(૫૦) ૮. અનાગતઞાણકથા

૪૩૯. અનાગતે ઞાણં અત્થીતિ? આમન્તા. અનાગતં મૂલતો જાનાતિ, હેતુતો જાનાતિ, નિદાનતો જાનાતિ, સમ્ભવતો જાનાતિ, પભવતો જાનાતિ, સમુટ્ઠાનતો જાનાતિ, આહારતો જાનાતિ, આરમ્મણતો જાનાતિ, પચ્ચયતો જાનાતિ, સમુદયતો જાનાતીતિ? ન હેવં વત્તબ્બે…પે….

અનાગતે ઞાણં અત્થીતિ? આમન્તા. અનાગતં હેતુપચ્ચયતં જાનાતિ, આરમ્મણપચ્ચયતં જાનાતિ, અધિપતિપચ્ચયતં જાનાતિ, અનન્તરપચ્ચયતં જાનાતિ, સમનન્તરપચ્ચયતં જાનાતીતિ? ન હેવં વત્તબ્બે…પે….

અનાગતે ઞાણં અત્થીતિ? આમન્તા. ગોત્રભુનો પુગ્ગલસ્સ સોતાપત્તિમગ્ગે ઞાણં અત્થીતિ? ન હેવં વત્તબ્બે…પે…. સોતાપત્તિફલસચ્છિકિરિયાય પટિપન્નસ્સ પુગ્ગલસ્સ સોતાપત્તિફલે ઞાણં અત્થીતિ? ન હેવં વત્તબ્બે…પે….

સકદાગામિ…પે… અનાગામિ …પે… અરહત્તસચ્છિકિરિયાય પટિપન્નસ્સ પુગ્ગલસ્સ અરહત્તે ઞાણં અત્થીતિ? ન હેવં વત્તબ્બે…પે….

૪૪૦. ન વત્તબ્બં – ‘‘અનાગતે ઞાણં અત્થી’’તિ? આમન્તા. નનુ વુત્તં ભગવતા – ‘‘પાટલિપુત્તસ્સ ખો, આનન્દ, તયો અન્તરાયા ભવિસ્સન્તિ – અગ્ગિતો વા ઉદકતો વા મિથુભેદા વા’’તિ [મહાવ. ૨૮૬; દી. નિ. ૨.૧૫૨; ઉદા. ૭૬]! અત્થેવ સુત્તન્તોતિ? આમન્તા. તેન હિ અનાગતે ઞાણં અત્થીતિ.

અનાગતઞાણકથા નિટ્ઠિતા.