(૨૮) ૮. દિબ્બસોતકથા

૩૭૫. મંસસોતં ધમ્મુપત્થદ્ધં દિબ્બસોતં હોતીતિ? આમન્તા. મંસસોતં દિબ્બસોતં, દિબ્બસોતં મંસસોતન્તિ? ન હેવં વત્તબ્બે…પે….

મંસસોતં ધમ્મુપત્થદ્ધં દિબ્બસોતં હોતીતિ? આમન્તા. યાદિસં મંસસોતં તાદિસં દિબ્બસોતં, યાદિસં દિબ્બસોતં તાદિસં મંસસોતન્તિ? ન હેવં વત્તબ્બે…પે….

મંસસોતં ધમ્મુપત્થદ્ધં દિબ્બસોતં હોતીતિ? આમન્તા. તઞ્ઞેવ મંસસોતં તં દિબ્બસોતં, તં દિબ્બસોતં તં મંસસોતન્તિ? ન હેવં વત્તબ્બે…પે….

મંસસોતં ધમ્મુપત્થદ્ધં દિબ્બસોતં હોતીતિ? આમન્તા. યાદિસો મંસસોતસ્સ વિસયો આનુભાવો ગોચરો તાદિસો દિબ્બસ્સ સોતસ્સ વિસયો આનુભાવો ગોચરોતિ? ન હેવં વત્તબ્બે…પે….

મંસસોતં ધમ્મુપત્થદ્ધં દિબ્બસોતં હોતીતિ? આમન્તા. ઉપાદિણ્ણં હુત્વા અનુપાદિણ્ણં હોતીતિ? ન હેવં વત્તબ્બે…પે….

ઉપાદિણ્ણં હુત્વા અનુપાદિણ્ણં હોતીતિ? આમન્તા. કામાવચરં હુત્વા રૂપાવચરં હોતીતિ? ન હેવં વત્તબ્બે…પે….

કામાવચરં હુત્વા રૂપાવચરં હોતીતિ? આમન્તા. રૂપાવચરં હુત્વા અરૂપાવચરં હોતીતિ? ન હેવં વત્તબ્બે…પે….

રૂપાવચરં હુત્વા અરૂપાવચરં હોતીતિ? આમન્તા. પરિયાપન્નં હુત્વા અપરિયાપન્નં હોતીતિ? ન હેવં વત્તબ્બે…પે….

૩૭૬. મંસસોતં ધમ્મુપત્થદ્ધં દિબ્બસોતં હોતીતિ? આમન્તા. દિબ્બસોતં ધમ્મુપત્થદ્ધં મંસસોતં હોતીતિ? ન હેવં વત્તબ્બે…પે….

મંસસોતં ધમ્મુપત્થદ્ધં દિબ્બસોતં હોતીતિ? આમન્તા. એકંયેવ સોતન્તિ? ન હેવં વત્તબ્બે…પે….

એકંયેવ સોતન્તિ? આમન્તા. નનુ દ્વે સોતાનિ વુત્તાનિ ભગવતા – ‘‘મંસસોતં, દિબ્બસોત’’ન્તિ? આમન્તા. હઞ્ચિ દ્વે સોતાનિ વુત્તાનિ ભગવતા – મંસસોતં, દિબ્બસોતં, નો ચ વત રે વત્તબ્બે – ‘‘એકઞ્ઞેવ સોત’’ન્તિ.

દિબ્બસોતકથા નિટ્ઠિતા.