૧૦. દસમવગ્ગો
(૯૫) ૧. નિરોધકથા
૫૭૧. ઉપપત્તેસિયે પઞ્ચક્ખન્ધે અનિરુદ્ધે કિરિયા પઞ્ચક્ખન્ધા ઉપ્પજ્જન્તીતિ? આમન્તા. દસન્નં ખન્ધાનં સમોધાનં હોતિ, દસ ખન્ધા સમ્મુખીભાવં આગચ્છન્તીતિ? ન હેવં વત્તબ્બે…પે… દસન્નં ખન્ધાનં સમોધાનં હોતિ, દસ ખન્ધા સમ્મુખીભાવં આગચ્છન્તીતિ? આમન્તા. દ્વિન્નં ફસ્સાનં…પે… દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે….
ઉપપત્તેસિયે પઞ્ચક્ખન્ધે અનિરુદ્ધે કિરિયા ચત્તારો ખન્ધા ઉપ્પજ્જન્તીતિ? આમન્તા. નવન્નં ખન્ધાનં સમોધાનં હોતિ, નવ ખન્ધા સમ્મુખીભાવં આગચ્છન્તીતિ? ન હેવં વત્તબ્બે…પે… નવન્નં ખન્ધાનં સમોધાનં હોતિ, નવ ખન્ધા સમ્મુખીભાવં આગચ્છન્તીતિ? આમન્તા. દ્વિન્નં ફસ્સાનં…પે… દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે….
ઉપપત્તેસિયે પઞ્ચક્ખન્ધે અનિરુદ્ધે કિરિયાઞાણં ઉપ્પજ્જતીતિ? આમન્તા. છન્નં ખન્ધાનં સમોધાનં હોતિ, છ ખન્ધા સમ્મુખીભાવં આગચ્છન્તીતિ? ન હેવં વત્તબ્બે…પે… છન્નં ખન્ધાનં સમોધાનં હોતિ, છ ખન્ધા સમ્મુખીભાવં આગચ્છન્તીતિ? આમન્તા. દ્વિન્નં ફસ્સાનં…પે… દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે….
૫૭૨. ઉપપત્તેસિયે પઞ્ચક્ખન્ધે નિરુદ્ધે મગ્ગો ઉપ્પજ્જતીતિ? આમન્તા. મતો મગ્ગં ભાવેતિ, કાલઙ્કતો મગ્ગં ભાવેતીતિ? ન હેવં વત્તબ્બે…પે….
નિરોધકથા નિટ્ઠિતા.
૧૦. દસમવગ્ગો
(૯૬) ૨. રૂપં મગ્ગોતિકથા
૫૭૩. મગ્ગસમઙ્ગિસ્સ રૂપં મગ્ગોતિ? આમન્તા. સારમ્મણં, અત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધીતિ? ન હેવં વત્તબ્બે…પે… નનુ અનારમ્મણં, નત્થિ તસ્સ આવટ્ટના…પે… પણિધીતિ? આમન્તા. હઞ્ચિ અનારમ્મણં, નત્થિ તસ્સ આવટ્ટના…પે… પણિધિ; નો ચ વત રે વત્તબ્બે – ‘‘મગ્ગસમઙ્ગિસ્સ રૂપં મગ્ગો’’તિ.
સમ્માવાચા મગ્ગોતિ? આમન્તા. સારમ્મણા, અત્થિ તાય આવટ્ટના…પે… પણિધીતિ? ન હેવં વત્તબ્બે…પે… નનુ અનારમ્મણા, નત્થિ તાય આવટ્ટના…પે… પણિધીતિ? આમન્તા. હઞ્ચિ અનારમ્મણા, નત્થિ તાય આવટ્ટના…પે… પણિધિ; નો ચ વત રે વત્તબ્બે – ‘‘સમ્માવાચા મગ્ગો’’તિ.
સમ્માકમ્મન્તો …પે… સમ્માઆજીવો મગ્ગોતિ? આમન્તા. સારમ્મણો, અત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે… નનુ અનારમ્મણો, નત્થિ તસ્સ આવટ્ટના…પે… પણિધીતિ? આમન્તા. હઞ્ચિ અનારમ્મણો, નત્થિ તસ્સ આવટ્ટના…પે… પણિધિ; નો ચ વત રે વત્તબ્બે – ‘‘સમ્માઆજીવો મગ્ગો’’તિ.
૫૭૪. સમ્માદિટ્ઠિ મગ્ગો, સા ચ સારમ્મણા, અત્થિ તાય આવટ્ટના…પે… પણિધીતિ? આમન્તા. સમ્માવાચા મગ્ગો, સા ચ સારમ્મણા, અત્થિ તાય આવટ્ટના…પે… પણિધીતિ? ન હેવં વત્તબ્બે …પે… સમ્માદિટ્ઠિ મગ્ગો, સા ચ સારમ્મણા, અત્થિ તાય આવટ્ટના…પે… પણિધીતિ? આમન્તા. સમ્માકમ્મન્તો…પે… સમ્માઆજીવો મગ્ગો, સો ચ સારમ્મણો, અત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે… સમ્માસઙ્કપ્પો…પે… સમ્માવાયામો…પે… સમ્માસતિ…પે….
સમ્માસમાધિ મગ્ગો, સો ચ સારમ્મણો, અત્થિ તસ્સ આવટ્ટના…પે… પણિધીતિ? આમન્તા. સમ્માવાચા મગ્ગો, સા ચ સારમ્મણા, અત્થિ તાય આવટ્ટના…પે… પણિધીતિ? ન હેવં વત્તબ્બે…પે… સમ્માસમાધિ મગ્ગો, સો ચ સારમ્મણો, અત્થિ તસ્સ આવટ્ટના…પે… પણિધીતિ? આમન્તા. સમ્માકમ્મન્તો…પે… સમ્માઆજીવો મગ્ગો, સો ચ સારમ્મણો, અત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….
સમ્માવાચા મગ્ગો, સા ચ અનારમ્મણા, નત્થિ તાય આવટ્ટના…પે… પણિધીતિ? આમન્તા. સમ્માદિટ્ઠિ મગ્ગો, સા ચ અનારમ્મણા, નત્થિ તાય આવટ્ટના…પે… પણિધીતિ? ન હેવં વત્તબ્બે…પે… સમ્માવાચા મગ્ગો, સા ચ અનારમ્મણા, નત્થિ તાય આવટ્ટના…પે… પણિધીતિ? આમન્તા. સમ્માસઙ્કપ્પો…પે… સમ્માવાયામો… સમ્માસતિ … સમ્માસમાધિ મગ્ગો, સો ચ અનારમ્મણો, નત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….
સમ્માકમ્મન્તો …પે… સમ્માઆજીવો મગ્ગો, સો ચ અનારમ્મણો, નત્થિ તસ્સ આવટ્ટના…પે… પણિધીતિ? આમન્તા. સમ્માદિટ્ઠિ… સમ્માસઙ્કપ્પો… સમ્માવાયામો… સમ્માસતિ…પે… સમ્માસમાધિ મગ્ગો, સો ચ અનારમ્મણો, નત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….
૫૭૫. ન વત્તબ્બં – ‘‘મગ્ગસમઙ્ગિસ્સ રૂપં મગ્ગો’’તિ? આમન્તા. નનુ સમ્માવાચા સમ્માકમ્મન્તો સમ્માઆજીવો મગ્ગોતિ? આમન્તા. હઞ્ચિ સમ્માવાચા સમ્માકમ્મન્તો સમ્માઆજીવો મગ્ગો, તેન વત રે વત્તબ્બે – ‘‘મગ્ગસમઙ્ગિસ્સ રૂપં મગ્ગો’’તિ.
રૂપં મગ્ગોતિકથા નિટ્ઠિતા.
૧૦. દસમવગ્ગો
(૯૭) ૩. પઞ્ચવિઞ્ઞાણસમઙ્ગિસ્સ મગ્ગકથા
૫૭૬. પઞ્ચવિઞ્ઞાણસમઙ્ગિસ્સ અત્થિ મગ્ગભાવનાતિ? આમન્તા. નનુ પઞ્ચવિઞ્ઞાણા ઉપ્પન્નવત્થુકા ઉપ્પન્નારમ્મણાતિ? આમન્તા. હઞ્ચિ પઞ્ચવિઞ્ઞાણા ઉપ્પન્નવત્થુકા ઉપ્પન્નારમ્મણા, નો ચ વત રે વત્તબ્બે – ‘‘પઞ્ચવિઞ્ઞાણસમઙ્ગિસ્સ અત્થિ મગ્ગભાવના’’તિ.
નનુ પઞ્ચવિઞ્ઞાણા પુરેજાતવત્થુકા પુરેજાતારમ્મણા અજ્ઝત્તિકવત્થુકા બાહિરારમ્મણા અસમ્ભિન્નવત્થુકા અસમ્ભિન્નારમ્મણા નાનાવત્થુકા નાનારમ્મણા ન અઞ્ઞમઞ્ઞસ્સ ગોચરવિસયં પચ્ચનુભોન્તિ, ન અસમન્નાહારા ઉપ્પજ્જન્તિ, ન અમનસિકારા ઉપ્પજ્જન્તિ, ન અબ્બોકિણ્ણા ઉપ્પજ્જન્તિ, ન અપુબ્બં અચરિમં ઉપ્પજ્જન્તિ, ન અઞ્ઞમઞ્ઞસ્સ સમનન્તરા ઉપ્પજ્જન્તિ, નનુ પઞ્ચવિઞ્ઞાણા અનાભોગાતિ? આમન્તા. હઞ્ચિ પઞ્ચવિઞ્ઞાણા અનાભોગા, નો ચ વત રે વત્તબ્બે – ‘‘પઞ્ચવિઞ્ઞાણસમઙ્ગિસ્સ અત્થિ મગ્ગભાવના’’તિ.
૫૭૭. ચક્ખુવિઞ્ઞાણસમઙ્ગિસ્સ અત્થિ મગ્ગભાવનાતિ? આમન્તા. ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? ન હેવં વત્તબ્બે…પે… ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? આમન્તા. ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે… ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણ’’ન્તિ.
૫૭૮. ચક્ખુવિઞ્ઞાણસમઙ્ગિસ્સ અત્થિ મગ્ગભાવનાતિ? આમન્તા. ચક્ખુવિઞ્ઞાણં અતીતાનાગતં આરબ્ભ ઉપ્પજ્જતીતિ? ન હેવં વત્તબ્બે…પે… ચક્ખુવિઞ્ઞાણસમઙ્ગિસ્સ અત્થિ મગ્ગભાવનાતિ? આમન્તા. ચક્ખુવિઞ્ઞાણં ફસ્સં આરબ્ભ…પે… વેદનં આરબ્ભ… સઞ્ઞં આરબ્ભ … ચેતનં આરબ્ભ… ચિત્તં આરબ્ભ… ચક્ખું આરબ્ભ… કાયં આરબ્ભ…પે… સદ્દં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? ન હેવં વત્તબ્બે…પે….
મનોવિઞ્ઞાણસમઙ્ગિસ્સ અત્થિ મગ્ગભાવના, મનોવિઞ્ઞાણં સુઞ્ઞતં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણસમઙ્ગિસ્સ અત્થિ મગ્ગભાવના, ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? ન હેવં વત્તબ્બે…પે… મનોવિઞ્ઞાણસમઙ્ગિસ્સ અત્થિ મગ્ગભાવના, મનોવિઞ્ઞાણં અતીતાનાગતં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણસમઙ્ગિસ્સ અત્થિ મગ્ગભાવના, ચક્ખુવિઞ્ઞાણં અતીતાનાગતં આરબ્ભ ઉપ્પજ્જતીતિ? ન હેવં વત્તબ્બે…પે… મનોવિઞ્ઞાણસમઙ્ગિસ્સ અત્થિ મગ્ગભાવના, મનોવિઞ્ઞાણં ફસ્સં આરબ્ભ… વેદનં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણસમઙ્ગિસ્સ અત્થિ મગ્ગભાવના, ચક્ખુવિઞ્ઞાણં ફસ્સં આરબ્ભ… વેદનં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? ન હેવં વત્તબ્બે…પે….
૫૭૯. ન વત્તબ્બં – ‘‘પઞ્ચવિઞ્ઞાણસમઙ્ગિસ્સ અત્થિ મગ્ગભાવના’’તિ? આમન્તા. નનુ વુત્તં ભગવતા – ‘‘ઇધ, ભિક્ખવે, ભિક્ખુ ચક્ખુના રૂપં દિસ્વા ન નિમિત્તગ્ગાહી હોતિ નાનુબ્યઞ્જનગ્ગાહી…પે… સોતેન સદ્દં સુત્વા…પે… ઘાનેન ગન્ધં ઘાયિત્વા…પે… જિવ્હાય રસં સાયિત્વા…પે… કાયેન ફોટ્ઠબ્બં ફુસિત્વા ન નિમિત્તગ્ગાહી હોતિ નાનુબ્યઞ્જનગ્ગાહી’’તિ! [મ. નિ. ૧.૩૪૯; અ. નિ. ૪.૩૭] અત્થેવ સુત્તન્તોતિ? આમન્તા. તેન હિ પઞ્ચવિઞ્ઞાણસમઙ્ગિસ્સ અત્થિ મગ્ગભાવનાતિ.
પઞ્ચવિઞ્ઞાણસમઙ્ગિસ્સ મગ્ગકથા નિટ્ઠિતા.
૧૦. દસમવગ્ગો
(૯૮) ૪. પઞ્ચવિઞ્ઞાણા કુસલાપિ અકુસલાપીતિકથા
૫૮૦. પઞ્ચવિઞ્ઞાણા કુસલાપિ અકુસલાપીતિ? આમન્તા. નનુ પઞ્ચવિઞ્ઞાણા ઉપ્પન્નવત્થુકા ઉપ્પન્નારમ્મણાતિ? આમન્તા. હઞ્ચિ પઞ્ચવિઞ્ઞાણા ઉપ્પન્નવત્થુકા ઉપ્પન્નારમ્મણા, નો ચ વત રે વત્તબ્બે – ‘‘પઞ્ચવિઞ્ઞાણા કુસલાપિ અકુસલાપી’’તિ. નનુ પઞ્ચવિઞ્ઞાણા પુરેજાતવત્થુકા પુરેજાતારમ્મણા અજ્ઝત્તિકવત્થુકા બાહિરારમ્મણા અસમ્ભિન્નવત્થુકા અસમ્ભિન્નારમ્મણા નાનાવત્થુકા નાનારમ્મણા ન અઞ્ઞમઞ્ઞસ્સ ગોચરવિસયં પચ્ચનુભોન્તિ, ન અસમન્નાહારા ઉપ્પજ્જન્તિ, ન અમનસિકારા ઉપ્પજ્જન્તિ, ન અબ્બોકિણ્ણા ઉપ્પજ્જન્તિ, ન અપુબ્બં અચરિમં ઉપ્પજ્જન્તિ, ન અઞ્ઞમઞ્ઞસ્સ સમનન્તરા ઉપ્પજ્જન્તિ, નનુ પઞ્ચવિઞ્ઞાણા અનાભોગાતિ? આમન્તા. હઞ્ચિ પઞ્ચવિઞ્ઞાણા અનાભોગા, નો ચ વત રે વત્તબ્બે – ‘‘પઞ્ચવિઞ્ઞાણા કુસલાપિ અકુસલાપી’’તિ.
૫૮૧. ચક્ખુવિઞ્ઞાણં કુસલન્તિ? આમન્તા. ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? ન હેવં વત્તબ્બે…પે… ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? આમન્તા. ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે. ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણ’’ન્તિ.
૫૮૨. ચક્ખુવિઞ્ઞાણં કુસલમ્પિ અકુસલમ્પીતિ? આમન્તા. ચક્ખુવિઞ્ઞાણં અતીતાનાગતં આરબ્ભ ઉપ્પજ્જતીતિ? ન હેવં વત્તબ્બે…પે…. ચક્ખુવિઞ્ઞાણં કુસલમ્પિ અકુસલમ્પીતિ? આમન્તા. ચક્ખુવિઞ્ઞાણં ફસ્સં આરબ્ભ…પે… ચિત્તં આરબ્ભ… ચક્ખું આરબ્ભ…પે… કાયં આરબ્ભ… સદ્દં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? ન હેવં વત્તબ્બે…પે….
મનોવિઞ્ઞાણં કુસલમ્પિ અકુસલમ્પિ, મનોવિઞ્ઞાણં સુઞ્ઞતં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણં કુસલમ્પિ અકુસલમ્પિ, ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? ન હેવં વત્તબ્બે…પે… મનોવિઞ્ઞાણં કુસલમ્પિ અકુસલમ્પિ, મનોવિઞ્ઞાણં અતીતાનાગતં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણં કુસલમ્પિ અકુસલમ્પિ, ચક્ખુવિઞ્ઞાણં અતીતાનાગતં આરબ્ભ ઉપ્પજ્જતીતિ? ન હેવં વત્તબ્બે…પે… મનોવિઞ્ઞાણં કુસલમ્પિ અકુસલમ્પિ, મનોવિઞ્ઞાણં ફસ્સં આરબ્ભ…પે… ચિત્તં આરબ્ભ…પે… કાયં આરબ્ભ … સદ્દં આરબ્ભ …પે… ફોટ્ઠબ્બં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણં કુસલમ્પિ અકુસલમ્પિ, ચક્ખુવિઞ્ઞાણં ફસ્સં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? ન હેવં વત્તબ્બે…પે….
૫૮૩. ન વત્તબ્બં – ‘‘પઞ્ચવિઞ્ઞાણા કુસલાપિ અકુસલાપી’’તિ? આમન્તા. નનુ વુત્તં ભગવતા – ‘‘ઇધ, ભિક્ખવે, ભિક્ખુ ચક્ખુના રૂપં દિસ્વા નિમિત્તગ્ગાહી હોતિ…પે… ન નિમિત્તગ્ગાહી હોતિ…પે… સોતેન સદ્દં સુત્વા…પે… કાયેન ફોટ્ઠબ્બં ફુસિત્વા નિમિત્તગ્ગાહી હોતિ…પે… ન નિમિત્તગ્ગાહી હોતી’’તિ! અત્થેવ સુત્તન્તોતિ? આમન્તા. તેન હિ પઞ્ચવિઞ્ઞાણા કુસલાપિ અકુસલાપીતિ.
પઞ્ચવિઞ્ઞાણા કુસલાપિ અકુસલાપીતિકથા નિટ્ઠિતા.
૧૦. દસમવગ્ગો
(૯૯) ૫. સાભોગાતિકથા
૫૮૪. પઞ્ચવિઞ્ઞાણા સાભોગાતિ? આમન્તા. નનુ પઞ્ચવિઞ્ઞાણા ઉપ્પન્નવત્થુકા ઉપ્પન્નારમ્મણાતિ? આમન્તા. હઞ્ચિ પઞ્ચવિઞ્ઞાણા ઉપ્પન્નવત્થુકા ઉપ્પન્નારમ્મણા, નો ચ વત રે વત્તબ્બે – ‘‘પઞ્ચવિઞ્ઞાણા સાભોગા’’તિ. નનુ પઞ્ચવિઞ્ઞાણા પુરેજાતવત્થુકા પુરેજાતારમ્મણા અજ્ઝત્તિકવત્થુકા બાહિરારમ્મણા અસમ્ભિન્નવત્થુકા અસમ્ભિન્નારમ્મણા નાનાવત્થુકા નાનારમ્મણા ન અઞ્ઞમઞ્ઞસ્સ ગોચરવિસયં પચ્ચનુભોન્તિ, ન અસમન્નાહારા ઉપ્પજ્જન્તિ, ન અમનસિકારા ઉપ્પજ્જન્તિ, ન અબ્બોકિણ્ણા ઉપ્પજ્જન્તિ, ન અપુબ્બં અચરિમં ઉપ્પજ્જન્તિ, નનુ પઞ્ચવિઞ્ઞાણા ન અઞ્ઞમઞ્ઞસ્સ સમનન્તરા ઉપ્પજ્જન્તીતિ? આમન્તા. હઞ્ચિ પઞ્ચવિઞ્ઞાણા ન અઞ્ઞમઞ્ઞસ્સ સમનન્તરા ઉપ્પજ્જન્તિ, નો ચ વત રે વત્તબ્બે – ‘‘પઞ્ચવિઞ્ઞાણા સાભોગા’’તિ.
૫૮૫. ચક્ખુવિઞ્ઞાણં સાભોગન્તિ? આમન્તા. ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? ન હેવં વત્તબ્બે…પે… ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? આમન્તા. ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે… ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ…પે… ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ સુઞ્ઞતઞ્ચ ઉપ્પજ્જતિ ચક્ખુવિઞ્ઞાણ’’ન્તિ.
ચક્ખુવિઞ્ઞાણં સાભોગન્તિ? આમન્તા. ચક્ખુવિઞ્ઞાણં અતીતાનાગતં આરબ્ભ ઉપ્પજ્જતીતિ? ન હેવં વત્તબ્બે…પે… ચક્ખુવિઞ્ઞાણં સાભોગન્તિ? આમન્તા. ચક્ખુવિઞ્ઞાણં ફસ્સં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? ન હેવં વત્તબ્બે…પે… મનોવિઞ્ઞાણં સાભોગં, મનોવિઞ્ઞાણં સુઞ્ઞતં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણં સાભોગં, ચક્ખુવિઞ્ઞાણં સુઞ્ઞતં આરબ્ભ ઉપ્પજ્જતીતિ? ન હેવં વત્તબ્બે…પે… મનોવિઞ્ઞાણં સાભોગં, મનોવિઞ્ઞાણં અતીતાનાગતં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણં સાભોગં, ચક્ખુવિઞ્ઞાણં અતીતાનાગતં આરબ્ભ ઉપ્પજ્જતીતિ? ન હેવં વત્તબ્બે…પે… મનોવિઞ્ઞાણં સાભોગં, મનોવિઞ્ઞાણં ફસ્સં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? આમન્તા. ચક્ખુવિઞ્ઞાણં સાભોગં, ચક્ખુવિઞ્ઞાણં ફસ્સં આરબ્ભ…પે… ફોટ્ઠબ્બં આરબ્ભ ઉપ્પજ્જતીતિ? ન હેવં વત્તબ્બે…પે….
૫૮૬. ન વત્તબ્બં – ‘‘પઞ્ચવિઞ્ઞાણા સાભોગા’’તિ? આમન્તા. નનુ વુત્તં ભગવતા – ‘‘ઇધ, ભિક્ખવે, ભિક્ખુ ચક્ખુના રૂપં દિસ્વા નિમિત્તગ્ગાહી હોતિ…પે… ન નિમિત્તગ્ગાહી હોતિ…પે… કાયેન ફોટ્ઠબ્બં ફુસિત્વા નિમિત્તગ્ગાહી હોતિ…પે… ન નિમિત્તગ્ગાહી હોતી’’તિ! અત્થેવ સુત્તન્તોતિ? આમન્તા. તેન હિ પઞ્ચવિઞ્ઞાણા સાભોગાતિ…પે….
સાભોગાતિકથા નિટ્ઠિતા.
૧૦. દસમવગ્ગો
(૧૦૦) ૬. દ્વીહિસીલેહિકથા
૫૮૭. મગ્ગસમઙ્ગી દ્વીહિ સીલેહિ સમન્નાગતોતિ? આમન્તા. મગ્ગસમઙ્ગી દ્વીહિ ફસ્સેહિ દ્વીહિ વેદનાહિ દ્વીહિ સઞ્ઞાહિ દ્વીહિ ચેતનાહિ દ્વીહિ ચિત્તેહિ દ્વીહિ સદ્ધાહિ દ્વીહિ વીરિયેહિ દ્વીહિ સતીહિ દ્વીહિ સમાધીહિ દ્વીહિ પઞ્ઞાહિ સમન્નાગતોતિ? ન હેવં વત્તબ્બે…પે….
મગ્ગસમઙ્ગી લોકિયેન સીલેન સમન્નાગતોતિ? આમન્તા. મગ્ગસમઙ્ગી લોકિયેન ફસ્સેન લોકિયાય વેદનાય લોકિયાય પઞ્ઞાય લોકિયાય ચેતનાય લોકિયેન ચિત્તેન લોકિયાય સદ્ધાય લોકિયેન વીરિયેન લોકિયાય સતિયા લોકિયેન સમાધિના લોકિયાય પઞ્ઞાય સમન્નાગતોતિ? ન હેવં વત્તબ્બે…પે….
મગ્ગસમઙ્ગી લોકિયેન ચ લોકુત્તરેન ચ સીલેન સમન્નાગતોતિ? આમન્તા. મગ્ગસમઙ્ગી લોકિયેન ચ લોકુત્તરેન ચ ફસ્સેન સમન્નાગતો…પે… લોકિયાય ચ લોકુત્તરાય ચ પઞ્ઞાય સમન્નાગતોતિ? ન હેવં વત્તબ્બે…પે… મગ્ગસમઙ્ગી લોકિયેન સીલેન સમન્નાગતોતિ? આમન્તા. મગ્ગસમઙ્ગી પુથુજ્જનોતિ? ન હેવં વત્તબ્બે…પે….
૫૮૮. મગ્ગસમઙ્ગી લોકિયાય સમ્માવાચાય સમન્નાગતોતિ? આમન્તા. મગ્ગસમઙ્ગી લોકિયાય સમ્માદિટ્ઠિયા સમન્નાગતોતિ? ન હેવં વત્તબ્બે…પે… મગ્ગસમઙ્ગી લોકિયાય સમ્માવાચાય સમન્નાગતોતિ? આમન્તા. મગ્ગસમઙ્ગી લોકિયેન સમ્માસઙ્કપ્પેન…પે… લોકિયેન સમ્માવાયામેન…પે… લોકિયાય સમ્માસતિયા…પે… લોકિયેન સમ્માસમાધિના સમન્નાગતોતિ? ન હેવં વત્તબ્બે…પે… મગ્ગસમઙ્ગી લોકિયેન સમ્માકમ્મન્તેન…પે… લોકિયેન સમ્માઆજીવેન સમન્નાગતોતિ? આમન્તા. મગ્ગસમઙ્ગી લોકિયાય સમ્માદિટ્ઠિયા…પે… લોકિયેન સમ્માસમાધિના સમન્નાગતોતિ? ન હેવં વત્તબ્બે…પે….
મગ્ગસમઙ્ગી લોકિયાય ચ લોકુત્તરાય ચ સમ્માવાચાય સમન્નાગતોતિ? આમન્તા. મગ્ગસમઙ્ગી લોકિયાય ચ લોકુત્તરાય ચ સમ્માદિટ્ઠિયા સમન્નાગતોતિ? ન હેવં વત્તબ્બે…પે… મગ્ગસમઙ્ગી લોકિયાય ચ લોકુત્તરાય ચ સમ્માવાચાય સમન્નાગતોતિ? આમન્તા. મગ્ગસમઙ્ગી લોકિયેન ચ લોકુત્તરેન ચ સમ્માસઙ્કપ્પેન…પે… લોકિયેન ચ લોકુત્તરેન ચ સમ્માવાયામેન …પે… લોકિયાય ચ લોકુત્તરાય ચ સમ્માસતિયા…પે… લોકિયેન ચ લોકુત્તરેન ચ સમ્માસમાધિના સમન્નાગતોતિ? ન હેવં વત્તબ્બે…પે….
મગ્ગસમઙ્ગી લોકિયેન ચ લોકુત્તરેન ચ સમ્માકમ્મન્તેન…પે… સમ્માઆજીવેન સમન્નાગતોતિ? આમન્તા. મગ્ગસમઙ્ગી લોકિયાય ચ લોકુત્તરાય ચ સમ્માદિટ્ઠિયા સમન્નાગતોતિ? ન હેવં વત્તબ્બે…પે… મગ્ગસમઙ્ગી લોકિયેન ચ લોકુત્તરેન ચ સમ્માઆજીવેન સમન્નાગતોતિ? આમન્તા. મગ્ગસમઙ્ગી લોકિયેન ચ લોકુત્તરેન ચ સમ્માસઙ્કપ્પેન…પે… લોકિયેન ચ લોકુત્તરેન ચ સમ્માસમાધિના સમન્નાગતોતિ? ન હેવં વત્તબ્બે…પે….
૫૮૯. ન વત્તબ્બં – ‘‘મગ્ગસમઙ્ગી દ્વીહિ સીલેહિ સમન્નાગતો’’તિ? આમન્તા. લોકિયે સીલે નિરુદ્ધે મગ્ગો ઉપ્પજ્જતીતિ? આમન્તા. દુસ્સીલો ખણ્ડસીલો છિન્નસીલો મગ્ગં ભાવેતીતિ? ન હેવં વત્તબ્બે …પે… તેન હિ મગ્ગસમઙ્ગી દ્વીહિ સીલેહિ સમન્નાગતોતિ.
દ્વીહિસીલેહિકથા નિટ્ઠિતા.
૧૦. દસમવગ્ગો
(૧૦૧) ૭. સીલં અચેતસિકન્તિકથા
૫૯૦. સીલં અચેતસિકન્તિ? આમન્તા. રૂપં…પે… નિબ્બાનં…પે… ચક્ખાયતનં …પે… કાયાયતનં… રૂપાયતનં…પે… ફોટ્ઠબ્બાયતનન્તિ? ન હેવં વત્તબ્બે…પે… સીલં અચેતસિકન્તિ? આમન્તા. ફસ્સો અચેતસિકોતિ? ન હેવં વત્તબ્બે …પે… સીલં અચેતસિકન્તિ? આમન્તા. વેદના…પે… સઞ્ઞા…પે… ચેતના…પે… સદ્ધા…પે… વીરિયં…પે… સતિ…પે… સમાધિ…પે… પઞ્ઞા અચેતસિકાતિ? ન હેવં વત્તબ્બે…પે….
ફસ્સો ચેતસિકોતિ? આમન્તા. સીલં ચેતસિકન્તિ? ન હેવં વત્તબ્બે…પે… વેદના…પે… સઞ્ઞા…પે… ચેતના…પે… સદ્ધા…પે… વીરિયં…પે… સતિ…પે… સમાધિ…પે… પઞ્ઞા ચેતસિકાતિ? આમન્તા. સીલં ચેતસિકન્તિ? ન હેવં વત્તબ્બે…પે….
૫૯૧. સીલં અચેતસિકન્તિ? આમન્તા. અનિટ્ઠફલન્તિ? ન હેવં વત્તબ્બે…પે… નનુ ઇટ્ઠફલન્તિ? આમન્તા. હઞ્ચિ ઇટ્ઠફલં, નો ચ વત રે વત્તબ્બે – ‘‘સીલં અચેતસિક’’ન્તિ.
સદ્ધા ઇટ્ઠફલા, સદ્ધા ચેતસિકાતિ? આમન્તા. સીલં ઇટ્ઠફલં, સીલં ચેતસિકન્તિ? ન હેવં વત્તબ્બે…પે… વીરિયં…પે… સતિ…પે… સમાધિ…પે… પઞ્ઞા ઇટ્ઠફલા, પઞ્ઞા ચેતસિકાતિ? આમન્તા. સીલં ઇટ્ઠફલં, સીલં ચેતસિકન્તિ? ન હેવં વત્તબ્બે…પે….
સીલં ઇટ્ઠફલં, સીલં અચેતસિકન્તિ? આમન્તા. સદ્ધા ઇટ્ઠફલા, સદ્ધા અચેતસિકાતિ? ન હેવં વત્તબ્બે…પે… સીલં ઇટ્ઠફલં, સીલં અચેતસિકન્તિ? આમન્તા. વીરિયં…પે… સતિ…પે… સમાધિ…પે… પઞ્ઞા ઇટ્ઠફલા, પઞ્ઞા અચેતસિકાતિ? ન હેવં વત્તબ્બે…પે….
૫૯૨. સીલં અચેતસિકન્તિ? આમન્તા. અફલં અવિપાકન્તિ? ન હેવં વત્તબ્બે…પે… નનુ સફલં સવિપાકન્તિ? આમન્તા. હઞ્ચિ સફલં સવિપાકં, નો ચ વત રે વત્તબ્બે – ‘‘સીલં અચેતસિક’’ન્તિ…પે….
ચક્ખાયતનં અચેતસિકં અવિપાકન્તિ? આમન્તા. સીલં અચેતસિકં અવિપાકન્તિ? ન હેવં વત્તબ્બે…પે… સોતાયતનં…પે… કાયાયતનં …પે… રૂપાયતનં…પે… ફોટ્ઠબ્બાયતનં અચેતસિકં અવિપાકન્તિ? આમન્તા. સીલં અચેતસિકં અવિપાકન્તિ? ન હેવં વત્તબ્બે…પે….
સીલં અચેતસિકં સવિપાકન્તિ? આમન્તા. ચક્ખાયતનં અચેતસિકં સવિપાકન્તિ? ન હેવં વત્તબ્બે…પે… સીલં અચેતસિકં સવિપાકન્તિ? આમન્તા. સોતાયતનં…પે… કાયાયતનં… રૂપાયતનં…પે… ફોટ્ઠબ્બાયતનં અચેતસિકં સવિપાકન્તિ? ન હેવં વત્તબ્બે…પે….
૫૯૩. સમ્માવાચા અચેતસિકાતિ? આમન્તા. સમ્માદિટ્ઠિ અચેતસિકાતિ? ન હેવં વત્તબ્બે…પે… સમ્માવાચા અચેતસિકાતિ? આમન્તા. સમ્માસઙ્કપ્પો…પે… સમ્માવાયામો…પે… સમ્માસતિ…પે… સમ્માસમાધિ અચેતસિકોતિ? ન હેવં વત્તબ્બે…પે… સમ્માકમ્મન્તો…પે… સમ્માઆજીવો અચેતસિકોતિ? આમન્તા. સમ્માદિટ્ઠિ અચેતસિકાતિ? ન હેવં વત્તબ્બે…પે… સમ્માઆજીવો અચેતસિકોતિ? આમન્તા. સમ્માસઙ્કપ્પો… સમ્માવાયામો… સમ્માસતિ… સમ્માસમાધિ અચેતસિકોતિ? ન હેવં વત્તબ્બે…પે….
સમ્માદિટ્ઠિ ચેતસિકાતિ? આમન્તા. સમ્માવાચા ચેતસિકાતિ? ન હેવં વત્તબ્બે…પે… સમ્માદિટ્ઠિ ચેતસિકાતિ? આમન્તા. સમ્માકમ્મન્તો…પે… સમ્માઆજીવો ચેતસિકોતિ? ન હેવં વત્તબ્બે…પે… સમ્માસઙ્કપ્પો…પે… સમ્માવાયામો…પે… સમ્માસતિ…પે… સમ્માસમાધિ ચેતસિકોતિ? આમન્તા. સમ્માવાચા ચેતસિકાતિ? ન હેવં વત્તબ્બે…પે… સમ્માસમાધિ ચેતસિકોતિ? આમન્તા. સમ્માકમ્મન્તો…પે… સમ્માઆજીવો ચેતસિકોતિ? ન હેવં વત્તબ્બે…પે….
૫૯૪. ન વત્તબ્બં – ‘‘સીલં અચેતસિક’’ન્તિ? આમન્તા. સીલે ઉપ્પજ્જિત્વા નિરુદ્ધે દુસ્સીલો હોતીતિ? ન હેવં વત્તબ્બે. તેન હિ સીલં અચેતસિકન્તિ.
સીલં અચેતસિકન્તિકથા નિટ્ઠિતા.
૧૦. દસમવગ્ગો
(૧૦૨) ૮. સીલં ન ચિત્તાનુપરિવત્તીતિકથા
૫૯૫. સીલં ન ચિત્તાનુપરિવત્તીતિ? આમન્તા. રૂપં… નિબ્બાનં… ચક્ખાયતનં…પે… ફોટ્ઠબ્બાયતનન્તિ? ન હેવં વત્તબ્બે…પે… સીલં ન ચિત્તાનુપરિવત્તીતિ? આમન્તા. ફસ્સો ન ચિત્તાનુપરિવત્તીતિ? ન હેવં વત્તબ્બે…પે… સીલં ન ચિત્તાનુપરિવત્તીતિ? આમન્તા. વેદના…પે… સઞ્ઞા… ચેતના… સદ્ધા… વીરિયં… સતિ… સમાધિ…પે… પઞ્ઞા ન ચિત્તાનુપરિવત્તીતિ? ન હેવં વત્તબ્બે…પે….
ફસ્સો ચિત્તાનુપરિવત્તીતિ? આમન્તા. સીલં ચિત્તાનુપરિવત્તીતિ? ન હેવં વત્તબ્બે…પે… વેદના…પે… સઞ્ઞા… ચેતના … સદ્ધા… વીરિયં… સતિ… સમાધિ…પે… પઞ્ઞા ચિત્તાનુપરિવત્તીતિ? આમન્તા. સીલં ચિત્તાનુપરિવત્તીતિ? ન હેવં વત્તબ્બે…પે….
૫૯૬. સમ્માવાચા ન ચિત્તાનુપરિવત્તીતિ? આમન્તા. સમ્માદિટ્ઠિ ન ચિત્તાનુપરિવત્તીતિ? ન હેવં વત્તબ્બે…પે… સમ્માવાચા ન ચિત્તાનુપરિવત્તીતિ? આમન્તા. સમ્માસઙ્કપ્પો… સમ્માવાયામો… સમ્માસતિ…પે… સમ્માસમાધિ ન ચિત્તાનુપરિવત્તીતિ? ન હેવં વત્તબ્બે…પે….
સમ્માકમ્મન્તો…પે… સમ્માઆજીવો ન ચિત્તાનુપરિવત્તીતિ? આમન્તા. સમ્માદિટ્ઠિ ન ચિત્તાનુપરિવત્તીતિ? ન હેવં વત્તબ્બે…પે… સમ્માઆજીવો ન ચિત્તાનુપરિવત્તીતિ? આમન્તા. સમ્માસઙ્કપ્પો… સમ્માવાયામો… સમ્માસતિ…પે… સમ્માસમાધિ ન ચિત્તાનુપરિવત્તીતિ? ન હેવં વત્તબ્બે…પે….
સમ્માદિટ્ઠિ ચિત્તાનુપરિવત્તીતિ? આમન્તા. સમ્માવાચા ચિત્તાનુપરિવત્તીતિ? ન હેવં વત્તબ્બે…પે… સમ્માદિટ્ઠિ ચિત્તાનુપરિવત્તીતિ? આમન્તા. સમ્માકમ્મન્તો…પે… સમ્માઆજીવો ચિત્તાનુપરિવત્તીતિ? ન હેવં વત્તબ્બે…પે….
સમ્માસઙ્કપ્પો … સમ્માવાયામો… સમ્માસતિ…પે… સમ્માસમાધિ ચિત્તાનુપરિવત્તીતિ? આમન્તા. સમ્માવાચા ચિત્તાનુપરિવત્તીતિ? ન હેવં વત્તબ્બે…પે… સમ્માસમાધિ ચિત્તાનુપરિવત્તીતિ? આમન્તા. સમ્માકમ્મન્તો…પે… સમ્માઆજીવો ચિત્તાનુપરિવત્તીતિ? ન હેવં વત્તબ્બે…પે….
૫૯૭. ન વત્તબ્બં – ‘‘સીલં ન ચિત્તાનુપરિવત્તી’’તિ? આમન્તા. સીલે ઉપ્પજ્જિત્વા નિરુદ્ધે દુસ્સીલો હોતીતિ? ન હેવં વત્તબ્બે. તેન હિ સીલં ન ચિત્તાનુપરિવત્તીતિ.
સીલં ન ચિત્તાનુપરિવત્તીતિકથા નિટ્ઠિતા.
૧૦. દસમવગ્ગો
(૧૦૩) ૯. સમાદાનહેતુકથા
૫૯૮. સમાદાનહેતુકં સીલં વડ્ઢતીતિ? આમન્તા. સમાદાનહેતુકો ફસ્સો વડ્ઢતિ, વેદના વડ્ઢતિ, સઞ્ઞા વડ્ઢતિ, ચેતના વડ્ઢતિ, ચિત્તં વડ્ઢતિ, સદ્ધા વડ્ઢતિ, વીરિયં વડ્ઢતિ, સતિ વડ્ઢતિ, સમાધિ વડ્ઢતિ, પઞ્ઞા વડ્ઢતીતિ? ન હેવં વત્તબ્બે…પે….
સમાદાનહેતુકં સીલં વડ્ઢતીતિ? આમન્તા. લતા વિય વડ્ઢતિ, માલુવા વિય વડ્ઢતિ, રુક્ખો વિય વડ્ઢતિ, તિણં વિય વડ્ઢતિ, મુઞ્જપુઞ્જો વિય વડ્ઢતીતિ? ન હેવં વત્તબ્બે…પે….
૫૯૯. સમાદાનહેતુકં સીલં વડ્ઢતીતિ? આમન્તા. સીલં સમાદિયિત્વા કામવિતક્કં વિતક્કેન્તસ્સ બ્યાપાદવિતક્કં વિતક્કેન્તસ્સ વિહિંસાવિતક્કં વિતક્કેન્તસ્સ સીલં વડ્ઢતીતિ? આમન્તા. દ્વિન્નં ફસ્સાનં…પે… દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે… દ્વિન્નં ફસ્સાનં…પે… દ્વિન્નં ચિત્તાનં સમોધાનં હોતીતિ? આમન્તા. કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તીતિ? ન હેવં વત્તબ્બે…પે….
કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તીતિ? આમન્તા. નનુ વુત્તં ભગવતા – ‘‘ચત્તારિમાનિ, ભિક્ખવે, સુવિદૂરવિદૂરાનિ! કતમાનિ ચત્તારિ? નભઞ્ચ, ભિક્ખવે, પથવી ચ – ઇદં પઠમં સુવિદૂરવિદૂરં…પે… તસ્મા સતં ધમ્મો અસબ્ભિ આરકા’’તિ. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તી’’તિ.
૬૦૦. ન વત્તબ્બં – ‘‘સમાદાનહેતુકં સીલં વડ્ઢતી’’તિ? આમન્તા. નનુ વુત્તં ભગવતા – ‘‘આરામરોપા વનરોપા…પે… ધમ્મટ્ઠા સીલસમ્પન્ના તે જના સગ્ગગામિનો’’તિ. અત્થેવ સુત્તન્તોતિ? આમન્તા. તેન હિ સમાદાનહેતુકં સીલં વડ્ઢતીતિ.
સમાદાનહેતુકથા નિટ્ઠિતા.
૧૦. દસમવગ્ગો
(૧૦૪) ૧૦. વિઞ્ઞત્તિ સીલન્તિકથા
૬૦૧. વિઞ્ઞત્તિ સીલન્તિ? આમન્તા. પાણાતિપાતા વેરમણીતિ? ન હેવં વત્તબ્બે…પે… અદિન્નાદાના વેરમણીતિ? ન હેવં વત્તબ્બે…પે… કામેસુમિચ્છાચારા વેરમણીતિ? ન હેવં વત્તબ્બે …પે… મુસાવાદા વેરમણીતિ? ન હેવં વત્તબ્બે…પે… સુરામેરયમજ્જપમાદટ્ઠાના વેરમણીતિ? ન હેવં વત્તબ્બે…પે….
અભિવાદનં સીલં, પચ્ચુટ્ઠાનં સીલં, અઞ્જલિકમ્મં સીલં, સામીચિકમ્મં સીલં, આસનાભિહારો સીલં, સેય્યાભિહારો સીલં, પાદોદકાભિહારો સીલં, પાદકથલિકાભિહારો સીલં, ન્હાને પિટ્ઠિપરિકમ્મં સીલન્તિ? આમન્તા. પાણાતિપાતા વેરમણીતિ? ન હેવં વત્તબ્બે…પે… સુરામેરયમજ્જપમાદટ્ઠાના વેરમણીતિ? ન હેવં વત્તબ્બે…પે….
૬૦૨. ન વત્તબ્બં – ‘‘વિઞ્ઞત્તિ સીલ’’ન્તિ? આમન્તા. દુસ્સિલ્યન્તિ? ન હેવં વત્તબ્બે…પે… તેન હિ વિઞ્ઞત્તિ સીલન્તિ.
વિઞ્ઞત્તિ સીલન્તિકથા નિટ્ઠિતા.
૧૦. દસમવગ્ગો
(૧૦૫) ૧૧. અવિઞ્ઞત્તિ દુસ્સિલ્યન્તિકથા
૬૦૩. અવિઞ્ઞત્તિ દુસ્સિલ્યન્તિ? આમન્તા. પાણાતિપાતોતિ? ન હેવં વત્તબ્બે…પે… અદિન્નાદાનન્તિ? ન હેવં વત્તબ્બે…પે… કામેસુમિચ્છાચારોતિ? ન હેવં વત્તબ્બે…પે… મુસાવાદોતિ? ન હેવં વત્તબ્બે…પે… સુરામેરયમજ્જપમાદટ્ઠાનન્તિ? ન હેવં વત્તબ્બે…પે….
પાપકમ્મં સમાદિયિત્વા દાનં દદન્તસ્સ પુઞ્ઞઞ્ચ અપુઞ્ઞઞ્ચ ઉભો વડ્ઢન્તીતિ? ન હેવં વત્તબ્બે…પે… પુઞ્ઞઞ્ચ અપુઞ્ઞઞ્ચ ઉભો વડ્ઢન્તીતિ? આમન્તા. દ્વિન્નં ફસ્સાનં…પે… દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે… દ્વિન્નં ફસ્સાનં…પે… દ્વિન્નં ચિત્તાનં સમોધાનં હોતીતિ? આમન્તા. કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તીતિ? ન હેવં વત્તબ્બે…પે….
કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તીતિ? આમન્તા. નનુ વુત્તં ભગવતા – ‘‘ચત્તારિમાનિ, ભિક્ખવે, સુવિદૂરવિદૂરાનિ! કતમાનિ ચત્તારિ? નભઞ્ચ, ભિક્ખવે, પથવી ચ – ઇદં પઠમં સુવિદૂરવિદૂરં…પે… તસ્મા સતં ધમ્મો અસબ્ભિ આરકા’’તિ. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘કુસલાકુસલા સાવજ્જાનવજ્જા હીનપણીતા કણ્હસુક્કસપ્પટિભાગા ધમ્મા સમ્મુખીભાવં આગચ્છન્તી’’તિ.
૬૦૪. ન વત્તબ્બં – ‘‘અવિઞ્ઞત્તિ દુસ્સિલ્ય’’ન્તિ? આમન્તા. નનુ પાપકમ્મં સમાદિન્નો આસીતિ? આમન્તા. હઞ્ચિ પાપકમ્મં સમાદિન્નો આસિ, તેન વત રે વત્તબ્બે – ‘‘અવિઞ્ઞત્તિ દુસ્સિલ્ય’’ન્તિ.
અવિઞ્ઞત્તિ દુસ્સિલ્યન્તિકથા નિટ્ઠિતા.
દસમવગ્ગો.
તસ્સુદ્દાનં –
ઉપપત્તેસિયે પઞ્ચક્ખન્ધે અનિરુદ્ધે કિરિયા પઞ્ચક્ખન્ધા ઉપ્પજ્જન્તિ, મગ્ગસમઙ્ગિસ્સ રૂપં મગ્ગો, પઞ્ચવિઞ્ઞાણસમઙ્ગિસ્સ અત્થિ મગ્ગભાવના, પઞ્ચવિઞ્ઞાણા કુસલાપિ અકુસલાપિ, પઞ્ચવિઞ્ઞાણા સાભોગા, મગ્ગસમઙ્ગી દ્વીહિ સીલેહિ સમન્નાગતો, સીલં અચેતસિકં, સીલં ન ચિત્તાનુપરિવત્તિ, સમાદાનહેતુકં સીલં વડ્ઢતીતિ, વિઞ્ઞત્તિસીલં અવિઞ્ઞત્તિ દુસ્સિલ્યન્તિ.
દુતિયો પણ્ણાસકો.
તસ્સુદ્દાનં –
નિયામસઙ્ગહગતાનિસંસતા ચ નિરોધોતિ [નિયામ સઙ્ગહગતાનિસંસતા અત્થિ પઞ્ચવોકારભવો નિરોધો મગ્ગસમઙ્ગિસ્સ પઞ્ચવોકારભવોતિ (સી. સ્યા. ક.), નિયામ સઙ્ગહ ગતાનિસંસતા અત્થિ પઞ્ચવોકારભવો મગ્ગસમઙ્ગિસ્સ નો પઞ્ચવોકારભવો (પી.)].