(૩૩) ૧. ગિહિસ્સ અરહાતિકથા

૩૮૭. ગિહિસ્સ અરહાતિ? આમન્તા. અત્થિ અરહતો ગિહિસંયોજનન્તિ? ન હેવં વત્તબ્બે…પે… નત્થિ અરહતો ગિહિસંયોજનન્તિ? આમન્તા. હઞ્ચિ નત્થિ અરહતો ગિહિસંયોજનં, નો ચ વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. નનુ અરહતો ગિહિસંયોજનં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મન્તિ? આમન્તા. હઞ્ચિ અરહતો ગિહિસંયોજનં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મં, નો ચ વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. અત્થિ કોચિ ગિહી ગિહિસંયોજનં અપ્પહાય દિટ્ઠેવ ધમ્મે દુક્ખસ્સન્તકરોતિ [મ. નિ. ૨.૧૮૬]? નત્થિ. હઞ્ચિ નત્થિ કોચિ ગિહી ગિહિસંયોજનં અપ્પહાય દિટ્ઠેવ ધમ્મે દુક્ખસ્સન્તકરો, નો ચ વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. નનુ વચ્છગોત્તો પરિબ્બાજકો ભગવન્તં એતદવોચ – ‘‘અત્થિ નુ ખો, ભો ગોતમ, કોચિ ગિહી ગિહિસંયોજનં અપ્પહાય કાયસ્સ ભેદા દુક્ખસ્સન્તકરો’’તિ? ‘‘નત્થિ ખો, વચ્છ, કોચિ ગિહી ગિહિસંયોજનં અપ્પહાય કાયસ્સ ભેદા દુક્ખસ્સન્તકરો’’તિ. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. અરહા મેથુનં ધમ્મં પટિસેવેય્ય, મેથુનં ઉપ્પાદેય્ય, પુત્તસમ્બાધસયનં અજ્ઝાવસેય્ય, કાસિકચન્દનં પચ્ચનુભવેય્ય, માલાગન્ધવિલેપનં ધારેય્ય, જાતરૂપરજતં સાદિયેય્ય, અજેળકં પટિગ્ગણ્હેય્ય, કુક્કુટસૂકરં પટિગ્ગણ્હેય્ય, હત્થિગવસ્સવળવં પટિગ્ગણ્હેય્ય, તિત્તિરવટ્ટકમોરકપિઞ્જરં [… કપિઞ્જલં (સ્યા. કં. પી.)] પટિગ્ગણ્હેય્ય, ચિત્તવણ્ડવાલમોળિં [પીતવણ્ટવાલમોળિકં (સ્યા. કં. પી.)] ધારેય્ય, ઓદાતાનિ વત્થાનિ દીઘદસાનિ ધારેય્ય, યાવજીવં અગારિયભૂતો અસ્સાતિ? ન હેવં વત્તબ્બે…પે….

ન વત્તબ્બં – ‘‘ગિહિસ્સ અરહા’’તિ? આમન્તા. નનુ યસો કુલપુત્તો, ઉત્તિયો ગહપતિ, સેતુ માણવો, ગિહિબ્યઞ્જનેન અરહત્તં પત્તોતિ? આમન્તા. હઞ્ચિ યસો કુલપુત્તો, ઉત્તિયો ગહપતિ, સેતુ માણવો, ગિહિબ્યઞ્જનેન અરહત્તં પત્તો, તેન વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિકથા નિટ્ઠિતા.