ્સારાનિ (સી. પી. ક.), દુક્ખુદ્રયાનિ (સ્યા.)] દુક્ખવિપાકાનિ આયતિં જાતિજરામરણિયાનિ તેસં વિપાકો ‘‘મા નિબ્બત્તી’’તિ નત્થિ કોચિ પાટિભોગો સમણો વા બ્રાહ્મણો વા દેવો વા મારો વા બ્રહ્મા વા કોચિ વા લોકસ્મિં. ઇમેસં ખો, ભિક્ખવે, ચતુન્નં ધમ્માનં નત્થિ કોચિ પાટિભોગો સમણો વા બ્રાહ્મણો વા દેવો વા મારો વા બ્રહ્મા વા કોચિ વા લોકસ્મિ’’ન્તિ [અ. નિ. ૪.૧૮૨]. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ઇદ્ધિબલેન સમન્નાગતો કપ્પં તિટ્ઠેય્યા’’તિ.
ઇદ્ધિબલકથા નિટ્ઠિતા.
૧૧. એકાદસમવગ્ગો
(૧૧૩) ૮. સમાધિકથા
૬૨૫. ચિત્તસન્તતિ સમાધીતિ? આમન્તા. અતીતા ચિત્તસન્તતિ સમાધીતિ? ન હેવં વત્તબ્બે …પે… ચિત્તસન્તતિ સમાધીતિ? આમન્તા. અનાગતા ચિત્તસન્તતિ સમાધીતિ? ન હેવં વત્તબ્બે…પે… ચિત્તસન્તતિ સમાધીતિ? આમન્તા. નનુ અતીતં નિરુદ્ધં અનાગતં અજાતન્તિ? આમન્તા. હઞ્ચિ અતીતં નિરુદ્ધં અનાગતં અજાતં, નો ચ વત રે વત્તબ્બે – ‘‘ચિત્તસન્તતિ સમાધી’’તિ.
૬૨૬. એકચિત્તક્ખણિકો સમાધીતિ? આમન્તા. ચક્ખુવિઞ્ઞાણસમઙ્ગી સમાપન્નોતિ? ન હેવં વત્તબ્બે…પે… સોતવિઞ્ઞાણસમઙ્ગી…પે… ઘાનવિઞ્ઞાણસમઙ્ગી… જિવ્હાવિઞ્ઞાણસમઙ્ગી… કાયવિઞ્ઞાણસમઙ્ગી…પે… અકુસલચિત્તસમઙ્ગી …પે… રાગસહગતચિત્તસમઙ્ગી…પે… દોસસહગતચિત્તસમઙ્ગી…પે… મોહસહગતચિત્તસમઙ્ગી…પે… અનોત્તપ્પસહગતચિત્તસમઙ્ગી સમાપન્નોતિ? ન હેવં વત્તબ્બે…પે….
ચિત્તસન્તતિ સમાધીતિ? આમન્તા. અકુસલચિત્તસન્તતિ સમાધીતિ? ન હેવં વત્તબ્બે…પે… રાગસહગતા…પે… દોસસહગતા…પે… મોહસહગતા…પે… અનોત્તપ્પસહગતા ચિત્તસન્તતિ સમાધીતિ? ન હેવં વત્તબ્બે…પે….
ન વત્તબ્બં – ‘‘ચિત્તસન્તતિ સમાધી’’તિ? આમન્તા. નનુ વુત્તં ભગવતા – ‘‘અહં ખો, આવુસો નિગણ્ઠા, પહોમિ અનિઞ્જમાનો કાયેન, અભાસમાનો વાચં, સત્ત રત્તિન્દિવાનિ [રત્તિદિવાનિ (ક.)] એકન્તસુખં પટિસંવેદી વિહરિતુ’’ન્તિ [મ. નિ. ૧.૧૮૦]! અત્થેવ સુત્તન્તોતિ? આમન્તા. તેન હિ ચિત્તસન્તતિ સમાધીતિ.
સમાધિકથા નિટ્ઠિતા.
૧૧. એકાદસમવગ્ગો
(૧૧૪) ૯. ધમ્મટ્ઠિતતાકથા
૬૨૭. ધમ્મટ્ઠિતતા પરિનિપ્ફન્નાતિ? આમન્તા. તાય ઠિતતા પરિનિપ્ફન્નાતિ? ન હેવં વત્તબ્બે…પે… તાય ઠિતતા પરિનિપ્ફન્નાતિ? આમન્તા. તાય તાયેવ નત્થિ દુક્ખસ્સન્તકિરિયા, નત્થિ વટ્ટુપચ્છેદો, નત્થિ અનુપાદાપરિનિબ્બાનન્તિ? ન હેવં વત્તબ્બે…પે….
રૂપસ્સ ઠિતતા પરિનિપ્ફન્નાતિ? આમન્તા. તાય ઠિતતા પરિનિપ્ફન્નાતિ? ન હેવં વત્તબ્બે…પે… તાય ઠિતતા પરિનિપ્ફન્નાતિ? આમન્તા. તાય તાયેવ નત્થિ દુક્ખસ્સન્તકિરિયા, નત્થિ વટ્ટુપચ્છેદો, નત્થિ અનુપાદાપરિનિબ્બાનન્તિ? ન હેવં વત્તબ્બે…પે….
વેદનાય ઠિતતા…પે… સઞ્ઞાય ઠિતતા…પે… સઙ્ખારાનં ઠિતતા…પે… વિઞ્ઞાણસ્સ ઠિતતા પરિનિપ્ફન્નાતિ? આમન્તા. તાય ઠિતતા પરિનિપ્ફન્નાતિ? ન હેવં વત્તબ્બે…પે… તાય ઠિતતા પરિનિપ્ફન્નાતિ? આમન્તા. તાય તાયેવ નત્થિ દુક્ખસ્સન્તકિરિયા, નત્થિ વટ્ટુપચ્છેદો, નત્થિ અનુપાદાપરિનિબ્બાનન્તિ? ન હેવં વત્તબ્બે…પે….
ધમ્મટ્ઠિતતાકથા નિટ્ઠિતા.
૧૧. એકાદસમવગ્ગો
(૧૧૫) ૧૦. અનિચ્ચતાકથા
૬૨૮. અનિચ્ચતા પરિનિપ્ફન્નાતિ? આમન્તા. તાય અનિચ્ચતાય અનિચ્ચતા પરિનિપ્ફન્નાતિ? ન હેવં વત્તબ્બે…પે… તાય અનિચ્ચતાય અનિચ્ચતા પરિનિપ્ફન્નાતિ? આમન્તા. તાય તાયેવ નત્થિ દુક્ખસ્સન્તકિરિયા, નત્થિ વટ્ટુપચ્છેદો, નત્થિ અનુપાદાપરિનિબ્બાનન્તિ? ન હેવં વત્તબ્બે.
જરા પરિનિપ્ફન્નાતિ? આમન્તા. તાય જરાય જરા પરિનિપ્ફન્નાતિ? ન હેવં વત્તબ્બે…પે… તાય જરાય જરા પરિનિપ્ફન્નાતિ? આમન્તા. તાય તાયેવ નત્થિ દુક્ખસ્સન્તકિરિયા, નત્થિ વટ્ટુપચ્છેદો, નત્થિ અનુપાદાપરિનિબ્બાનન્તિ? ન હેવં વત્તબ્બે…પે….
મરણં પરિનિપ્ફન્નન્તિ? આમન્તા. તસ્સ મરણસ્સ મરણં પરિનિપ્ફન્નન્તિ? ન હેવં વત્તબ્બે. તસ્સ મરણસ્સ મરણં પરિનિપ્ફન્નન્તિ? આમન્તા. તસ્સ તસ્સેવ નત્થિ દુક્ખસ્સન્તકિરિયા, નત્થિ વટ્ટુપચ્છેદો, નત્થિ અનુપાદાપરિનિબ્બાનન્તિ? ન હેવં વત્તબ્બે…પે….
૬૨૯. રૂપં પરિનિપ્ફન્નં, રૂપસ્સ અનિચ્ચતા અત્થીતિ? આમન્તા. અનિચ્ચતા પરિનિપ્ફન્ના, અનિચ્ચતાય અનિચ્ચતા અત્થીતિ? ન હેવં વત્તબ્બે…પે… રૂપં પરિનિપ્ફન્નં, રૂપસ્સ જરા અત્થીતિ? આમન્તા. જરા પરિનિપ્ફન્ના, જરાય જરા અત્થીતિ? ન હેવં વત્તબ્બે…પે….
રૂપં પરિનિપ્ફન્નં, રૂપસ્સ ભેદો અત્થિ, અન્તરધાનં અત્થીતિ? આમન્તા. મરણં પરિનિપ્ફન્નં, મરણસ્સ ભેદો અત્થિ, અન્તરધાનં અત્થીતિ? ન હેવં વત્તબ્બે…પે….
વેદના …પે… સઞ્ઞા… સઙ્ખારા…પે… વિઞ્ઞાણં પરિનિપ્ફન્નં, વિઞ્ઞાણસ્સ અનિચ્ચતા અત્થીતિ? આમન્તા. અનિચ્ચતા પરિનિપ્ફન્ના, અનિચ્ચતાય અનિચ્ચતા અત્થીતિ? ન હેવં વત્તબ્બે …પે… વિઞ્ઞાણં પરિનિપ્ફન્નં, વિઞ્ઞાણસ્સ જરા અત્થીતિ? આમન્તા. જરા પરિનિપ્ફન્ના, જરાય જરા અત્થીતિ? ન હેવં વત્તબ્બે…પે….
વિઞ્ઞાણં પરિનિપ્ફન્નં, વિઞ્ઞાણસ્સ ભેદો અત્થિ, અન્તરધાનં અત્થીતિ? આમન્તા. મરણં પરિનિપ્ફન્નં, મરણસ્સ ભેદો અત્થિ, અન્તરધાનં અત્થીતિ? ન હેવં વત્તબ્બે…પે….
અનિચ્ચતાકથા નિટ્ઠિતા.
એકાદસમવગ્ગો.
તસ્સુદ્દાનં –
અનુસયા અબ્યાકતા, અહેતુકા, ચિત્તવિપ્પયુત્તા, અઞ્ઞાણે વિગતે ઞાણી, ઞાણં ચિત્તવિપ્પયુત્તં, યત્થ સદ્દે [યત્થ સદ્દો (સી.), યથાસદ્દં (?)] ઞાણં પવત્તતિ, ઇદ્ધિબલેન સમન્નાગતો કપ્પં તિટ્ઠેય્ય, ચિત્તસન્તતિ સમાધિ, ધમ્મટ્ઠિતતા, અનિચ્ચતાતિ.