(૬૩) ૧. સઙ્ગહિતકથા

૪૭૧. નત્થિ કેચિ ધમ્મા કેહિચિ ધમ્મેહિ સઙ્ગહિતાતિ [સઙ્ગહીતાતિ (પી.)]? આમન્તા. નનુ અત્થિ કેચિ ધમ્મા કેહિચિ ધમ્મેહિ ગણનં ગચ્છન્તિ ઉદ્દેસં ગચ્છન્તિ પરિયાપન્નાતિ? આમન્તા. હઞ્ચિ અત્થિ કેચિ ધમ્મા કેહિચિ ધમ્મેહિ ગણનં ગચ્છન્તિ ઉદ્દેસં ગચ્છન્તિ પરિયાપન્ના, નો ચ વત રે વત્તબ્બે – ‘‘નત્થિ કેચિ ધમ્મા કેહિચિ ધમ્મેહિ સઙ્ગહિતા’’તિ.

ચક્ખાયતનં કતમક્ખન્ધગણનં [કતમં ખન્ધગણનં (સી. પી. ક.)] ગચ્છતીતિ? રૂપક્ખન્ધગણનં ગચ્છતીતિ. હઞ્ચિ ચક્ખાયતનં રૂપક્ખન્ધગણનં ગચ્છતિ, તેન વત રે વત્તબ્બે – ‘‘ચક્ખાયતનં રૂપક્ખન્ધેન સઙ્ગહિત’’ન્તિ. સોતાયતનં…પે… ઘાનાયતનં…પે… જિવ્હાયતનં…પે… કાયાયતનં કતમક્ખન્ધગણનં ગચ્છતીતિ? રૂપક્ખન્ધગણનં ગચ્છતીતિ. હઞ્ચિ કાયાયતનં રૂપક્ખન્ધગણનં ગચ્છતિ, તેન વત રે વત્તબ્બે – ‘‘કાયાયતનં રૂપક્ખન્ધેન સઙ્ગહિત’’ન્તિ.

રૂપાયતનં…પે… સદ્દાયતનં…પે… ગન્ધાયતનં…પે… રસાયતનં…પે… ફોટ્ઠબ્બાયતનં કતમક્ખન્ધગણનં ગચ્છતીતિ? રૂપક્ખન્ધગણનં ગચ્છતીતિ. હઞ્ચિ ફોટ્ઠબ્બાયતનં રૂપક્ખન્ધગણનં ગચ્છતિ, તેન વત રે વત્તબ્બે – ‘‘ફોટ્ઠબ્બાયતનં રૂપક્ખન્ધેન સઙ્ગહિત’’ન્તિ.

સુખા વેદના કતમક્ખન્ધગણનં ગચ્છતીતિ? વેદનાક્ખન્ધગણનં ગચ્છતીતિ. હઞ્ચિ સુખા વેદના વેદનાક્ખન્ધગણનં ગચ્છતિ, તેન વત રે વત્તબ્બે – ‘‘સુખા વેદના વેદનાક્ખન્ધેન સઙ્ગહિતા’’તિ. દુક્ખા વેદના…પે… અદુક્ખમસુખા વેદના કતમક્ખન્ધગણનં ગચ્છતીતિ? વેદનાક્ખન્ધગણનં ગચ્છતીતિ. હઞ્ચિ અદુક્ખમસુખા વેદના વેદનાક્ખન્ધગણનં ગચ્છતિ, તેન વત રે વત્તબ્બે – ‘‘અદુક્ખમસુખા વેદના વેદનાક્ખન્ધેન સઙ્ગહિતા’’તિ.

ચક્ખુસમ્ફસ્સજા સઞ્ઞા કતમક્ખન્ધગણનં ગચ્છતીતિ? સઞ્ઞાક્ખન્ધગણનં ગચ્છતીતિ. હઞ્ચિ ચક્ખુસમ્ફસ્સજા સઞ્ઞા સઞ્ઞાક્ખન્ધગણનં ગચ્છતિ, તેન વત રે વત્તબ્બે – ‘‘ચક્ખુસમ્ફસ્સજા સઞ્ઞા સઞ્ઞાક્ખન્ધેન સઙ્ગહિતા’’તિ. સોતસમ્ફસ્સજા સઞ્ઞા…પે… મનોસમ્ફસ્સજા સઞ્ઞા કતમક્ખન્ધગણનં ગચ્છતીતિ? સઞ્ઞાક્ખન્ધગણનં ગચ્છતીતિ. હઞ્ચિ મનોસમ્ફસ્સજા સઞ્ઞા સઞ્ઞાક્ખન્ધગણનં ગચ્છતિ, તેન વત રે વત્તબ્બે – ‘‘મનોસમ્ફસ્સજા સઞ્ઞા સઞ્ઞાક્ખન્ધેન સઙ્ગહિતા’’તિ.

ચક્ખુસમ્ફસ્સજા ચેતના…પે… મનોસમ્ફસ્સજા ચેતના કતમક્ખન્ધગણનં ગચ્છતીતિ? સઙ્ખારક્ખન્ધગણનં ગચ્છતીતિ. હઞ્ચિ મનોસમ્ફસ્સજા ચેતના સઙ્ખારક્ખન્ધગણનં ગચ્છતિ, તેન વત રે વત્તબ્બે – ‘‘મનોસમ્ફસ્સજા ચેતના સઙ્ખારક્ખન્ધેન સઙ્ગહિતા’’તિ.

ચક્ખુવિઞ્ઞાણં …પે… મનોવિઞ્ઞાણં કતમક્ખન્ધગણનં ગચ્છતીતિ? વિઞ્ઞાણક્ખન્ધગણનં ગચ્છતીતિ. હઞ્ચિ મનોવિઞ્ઞાણં વિઞ્ઞાણક્ખન્ધગણનં ગચ્છતિ, તેન વત રે વત્તબ્બે – ‘‘મનોવિઞ્ઞાણં વિઞ્ઞાણક્ખન્ધેન સઙ્ગહિત’’ન્તિ.

૪૭૨. યથા દામેન વા યોત્તેન વા દ્વે બલિબદ્દા સઙ્ગહિતા, સિક્કાય પિણ્ડપાતો સઙ્ગહિતો, સા ગદ્દુલેન સઙ્ગહિતો; એવમેવ તે ધમ્મા તેહિ ધમ્મેહિ સઙ્ગહિતાતિ [સકવાદિવચનં (અટ્ઠકથા પસ્સિતબ્બા)]? હઞ્ચિ દામેન વા યોત્તેન વા દ્વે બલીબદ્દા સઙ્ગહિતા, સિક્કાય પિણ્ડપાતો સઙ્ગહિતો, સા ગદ્દુલેન સઙ્ગહિતો, તેન વત રે વત્તબ્બે – ‘‘અત્થિ કેચિ ધમ્મા કેહિચિ ધમ્મેહિ સઙ્ગહિતા’’તિ [સકવાદિવચનં (અટ્ઠકથા પસ્સિતબ્બા)].

સઙ્ગહિતકથા નિટ્ઠિતા.