૪. ચતુત્થવગ્ગો

(૪૧) ૯. અપરાપિ સમન્નાગતકથા

૪૦૬. અરહત્તસચ્છિકિરિયાય પટિપન્નો પુગ્ગલો તીહિ ફલેહિ સમન્નાગતોતિ? આમન્તા. અરહત્તસચ્છિકિરિયાય પટિપન્નો પુગ્ગલો ચતૂહિ ફસ્સેહિ ચતૂહિ વેદનાહિ ચતૂહિ સઞ્ઞાહિ ચતૂહિ ચેતનાહિ ચતૂહિ ચિત્તેહિ ચતૂહિ સદ્ધાહિ ચતૂહિ વીરિયેહિ ચતૂહિ સતીહિ ચતૂહિ સમાધીહિ ચતૂહિ પઞ્ઞાહિ સમન્નાગતોતિ? ન હેવં વત્તબ્બે…પે….

અનાગામિફલસચ્છિકિરિયાય પટિપન્નો પુગ્ગલો દ્વીહિ ફલેહિ સમન્નાગતોતિ? આમન્તા. અનાગામિફલસચ્છિકિરિયાય પટિપન્નો પુગ્ગલો તીહિ ફસ્સેહિ તીહિ વેદનાહિ…પે… તીહિ પઞ્ઞાહિ સમન્નાગતોતિ? ન હેવં વત્તબ્બે…પે….

સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. સકદાગામિફલસચ્છિકિરિયાય પટિપન્નો પુગ્ગલો દ્વીહિ ફસ્સેહિ દ્વીહિ વેદનાહિ…પે… દ્વીહિ પઞ્ઞાહિ સમન્નાગતોતિ? ન હેવં વત્તબ્બે…પે….

અરહત્તસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. અરહત્તસચ્છિકિરિયાય પટિપન્નો પુગ્ગલો સોતાપન્નો સત્તક્ખત્તુપરમો, કોલઙ્કોલો, એકબીજીતિ? ન હેવં વત્તબ્બે…પે….

અરહત્તસચ્છિકિરિયાય પટિપન્નો પુગ્ગલો સકદાગામિફલેન સમન્નાગતોતિ? આમન્તા. અરહત્તસચ્છિકિરિયાય પટિપન્નો પુગ્ગલો સકદાગામીતિ? ન હેવં વત્તબ્બે…પે….

અરહત્તસચ્છિકિરિયાય પટિપન્નો પુગ્ગલો અનાગામિફલેન સમન્નાગતોતિ? આમન્તા. અરહત્તસચ્છિકિરિયાય પટિપન્નો પુગ્ગલો અનાગામી અન્તરાપરિનિબ્બાયી, ઉપહચ્ચપરિનિબ્બાયી, અસઙ્ખારપરિનિબ્બાયી, સસઙ્ખારપરિનિબ્બાયી, ઉદ્ધંસોતો અકનિટ્ઠગામીતિ? ન હેવં વત્તબ્બે…પે….

અનાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. અનાગામિફલસચ્છિકિરિયાય પટિપન્નો પુગ્ગલો સોતાપન્નો સત્તક્ખત્તુપરમો, કોલઙ્કોલો, એકબીજીતિ? ન હેવં વત્તબ્બે…પે….

અનાગામિફલસચ્છિકિરિયાય પટિપન્નો પુગ્ગલો સકદાગામિફલેન સમન્નાગતોતિ? આમન્તા. અનાગામિફલસચ્છિકિરિયાય પટિપન્નો પુગ્ગલો સકદાગામીતિ? ન હેવં વત્તબ્બે…પે….

સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. સકદાગામિફલસચ્છિકિરિયાય પટિપન્નો પુગ્ગલો સોતાપન્નો સત્તક્ખત્તુપરમો, કોલઙ્કોલો, એકબીજીતિ? ન હેવં વત્તબ્બે…પે….

૪૦૭. સોતાપત્તિફલેન સમન્નાગતો સોતાપન્નોતિ વત્તબ્બોતિ? આમન્તા. અરહત્તસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. સ્વેવ અરહત્તસચ્છિકિરિયાય પટિપન્નો પુગ્ગલો, સો સોતાપન્નોતિ? ન હેવં વત્તબ્બે…પે….

સકદાગામિફલેન સમન્નાગતો સકદાગામીતિ વત્તબ્બોતિ? આમન્તા. અરહત્તસચ્છિકિરિયાય પટિપન્નો પુગ્ગલો સકદાગામિફલેન સમન્નાગતોતિ? આમન્તા. સ્વેવ અરહત્તસચ્છિકિરિયાય પટિપન્નો પુગ્ગલો, સો સકદાગામીતિ? ન હેવં વત્તબ્બે…પે….

અનાગામિફલેન સમન્નાગતો અનાગામીતિ વત્તબ્બોતિ? આમન્તા. અરહત્તસચ્છિકિરિયાય પટિપન્નો પુગ્ગલો અનાગામિફલેન સમન્નાગતોતિ? આમન્તા. સ્વેવ અરહત્તસચ્છિકિરિયાય પટિપન્નો પુગ્ગલો, સો અનાગામીતિ? ન હેવં વત્તબ્બે…પે….

સોતાપત્તિફલેન સમન્નાગતો સોતાપન્નોતિ વત્તબ્બોતિ? આમન્તા. અનાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. સ્વેવ અનાગામિફલસચ્છિકિરિયાય પટિપન્નો પુગ્ગલો, સો સોતાપન્નોતિ? ન હેવં વત્તબ્બે…પે….

સકદાગામિફલેન સમન્નાગતો સકદાગામીતિ વત્તબ્બોતિ? આમન્તા. અનાગામિફલસચ્છિકિરિયાય પટિપન્નો પુગ્ગલો સકદાગામિફલેન સમન્નાગતોતિ? આમન્તા. સ્વેવ અનાગામિફલસચ્છિકિરિયાય પટિપન્નો પુગ્ગલો, સો સકદાગામીતિ? ન હેવં વત્તબ્બે…પે….

સોતાપત્તિફલેન સમન્નાગતો સોતાપન્નોતિ વત્તબ્બોતિ? આમન્તા. સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. સ્વેવ સકદાગામિફલસચ્છિકિરિયાય પટિપન્નો પુગ્ગલો, સો સોતાપન્નોતિ? ન હેવં વત્તબ્બે…પે….

૪૦૮. અરહત્તસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. નનુ અરહત્તસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તોતિ? આમન્તા. હઞ્ચિ અરહત્તસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તો, નો ચ વત રે વત્તબ્બે – ‘‘અરહત્તસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતો’’તિ.

અરહત્તસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તો, તેન સમન્નાગતોતિ? આમન્તા. અરહત્તસચ્છિકિરિયાય પટિપન્નો પુગ્ગલો સોતાપત્તિમગ્ગં વીતિવત્તો, સક્કાયદિટ્ઠિં વિચિકિચ્છં સીલબ્બતપરામાસં અપાયગમનીયં રાગં અપાયગમનીયં દોસં અપાયગમનીયં મોહં વીતિવત્તો, તેન સમન્નાગતોતિ? ન હેવં વત્તબ્બે…પે….

અરહત્તસચ્છિકિરિયાય પટિપન્નો પુગ્ગલો સકદાગામિફલેન સમન્નાગતોતિ? આમન્તા. નનુ અરહત્તસચ્છિકિરિયાય પટિપન્નો પુગ્ગલો સકદાગામિફલં વીતિવત્તોતિ? આમન્તા. હઞ્ચિ અરહત્તસચ્છિકિરિયાય પટિપન્નો પુગ્ગલો સકદાગામિફલં વીતિવત્તો, નો ચ વત રે વત્તબ્બે – ‘‘અરહત્તસચ્છિકિરિયાય પટિપન્નો પુગ્ગલો સકદાગામિફલેન સમન્નાગતો’’તિ.

અરહત્તસચ્છિકિરિયાય પટિપન્નો પુગ્ગલો સકદાગામિફલં વીતિવત્તો, તેન સમન્નાગતોતિ? આમન્તા. અરહત્તસચ્છિકિરિયાય પટિપન્નો પુગ્ગલો સકદાગામિમગ્ગં વીતિવત્તો, ઓળારિકં કામરાગં ઓળારિકં બ્યાપાદં વીતિવત્તો, તેન સમન્નાગતોતિ? ન હેવં વત્તબ્બે…પે….

અરહત્તસચ્છિકિરિયાય પટિપન્નો પુગ્ગલો અનાગામિફલેન સમન્નાગતોતિ? આમન્તા. નનુ અરહત્તસચ્છિકિરિયાય પટિપન્નો પુગ્ગલો અનાગામિફલં વીતિવત્તોતિ? આમન્તા. હઞ્ચિ અરહત્તસચ્છિકિરિયાય પટિપન્નો પુગ્ગલો અનાગામિફલં વીતિવત્તો, નો ચ વત રે વત્તબ્બે – ‘‘અરહત્તસચ્છિકિરિયાય પટિપન્નો પુગ્ગલો અનાગામિફલેન સમન્નાગતો’’તિ.

અરહત્તસચ્છિકિરિયાય પટિપન્નો પુગ્ગલો અનાગામિફલં વીતિવત્તો, તેન સમન્નાગતોતિ? આમન્તા. અરહત્તસચ્છિકિરિયાય પટિપન્નો પુગ્ગલો અનાગામિમગ્ગં વીતિવત્તો, અણુસહગતં કામરાગં અણુસહગતં બ્યાપાદં વીતિવત્તો, તેન સમન્નાગતોતિ? ન હેવં વત્તબ્બે…પે….

૪૦૯. અનાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. નનુ અનાગામિફલસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તોતિ? આમન્તા. હઞ્ચિ અનાગામિફલસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તો, નો ચ વત રે વત્તબ્બે – ‘‘અનાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતો’’તિ.

અનાગામિફલસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તો, તેન સમન્નાગતોતિ? આમન્તા. અનાગામિફલસચ્છિકિરિયાય પટિપન્નો પુગ્ગલો સોતાપત્તિમગ્ગં વીતિવત્તો, સક્કાયદિટ્ઠિં…પે… અપાયગમનીયં મોહં વીતિવત્તો, તેન સમન્નાગતોતિ? ન હેવં વત્તબ્બે…પે….

અનાગામિફલસચ્છિકિરિયાય પટિપન્નો પુગ્ગલો સકદાગામિફલેન સમન્નાગતોતિ? આમન્તા. નનુ અનાગામિફલસચ્છિકિરિયાય પટિપન્નો પુગ્ગલો સકદાગામિફલં વીતિવત્તોતિ? આમન્તા. હઞ્ચિ અનાગામિફલસચ્છિકિરિયાય પટિપન્નો પુગ્ગલો સકદાગામિફલં વીતિવત્તો, નો ચ વત રે વત્તબ્બે – ‘‘અનાગામિફલસચ્છિકિરિયાય પટિપન્નો પુગ્ગલો સકદાગામિફલેન સમન્નાગતો’’તિ.

અનાગામિફલસચ્છિકિરિયાય પટિપન્નો પુગ્ગલો સકદાગામિફલં વીતિવત્તો, તેન સમન્નાગતોતિ? આમન્તા. અનાગામિફલસચ્છિકિરિયાય પટિપન્નો પુગ્ગલો સકદાગામિમગ્ગં વીતિવત્તો, ઓળારિકં કામરાગં ઓળારિકં બ્યાપાદં વીતિવત્તો, તેન સમન્નાગતોતિ? ન હેવં વત્તબ્બે…પે….

૪૧૦. સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. નનુ સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તોતિ? આમન્તા. હઞ્ચિ સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તો, નો ચ વત રે વત્તબ્બે – ‘‘સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતો’’તિ.

સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલં વીતિવત્તો, તેન સમન્નાગતોતિ? આમન્તા. સકદાગામિફલસચ્છિકિરિયાય પટિપન્નો પુગ્ગલો સોતાપત્તિમગ્ગં વીતિવત્તો, સક્કાયદિટ્ઠિં…પે… અપાયગમનીયં મોહં વીતિવત્તો, તેન સમન્નાગતોતિ? ન હેવં વત્તબ્બે…પે….

૪૧૧. ન વત્તબ્બં – ‘‘અરહત્તસચ્છિકિરિયાય પટિપન્નો પુગ્ગલો તીહિ ફલેહિ સમન્નાગતો’’તિ? આમન્તા. નનુ અરહત્તસચ્છિકિરિયાય પટિપન્નેન પુગ્ગલેન તીણિ ફલાનિ પટિલદ્ધાનિ, તેહિ ચ અપરિહીનોતિ? આમન્તા. હઞ્ચિ અરહત્તસચ્છિકિરિયાય પટિપન્નેન પુગ્ગલેન તીણિ ફલાનિ પટિલદ્ધાનિ તેહિ ચ અપરિહીનો, તેન વત રે વત્તબ્બે – ‘‘અરહત્તસચ્છિકિરિયાય પટિપન્નો પુગ્ગલો તીહિ ફલેહિ સમન્નાગતો’’તિ.

ન વત્તબ્બં – ‘‘અનાગામિફલસચ્છિકિરિયાય પટિપન્નો પુગ્ગલો દ્વીહિ ફલેહિ સમન્નાગતો’’તિ? આમન્તા. નનુ અનાગામિફલસચ્છિકિરિયાય પટિપન્નેન પુગ્ગલેન દ્વે ફલાનિ પટિલદ્ધાનિ, તેહિ ચ અપરિહીનોતિ? આમન્તા. હઞ્ચિ અનાગામિફલસચ્છિકિરિયાય પટિપન્નેન પુગ્ગલેન દ્વે ફલાનિ પટિલદ્ધાનિ તેહિ ચ અપરિહીનો, તેન વત રે વત્તબ્બે – ‘‘અનાગામિફલસચ્છિકિરિયાય પટિપન્નો પુગ્ગલો દ્વીહિ ફલેહિ સમન્નાગતો’’તિ.

ન વત્તબ્બં – ‘‘સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતો’’તિ? આમન્તા. નનુ સકદાગામિફલસચ્છિકિરિયાય પટિપન્નેન પુગ્ગલેન સોતાપત્તિફલં પટિલદ્ધં, તેન ચ અપરિહીનોતિ? આમન્તા. હઞ્ચિ સકદાગામિફલસચ્છિકિરિયાય પટિપન્નેન પુગ્ગલેન સોતાપત્તિફલં પટિલદ્ધં તેન ચ અપરિહીનો, તેન વત રે વત્તબ્બે – ‘‘સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતો’’તિ.

૪૧૨. અરહત્તસચ્છિકિરિયાય પટિપન્નેન પુગ્ગલેન તીણિ ફલાનિ પટિલદ્ધાનિ તેહિ ચ અપરિહીનોતિ, અરહત્તસચ્છિકિરિયાય પટિપન્નો પુગ્ગલો તીહિ ફલેહિ સમન્નાગતોતિ? આમન્તા. અરહત્તસચ્છિકિરિયાય પટિપન્નેન પુગ્ગલેન ચત્તારો મગ્ગા પટિલદ્ધા તેહિ ચ અપરિહીનોતિ, અરહત્તસચ્છિકિરિયાય પટિપન્નો પુગ્ગલો ચતૂહિ મગ્ગેહિ સમન્નાગતોતિ? ન હેવં વત્તબ્બે…પે….

અનાગામિફલસચ્છિકિરિયાય પટિપન્નેન પુગ્ગલેન દ્વે ફલાનિ પટિલદ્ધાનિ તેહિ ચ અપરિહીનોતિ, અનાગામિફલસચ્છિકિરિયાય પટિપન્નો પુગ્ગલો દ્વીહિ ફલેહિ સમન્નાગતોતિ? આમન્તા. અનાગામિફલસચ્છિકિરિયાય પટિપન્નેન પુગ્ગલેન તયો મગ્ગા પટિલદ્ધા તેહિ ચ અપરિહીનોતિ, અનાગામિફલસચ્છિકિરિયાય પટિપન્નો પુગ્ગલો તીહિ મગ્ગેહિ સમન્નાગતોતિ? ન હેવં વત્તબ્બે…પે….

સકદાગામિફલસચ્છિકિરિયાય પટિપન્નેન પુગ્ગલેન સોતાપત્તિફલં પટિલદ્ધં તેન ચ અપરિહીનોતિ, સકદાગામિફલસચ્છિકિરિયાય પટિપન્નો પુગ્ગલો સોતાપત્તિફલેન સમન્નાગતોતિ? આમન્તા. સકદાગામિફલસચ્છિકિરિયાય પટિપન્નેન પુગ્ગલેન દ્વે મગ્ગા પટિલદ્ધા તેહિ ચ અપરિહીનોતિ, સકદાગામિફલસચ્છિકિરિયાય પટિપન્નો પુગ્ગલો દ્વીહિ મગ્ગેહિ સમન્નાગતોતિ? ન હેવં વત્તબ્બે…પે….

અપરાપિ સમન્નાગતકથા નિટ્ઠિતા.